Samia Veerɛi 22 - Yálá laawoo hɛɓɛ (dc)Davidə ə Yálá hɛɠɛɛɓo 1 Ɓɛlɔwai Yai-Laa ə Davidə kulɔ la ɲowoɠaa yəi, ə mą kɛ Saulə yəi; nąąlɔwai ɓə ə nwələi ŋɛ̨i too la Yai-Laa ɓa. 2 Yɛ kɛ mą: Yai-Laa kaa a nwɔ́ kwɛni, da nwɔ́ hį́i, da nwún mąąɓomun. 3 Nwɔ́ Yálá kaa a kwɛnii ŋą́ mą́ą́kilɛ bulu. Gaa a nwɔ́ hə́mə́, yɛ ɓo a nwɔ́ yee tɛɛ mąą kwɛli hɛn. Gaa a nwɔ́ taa walawala yii ŋą́ mą́ą́kilɛ ɉu. Málomun ni, nwún mąąɓomun ni. Ya ɓə a gúlɔ toomɛ̨i kɛ nuą yee mu. 4 Mąąwiɛ ə kɛ Naa ɓa. Ŋą́ dəli, ya ɓə a yee tɛɛ mąą tɛɛ bɔ́ ɲówoɠaa mɛ̨i. 5 Haa ə pa a vaŋa, ə mą́ą́tinɛ̨n, yɛ mą́ą́ɲɔw yɛ yanwana; 6 Ŋamuątaa yɛliɠaa daa kɛ kpɛlaan a ɲą́ą́; Haa aa kɛ ɓaalə tɛ dɔ́wɔ. 7 Nwɔ́ kwəi pili maa hu, ŋą́ Yai-Laa təli, Ŋą́ nwɔ́ Yálá təli, ə lɛɛ ɉee pɛlɛ́ mun, ə nwóó mɛ̨n; nwɔ́lɔ woo ə too nwəlii. 8 Ɓɛlɔwai Yai-Laa ə Nii holi la, lɔi hu ə pu mą, maa ə kpɛlin, yələkɔlɔn vilɛn ɉɛn ə kpɛlin. 9 Nwɔ̨n nulu ə kɛi kulɔ ɉunwɛi nwɔ̨n gbaalən yɛ kulɔ na, da nwɔ̨n dəŋa. 10 Ə yələkɔlɔn volóon, ə yɛɛ, tulɔkpiliɠilin gɛnɛ̨ ə ɓo gɔwɔ mu. 11 Ə tɛ mąąkpɛ malaka ta mɛ̨i, ə koon, diɛ ɓo hvaŋą hu. 12 Ə maakpinįn gɛ a kɛɛ kpinɛ̨ɛ̨, Ya kɛnɛ̨, tulɔ kpįnįn ɉeɛ tulɔ kpįnįn mɛ̨i. 13 Nwɔ̨n nən ə ɓɛla ɲɛ̨i tɔwɔ, nwɔ̨n gbaalən yɛ taɠa. 14 Yai-Laa a tomą yələkɔlɔn ɉu, yɛ yələgbąnąąn, Hɛn Gəlee Nwun Mɛi Yálá woo kaa tɔɔi. 15 A mɛ̨ɛ̨kɔw pili pələ kəlee, yɛ yələgbąnąąn ɓɛla kɛɛnąą kəlee. 16 Yai-Laa tomą woo, da ɉunwɛi nɔ̨ɔ̨, a gboloyá həɠə naai, ɲa kɔ́w ɓa maa ə pɔ̨nɔ̨. Yɛ lɔi kɔ́wɔ hvilɛn ɉɛn maa pɔ̨nɔ̨. 17 Ə lɛɛ ɲələi, ə gbə́ŋə, ə gúlɔ ɲa leeɠaa yəi. 18 Ɲówoɠaai di yee walawalaa, gɔ́yɔwɔɠai di hvaŋą kɛnɛ̨, a gúlɔ di yee mu. 19 Hvólói kɔ́ ə kala la mą́ą́, di hee ɉú, Kɛlaa, Yai-Laa ə kpɔmąą tɛɛ bɔ́. 20 Ə gúlɔ di yəi, ə nɛ́ɛ́ gbɔ́ɔ́ ɓa. Nwɛ́li kaa mą, mɛ̨nįi gɛ yɛ nwún mąąɓo la, yaa li. 21 Yai-Laa a ɉón yɛ bələi nwɔ́ tələnmolaa kaa la, yɛ bələi ɲéé mąąhəɠɛɛi la, mɛ̨nį ɲɔ̨n və ɲéé pɔ. 22 Mąąhɔlɔɓo, kpaaləi Yai-Laa ə kɛ yɛ ŋą́ hiɛ la, ya ɓə ŋą́ hiɛ laɉu. Və́ kɛ kulɔ li nwɔ́ Yálá woo mu. 23 Nwɔ tɔ́nŋaa kəlee di kɛ ɲə́i, Və́ gíli kulɔ li bɔ liɛwoo tɔ̨nɔ̨ kpɛli hu. 24 Ŋą́ gwə́i kwələ Yai-Laa ɓa. Ŋą́ gbɔ́ɔ́ laa hɔn mo mɛ̨nį ɲɔ̨n gəlee tɔwɔ. 25 Yii kɛ ɉaŋąą Yai-Laa ɲɛ̨i ɓa, Ə lɛɛ tələnmo túwɔ́ yii ŋą́ mo, bələ ɓə ə və́la kulɔ la. 26 Nui a kulɔ nwoo ɓa, yá kulɔ ə́ woo ɓa mąą nu ɓa. Nui gwəi kwɛlɛɛ, yá ə́ kwəi kwələ ma. 27 Nui a mąąhəɠɛɛ, yá ə́ wɔ mąąhəɠə laa lɛ mą. A yɛlɛ kulɔ gbana mun ɉu. 28 Nuąi da di kpɔɔ mąą yɛɛ, ya yee tɛɛ mąą tɛɛ di pɔ, Ya huɲąŋą kɛnɛ̨ nuą kaa a tɛɠɛɓo ɉu 29 Yai-Laa, yɛ́ ɓə ə́ kaa a nwɔ́ kɛɛ pɔ̨nɔ̨. Yai-Laa a nwɔ́ kpįnįi hu pɔ̨nɔ̨. 30 Ŋą́ laŋin ɓoloonŋaa mɛ̨i ə́ haalai, nwɔ́ Yálá a kɛ bɔ́, kwa laŋin hįi mɛ̨i ku hvilɛn ɉu pələ. 31 Yálá kaa a nu tənən dɔɔ mun yii ɲɔ̨nwɔ̨mąn və mą. Yai-Laa hvaa woo kəlee hu pɔ̨nɔ̨ɔ̨i; Nuąi da lɔ Yai-Laa hvaŋan mu, gaa a di wɔɔ hə́mə́. 32 Gbɛɛ ɓə gaa a Yálá, akɛ Yai-Laa hvəi? Gbɛɛ ɓə gaa a kwɛni, akɛ kuɔ Yálái hvəi? 33 Ɲálái tii ɓə gaa a mą́ą́kpɛ hį́i walawala, Ya ɓə a dɔ́wɔ́ pɔ̨nɔ̨. 34 A gɔ́wɔ́ kɛ mú yɛ lomą. A ɉáŋa ə dɔ́ɔ́, ə náŋin yeeɠaa mɛ̨i. 35 A ɲéé ɲąątɔɔ a kɔ́ kɔ́wɔ, Ɲéé kɔ̨nwɔ̨n yɛ ɓala kilɛn ɲala ɉu. 36 Yá ə́ wɔɔ yee tɛɛ mąą hə́mə́i tɛɛ bɔ́, ŋą́ ə́ təli, yá hvaa nwóó mu, ə lɛɛ, yɛ́ ɉúwalawala. 37 Yá gɔ́wɔ́ muhəɠə a nɛlɛɛ, gɛ́ gilɛ həɠə, gɔ́wɔ́ hva kpona. 38 Ŋą́ hvilɛn yówoɠaa pulu, ŋą́ di nwun na pili. Vá pənə búlu, akɛ və́ di paa li, və́ di kpɛɛ. 39 Ŋą́ą́ gəlee paa kpɔ tɛ̨ɛ̨tɛ̨ɛ̨, di hvo kɛa pai di muhəɠəi, daa too gɔ́wɔ́ mu. 40 Yá ɉáán yili a hvaŋą, gɛ́ li kɔ́ mɛ̨i Nuąi da wolo mą́ą́, yá di pɛlɛ gɔ́wɔ́ mu. 41 Yá ɲówoɠaa kpowola lɛ mą́ą́, Nuąi da tɔɔ ná, gɛ́ pɛli di hukalai. 42 Da tomą a wɔlɔ, nu ta hva pa hvo di mąą kpɔmąąɓo. Da di woo tɛ Yai-Laa ɓa, hva kpɛli di pɔ pələ kaa. 43 Ŋą́ di mąą pənə a muluun gbala, ŋą́ di hu hunwɔ̨, ŋą́ di tan yɛ pələ mɛ̨i palaya. 44 Nwɔ́ nuąi da di kwɛli tee, yá nwún mąąkilɛ di yəi, Yá ɉéé lɔiɠaa nwun na. Ɉiin yiiɠaai di hvo gɔ́lɔn, da di mąą yɛɛ ɲéé mu. 45 Nweaa ɓə da tɔɔ búlu, ŋą́ hvaa lɔ, daa mąn nwóó hon. 46 Nweaa da too, diɛ di loo pələi, di mąą yɛ kpɛlin. 47 Mąąwiɛ ə kɛ Yai-Laa ɓa, Hɛɠɛɛ ɓo ə kɛ mą, yaai gaa a dɔ́ɔ́ pulu kwɛni, nwɔ́ɔ́ yee tɛɛ mąą kwɛni la ə tɛ. 48 Yálá, yɛ́ ɓə yá nwą́ną kulɔ, Yɛ́ nu huwuɠaa pɛlɛ gɔ́wɔ́ mu. 49 Yá gúlɔ yówoɠaa lɔwai, nuąi da too mɛ̨́i, yá ɲéé tɛɛ diɛ, Yɛ́ gúlɔ nwąnąlɔɔ nuą yee mu. 50 Yili mąą mɛ̨nį ɓa, gáá Yai-Laa hɛɠɛɛɓoi hįi kəlee ɲɛ̨i ɓa. Gɛ́ naa mąątɛ̨nɛ̨. 51 Yai-Laa a kɔ́ nɛ̨ɛ̨ nwɔ tɔɔmun ma nui a ɉəɠə ɉu ə mąątí, a lɛɛ mąą nu ɓa a woo tɔ̨nɔ̨, a lɛɛ Davidə da ɉuwuhu nuą kəle pɔ, a yələ kəlee. |