Samia Veerɛi 13 - Yálá laawoo hɛɓɛ (dc)Amnɔn da Tamarə 1 Yiliɠaai tii kəlee tɛɛ pulu, mɛ̨nįi kɛ ya ka: Davidə lon Absalɔn mąąhala ta ə kɛ laa, nɛlɛɛ kpɔ kɛnɛ̨, diɛ kɛ naa ɓaa: Tamarə. Tamarə wɛli ə too Davidə lon Amnɔn ɓa kpɔ kɛnɛ̨. 2 Amnɔn mąąhala Tamarə wɛli too pələ ma, ə ɲɔ̨n bɛlɛ ma, mąąhɔlɔɓo, yili hvo kɛ hulɔnu mɛ̨nį hukɔlɔn, ə lɛɛ pələi kpɔ kɛ ə tɛɛ la da yaa di too di kee ɓa, hvo kɛ bələ kɔ́lɔn. 3 Yaan Amnɔn mɛlan da ə kɛ laa, diɛ kɛ mą: Yonadavə, yili ə kɛ a Davidə niɛ Simea lon ɉulɔnu. Yonadavə tii ə kɛ a nui giliŋa kulaa. 4 Yili ə mo Amnɔn ɓa yɛ mą: «Tɔɔmun non, lə ɓə kɛ yɛ́ yai ə́ kɔ́lɔ haa lɔ yɛ́ yələ wala pɔ kəlee? Mɛ̨nįi gaa yɛ́, mo mą́ą́.» Amnɔn yɛ mą: «Tamarə ŋɛ̨i a ną́n non Absalɔn mąąhala, ya ɓə nwɛli aa too mą́ą́.» 5 Yonadavə yɛ mą: «Li ə́ laa ə́ yəi gbin ŋą, ə́ ə́ kpɔɔ kɛ a ɲɔ̨n gɛ mun, ɓɛlɔwai ə́ nąn a paa la nwoo pilii yɛ́, yá kɛ mą: ‹Gɛ́ ə́ hvaa mą, mą́ą́hala Tamarə ə pa ə gɔ́nɔn gɛ ɓɛ. A pa gaa pai gɔ̨nɔ̨n tii pɛli ɲɛ̨́i ɓa, gɛ́ naa kaa, ə lɛɛ ya kpįnįi ə dɛɛ bɔ́ gɛ́ mɛɛ.›» 6 Amnɔn ə́ laa, ə gbɔwɔ kɛ a ɲɔ̨n gɛ mun. Tɔɔmun ə pa nwoo pilii ma, yɛ tɔɔmun ma: «Gɛ́ ə́ hvaa mą mą́ą́hala Tamarə ə pa, ə nwɔ̨mįi hveelɛ kɛ ɓɛ ɲɛ̨i ɓa, ə və ŋą́ mįi.» 7 Tɔɔmun ə bɛlɛ́n dimun da tɔɔ, diɛ li moi Tamarə ɓa, diɛ kɛ mą: «Tɔɔmun yɛ ə́ li ə́ mąąhulɔnu Amnɔn yəi bɛlɛ́n, ə́ kɔ̨nɔ̨n bɛli ə́ dɛɛ bɔ.» 8 Tamarə ə muhəɠə ə li mąąhulɔnbu Amnɔn pɔ bɛlɛ́n, Amnɔn ə kɛ laani. Nwɔ̨mįi kpɔlɔi tii ə ɲɔwɔn, ə ɉəɠə, ə gɛ a nwɔ̨mįi niɛ ɲɛ̨i ɓa. 9 Yili pulu, ə nwɔ̨mįi kulɔ nəɠii niɛ ɲɛ̨i ɓa, kɛlaa, yili hvo gɛ hvo mįi. Amnɔn yɛ diɛ: «Ka mo nuą kəlee di kulɔ ɲɛ̨nɛ̨ɛ̨.» Nu kəlee di kulɔ ɲɛ̨nɛ̨ɛ̨, ə lɛɛ lɔ kɛa a yaa da mąąhala. 10 Amnɔn yɛ Tamarə ɓa: «Gɔ̨nɔ̨n ŋɛ̨i ə gɛ, ɉəɠə gwəli la ɲíí pɛlɛ mu, yɛ́ nɔ na gɛ́ mįi.» Tamarə ə nwɔ̨mįiɠaai tii həɠə, ə li la mąąhulɔnu Amnɔn yii pɛlɛ mu. 11 Ɓɛlɔwai ə kɛi nɛ la ma, ə ɉon a ɲee, yɛ mą: «Pa mą́ą́hala, gu laa.» 12 Maahala yɛ mą: «Kpaa níɛ! Hvo too mɛ̨i. Mąąhɔlɔɓo, di hva dúwɔ huwui tii ɓo Israɛlə lɔi hu. Hvo naa kala mɛ̨nįi ŋɛ̨i kɛ. 13 Yá gɛ tii, mįnɛ̨ ɓə ŋą́ li laa nwɔ́ nwumɛ̨ ŋɛ̨i mąąkilɛi? Ə lɛɛ yɛ kpɛli, yá kɛ kɛa yɛ nui mɛlɛ hvo mą Israɛlə lɔi hu. Yii hui ŋɛ̨i, gáá nɛ̨ɛ̨mąą hvəi yɛ́, gɛ́ ə́ li ə́ ə́ woo hukulɔ tɔɔmun ma hvo pai lənəi ma, ə gɛ ə́ ɉəɠə a ə nɛ̨ą.» 14 Kɛlaa, hvo gɛ hvo nwəli tɔɔ Tamarə woo ɓa, ə wolo ma, ɲee ə tɛɛ mą, ə laa la. 15 Yii kɛa ə gɛ tii, ə pɛlɛ kɛa yɛ wɛli kpɛɛ mąą laa kulɔ a Tamarə kpɔ kɛnɛ̨. A tɛ̨ą, ɲowo laai ə kɛi gulɔ la, ɉu kɛnɛ̨i kɛ ə tɛɛ nwɛli kɛ maa yii kɛ ɉu, yɛ mąahala kɛ a nɛ̨ą ma. Amnɔn yɛ mąahala ɓa: «Ə́ muhəɠə ə́ li.» 16 Kɛlaa, Tamarə ə kɛ mą: «Va gɛ niɛ! Mąąhɔlɔɓo, yá gbɛ́, yili ɲɔ̨nwɔ̨ɔ̨i ɲee tɛɛ mɛ̨nįi ŋɛ̨i ə́ gɛ a ɲą́ą́ ma.» Kɛlaa, Amnɔn hvo nwəli tɔɔ mąąhala woo ɓa. 17 Ɉulɔnon tii kɛ Amnɔn pɔ a nwɔ tímun, ə dəli yɛ mą: «Nɛ̨ɛ̨non ŋɛ̨i hon, ə́ gulɔ ɲɛ̨nɛ̨ɛ̨, ə bɛlɛ laa kpulu.» 18 Ɉulɔnon tii ə Tamarə kulɔ ɲɛ̨nɛ̨ɛ̨, ə bɛlɛ laa kpulu bulu pələ. Yaan həɠə yee kwɛa ta ə kɛ Tamarə ɓa. Ɉəɠə yee kwɛa huwui tii ɓə, tɔɔmun lonnii nɛ̨ąąi di hvo hulɔnu mɛ̨nį hukɔlɔn, di kɛi doo di kwąną. 19 Nąąlɔwai, ɉəɠə yee kwɛai ŋɛ̨i kɛ Tamarə ɓa ə ɉu ɓɛla, ə luwu pu nwuɔ̨, ə ɲee laa nwuɔ̨ yɛ wɔlɔ. 20 Tamarə mąąhulɔnu Absalɔn yɛ mą: «Ə́ mąąhulɔnu Amnɔn aa laa a yɛ́? Yili ɓa, ə́ laa pilɛ nə́ɠə, ə́ mąąhulɔnu li. Hvo yili hee ə́ kwəi.» Tamarə ə lɛɛ gbɔwɔ ɓa, mąąhulɔnu Absalɔn yəi bɛlɛ́n. 21 Tɔɔmun Davidə ə mɛ̨nįi tii bələ mɛ̨n, nii ə holi kpɔ kɛnɛ̨. Kɛlaa, hvo gɛ hvo haŋą non Amnɔn ɓa, mąąhɔlɔɓo, non ɉulɔnu dɔlɔɔ li kɛ, ə lɛɛ nwɛli ə ɓo mą. 22 Absalɔn hvo mɛ̨nį lɔpee ta ɓo Amnɔn laa mɛ̨i a ɲɔ̨nwɔ̨ɔ̨ ə mą kɛ a nɛlɛɛ. Kɛlaa, nwɛli ə kpɛɛ mą, mąąhɔlɔɓo, aa too mąąhala Tamarə mɛ̨i. Amnɔn paa mɛ̨nį da Absalɔn pu mɛ̨nį 23 Kwɛlan veelɛ tɛɛ pulu, di kɛi Absalɔn nwɔ ɓɛlaɠaai ləɠa mɛ̨i tee, Baalə-Hasɔrə daai, yii kɛ Ɛfraimə kwɛlɛ. Absalɔn ə tɔɔmun non ɉinąą kəlee təli ɉɛli ɓa. 24 Absalɔn ə pa, yɛ tɔɔmun ma: «Nán, nuą kaa lii ə́ wɔ tímun nwɔ taatɛlɛɛɠaai ləga mɛ̨i teei, mɛlɛ laa ə həli yɛ́. Gɛ́ nwɔ́ mɛ̨nį Nąmu da nwɔ nwun nąmįnąi di pa ɉɛli ɓa.» 25 Kɛlaa, tɔɔmun yɛ Absalɔn ɓa: «Nón, ku kəlee kwa pai, yili kaa pai kɛi a tiɛ̨ kɛnɛ̨ ə nwuɔ̨, yili ɓa ku hvo pai.» Absalɔn ə hɔlɔ nąn ma, kɛlaa, tɔɔmun və gɛ hvo li. Ə lúwɔ́ too mą. 26 Absalɔn yɛ mą: «Hvaa kani ma, kwa ną́n non Amnɔn ni kwəli.» Tɔɔmun yɛ mą: «A hvilɛn ə́ pulu lə mɛ̨nį ɓa?» 27 Absalɔn ə da ɓo a nwalawalaa, tɔɔmun ə hvaa mą, Amnɔn da tɔɔmun nonnii takpɛliɠaa də li. 28 Absalɔn yɛ ɲəi bɛlɛ́n góló kɛ nuą diɛ: «Ka gɛ a nɛlɛɛ, ɓɛlɔwai ka Amnɔn kaa la nɔɔ aa ɉon, ŋą́ kɛ kaa: ‹Ka Amnɔn kɛlɛ›, ka baa. Ka hvo ɲɔw, ɲą́ą́ ɓə ka tɔɔ la ka ká liikpələ, ka gɛ a hulɔnu laa.» 29 Mɛ̨nįi Absalɔn ə mo ɲəi bɛlɛ́n nuą diɛ, di gɛ tii a Amnɔn ɲąąɓa, tɔɔmun nonnii kəlee di di muhəgə, di tɛ di wɔ tiɛ̨-həɠə hooɠaai mɛ̨i, di pu. 30 Di lɛɛ nii bələi, nwɛlɛɛ ə həli Davidə ɓa, diɛ mą: «Absalɔn aa tɔɔmun nonnii kəlee paa, da lɔpee hvo lɛɛ li a vulú.» 31 Tɔɔmun ə muhəɠə, ə mąąhəɠəɠaa hu ɓɛla, ə laa nɔi ɓa, ɲee pɔ nuą kəlee di kɛ tɔɔni gwɛlɛ, di mąąhəɠəɠaa hu ɓɛlaa. 32 Davidə niɛ Simea lon Yonadavə ə mo yɛ diɛ: «Nwɔ́ mɛ̨nį Nąmu hvo giliŋąhiɛ, yɛ kɛ diɛ daa tɔɔmun lon ɉinąą kəlee paa, Amnɔn yaa tɔ̨nɔ̨ lɔ bə aa haa. Absalɔn ə yili mąą kili tee tii gwəi, ə həɠə ɲələi di too la mąąhala Tamarə mɛ̨i ɲələ ɓa. 33 Nwɔ́ mɛ̨nį Nąmu hvo kɛ diɛ tɔɔmun nonnii kəlee daa haa, hvo tii, Amnɔn yaa tɔ̨nɔ̨ lɔ ɓə haa. 34 Ə lɛɛ, Absalɔn aa pu.» Daa mɛ̨i kaa hulɔnon tii kɛ laa, ə ɲɛ̨i hee, ə nu kpulu kaa yɛ kulɔ bulu pələ ɲee kooɓa. 35 Yonadavə yɛ tɔɔmun ma: «Tɔɔmun ə́ lonnii hvə tii pai, mɛ̨nį kəlee aa kɛ yɛ pələi ŋą́ mo la.» 36 Ə lɛɛ lɔ nwoo laa kulɔi, tɔɔmun nonnii diɛ lɔ, di pola a wɔlɔ, tɔɔmun da ɲeepɔ nuą kəlee diɛ kpɛli di wɔlɔ kpɔ kɛnɛ̨. 37 Absalɔn ə pu, ə li Amihurə lon Talmai pɔɔli, yai kɛ a Gesurə tɔɔmun, Davidə ə kɛi lɔ non ɉaa wɔlɔ ɓo a nɔwai kpɔ tii Absalɔn ə gɛ bu pələi. 38 Absalɔn nwɛi, ə pu, ə li Gesurə, ə kwɛlan ɉaaɓa kɛ laa. 39 Tɔɔmun nwɔ líiholi kɛ ɉu Absalɔn pɔ, gɔlɔ ə haa ma, mąąhɔlɔɓo, nii aa kɛ laa Amnɔn paa mɛ̨nį hu. |