Samia Veerɛi 20 - Yálá laawoo hɛɓɛ (dc)Seva ə gwɛli tee Davidə ɓa 1 Nu kpoloon da ə kɛ laa, diɛ kɛ naa ɓa a: Seva, Bɛnɉamɛn mun da li kɛ, nąn naa ɓa kɛ a: Bikri. Seva ə túlú hvɛɛ, yɛ diɛ: Lə mɛ̨nį ɓə gwa Davidə ni gu lɔwai? Gwa Ɉɛse lonni, gu hvo kpɔnni hɛn da ɓa. Israɛlə nuą, nu kəlee ə li ɲəi bɛlɛ́ laaləi. 2 Israɛlə nuą kəlee di həɠə Davidə pɔ, di hvilɛn Bikri lon Seva pulu. Kɛlaa, Ɉuda nuą kəlee di lɛɛ tɔɔmun Davidə kɔ́wɔ pɔ, ə həɠə Ɉurdɛn ya ɓa, yɛ li Ɉerusalɛmə daai. 3 Davidə ə pənə ə pa bɔ taai Ɉerusalɛmə, nwɔ wɛli nɛ̨ąą powi tii ə di lɛɛ bɛlɛ́ laaləi, diɛ di ɲɛ̨i kɛ bɛlɛ ɓa, ə di həɠə, ə di lɔ pɛlɛ ta mu, nuą diɛ di ɲɛ̨i kɛ diɛ a nɛlɛɛ, yɛ di kɔ̨nɔ̨n gɛ. Hvo kɛa da kɛ a nɛ̨ą, di lɛɛ tii yɛ kalaninŋaa, ə lɛɛ la ɉu di yii hvóló ə kpɛɛ. Ɉoabə ə Amasa paa 4 Tɔɔmun yɛ Amasa ɓa: «Voló haaɓai ŋɛ̨i yee mu, Ɉuda nuą təli, ka diɛni ka pa ɓɛ.» 5 Amasa ə li ə Ɉuda nuą təli, kɛlaa, guui Davidə ə dɔɔ ma, ə lɛɛ laa guu ə tɛɛ. 6 Davidə yɛ Avisai ɓa: «Yii hui ŋɛ̨i, Bikri lon Seva kaa pai mɔ̨nɔ̨ lɔi gu pɔ, ə tɛɛ la Absalɔn nwɛi ɓa. Yɛ́ kpįnįi, ə́ wɔ mɛ̨nį Nąmu nwɔ hvólóhiɠaai həɠə, ka diɛni ka hvilɛn Seva pulu, gɛɛ hvo pa kɛ həlii daaɠaai mąątinɛ̨n ŋąą a hįi diɛ, hvo pu gu yəi.» 7 Ɉoabə nwɔ nuąi da Kereti nuą, Peleti nuą, diɛi di kaa a gɔ́kuláá walawalaɠaa, diɛ ɓə hvilɛn Avisai pulu. Di həɠə Ɉerusalɛmə daai, diɛ li Bikri lon Seva kwɛlii. 8 Ɓɛlɔwai Amasa ə kɛi paa la, da Ɉoabə ni di kwiɛn Gabaɔn gwɛni kɛnɛ̨ kwɛlɛ. Ɉoabə nwɔ kɔ́ kɔ́ hɛnŋaa kəlee di kɛ hɛlɛn ni ma, nwɔ ɓɔwai lɔɔ daa hu, gbulɔn ŋąą ɉąą. Ɓɛlɔwai Ɉoabə ə kɛi maa kpuɔ la Amasa ɓa, mowa ə too. 9 Ɉoabə yɛ Amasa ɓa: «Nán non! Ə́ yii kpɛli!» Ɉoabə ə ma mįi yee hiɛ yili kpɛlɛ hu, yɛ a kɛi kɛ ə naa pɛlɛ yili laa ɓa. 10 Mowai tii too, Ɉoabə ə ɉəɠə a gɔɓɛ yee, Amasa kili hvo kɛ ɉu. Ɉoabə ə mowa pu Amasa kwəi, yili kpoyɛli kəlee ə kulɔ, ə pu nɔi ɓa. Amasa ə haa laa kpɔlɔɔ tii ŋaaɓa, Ɉoabə hvo mowa veelɛ na pili mą. Ɉoabə da nəɠə Avisai di tɛɛ di hvilɛn Bikri lon Seva pulu, diɛ gbɛ. Bələi Seva mąą mɛ̨nį ŋąą ə kpɛɛ la bələ ka 11 Ɉoabə yee pɔ nu tɔ̨nɔ̨ ə lɛɛ Amasa powa kwɛlɛ, ɉulɔnon tii ə kɛi kɛ diɛ: «Nuąi di kaa Ɉoabə pulu, nuąi di kaa Davidə pulu, di hvilɛn Ɉoabə pulu!» 12 Nąąlɔwai Amasa ə tooni ŋama ŋą bələ hąmąi. Ɉulɔnon ŋɛ̨i lɛɛ bowa kwɛlɛ, ə gaa yɛ, nui lɔpee a pa laa a tɔɔ kɛ, yili ɓə gɛ, ə Amasa powa yala, ə doo gbomo hu pələ, ə həɠə kɛnɛ̨ ta pɛlɛ mɛ̨i. 13 Nu powa həɠəi ə mo bələi, nu kəlee di kɛi tɛɛ diɛ laŋąn Ɉoabə ɓa, diɛ li Bikri lon Seva kwɛli mɛ̨nį ɓa. 14 Ɉoabə aa kɛ tɛɛ Israɛlə lɔi hu na kəlee, aa həli kɛa Avɛlə-Bɛtə-Maaka daai, Beri nuą di di ŋąąkpɔn, di hvilɛn bulu. 15 Ɉoabə da nwɔ nuąi di pa di Avɛlə-Bɛtə-Maaka daai tii mąątinɛ̨n, naa ɓə Seva ə kɛ laa. Di pɔlɔ tiɛ ɉįin bələ tɔ̨nɔ̨ ɓa, Ɉoabə nwɔ nuąi di tinɛ̨n gea ɉįin ɓa, diɛ ɉuwu-ɉuwu ɓo, ə gɛ ə too. 16 Kilimąą nɛ̨ɛ̨nu ta, ə tɛ ɉíín mɛ̨i, ə tomą, yɛ diɛ: «'Ka ká wəli tɔɔ! 'Ka ká wəli tɔɔ! Ka mo Ɉoabə ɓa, ə lɛɠɛ ɓɛ, gɛ́ ŋą́ mɛ̨nį ɓo mą!» 17 Ɉoabə ə lɛɠɛ laa, Nɛ̨ɛ̨nui tii yɛ mą: «Yɛ́ ɓə da kɛ yɛ́ Ɉoabə?» Yili yɛ mą: «Ee! Ɲą́ą́ ɓə!» Nɛ̨ɛ̨nui tii yɛ mą: «Nwɔ́ mɛ̨nį Nąmu, ə́ wəli tɔɔ ə́ wɔɔ luwɔ nɛ̨ą woo ɓa.» Ɉoabə yɛ mą: «Ŋą́ą́ wə́li tɔɔ!» 18 Nɛ̨ɛ̨nui tii yɛ mą: «Di wɔlɔ kɛi mo tii daai ŋɛ̨i laa mɛ̨i, diɛ kɛ diɛ: ‹Ka li ka kɛɛ mąąnin gɛ Avɛlə-Bɛtə-Maaka daai, a kɛ tii, mɛ̨nį aa kpɛɛ.› 19 Kuɔ taai kaa a liilaa taa, dɛɛ Israɛlə taaɠaa kəlee ɓa, ya ɓə ə́ kaa bɔ ə́ daai ŋɛ̨i hu nuą kəlee nwun na pili! Ə́ Israɛlə taa walawalai ŋɛ̨i wolo! Lə mɛ̨nį ɓa, ə́ kaa bɔ ə́ Yai-Laa kwɛlin ɉukala?» 20 Ɉoabə ə nwoo tii pulu pənə, yɛ mą: «Yili ə hvóló mą́ą́! Yili ə hvóló mą́ą́! Və́ kɛ li ŋą́ nwolo, və́ kɛ li ŋą́ kɛɛ kala. 21 Yili mɛ̨nį hvəi; kɛlaa, Ɛfraimə yee hu mun da, yii naa ɓa a Seva, Bikri lon ɉulɔnu, ya ɓə aa tɔɔ tɔɔmun Davidə la, ka gulɔ ka dɛɛ bɔ́, yaa tɔ̨nɔ̨ gbən, a kɛ tii, ŋą́ą́ ma gɔ́ muhəɠə ka wɔɔ taai ɓa.» Nɛ̨ɛ̨nui tii yɛ Ɉoabə ɓa: «Akɛ yili lɔ ɓə, di kaa nwun deei ŋą, di pili ə́ pɔ ɉíín pulu pələ.» 22 Gili mɛ̨nįi tii, Nɛ̨ɛ̨nui tii ə mo, ə li ə ɉukulɔ daa nuą diɛ. Di nɛɛ mą di Bikri lon Seva nwun dee ŋą, di nwun galən bili Ɉoabə pɔ ɉíín pulu pələ. Ɉoabə ə dulu hvɛɛ, ə gɔ́ muhəɠə daa ɓa, nu kəlee ə li ɲəi bɛlɛ́ laaləi. Ɉoabə ə bulu pənə ə pa Ɉerusalɛmə daai tɔɔmun bɔ. Davidə nwɔ nwun nąmįną laa ka 23 Ɉoabə ɓə kɛ a Israɛlə kɔ́kulááɠaa kəlee nwun nąmu. Yehoyada lon Benaya ɓə kɛ a Peleti nuą da Kereti nuą nwun na. 24 Adoramə ɓə kɛ góló mɛ̨nį nwun na. Ahiludə lon Yehosafatə ə ɓo a dɔɔmun nwɔ hɛɓɛ́ kɛmun. 25 Sewa ɓə kɛ a ɉɛɓɛ́ kɛmun, Sadɔkə da Abiatarə, diɛ ɓo a ɉaláá laa həli nuą. 26 Yairə mun Ira yaa kpɛli, ə kɛ laa, ə ɓo Davidə yəi a haláá la həli mun. |