Samia Veerɛi 16 - Yálá laawoo hɛɓɛ (dc)Davidə da Siva 1 Davidə ə tɛɛ lɔ wolo ɓo ɲee nwuɔ̨, yɛ Mefibosɛtə nwɔ tímun Siva kaa yɛ pa, hoohvaalən veelɛ ə ɓo ɲee pɔ, tiɛ̨ ə ɓo gəlee pulu: lɛɠɛ nwun veelɛ, da viɲə ɓá kpala nwun dɔ̨nɔ̨, da wulu ɓa nwun dɔ̨nɔ̨, yiiɠaai kɛi ɓa nąąlɔwai; da lɔɔ hɛnɲąŋą tɔ̨nɔ̨. 2 Tɔɔmun yɛ Siva ɓa: «Lə ɓə tii ə́ yəi?» Siva yɛ mą: «Tɔɔmun yəi bɛlɛ́n nuą hiɛ hɛn maa ɉoohvaalən veelɛi, nɛɠɛ da nwulu ɓaɠaa, ɉilɛlɛa kɔ̨nɔ̨n ni, yii ɓaa nɔɔ nwɛi, nuąi nɔi pun ɉu hiɛ kaa pai di hvįikpɛɛi, di kpələ lɔɔ li.» 3 Tɔɔmun yɛ mą: «Ə́ wɔɔ mɛ̨nį Nąmu lon yaan, gaa mį?» Siva yɛ mą: «Ə lɛɛ Ɉerusalɛmə daai, yɛ kɛ diɛ: ‹Háákələi, Israɛlə nuą kaa pai ną́n nwɔ tɔɔlaai pənəi di dɛɛ bɔ́.›» 4 Tɔɔmun yɛ Siva ɓa: «Mefibosɛtə yəi hɛnŋaa kəlee daa lɛɛ a ə́ wɔɔ.» Siva yɛ tɔɔmun ma: «Ɲą́ą́ ka, ŋą́ą́ pɛlɛ, Yálá ə hvaa mą, ŋą́ kɛ a nui ya ə́ ɲɛ̨i lɛlɛɛ hee mą́ą́, tɔɔmun nwɔ́ mɛ̨nį Nąmu.» Simei ə Davidə nɛ̨ŋɛ̨n naa 5 Tɔɔmun ə kɛi lɔ həli Bahurimə daai, hulɔnu ta ə kɛ laa, da Saulə ni di kɛ a pɛlɛ tɔ̨nɔ̨ mu nuą, diɛ kɛ naa ɓa a: Simei, diɛ kɛ nąn naa ɓa a: Gera. Gera lon Simei tii, ə kulɔ ə tɔɔ yɛ nɛ̨ŋɛ̨n naa kɛ. 6 Yɛ kwɛni pili, tɔɔmun Davidə ɓa, da bɔ nuą kəlee; ya pa, nu kpulu kɛnɛ̨, da gɔkulaa kəlee di kɛ mą mįi yee hu, da gɔɓɛ yee hu. 7 Nɛ̨ŋɛ̨n naa wooɠaai Simei ə kɛi mo diɛ ka, ə kɛi kɛ mą: «Li! Li! Ə́ nu paa mun gbɛlikpɛlii ŋɛ̨i. 8 Saulə tii ə́ hee ɉeei a tɔɔmun, ɲəi bɛlɛ́n nuą ŋamai kpɔ ə́ bu, Yai-Laa a gəlee nwulu lɛɛ ə́ nwuɔ̨. Yai-Laa aa dɔɔ ɓɔlɔ tɛɛ ə́ lon Absalɔn pɔ; ə lɛɛ, ə́ kaa mɔ̨nɔ̨ mįi, mąąhɔlɔɓo, nu paa mun ma a yɛ́.» 9 Seruya lon Avisai yɛ tɔɔmun ma: «Lə mɛ̨nį ɓa, ɲilɛ powai ŋɛ̨i kaa nwɔ́ mɛ̨nį nąmu tɔɔmun nɛ̨ŋɛ̨n naai! Nɛ́ɛ́ tai laa, ŋą́ li ŋą́ nwun gulɔ ŋą.» 10 Tɔɔmun yɛ mą: «Ə́ wɔɔ naa ɓa a lə mɛ̨nįi ŋɛ̨i hu, Seruya lon? Akɛ nɛ̨ŋɛ̨n naa ŋɛ̨i gaa gɛi, Yai-Laa ɓə kɛ mą: ‹Li ə́ Davidə nɛ̨ŋɛ̨n naa›, gbɛɛ ɓə a pɛli kɛi ma: ‹Lə mɛ̨nį ɓa ə́ kaa yili kɛi?›» 11 Davidə yɛ Avisai da bɔ nuą kəlee kpɔ kpun diɛ: «Nón! A gáá gwəi lon gbɔɔ-kpɔ, a hvilɛn búlú, yɛ kɛ ə ɲíi hvóló tee mɛ̨i, gu hvo mun kɛ Bɛnɉamɛn mun ŋɛ̨i! Ka nɛɛ laa, ə nɛ̨ŋɛ̨n naa kɛ; Akɛ Yai-Laa ɓə dɔɔ la-o. 12 Gbəli hu, Yai-Laa kaa pai ɲɛ̨́i mąąwɛli kaai, ə pənə ə nwún na nɛɛ, a háákələi nɛ̨ŋɛ̨n naa ŋɛ̨i maahvalən.» 13 Davidə ə kɛi li, da nwɔ nuąi, Simei ə ɓo ɲee koo ɓa, yɛ li, gbanwoɔ lɔ nɛ̨ŋɛ̨n naa kɛɛ hu, yɛ kwɛni pili, ə lɛɛ, nwɔ̨nɔ̨, yɛ pɔlɔ pili yələi. 14 Tɔɔmun da bɔ nuą kəlee di həli Ɉurdɛn kwɛlɛ di hvįikpɛɛ, di di hvįitɔɔ laa. Husai ə laŋąn Absalɔn ɓa 15 Absalɔn da Israɛlə nu kpulu kəlee di həli Ɉerusalɛmə daai; Ahitofɛlə ə kɛ bɔ. 16 Arki mun ŋɛ̨i a Husai Davidə mɛlan, ə həli Absalɔn ɓa. Husai yɛ Absalɔn ɓa: «Tɔɔmun ə́ yii ə kwɛa! Ə́ yii ə kwɛa.» 17 Absalɔn yɛ Husai ɓa: «Bələ ɓə yá kanąn na ə́ ɓɛlan mun Davidə ɓa? Lə ɓə kɛ yaai ka ə́ ɓɛlan mun Davidə ka hvo li li?» 18 Husai yɛ Absalɔn ɓa: «Hvo tii, nui Yai-Laa a gɛ a niiɓa mun, da nu kpului kpɔ ŋɛ̨i, ə lɛɛ, Israɛlə nuą kəlee, mąą nu ɓə gáá bɔ kwa yaa ku tɔɔ, gɛ́ lɛɛ bɔ. 19 Yili a həɠə laa gbɛɛ ɓə gáá pai tíi ma? Kɛlɛi mɛ́lan mun non mə? Bələi lɔ ŋą́ kɛ la ə́ ną́n nwɔ kóló ɓa, bələ lɔ ɓə gáá kɛi la yɛ́ kóló ɓa.» Absalɔn ə laa a nąn nwɔ wɛli nɛ̨ąąi 20 Absalɔn yɛ Ahitofɛlə ɓa: «'Ka ká nwun dɔɔ, mɛ̨nįi gu pai gɛi ma.» 21 Ahitofɛlə yɛ Absalɔn ɓa: «Ə́ nąn nwɔ wɛli nɛaii ŋɛ̨i ə́ nąn ə di lɛɛ ɓɛ, diɛ di ɲɛ̨i kɛ diɲɛɠaa li ə́ laa a diɛ. A kɛ tii, Israɛlə nuą kəlee kaa pai gbaɠala kaai, diɛ kɛ yaa yowo laa kɛnɛ̨ lɔ ka ə́ nąn ka lɔwai. Ə lɛɛ, nuąi di tɔɔ ə́ pulu, di hvaŋą kaa pai lɔi.» 22 Di nɛɛ mą di həɠə ɓɛla kələ tɔɔ ɲələi pɛlɛ ɲiman mu, naa ɓə Absalɔn ə laa laa a nąn nwɔ wɛli nɛ̨ąąi kəlee, Israɛlə nuą kəlee ɲɛ̨i ɓa. 23 Liɛwooɠaai Ahitofɛlə ə kɛi gɛ nąąlɔwai, di kɛi di wəli tɔɔ gəlee ɓa yɛ Yálá lawoo. Ə ma kpɛli kɛ Absalɔn ɲɛ̨i ɓa, yɛ pələi Ahitofɛlə hvaa woo ə kɛ la Davidə ɲɛ̨i ɓa, yɛ Yálá lawoo. |