Samia Veerɛi 18 - Yálá laawoo hɛɓɛ (dc)Gɔ ə kala Absalɔn nwɔ nuąi diɛ 1 Davidə ə bɔ nuą lono, ə nwun nąmįną hee nu waa tɛitɛi nwun na, da nu nwun dɛitɛiɠaa. 2 Yili pulu, pələi mąąnɛ̨ɛ̨ nuą di pa hvilɛn na bələ ɓa, Davidə ə mo diɛ. Nu kpului tii ə ɲąą kwɛlɛ ɉu haaɓa, ə bələ tɔ̨nɔ̨ kalihvaɓo Ɉoabə ɓa, ə bələ tɔ̨nɔ̨ tɛɛ Seruya lon Avisai pɔ, yai kɛ a Ɉoabə nəɠə, Gatə mun ŋɛ̨i kɛ a Itai, ə gbulu kpəli tɛɛ bɔ. Tɔɔmun yɛ nuą diɛ: «Gáá bɔ gu kəlee gwəli gɔ́ mɛ̨i.» 3 Nuą diɛ mą: «Mąą hvo nɛ̨ɛ̨li hvo li gɔ́ mɛ̨i, mąąhɔlɔɓo, kwa pu, yili hvo pai ku yowoɠaa lii kulɔi diɛ, ə ma kpɛli kɛ daa ku kpulu bələ tɔ̨nɔ̨ paa, yili hva kpɛli kɛ di ɲɛ̨i ɓa a mɛ̨nį ta. Kɛlaa, yɛ́ tɔ̨nɔ̨ gbən, ə́ mąąnɛ̨ɛ̨ ə lɛɛ ɓɛ daai, ə gɛ bələi a kɛ la, ə́ nuą tɔɔ di pa di ku yee kɔ́w kɛ ɉu.» 4 Tɔɔmun yɛ diɛ: «Yɛ pələi kaa mo la tii, yii ka káá bɔ ya ɓə ŋą́ hvaa mą.» Tɔɔmun ə li ə tɔɔ ɉii la, ɲɛ̨i heɛ nuą diɛ, diɛ kulɔ, a nu nwun dɛitɛi, nu waa tɛitɛi. 5 Tɔɔmun ə mo Ɉoabə, Avisai da Itai diɛ, yɛ diɛ: «Ną́nni, gáá nɛ̨ɛ̨mąą hvəi kaa, Absalɔn mąą mɛ̨nį ɓa.» Mɛ̨nįi tii tɔɔmun ə mo yɛ hvilɛn na Absalɔn ɓa, ə too nuą kəlee wəlii. 6 Nuą kəlee də li ɲɛa kɔ́wɔ hu gɔ́ kɔ́ mɛ̨nį ɓa Ɛfraimə nwɛla hu, da Israɛlə nuą. 7 Davidə pɔ nuą di Israɛlə nuą tamąą paa. Maa hvólói tii, nu tamąą di lɛɛ gɔ́ hu, nu waa pow hveelɛ ɓə lɛɛ gɔ́ hu. 8 Gɔ ə taɠa taɠa kɛa nɔi nąą kəlee. Mąą yələi tii, nuą lan nwɛla hu, di kpulu ə kɛnɛ̨ ə tɛɛ yii ɓɔwa ə baa ma. Ɉoabə ə Absalɔn paa 9 Absalɔn ə tɛ Davidə nwɔ nuąi mɛ̨i dɛɠii. Absalɔn ə kɛ heeni tiɛ̨-hŋəŋ hoo mɛ̨i, ɉoo ə bələ haŋą wulu kɛnɛ̨ ta pɔ pələ, yii kɛ ŋonwo tamąą ma. Absalɔn ə lɛɛ hɛlɛn ni nwulu wonwo ta ɓa ɲələi gɔwɔ hvo nɔi ɓa, ɉoo ə ɓɔ mu. 10 Nu ta ə gaa hɛlɛn ni, ə pa yɛ Ɉoabə ɓa: «Ŋą́ą́ Absalɔn kaa hɛlɛn ni wulu ta ɓa.» 11 Nui ŋɛ̨i pa nwɛlɛɛ ɓoi, Ɉoabə yɛ mą: «Ə́ gaa pələ kɛ ləi yai hvo baa li laa ɲąą ɓa? Yá baa kɛ, ŋą́ pɛli kɛ ŋą́ wali kwələ pow tɛɛ ə́ pɔ, ŋą́ bɛlɛ hąą yili kɔ́lɔ ɓa.» 12 Ɉulɔnui tii yɛ Ɉoabə ɓa: «Ə ma kpɛli kɛ yaa ɲéé laahvɛɛ a wali kwələ nwaa tamąą vá pɛli mɛ̨nį ɲɔ̨n gɛi a tɔɔmun non. Mąąhɔlɔɓo, mɛ̨nįi tɔɔmun ə mo yɛ́ ka Avisai, ə mą kɛ Itai kaa, yɛ hvilɛn na Absalɔn ɓa, ə too ku wəlii. 13 Ə lɛɛ hɔlɔ, ŋą́ li baa loo hu, tɔɔmun ə li gbaɠala kaa, yii ŋɛ̨i hɔlɔ, hvə́ li kpɛli tɔɔ búlu.» 14 Ɉoabə yɛ mą: «Və́ bɔ və́ lamun tɔɔni ə́ lííla.» Ɉoabə ə kpala haaɓa həɠə, ə li ə gbɔn Absalɔn kəŋə hu, ə nii ɓɔ. Absalɔn ə kɛ nii nwului tii hu a vulu, ɓɛlɔwai Ɉoabə ə kɛi paa la. 15 Yili pulu, ɉilɛlɛa powi ŋɛ̨i kɛ Ɉoabə pɔ diɛ nwɔ kɔ́ kɔ́ kwɛli hɛnŋaa həɠə, di tinɛ̨n Absalɔn ɓa, di gbəli paa. 16 Ɉoabə ə nɛɛ mą ə dulu hvɛɛ, nuą di kpɛla Israɛlə nuą kpɛɛ ɓa. Pələ ɓə ə ɲee too la nuą hu. 17 Di Absalɔn powa həɠə, di bili ɓoloon gɛnɛ̨ ta hu nwɛla hu, di kwɛni hįi kɛnɛ̨ ta tɔɔ mɛ̨i a kili lɛɛ ɉu hɛn. Israɛlə nuą kəlee di pu, nu kəlee ə li bɔɔli. 18 Absalɔn kɛɛ vulú kɔ́ɔŋą, ə kwɛni kwɛaa ta tɔɔ tɔɔmun ɲəi ɲa-ɓoloon bɔ, Mąąhɔlɔɓo, ə kɛi kɛ diɛ: «Nwɛ́i lon ɉulɔnu hvo nii ɲə́i yii a náá lɛɛ lɔi mɛ̨i.» Ə naa hee gwɛnii tii ɓa, yai háá ɓa háá, da kɛ lɔ ma: Absalɔn nwɔ kili lɛɛ ɉu kwɛni. Di Absalɔn haa too Davidə ɓa 19 Sadɔkə lon Ahimaasə yɛ Ɉoabə ɓa: «Gɛ́ ə́ hvaa mą, ŋą́ gilɛ həɠə, ŋą́ li ŋą́ nwɛlɛ nɛɛi ŋɛ̨i ɓo tɔɔmun ma, gɛ́ mą: Yai-Laa aa ə́ nwun mąąɓo, aa ə́ kulɔ ə́ yowo yəi.» 20 Ɉoabə yɛ mą: «Ya li, hvo lii kɛi ɲɛ̨i ɓa a mɛ̨nį lɛlɛɛ ɓomun, nɛɛ laa Yələ takpɛli, ə li ə nwɛlɛɛ ɓo mą, kɛlaa, háákələi ŋɛ̨i hvo a wɛlɛɛ lɛlɛɛ ɓomun tɔɔmun ma, maahɔlɔbo, non ɉaa mɛ̨nį ka tii.» 21 Ɉoabə yɛ Nubi mun da ɓa: «Li mɛ̨nįi ŋɛ̨i ə́ ɲɛ̨i aa tɔɔ ɉu, ə ɉukulɔ tɔɔmun ma.» Nubi mun tii ə kwɛli hvilɛn Ɉoabə ɓa ə́ tɛɛ yɛ li a gílɛ. 22 Sadɔkə lon Ahimaasə ə pa nwɔ̨nɔ̨, yɛ Ɉoabə ɓa: «Yii lɔpee a kulɔ ɉu, yaa lɔ li, nɛɛ laa ŋą́ hvilɛn Nubi mun tii pulu a gilɛ ɲą́ą́ gbɛli.» Ɉoabə yɛ mą: «Nón yɛ kpɛli ə́ gilɛ həɠə mɛ̨nį nwun maa lə? Yɛ́ li mɛ̨nį ta ɓoi yii tɔ̨nɔ̨ hva kulɔ ɉu hvo həli yɛ́.» 23 Ahimaasə yɛ mą: «Yii lɔpee a kulɔ ɉu yaa lɔ li, gɛ́ lɔ ŋą́ gilɛ həɠə.» Ɉoabə yɛ mą: «Gilɛ həɠə.» Ahimaasə ə tɛɛ a gilɛ, ə ɉon a nɛɠɛ lɔi hu pələ, ə tɛɛ Nubi mun tii ɓa, yɛ li. 24 Davidə ə kɛ heeni ɉįi laaləi hveelɛi lɔwai, nui kɛ tɔɔni ɉįin la, yɛ daa mɛ̨i kaa, ə li Davidə pɔ, ə li ɉįi la, ə nwun mu həɠə, ə nu tɔ̨nɔ̨ kaa, yɛ gilɛ həɠə yɛ pa. 25 Ɉįįn la mun ə tomą, ə tɔɔmun gili pu ɉu. Tɔɔmun yɛ mą: «Akɛ yaa tɔ̨nɔ̨ ɓə, a kɛ tii wɛlɛ lɛlɛɛ li.» Gilɛ həɠə mun tii ə kɛi lɔ mąą lɛɠɛ gbon na mun ma, 26 ə nu takpɛli kaa nwɔ̨nɔ̨ yili pulu, yɛ pa a gilɛ, ɉįi mɛ̨i mun ə mo ɉįi la mun ma, yɛ mą: «Nu tɔ̨nɔ̨ kaa nwɔ̨nɔ̨ bulu yɛ pa a gilɛ.» Tɔɔmun yɛ mą: «Yili yaa kpɛli gaa pai wɛlɛɛ lɛlɛɛ ɓoi.» 27 Ɉįi mɛ̨i mun yɛ diɛ: «Nu tɔlɔɔi ŋɛ̨i gilɛ həɠə pələ, ŋą́ą́ gɔlɔn, Sadɔkə lon Ahimaasə li.» Tɔɔmun yɛ diɛ: «Nu lɛlɛɛ ka tii, wɛlɛɛ nɛɛ kpɔ kpɔɔ ɓə gaa na.» 28 Ahimaasə ə tomą kpɔ, yɛ tɔɔmun ma: «Nąą lɛlɛɛi ɓə!» Ə pɛlɛ nɔi ɓa, ə kwɛli hvilɛn tɔɔmun ma, yɛ mą: «Mąąwiɛ kaa Yai-Laa ə́ wɔ Yálá ɓa, nuąi kɛ di muhəɠɛɛ nwɔ́ mɛ̨nį nąmu tɔɔmun naa ɓa; Yálá aa ə́ yee tɛɛ gəlee ɓa.» 29 Tɔɔmun yɛ mą: «Naa lɛlɛɛ ɓə, Absalɔn kaa laa kpɛli?» Ahimaasə yɛ mą: «Ɓɛlɔwai Ɉoabə ə kɛi ku tɔɔ la, ɲą́ą́ kwa ə́ wɔ luwɔ tɔ̨nɔ̨, ŋą́ nuą kaa, naa ə ɓo ɉuwu-ɉuwu. Mɛ̨nįi kpɔ kɛ laa, və́ gɔlɔn.» 30 Tɔɔmun yɛ mą: «Ə́ maa tɛ ə́ tɔɔ ɓɛi tii.» Yili ə maa tɛ ə tɔɔ. 31 Nąąlɔwai, Nubi mun tii ə pa, yɛ diɛ: «Gɛ́ nwɔ́ mɛ̨nį nąmu tɔɔmun ə nwəli tɔɔ, ŋą́ wɛlɛɛ lɛlɛɛ laa həli mą. Yai-Laa aa kələi ə́ kulɔ ə́ yowoɠaa kəlee yeemu.» 32 Tɔɔmun yɛ Nubi mun tii ɓa: «Naa lɛlɛɛi, Absalɔn kaa laa kpɛli?» Nubi mun tii ə bulu pənə, yɛ mą: «Yii ku kaa ɉu hvɛlii Yálá ɓa, ya ɓaa, mɛ̨nįi tii laa ɉulɔnon tii ɓa, Yálá ə gɛ ɲɔ̨nwɔ̨mąn ə laa nwɔ́ mɛ̨nį Nąmu ɲowoɠaa diɛ, diɛi di kaa bɔ mɛ̨nį ɲąąnwąnąą ə laa mai.» |