Samia Veerɛi 12 - Yálá laawoo hɛɓɛ (dc)Natan ə Davidə hɔn mo mą 1 Yai-Laa ə Natan tɔɔ Davidə pɔɔli, yili ə li yɛ Davidə ɓa: «Nu hveelɛ di kɛ taa tɔ̨nɔ̨ hu, dɔ̨nɔ̨ ə ɓo a hɛn gɔw nąmu kɛnɛ̨, dɔ̨nɔ̨ ə ɓo a yeehowolo mun. 2 Ɓɛlaa kpulu, da Nįŋɛ̨ kpulu ə kɛ ɉɛn gɔw námui tii yəi kpɔ kɛnɛ̨. 3 Ɲeehowolo mun tii, hɛn nɔpee ta hvo kɛ ɲəi hvo kɛli lɔ ɓɛlaa haa lon dɔ̨nɔ̨ gbən mə ə ɲa, yɛ gɔ̨nɔ̨n gɛ, mɛlaa tii da ɉulɔnui tii lonnii di kɛi kɛnɛ̨ di kee pɔ. Kɔ̨nɔ̨n kɛ a mįi, gbuɔ ɓə kɛ a dɛɛ mɛlaa pɔ, da yaa di kpələ kɔ́wɔ ə kɛ tɔ̨nɔ̨, diɛ laa kpin dɔ̨nɔ̨ ŋą. Mɛlaa tii ə kɛ ɉulɔnui tii ɲɛ̨i ɓa yɛ non nɛ̨ɛ̨nu. 4 Ə kɛ a Yələ ta, nwea ə kulɔ ɉɛn gɔw Námuni tii ɓa, hvo gɛ hvo ɲee lɔ nwɔɔ taatɛlɛɛ kpulu kɛnɛ̨i tii hu, hvo da hon, hvo gɛ a nwɔ nweai nwea laa kɛ hɛn. Kɛlaa, ya ka tii lii, ə ɲeehvowolomun nwɔ ɓɛlaa haa tɔ̨nɔ̨i tii hon, yɛ gɛ a nwɔɔ nweai nwea laa kɛ hɛn.» 5 Davidə lii ə kələn gbɔ gwəi kɛnɛ̨ yɛ hvilɛn na ɉulɔnui tii ɓa. Ə nɛɛ mą yɛ Natan ɓa: «Yii kpɔ Yai-Laa kaa a vulú, ɉulɔnui mɛ̨nįi tii kɛ, aa haa kwɛli gbɔwɔ ɓa. 6 Ə lɛɛ mąąnɛ̨ɛ̨ ə mɛlaa haai tii bɔɔi tɛɛ gee mɛ̨i nąąn; mąąhɔlɔɓo, aa túwɔ́ ɲɔ̨nwɔ̨ɔ̨ ɓo, hvo ɉulɔnui tii mąąwɛlii kaa li.» 7 Nąąlɔwai, Natan yɛ Davidə ɓa: «Maa hulɔnui tii ɓaa yɛ́. Mɛ̨nįi Yai-Laa, Israɛlə nwɔ Yálá kaa moi, ya ka; yɛ diɛ: ‹Ɲą́ą́ ɓə ə́ mąątí a dɔɔ wulɔ, ŋą́ ə́ kɛ a tɔɔmun Israɛlə nuą mɛ̨i, ŋą́ ə́ kulɔ Saulə yəi, 8 ŋą́ ə wɔ mɛ̨nį Nąmu nwɔ pɛlɛ́i tɛɛ ə́ pɔ, ŋą́ ə́ wɔ mɛ̨nį Nąmu nɛąni tɛɛ ə́ pɔ, ŋą́ Israɛlə da Ɉuda di wɔ pɛlɛ́i tɛɛ ə́ pɔ, a kɛ kɛ yili hva pɛli, ŋą́ li da pɛlɛ ma! 9 Gɛ pələ kaa ləi yai, ə́ tɛɠɛɓo Yai-Laa woo hu, mɛ̨nįi hva nɛɛ mą́ą́, yɛ́ gɛ? Hɛtə mun ŋɛ̨i a Uri, yáá baa a ɓɔwa, yáá nɛ̨ą həɠə, yɛ gɛ a ə́ nɛ̨ą. Yɛ́ kpįnįi ɓə dɛɛ Amɔn lonnii pɔ, diɛ baa a kɔ́ kɔ́ ɓɔwa. 10 Yili ɓai tii, kɔ́ ɓɔwa maa hva kɛa kwɛa ə́ wɔ pɛlɛ́i ɓa, mąąhɔlɔɓo, yaa tɛgɛɓo ɉú, yɛ́ Hɛtə mun Uri nɛ̨ą həɠə yɛ lɛɛ ə́ yəi a ə́ nɛ̨ą. 11 Yai-Laa woo ka: yɛ diɛ: ə́ ɲɛ̨i hee laa, kpaloi pai ɓɛlai yɛ́, a kulɔ ə́ yəi bɛlɛ́n, ŋą́ ə́ nɛ̨ąni həɠə ə́ ɲɛ̨i ɓa, ŋą́ di tɛɛ ə́ hee yɔwɔ pɔ, yɛ laa a ə́ nɛ̨ąni ə́ ɲɛ̨i ɓa hvóló ŋą ɉə-ɉə. 12 Ə́i wɛi kɛ loo hu, kɛlaa gáá pai mɛ̨nįi tii kɛi a yɛ́, Israɛlə nuą kəlee ɲɛ̨i ɓa hvóló ŋa.›» 13 Nąąlɔwai Davidə yɛ Natan ɓa: «Ŋą́ą́ nɛ̨ŋɛ̨n ɉəɠə Yai-Laa ɓa.» Natan yɛ Davidə ɓa: «Yai-Laa aa ə́ kɛ nɛ̨ŋɛ̨n mąąhvaalɛɛ, hvo pai haai. 14 Kɛlaa, gɛ mɛ̨nį yaa Yai-Laa ɓɛlɛkpɛɛ ma a dúwɔ́ ŋɛ̨i ə́ moi, non ɉulɔnui tii hɔlɔɓo, gaa pai haai.» 15 Yili pulu, Natan ə tɛɛ ə li ɲəi bɛlɛ́ laaləi. Non ŋɛ̨i Davidə ə gaa Uri nɛ̨ą ɓa, ə ɲɔ̨n ɉəɠə. Bɛtsabe lon ɉaa mɛ̨nį 16 Davidə ə Yálá mąąnɛ̨ɛ̨ nokoloi tii mąą mɛ̨nį ɓa. Ə hin nɔ, ə lɔ ɲəi bɛlɛ́n, a kpįnį hvo laa ɲai gbin ɲa, ə laa nɔi ɓa. 17 Galanɉonŋaa ŋɛ̨i kɛ ɲəi bɛlɛ́n, di mąąnɛ̨ɛ̨, ə gɛ ə həɠə laani nɔi ɓa. Hvo gɛ hvo muhəɠə, hvo kɔ̨nɔ̨n da lɔpee mįi. 18 Lɔwɔ tɔ̨nɔ̨ tɛɛ pulu nokolo ə haa. Davidə yee pɔ nuą di kɛi ɲɔw nokolo haa tooi mą di kɛi di kiliŋąhiɛ diɛ kɛ diɛ: «Kaa gaa, ɓɛlɔwai nokoloi ŋɛ̨i ə kɛ la a vulú, gu mɛ̨nį ɓo mą, hvo gɛ hvo nwəli tɔɔ gu woo ɓa. Gwa pɛli tɛɛi ləi guɔ non ɉaa too mą? A kɛ tii, gaa pai mɛ̨nį laai gbɔwɔ ɓa.» 19 Kɛlaa, Davidə ə gaa yɛ, ɲee pɔ nuą kaa mɛ̨nį ta ɓoi di kee lɔwai loo hu, Davidə ə gbaɠala kaa yɛ non aa haa. Davidə yɛ yee pɔ nuą diɛ: «Akɛ tii nokoloi aa haa?» Yiliɠaa diɛ mą: «Aa haa.» 20 Davidə ə muhəɠə kɛa nɔi ɓa, ə nwaa ə mąątí, ə həɠə lɛlɛɛ kɛ mą; ə li Yai-Laa yəi bɛlɛ́n, ə kwɛli hvilɛn ma. Ə həɠə laa ə pa ɲəi bɛlɛ́n, ə mo di kɔ̨nɔ̨n dɛɛ bɔ, ə mįi. 21 Ɲee pɔ nuą diɛ mą: «Lə ɓə ŋɛ̨i ə́ gɛi? Ɓɛlɔwai nokoloi ə kɛ la yɛnɛ̨ɛ̨, ə́ hin nɔ yɛ́ wɔlɔ. Nokolo a haa kɛa, ə́ ə́ muhəɠə kɛa yɛ́ kɔ̨nɔ̨n mįi!» 22 Davidə yɛ diɛ: «Ɓɛlɔwai nokoloi tii ə kɛ la a vulú, ŋą́ hin nɔ, gɛ́ wɔlɔ mąąhɔlɔɓo, ŋą́ kɛi kɛ diɛ: ‹Gbəli hu kiɛ Yai-Laa kaa pai ɲɛ̨́i mąąwɛli kaai nokoloi ə lɛɛ yɛnɛ̨ɛ̨!› 23 Kɛlaa yiihui ŋɛ̨i kɛa nokolo aa haa, ŋą́ hin nɔ kɛa lə ɓa? Gáá mɔ pai pənəi ŋą́ gɛ a vulú? Hvo kɛa pai pənəi hvo pa bɔ́, ɲą́ą́ mun mə pai li bɔ pələ.» Salomɔn kaa mɛ̨nį 24 Yili pulu, Davidə ə nɛ̨ą Bɛtsabe líílaa, da yaa di lɔ pɛlɛ́n, ə koo həɠə, ə naa yɛɛ a hulɔnu, ə naa hee a Salomɔn. Nokoloi tii wɛli ə too Yai-Laa ɓa. 25 Yai-Laa ə Natan tɔɔ Davidə pɔ ə mo mą, yɛ mą: «Nokoloi laa hee a Yedidya, mukulaa ɓaa: ‹nwɛli kaa Yai-Laa ɓa›, bələ ɓə Yai-Laa laa ə mo la.» Davidə ə Raba taa hon a kɔ́ 26 Ɉoabə ə kɔ́ pɛlɛ Raba taa ɓa, yai kɛ a Amɔn lonnii di wɔ tɔɔ taa, ə ɉon a kɔ́. 27 Ɉoabə ə tímun Davidə pɔɔli, yɛ mą: «Ŋą́ą́ kɔ́ pɛlɛ Raba ɓa, ŋą́ą́ ɲa kwɛlɛ taa hon. 28 Yii hu, nu kpəliɠaa ɲąąkpɔn, ə́ pa ə́ pɛlɛ la daa ɓa, ə gɛ di hvo pa kɛ diɛ ɲą́ą́ ɓə ɲéé ə tɛɛ daa ɓa, náá hvo pa kɛ ma.» 29 Davidə ə nuą kəlee ɲąąkpɔn, də li di kɔ́ pɛlɛ Raba ɓa, di yee ə tɛɛ mą. 30 Yili pulu, di di wɔ tɔɔmun nwɔ tɔɔ ɓɔlɔi kulɔ nwuɔ̨, nwiɛ yee ə kɛ a kilə pow haaɓa kɔ́w nąąn, yɛ ɓo a hɛni. Kúwɔ́-kwɛni ə kɛ ɉu, di bɛlɛ Davidə nwuɔ̨. Ɉɛn di ɉon daai tii hu a kɔ́, gɛnɛ̨i kɛ, ə ɉəɠə yɛ li la. 31 Yii ɓaa daa tii hu nuą di wɛi, ə di hon a kɔluwɔɠaa, daɠaa diɛ wulu haɠa, diɛ kwɛni haɠa, daɠaa diɛ kwɛi kwɛli, daɠaa diɛ pɔlɔkɔw kɛ. Pələ ɓə ə gɛ la a Amɔn lonnii di wɔ taaɠaai kəlee da ɉu nuą. Davidə da nuą kəlee di pənə di pa Ɉerusalɛmə daai. |