Samia Veerɛi 2 - Yálá laawoo hɛɓɛ (dc)Di Davidə hee a tɔɔmun Hebrɔn daai 1 Mɛ̨nįɠaa tii kəlee tɛɛ pulu, Davidə ə Yai-Laa mąąnin gɛ, yɛ mą: «Akɛ tii, mąąnɛ̨ɛ̨ mɔ̨ɔ̨ ŋą́ li Ɉuda taa ta hu?» Yai-Laa yɛ mą: «Ee! Li.» Davidə yɛ mą: «Daa nɛlɛ ɓə ŋą́ li ɉu?» Yai-Laa yɛ mą: «Hebrɔn daai.» 2 Davidə da nɛ̨ąni hveelɛ də li: Ahinoamə, yai kɛ a Izreɛlə nɛ̨ɛ̨nu, da Karmɛlə mun Navalə nɛ̨ą Avigailə. 3 Davidə ə mo bɔ nuą diɛ, diɛ kpɛli di hvilɛn bulu diɛ li Hebrɔn, nu kəlee da ɲəi bɛlɛ́n nuą. 4 Ɉuda lɔi hu nuą di pa di nwulɔ lɔ Davidə ɓa, di gɛ a tɔɔmun Ɉuda nwɔ pɛlɛ́i nwun na. Nuą di pa diɛ Davidə ɓa: «Yavɛsə Galaadə lɔi hu nuą ɓə Saulə powa loo.» 5 Davidə ə nuą tɔɔ Yavɛsə nuą pɔɔli Galaadə lɔi hu, yɛ kɛ diɛ: «Yai-Laa ə lúwɔ́ too kaa, kaai tii wɛlikɛmąą túwɔ́ ɓo a ka nąmu Saulə, kaa bowa loo. 6 Yai-Laa ə ka hon a wɛlikɛmąąlaa, a tɛ̨ą, ɲą́ą́ gbɛli mąn gáá pai ɲɛ̨i lɛlɛɛ heei kaa, mąąhɔlɔɓo, kaa túwɔ́ lɛlɛɛ ɓo. 7 'Ka ká liikpələ yiihu, ka too a kpakolo laa. Tɛ̨ą li, ka nwun nąmu Saulə aa haa, kɛlaa, mąąnɛ̨ɛ̨ ka kili ə pu ɉu, kaa diɛ, Ɉuda nwɔ pɛlɛ́i aa nwulɔ hiɛ mą́ą́, ə gɛ, ŋą́ kɛ a tɔɔmun.» Di Isbosɛtə hee a Israɛlə tɔɔmun 8 Nɛrə lon Avnɛrə, yai kɛ a Saulə nwɔ kɔlaɠa nwun nąmu, aa kɛ Saulə lon Isbosɛtə tɛɛ Mahanaimə daai. 9 Ə ɉee a tɔɔmun Galaadə lɔi nwun na, da Asurə nuą, Izreɛlə nuą, ə mą kɛ Ɛfraimə, Bɛnɉamɛn da Israɛlə kəlee mɛ̨i. 10 Saulə lon Isbosɛtə kaa kwɛlan ə kɛ pow nąąn ɓɛlɔwai di ɉee la a tɔɔmun Israɛlə lɔi mɛ̨i. Ə dɔɔlaa kɛ kwɛlan veelɛ yee mu. Kɛlaa, Ɉuda nwɔ pɛlɛ́i mu nuą tɔɔi kɛ Davidə pulu. 11 Kwɛlan mɛ̨ihveelɛ ɲąnin mɛ̨ida ɓə Davidə ə gɛ dɔɔlaa hu Ɉuda nwɔ pɛlɛ́i nwun na Hebrɔn daai. Ɉuda da Israɛlə di kɔ́ kɔ́ Gabaɔn daai 12 Nɛrə lon Avnɛrə da Saulə lon Isbosɛtə nwɔ nuą, di kulɔ Mahanaimə a kɔ́, diɛ li la Gabaɔn daai. 13 Seruya lon Ɉoabə da Davidə nwɔ nuąi, diɛ kpɛli di kulɔ, di di kee kaa Gabaɔn powa ya ta kwɛlɛ. Daɠaa di tɔɔ bowa ya bələ tɔ̨nɔ̨, yiiɠaa tii di tɔɔ bələ tɔ̨nɔ̨. 14 Avnɛrə yɛ Ɉoabə ɓa: «Ɉilɛlea di kulɔ kani, di pə́lə́ kɛ gu ɲɛ̨i.» Ɉoabə yɛ mą: «Di gɛ tii kani.» 15 Di di muhəɠə, di di lono. Nu pow kɔ́w hveelɛ di ɓo a Bɛnɉamɛn nu huwu, da Saulə lon Isbosɛtə di wɛi, ɛlɛɛ, yili pulu, nu pow kɔ́w hveelɛ a Davidə nwɔ tínuą. 16 Nu kəlee ə yili ɲowo nwun galən ma, ə nwɔ ɓɔwai lɔ gwəi, di too a gee. Di gɛɛnąą tii laa hee a: Gwɛni kpuwulu kɛɛnąą. Nąą kaa Gabaɔn. 17 Gɔ ə kpɔlu a ɲələi tii, Avnɛrə da nwɔ nuąi di pu Davidə nwɔ nuąi tɔwɔ. 18 Seruya lonnii haaɓa di kɛ laa: Ɉoabə, Avisai, da Asahɛlə. Asahɛlə ə kɛi gilɛ həɠə looɛi yɛ lómą. 19 Asahɛlə ə hvilɛn Avnɛrə pulu yɛ gbɛ, hvo həɠə gbaalə ɓa kpɔ tiikpə. 20 Avnɛrə ə tinɛ̨n yɛ mą: «Asahɛlə! Yɛ́ li?» Yili yɛ mą: «Ee! Ɲą́ą́ li!» 21 Avnɛrə yɛ mą: «Ɉaŋa a ə́ ɓa mįi yee pələ, a wala kɛ tii, ə́ kɔ́ɓɛyee hu pələ, ɉilɛlɛa tii tɔ̨nɔ̨ hon, ə́ maa kpoloon, ɉɛnŋaa di lɛɛ ə́ yəi a ə́ wɔɔ.» Kɛlaa, Asahɛlə hvo gɛ hvo həɠə bulu, hvo kpɛla gbɛɛ ɓa. 22 Avnɛrə ə tinɛ̨n yɛ Asahɛlə ɓa: «Həɠə búlú, kpɛla gbɛ́ɛ́ ɓa! Ə́ kaka mɔ̨ɔ̨ bɔ ŋą́ ə́ paa? Akɛ ŋą́ gɛ tii, ŋą́ pɛli kɛa ə́ liɛ Ɉoabə ɲɛ̨ilaa kai ləi?» 23 Kɛlaa, Asahɛlə hvo gɛ hvo həɠə bulu. Avnɛrə, ə ɉɔɔ a nwɔ kpalai gbala ɓa pələ, ə bo ɉu ə kulɔ bulu pələ, ə too laa, ə nɛɛ mą ə haa. Nui lɔpee kɛi pa ɓɛi tii Asahɛlə ə too laa, a bowa kaa, a kpɛla ə tɔɔ. 24 Ɉoabə da Avisai di hvilɛn Avnɛrə pulu diɛ gbɛ. Hvóló ə kɛi kɛa laa kpɔlɔ ŋą, diɛ həli Giveatə-Ama, yai kɛ Gia voló həɠəi pələ, Gabaɔn nɔi pun ɉu pələ pɔ. 25 Bɛnɉamɛn nuąi di di ŋąąkpɔn diɛ tɔɔ Avnɛrə pulu, di kɛ lɔ a di kpulu ɲee nwuɔ̨. 26 Avnɛrə ə nwoo tɛ ɲələ, yɛ Ɉoabə ɓa: «Kɔ kɔ́ ɓɔwa hvo mɔ̨ɔ̨ pai kpɛlai nu paa ɓa? Ə́ kili hvo ɉu yɛ naa kaa pai kulɔi a ɲąąnwąnąą? Mįnɛ̨ lɔwai ɓə ə́ kaa pai ə́ wɔ nuąi kpɛlai la di nąn nonnii kpɛɛ ɓa?» 27 Ɉoabə yɛ mą: «A tɛ̨ą Yálá kaa a vulú! Akɛ ya wala kɛ hvaa, nuą ŋɛ̨i də li lɛɛ di kaayowoa kpɛi ə lɛɛ la ɉu tínąą yələ ə ɓɔ.» 28 Ɉoabə ə dulu hvɛɛ, nuą kəlee di kpɛla di tɔɔ, di kpɛla Israɛlə nuą kpɛɛ ɓa, gɔ́ ə kpɛla laa. 29 Avnɛrə da nwɔ nuąi di yii hiɛi kpɔ pili-pili Ɉurdɛn ɲa-ɓoloon bɔ lɔi hu. Di Ɉurdɛn ya teen, di Bitrɔn lɔi hu ɓɔ, di həli Mahanaimə. 30 Ɉoabə ə kpɛla Avnɛrə kpɛɛ ɓa, ə nuą kəlee ŋąąkpɔn; Davidə nwɔ nuą lɔwai, nu pow kɔ́w mɛ̨inąąn Asahɛlə pɛlɛɛ di, diɛ ɓə di hvo kɛ laa. 31 Kɛlaa, Davidə nwɔ nuąi, di nu nwun ɉaaɓa ɲee mɛ̨ida paa, Bɛnɉamɛn da Avnɛrə di wɔ nuą lɔwai. 32 Də li a Asahɛlə di noo nąn gámą hu Bɛtleɛmə daai. Ɉoabə da nwɔ nuąi di yii kpɔ hiɛi pili-pili, yələ ɓɔi lɔwai di lɔ Hebrɔn daai. |