Samia Veerɛi 14 - Yálá laawoo hɛɓɛ (dc)Ɉoabə ə gɛ pələ kwɛli mą, Absalɔn ə pənə ə pa Ɉerusalɛmə 1 Seruya lon Ɉoabə ə gbaɠala kaa, yɛ kɛ tɔɔmun aa kɛ giliŋąhiɛ yɛ vilɛn Absalɔn ɓa. 2 Ə Tekoa nɛ̨ɛ̨nu ta wɛlɛɛ tɔɔ, yii kɛ giliŋa kulaa, yɛ mą: «Gɛ yɛ haa a too yɛ́, ɉəɠəɠaai haa a too nu ɓa a gɛ ma, di kɛ yɛ́, hvó ə́ mąątí, gɛ kpɔlɔ yɛ Nɛ̨ɛ̨nui a lamun haa wɔlɔ ɓoi. 3 Yili pulu, li ə́ həli tɔɔmun ma, ə mɛ̨nįɠaai ŋɛ̨i ɓo mą.» Mɛ̨nįɠaai kɛ mąąnɛ̨ɛ̨ nɛ̨ɛ̨nui tii ə mo, Ɉoabə ə gəlee ɓo mą. 4 Tekoa nɛ̨ɛ̨nui tii ə li kɛa tɔɔmun bɔɔli, ə pɛlɛ niiɓa nɔi ɓa, yɛ kɛ diɛ: «Ka pa mą́ą́, ə kə nwɔ́ tɔɔmun!» 5 Tɔɔmun yɛ mą: «Lə bə kɛ yɛ́?» Yɛ tɔɔmun ma: «Gáá a kalanin, ɉílɛ aa haa. 6 Lon ɉinąą hveelɛ ɓə ə́ wɔɔ tí nɛ̨ɛ̨nu yəi, di nu hveelɛi di gɔ́ lɔwɔi, nu ta hvo kɛ laa, hvo di ŋaakwɛlɛ, dɔ̨nɔ̨ ə mɛlan gɛlɛ, ə baa. 7 Yili ɓa, gwəlii nuą kəlee daa pɛlɛ ə́ wɔ tí nɛ̨ɛ̨nui ɓa, diɛ mą: ‹Nui nąn non baa, gulɔ ku baa a mɛlan baai tii ə mo gwələ kulɔ, ə lɛɛ, a kɛ tii, di nąn gwɛlin ɉəɠə mun hva kɛa lɛɛ.› Nwɔ̨n dəŋąi aa lɛɛ ɲə́i, diɛ di ya pu ŋą, diɛ di ɉílɛ laa kpɛɛ ɓɛ yɛnɛ̨ɛ̨.» 8 Tɔɔmun yɛ Nɛ̨ɛ̨nui tii ɓa: «Li ə́ pɔɔli, gáá ə́ mąą mɛ̨nį ɲɛ̨i kulɔ pələ lɛi ɲą́ą́ gbinįi.» 9 Tekoa nɛ̨ɛ̨nui tii, yɛ tɔɔmun ma: «Nąą wulu a lɛɛ kwa ną́n ɲəi bɛlɛ́n nuą ku nwuɔ̨, nwɔ́ mɛ̨nį nąmu tɔɔmun da nwɔ tɔɔ kpəlin di hɔn va lɛɛ ɉu.» 10 Tɔɔmun yɛ mą: «Nui a da ɓo yɛ́, paa la bɔ́, mąą nu hva kɛa pənə hvo hvaa pɛlɛ yɛ́.» 11 Nɛ̨ɛ̨nui tii yɛ tɔɔmun ma: «Tɔɔmun! Ə́ kwɛla a Yai-Laa yɛ, nón ɉulɔnu tɔ̨nɔ̨i ŋɛ̨i aa lɛɛ ɲə́i di hvo pai baa, a mɛlan ŋama nwąną kulɔ hɛn.» Tɔɔmun yɛ mą: «Yii kpɔ Yai-Laa kaa laa, ə́ lon nwun nəɠa tɔ̨nɔ̨ kpɛli hva too lɔi ɓa.» 12 Nɛ̨ɛ̨nui tii yɛ mą: «Mą́ą́ hvaalɛɛ, ə́ wɔ tínɛ̨ɛ̨nu kaa nwɔ̨nɔ̨ bɔ ə woo tɔ̨nɔ̨ ɓo nwɔ mɛ̨nį nąmu tɔɔmun ma.» Yili yɛ mą: «Yii ə́ kaa bɔ ə́ mo, mo.» 13 Nɛ̨ɛ̨nu tii yɛ mą: «Lə mɛ̨nį ɓa yaai, Ə́ giliŋąhiɛ huwui tii ta kɛ, yɛ Yálá nwɔ nu huwui mąą mɛ̨nį pili ɉu? Yɛ bələi ŋɛ̨i tɔɔmun yaa kpįnįi ə mo la yiihu, tɔɔmun aa hvaa mą, yɛ gaa a hɔn maa mun. Mąąhɔlɔɓo a nui tii ə́ gbɛ, aa lənə bulu pənə mɛ̨nį ɓa. 14 A kɛ tii gu kaa mɔ̨ɔ̨ pai haai a hvoló tɔ̨nɔ̨, yɛ yai daa bu lɔi ɓa hva pɛli kɛa yɛɠɛi. Kɛlaa, Yálá hva giliŋąhiɛ a ɲɔ̨nwɔ̨ɔ̨ nu ɓa, ə lɛɛ, aa gɛ pələ kwɛli mą, nui di gbɛ, mąą hvo kwɛa ma a mɔlɔɔ. 15 Yá gaa gɛ́ pa yiihu, mɛ̨nįi ŋɛ̨i ŋą́ mo tɔɔmun ma, gɛ́ ɉukulɔ mą, nuą ɓə daa mą́ą́ ɲɔw. Ə́ wɔ tímun ə giliŋąhiɛ, yɛ diɛ: ‹Gáá lii ŋą́ da ɓo tɔɔmun ma, gbəli hu kiɛ, tɔɔmun gaa pai nwóó hon ɉii, yɛ bələi nwɔ luwɔ nɛ̨ɛ̨nu kaa pai moi la ma. 16 Mąąhɔlɔɓo, tɔɔmun gaa pai hvaai ma, ə nwɔ tínɛ̨ɛ̨nui kulɔ nui tii yəi, yai gaa bɔ ə gúlɔ Yálá kwɛlin ɉu, ɲą́ą́ kwa nón.› 17 Ə́ wɔ tínɛ̨ɛ̨nui yɛ: ‹Yálá ə gɛ, nwɔ́ mɛ̨nį nąmu tɔɔmun vaa woo ə pa bɔ́ a liilaa. Mąąhɔlɔɓo, nwɔ́ mɛ̨nį nąmu tɔɔmun gaa yɛ Yálá nwɔ malaka, ə mɛ̨nį lɛlɛɛ kɔ́lɔn, ə ɲɔ̨nwɔ̨ɔ̨ kɔ́lɔn.› Yai-Laa ə́ wɔ Yálá ə kɛ ə́ pɔ.» 18 Tɔɔmun yɛ nɛ̨ɛ̨nui tii ɓa: «Gáá ə́ mąąnin gɛ, hvo mɛ̨nį ta loo mą́ą́.» Nɛ̨ɛ̨nui tii yɛ mą: «Nwɔ́ mɛ̨nį Nąmu yii gaa ə́ kwəi, mo!» 19 Tɔɔmun yɛ mą: «Kɛlɛi Ɉoabə ɓə ə́ yee pili mɛ̨nįi ŋɛ̨i hu-ee?» Nɛ̨ɛ̨nui ə nwoo pulu pənə yɛ mą: «Gána nwun ə báá, nwɔ́ mɛ̨nį nąmu tɔɔmun, yii lɔpee ya mo nu hva pɛli lii ŋɛ̨i hvo li ŋɛ̨i, gaa tii ə́ wɔ́ tímun Ɉoabə ɓə dɔ́ɔ́. Mɛ̨nįɠaai kpɔ kɛ mąąnɛ̨ɛ̨ ŋą́ mo, ya ɓə di lɔ ná. 20 Mɛ̨nį tii hon bələ maahvaalən mɛ̨nį ɓə, ə́ wɔ tímun Ɉoabə ə mɛ̨nįi kɛ la. Nwɔ́ mɛ̨nį Nąmu kaa a kili ma mun, gili kaa ɲəi yɛ Yálá nwɔ malaka. Mɛ̨nįi kpɔ gaa a ɓɛ lɔi mɛ̨i, ə gəlee kɔ́lɔn.» 21 Tɔɔmun yɛ Ɉoabə ɓa: «Mɛ̨nįi aa kpɛɛ, li ə́ pa a Absalɔn.» 22 Ɉoabə ə pɛlɛ niiɓa, nɔi ɓa, ə tɔɔmun mama ɓo, yɛ mą: «Háákələi kpɔ kpɔ, ɲą́ą́ ə́ wɔ tímun, gílí aa pu ɉu, gɛ́ nwɛ́li kaa yɛ́, yɛi a nwɔ́ mɛ̨nį Nąmu, nwɔ́ tɔɔmun. Hvo gaai mɛ̨nį ə́ wɔ tímun ə mo yɛ́, yáá gɛ.» 23 Ɉoabə ə muhəɠə, ə li Gesurə, ə pənə ə pa a Absalɔn Ɉerusalɛmə. 24 Tɔɔmun yɛ diɛ: «Ə li bɔɔli, nə́ kɛ li ŋą́ ɲɛ̨i tɔɔ mą.» Absalɔn ə li bɔɔli, hvo kulɔ tɔɔmun ɲɛ̨i ɓa. Davidə ə Absalɔn mąąhvaalɛɛ 25 Israɛlə lɔi hu, nu ta hvo kɛ laa nɛlɛɛ yɛ Absalɔn, naa tɛɛ yɛ yaa, ə həɠə gɔwɔŋa ə həli la nwuɔ̨, maa kulɔi hvo kɛ mą. 26 Ə kɛi nwun nəɠa mɛ̨i tee kwɛlan ɉəli pələ tɛitɛi, mąąhɔlɔɓo, nwun nəɠa ə kɛi wiɛ. Da nwun nəɠa mɛ̨i tee kɛ, di kɛi nwun nəɠa kɔ́ɔn tɔɔmun nwɔ kiləi ɓa, nwiɛ yee yɛ kɛ a kilə hveelɛ da gbulɔ. 27 Absalɔn lon ɉinąą di kɛ haaɓa da non Nɛ̨ɛ̨nu tɔ̨nɔ̨, diɛ kɛ naa ɓa Tamarə. Ə kɛ a nɛ̨ɛ̨nu lɛlɛɛ. 28 Absalɔn ə kwɛlan veelɛ kɛ Ɉerusalɛmə, hvo kulɔ tɔɔmun ɲɛ̨i ɓa. 29 Absalɔn ə nuą tɔɔ diɛ li Ɉoabə təlii, ə gɛ, ə dɔɔ tɔɔmun bɔɔli. Kɛlaa, Ɉoabə hvo gɛ hvo li Absalɔn nwɔ təli ɓa, ə nu takpɛli tɔɔ nwɔ̨nɔ̨, kɛlaa, Ɉoabə hvo gɛ hvo li. 30 Ə mo ɲeepɔ nuą diɛ, yɛ diɛ: «Ka Ɉoabə nwɔ tíi kɔ́lɔn nwɛ́i kwɛlɛ? Kpai kaa ɉu, ka li ka nwɔ̨n bili ɉu, ə kələn.» Absalɔn yeepɔ nuą di nwɔ̨n doo díi hu. 31 Ɉoabə ə li Absalɔn pɔɔli yɛ mą: «Lə mɛ̨nį ɓa yaai, ə́ yeepɔ nuą di nwɔ̨n doo nwɔ́ tíi hu?» 32 Absalɔn yɛ Ɉoabə ɓa: «Mąąhɔlɔɓo, ŋą́ kɛ ə́ təlii, gɛ́ kɛ ə́ li ə́ tɔɔmun mąąnin gɛ, yɛ́ kɛ mą: ‹Ŋą́ həɠə Gesurə, gɛ́ pa ɓɛ lə mɛ̨nį ɓa? Viɛlaɓoɔi kɛ ŋą́ lɛɛ nii laa.› Gáá kɛa bɔ, ŋą́ həli tɔɔmun ma, akɛ ŋą́ą́ ɉɔ́n gɛ la, ə báá.» 33 Ɉoabə ə li tɔɔmun bɔɔli ə nwoo hukulɔ mą. Tɔɔmun ə Absalɔn təli. Absalɔn ə li tɔɔmun bɔɔli ə pɛlɛ gɔwɔ mu niiɓa, tɔɔmun ə nɛ̨nɛ̨ɓo. |