Samia Veerɛi 17 - Yálá laawoo hɛɓɛ (dc)

Husai ə hea too Ahitofɛlə la

¹ Ahitofɛlə yɛ Absalɔn ɓa: «Hvaa mą, ŋą́ nu waa pow kɔ́w hveelɛ həɠə, ə lɛɛ, ŋą́ hvilɛn na Davidə pulu gbinįi ŋɛ̨i hu.

² Gáá pai həlii kpɔlɔɔ ma, ɓɛlɔwai vii a kɛ la a gbɛɛ, ŋą́ nuą maa ɲɔw, di taɠa ma, nąąlɔwai ŋą́ baa kɛa dɔ̨nɔ̨ kɛɛnąą.

³ A kɛ tii, ŋą́ nuą kəlee ɲɛ̨i tinɛ̨n ə́ pɔ pələ, yɛ wɛli Nɛ̨ɛ̨nu. A kɛ tii, nui ŋɛ̨i ə́ gaa bɔ ə mąą kwɛa yɛ́, a haa kɛa, nuą kəlee pənə hiɛ ka tii di pa ə́ pɔ, nɔi lonnii kəlee di kɛ liilaa hu.»

⁴ Niɛwoo tii ə nɛɛ Absalɔn ɓa, da Israɛlə kalanɉonŋaa kəlee.

⁵ Absalɔn yɛ diɛ: «Ka Arki mun Husai təli yaa kpɛli, ə pa, gu nwɔ liɛwoo mɛ̨n, gu gaa.»

⁶ Husai ə pa Absalɔn pɔ. Absalɔn yɛ mą: «Mɛ̨nįi Ahitofɛlə ə mo ya ka, ə həli yɛ́. Ku gɛ yɛ pələi ə mo la? A wala kɛ tii, ə́ pələ takpɛli lɛ kuɔ.»

⁷ Husai ə Absalɔn woo pulu pənə, yɛ mą: «Niɛwooi ŋɛ̨i Ahitofɛlə aa gɛ yiihui ŋɛ̨i, hvo lɛlɛ li.

⁸ Absalɔn, yɛ kpįnįi ə́ ə́ nąn gɔlɔn da nwɔ nuąi di kaa a kulaaɠaa, ə lɛɛ, niikpələi gaa di hu, gaa yɛ kwɛli lon a pili ɲəi yɛ gwɛli. Ə́ nąn gaa a kɔ́kuláá, da nuąi tii di hvo pai yii kɛɛnąą tɔ̨nɔ̨.

⁹ Ɓɛi gaa laa, aa now wolo ta hu, a wala kɛ tii kɛɛnąą takpɛli. Ə lɛɛ yaan, ya lɔ ɓaa nu ta a haa guɔ nuąi lɔwai, bələ kaa pai taɠai, nu ta ə mɛ̨n, diɛ kɛ mą: ‹Nuą di tɔɔ Absalɔn pulu, gɔ́ aa kala diɛ.›

¹⁰ Nąąlɔwai, ə mą kɛ nui nii kpəlɛɛ yɛ yala hilɛ, ɲɔw a too ɉu, mąąhɔlɔɓo, Israɛlə nuą kəlee di gɔlɔn diɛ ə́ nąn gaa a kulaa, bɔ nuą kəlee huwalawalaa.

¹¹ Yili ɓa, niɛwooi gaa ná, ya ka: Israɛlə nuą kəlee di di ɲąąkpɔn ə́ kwɛlɛ, ə həɠə Dan ə həli Beɛrə-Seva, di tamą yɛ gboloyá kwɛlɛ ɲeakɔw, ə lɛɛ, ə́ hvilɛn di ɲɛ̨i tɔwɔ, kaa li gɔ́ ɓa.

¹² Ɓɛi lɔpee gwa kwiɛn na laa, gwa pu di mɛ̨i yɛ luwuluwu a pɛlɛ lɔi mɛ̨i. Yaa mąn da bɔ nuą, nu ta hva lɛɛ.

¹³ A li a mąąkilɛ taa ta hu, yɛ nwɔ nuą ɲąąkpɔn gwɛlɛ, gu wɔ nuąi kəlee da li di yɛli too daa ɓa, ə mą kɛ kwɛni pɛlɛ ɓə, hva lɛɛ laa, gu maa taai yala ɲai pələ.»

¹⁴ Absalɔn da Israɛlə kalanɉonŋaa kəlee diɛ mą: «Arki mun Husai nwɔ liɛwooi aa lɛlɛ, aa tɛɛ Ahitofɛlə nwɛi ɓa.» Yai-Laa ə hvaa mą, ə Ahitofɛlə nwɛi hu kala, yai kɛ viɛlaɓoɔ, ə gɛ, Yai-Laa ə Absalɔn nwun na pili.

Davidə ə Ɉurdɛn teen

¹⁵ Husai yɛ ɉaláá kulɔ nuą Sadɔkə da Abiatarə diɛ: «Mɛ̨nįi Ahitofɛlə ə mo Absalɔn da Israɛlə kalanɉonŋaa diɛ, ya ka; mɛ̨nįi ɲą́ą́n ŋą́ mo ya.

¹⁶ Ka nu ta tɔɔ kani yiihu, ka Davidə kili pu ɉu, kaa mą: Hvo kɛ gaa tɔɔi háákələi kpįnįi nɔi pun ɉu, mąąnɛ̨ɛ̨ kpɔ hɔlɔmun ə Ɉurdɛn ya teen, a wala gɛ tii, tɔɔmun da nuą kpɔ tii bɔ, di lɛɛ li ɉu.»

¹⁷ Ɉonatan da Ahimaasə di kɛ Ein-Rogɛlə. Mąą nɛ̨ɛ̨ kɛ kóló kɛ Nɛ̨ɛ̨nu ta ə li ə mo diɛ, diɛ kpɛli, də li kɛa di mo tɔɔmun Davidə ɓa, mąąhɔlɔɓo, mąą hvo kɛ nɛ̨ɛ̨li di hvo di kaa, yili ɓə gɛ, di hvo kɛi tɛ taai.

¹⁸ Kɛlaa, hulɔnon da ə di kaa, ə li ə mo Absalɔn ɓa. Nwɛlɛɛ ɓo nuą hveelɛi tii, di nɛɛ mą di həɠə kpɔlɔ tii laa ɉa, də li Bahurimə hulɔnu ta yəi bɛlɛ́n. Ya-lɔwa ta ə kɛ laa gwəlii, di yɛɛ ɲálɔwai tii hu.

¹⁹ Bɛlɛ lee nɛ̨ą ə gbaha pɛlɛ ɲálɔwa la, ə mɔ̨nun bu mɛ̨i, nu ta kili hva pɛli kɛa kɛ kulɔi naa pɔ.

²⁰ Absalɔn nwɔ nuąi di lɔ nɛ̨ɛ̨nui tii yee bɛlɛ́n, diɛ mą: «Ahimaasə da Ɉonatan di kaa mį?» Nɛ̨ɛ̨nui tii yɛ diɛ: «Daa ɲa teen.» Absalɔn nwɔ nuąi tii, di di kwɛli di hvo di kaa, di pənə diɛ li Ɉerusalɛmə daai.

²¹ Di liɛ pulu, nuąi kɛ ɲálɔwa hu, di kulɔ də li, di di woo hukulɔ tɔɔmun Davidə ɓa, diɛ mą: «Ə́ muhəɠə ka ɲa teen ɉa-ɉa, mąąhɔlɔɓo, mɛ̨nįi Ahitofɛlə ə mo, yɛ hvilɛn na kaa, yaa li.»

²² Davidə ə muhəɠə, ə hvilɛn bələ ɓa, da nu kpului tii kɛ bɔ, di Ɉurdɛn teen. Yələɓɔi lɔwai, di ɲa teen, nui lɔpee ta hvo lɛɛ pulu.

²³ Yii kɛa Ahitofɛlə ə gaa yɛ di hvo hvilɛn ɉii nwɔ liɛwooɠaai pulu, ə nwɔ hoohvaalən hąą yili ə hvilɛn bələ ɓa, yɛ li bɔ taai. Ə vɛli ɲəi bɛlɛ́n nuą kəlee diɛ, ə li ə gbɔwɔ hɛlɛn. Haai ə mo, di noo nąn gámą hu.

Davidə ə li Mahanaimə

²⁴ Ɓɛlɔwai Davidə ə həli la Mahanaimə, nąąlɔwai ɓə Absalɔn aa kɛ Ɉurdɛn ya teen na, Israɛlə nuą kəlee hvilɛnŋaa bulu.

²⁵ Absalɔn ə Amasa kɛ a nwɔ kɔlaɠa nwun nąmu, a Ɉoabə mąąhvalin. Amasa nąn naa ɓaa kɛ a Yitra, Israɛlə mun da li kɛ. Yitra ə hvilɛn Avigalə pulu, yai kɛ a Nahasə lon Nɛ̨ɛ̨nu, Ɉoabə nee Seruya nəɠə Nɛ̨ɛ̨nu.

²⁶ Absalɔn da Israɛlə nuą di wɔ kɔlaɠai bɛlɛ Galaadə lɔi hu.

²⁷ Davidə ə tɛ kpɔlɔ Mahanaimə daai, Nahasə lon Sovi, yai kɛ a Raba daai, ə ɓo a Amɔn huwuhu mun da, ə lɛɛ Amiɛlə lon Makirə, yii həɠə Lodevarə da Barzilai Galaadə mun, yii həɠə Rogelimə,

²⁸ di pa a nu laa hɛnŋaa, kwɛlɛ həɠəɠaa, gəgənŋaa, da mɔ̨nun vunwɔ̨, kpai pola, tɔwɔ pɛlɛɛ,

²⁹ kwɛi nwulɔ, nįŋɛ̨ wulɔ, ɓɛlaaɠaa, nįŋɛ̨ huwɔ kpuɔɠaa, di paa la di dɛɛ Davidə da nwɔ nuąi di pɔ a di kɔ̨nɔ̨n. Mąąhɔlɔɓo, di kɛi kɛ diɛ: «Nuąi ŋɛ̨i daa pulu həɠə a mɔlɔ nɔi pun ɉu, di hvii aa kpɛɛ.»