Samia Veerɛi 21 - Yálá laawoo hɛɓɛ (dc)

Gabaɔn nuą da Saulə pulu nuą

¹ Davidə nwɔ tɔɔlaa kwɛlan ɉu, pulu kɛnɛ̨ ta ə too, ə kwɛlan ɉaaɓa kɛ nɔi. Davidə ə Yai-Laa mąąnin gɛ, Yai-Laa yɛ mą: «Bului tii too mɛ̨nį ə kulɔ Saulə da ɲəi bɛlɛ́n nuą di hɔn ɉu. Mąąhɔlɔɓo, di Gabaɔn nuą paa a nwąnąlɔɔ pələ.»

² Tɔɔmun ə Gabaɔn nuą təli, ə gɛ, da diɛni di heei ə kɛ tɔ̨nɔ̨, di mɛ̨nį ta ɓo mɛ̨nįi tii hu. Gabaɔn nuą di hvo kɛ a Israɛlə nu huwu ta. Kɛlaa, di kɛ a Amɔrə nu huwu gbəliɠaai lɛɛ, diɛi wɔlɔ da Israɛlə nuą di mįnɛ̨ həɠə, diɛ kɛ di hva di paa. Pələi mąn ə kɛ la tii, Israɛlə nuą da Ɉuda nuą di mąą mɛ̨nį nwąną pələ kɛ Saulə yəi, ə kɛi Gabaɔn nuą paa.

³ Davidə ə mo Gabaɔn nuą diɛ, yɛ diɛ: «Lə ɓə ŋą́ pɛli gɛi kaa? Lə ɓə ŋą́ pɛli gɛi a bɔnaa kulɔ hɛn gwa kaa ni gu lɔwai, ə gɛ, ka lúwɔ́ too Yai-Laa kwɛlin ma?»

⁴ Gabaɔn nuą diɛ Davidə ɓa: «Mɛ̨nįi gaa ku lɔwai kwa Saulə da ɲəi bɛlɛ́n nuą, wali hva gbɛɛ, hɛni hva gbɛɛ, ə ma kpɛli kɛ yáá Israɛlə mun dɔ̨nɔ̨ paa, yili hva gbɛɛ.» Davidə yɛ diɛ: «Yii lɔpee ka mo, ya ɓə ŋą́ gɛ.»

⁵ Gabaɔn nuą diɛ tɔɔmun ma: «Nui wɔlɔ kɛ bɔ ə ku huwu kpɛɛ, yaai ə kɛ gwəi kwaa kpɛɛ Israɛlə lɔi hu,

⁶ nu mɛ̨ihveelɛ tɛɛ ku pɔ ɉuwu hu nuą lɔwai, ku di hɛlɛn Yai-Laa lííla, Saulə ŋɛ̨i Yai-Laa ə ɉee a tɔɔmun bɔ taai Givea.» Tɔɔmun yɛ mą: «Gáá di tɛɛi ka pɔ.»

⁷ Kɛlaa, tɔɔmun ə Ɉonatan lon ɉulɔnu Mefibosɛtə, yai kɛ a Saulə mąnįn, ə naa kulɔ ɉu; mįnɛ̨i wɔlɔ Davidə da Ɉonatan di ɉəɠə mąą mɛ̨nį ɓa.

⁸ Tɔɔmun ə Aya lon Nɛ̨ɛ̨nu Rispa lon ɉinąą hveelɛ tɛɛ; yiiɠaa wɔlɔ Saulə ə di kaa mą, di laa ɓaa: Armoni, da Mefibosɛtə. Ə bɛlɛ Saulə lon Nɛ̨ɛ̨nu Mikalə lon ɉinąą lɔɔli ɓa, Barzilai Mehola daai mun non Adriɛlə ə gaa mą, ə di həɠə,

⁹ ə di tɛɛ Gabaɔn nuą pɔ, di di hɛlɛn ɲee tona, Yai-Laa lííla. Nu mɛ̨ihveelɛi tii kəlee di haa laa. Di di paa, ɓɛlɔwai di kɛ hihɛnŋaa ma kulɔ la, kpai teɛ kɔ́wɔ tɔɔi lɔwai.

¹⁰ Aya lon Nɛ̨ɛ̨nu Rispa ə ɓíi həɠə ə bɛlɛ gwɛni mɛ̨i. Ə həɠə ɉihənŋaa ɓa kulɔi lɔwai tɔlɔɔ ɓa, ə həli, ɲələi tulɔ tɔlɔɔ ə pu la nu powaɠaa diɛ. Hvo nɛɛ laa yələi nwɛ̨nįɠaa di hvo di powa kpələ, ə mą kɛ lɔwɔ huwɔɠaa di hvo lɛɠɛ diɛ a kpįnį.

¹¹ Mɛ̨nįi tii Aya lon Nɛ̨ɛ̨nu Rispa, yai kɛ a Saulə wɛli nɛ̨ą ə gɛ, də li di ɉukulɔ Davidə ɓa.

¹² Davidə ə li ə Saulə da non Ɉonatan di kɔ́wɠaa həɠə Yavɛsə nuą yəi, Galaadə lɔi hu. Nuą tii ɓə wɔlɔ pa, di ɉəɠə loo hu, Bɛtə-Sean, ɓɛi wɔlɔ Filisti nuą di di hɛlɛn naa, di paai di mo Gilboa daai.

¹³ Di Saulə da non Ɉonatan di kɔ́wɠaa həɠə laa, da nu mɛ̨ihveelɛi ŋɛ̨i di di hɛlɛn, di kɔ́wɠaa.

¹⁴ Di Saulə da non Ɉonatan di kɔ́wɠaa tii loo Sela daai Bɛnɉamɛn lɔi hu, Saulə nąn Kisə kámą hu. Bələi kpɔ tii tɔɔmun ə mo la di gɛ kpɔlɔɔ tii. Yili pulu, Yálá ə ɲɛ̨i lɛlɛɛ hee nɔi ɓa.

Filisti kɔ́ ə muhəɠə nwɔ̨nɔ̨

¹⁵ Kɔ ta ə pənə nwɔ̨nɔ̨ ə muhəɠə Filisti nuą da Israɛlə nuą di lɔwai. Davidə da bɔ nu di həɠə diɛ li gɔ́ mɛ̨i. Davidə ə gaa, yɛ viikpɛɛi.

¹⁶ Yisbi-be-Nɔvə yai a Harafa huwu ta, kpala ta ə kɛ ɲəi, nwiɛ yee ə ɓo a kilə haaɓa da gbulɔ ə ɓo a ɓala kwɛli, kɔ́ kɔ́ hɛnŋaa nįnɛ̨ di ɓo ɲəi. Ɉulɔnui tii ə kɛi bilinmo a Davidə paa mɛ̨nį.

¹⁷ Kɛlaa, Seruya lon Avisai ə pa ə kpɔmąą tɛɛ Davidə pɔ, ə Filisti mun tii paa. Nąąlɔwai ɓə Davidə nwɔ nuą di ɉuhvɛli la mą, diɛ mą: «Gwa gaani gu hva kɛa li kɔ́ mɛ̨i, ə gɛ, hvó pa Israɛlə nwɔ nwɔ̨n luwun.»

¹⁸ Yili pulu, Filisti nuą di kɔ́ takpɛli muhəɠə nwɔ̨nɔ̨ Gɔvə daai. Mąą yələ ɓə, Husa mun Sibekai ə Harafa mun dɔ̨nɔ̨ paa la, diɛ kɛ naa ɓa a: Safə.

¹⁹ Yili pulu nwɔ̨nɔ̨, Filisti kɔ́ takpɛli ə muhəɠə Gɔvə daai. Bɛtleɛmə mun ŋɛ̨i a Yaare-Oregimə, non Ɛlhanan ə Goliatə paa laa, yii həɠə Gatə. Goliatə tii, kpala ə kɛ ɲəi, nwulu kɛnɛ̨ pələ ə ɓo yɛ Nįnįgban.

²⁰ Di kɔ́ takpɛli kɔ́ Gatə, kɔ́kuláá ta ə kɛ laa, ɲeekpiɛ ə ɓo mɛ̨ida mɛ̨ida, gɔwɔ kpiɛ ə ɓo lɔ mɛ̨ida mɛ̨ida, ɲeekpiɛ da gɔwɔ kpiɛ kəlee pɛlɛɛ gee ɓa, ə kɛ pow hveelɛ kɔ́w nąąn. Yaa kpɛli ə kɛ a Harafa huwu ta.

²¹ Ɉulɔnui tii yaa kpɛli ə kɛi Israɛlə nuą paapɔlɔn dɔɔ. Davidə gaayɔwɔ Simea lon Yehonatan ɓə ɉulɔnui tii paa.

²² Nuą nąąn tii kəlee di kɛ a Gatə mun a Harafa nu huwu. Davidə da ɲee pɔ nuą di di kəlee di paa.