Samia Veerɛi 11 - Yálá laawoo hɛɓɛ (dc)

Davidə da Bɛtsabe

¹ Gwɛlan gɔwɔ tɔɔi lɔwai, ɓɛlɔwai tɔɔɓɛlaa di kɛi li la kɔ́ ɓa, Davidə ə Ɉoabə tɔɔ, da ɲee pɔ nuą kəlee, ə mą kɛ Israɛlə kɔ́kuláá kəlee. Di Amɔn lonnii tamąą paa, yili pulu di kɔlaɠa pɛlɛ Raba taa kwɛlɛ. Davidə nwɛi, hvo li, ə lɛɛ Ɉerusalɛmə daai.

² Yələwulii pɔ ta, Davidə ə muhəgə ɲəi gbinŋa, yɛ gɔwɔ hu hiɛ nwɔ tɔɔ pɛlɛ́i a yələi pɛlɛ́ ɲimąn mu ɲələi. Ə lɛɛ laa bɛlɛ́ ton na, ə nɛ̨ɛ̨nu ta kaa yɛ nwaa, nɛ̨ɛ̨nui tii lɛlɛɛ kpɔ kɛ a mɔlɔ.

³ Davidə ə nuą tɔɔ, diɛ li nɛ̨ɛ̨nui tii mąą kɛɛ mąąni kɛi nuą diɛ. Di pa, diɛ mą: «Bɛtsabe li, yai a Eliamə lon nɛ̨ɛ̨nu. Hɛtə mun Uri, nɛ̨ą li.»

⁴ Davidə ə nuą tɔɔ diɛ li nɛ̨ɛ̨nui tii təlii, pai ə mo, da Davidə di yíi, nɛ̨ɛ̨nui ə pənə li ɲəi bɛlɛ́ laaləi. Nɛ̨ɛ̨nui tii aa kpɛɛ kɛa kɛ a ɲəi waa, ɉaláái mąąnɛ̨ɛ̨ ə gulɔ ə gbɔwɔ mąąhəɠə mɛ̨nį ɓa, aa kpɛɛ kɛa kɛ a yili kulaa.

⁵ Mɛ̨nį tii Davidə da nɛ̨ɛ̨nui di tɛɛ ɉu, ə lɛɛ mą a koo. Nɛ̨ɛ̨nu ə nu ta tɔɔ Davidə pɔɔli, yɛ mą: «Mɛ̨nįi ŋɛ̨i gu tɛɛ ɉu, ə lɛɛ mą́ą́ a koo.»

⁶ Ɲąąɓa, Davidə ə kɛla tɔɔ Ɉoabə pɔ, yɛ kɛ mą: «Hɛtə mun Uri, dɛɛ ə pa.» Ɉoabə ə nɛɛmą ə Uri tɔɔ Davidə pɔɔli.

⁷ Pai Uri ə mo Davidə pɔ, Davidə ə Ɉoabə da gɔ́kulááɠaa mąą mąąni gɛ Uri ɓa, ə mą kɛ pələi gɔ́ kɔ́ pələ kaa kɛi la.

⁸ Yili pulu, Davidə yɛ Uri ɓa: «'Li ə́ yəi bɛlɛ́ laaləi, ə́ ə́ kɔ́wɔ mąąwaa.» Uri ə kulɔ lɔ tɔɔmun ɲəi bɛlɛ́n, di laŋąn mą a kɔ̨nɔ̨n yai kulɔ tɔɔmu ɲəi bɛlɛ́n.

⁹ Kɛlaa, Uri hvo gɛ hvo yíi ɲəi bɛlɛ́n, ə yíi tɔɔmun ɲəi bɛlɛ́ laaləi, da dɔɔ pɛlɛ́ mąąkpɛ nuą.

¹⁰ Di pa di di woo hukulɔ Davidə ɓa, diɛ mą: «Uri hvo gɛ li hvo yíi ɲəi bɛlɛn.» Davidə yɛ Uri ɓa: «Kɛlɛi ə́ həɠə hiɛ ɓa-ee, lə ɓə kɛ yai hvo yíi li ə́ yəi bɛlɛ́n?»

¹¹ Kɛlaa, Uri yɛ Davidə ɓa: «Mįnɛ̨ kəhi, da Israɛlə nuą, Ɉuda nuą di kaa kələɠaa mu, nwún nąmu Ɉoabə da nwɔ́ mɛ̨nį nąmu Davidə yee pɔ nuą, di kaa kɔ́ kpomói. Ɲą́ą́ gɛ́ li lɔi ɲəi bɛlɛ́n, gɛ́ náá mįi, gɛ́ gbələ, ɛlɛɛ gɛ́ laa nɛ̨́ą kwɛlɛ! Ə́ nwun tii ə báá, ə́ hvulú mąą hva lɛɛ yɛnɛ̨ɛ̨, vá mɛ̨nį yili kɛ.»

¹² Nąąlɔwai, Davidə yɛ Uri ɓa: «Ee, akɛ yili kaa tii, lɛɛ ɓɛ háákələi, tínąą, gáá pai ɓoi yɛ́, ə́ li.» Uri ə lɛɛ Ɉerusalɛmə daai a volói tii, da mąą yələ laa ɓoɔ.

¹³ Davidə ə Uri təli kɔ̨nɔ̨n ma, di kɔ̨nɔ̨n mįi, di di kpələ, Davidə ə lɔɔ tɔɔ Uri la nɔɔ ə ɉon. Kɛlaa, mąą yələwulii, Uri ə kulɔ ɲɛ̨nɛ̨ɛ̨, ə laa ɓɛi wɛi ə laa laa, dɔɔ pɛlɛ́ mąąkpɛ nuą lɔwai, hvo gɛ hvo li ɲəi bɛlɛ́n.

¹⁴ Maayələ laa ɓoɔ, Davidə ə hɛɓɛ́ kɛ, ə dɛɛ Uri pɔ, yɛ li la Ɉoabə pɔ.

¹⁵ Ə bɛ̨ɛ̨ ɉɛɓɛ́i tii hu, yɛ mą: «Ɉoabə, Uri tɔɔ gɔ́ ɲɛ̨itɔwɔ, ɓɛi kpɔ naa kpɔluɔ; yili pulu, ka kəlee ka tee bulu, ə lɛɛ a yaa tɔ̨nɔ̨, ə gɛ, ə lɛɛ ɉu di baa.»

Bɛtsabe ɉilɛ Uri haa mɛ̨nį

¹⁶ Ɉoabə aa kɛ kɔ́ tinɛ̨n daa ɓa, yɛ di mɛ̨i kaa; ə nɛɛmą ə Uri tɔɔ ɓɛi gɔ́ kpɔluɔ laa.

¹⁷ Daai tii hu nuą di kulɔ diɛ pa kɔ́ pɛlɛi Ɉoabə ɓa. Nu tamąą di lɛɛ ɉu da Davidə nwɔ kuláá walawala taɠaa ə mą kɛ Hɛtə mun ŋɛ̨i a Uri, ə lɛɛ ɉu.

¹⁸ Ɉoabə ə kuláá ta tɔɔ, yɛ li gɔ́ mɛ̨i mɛ̨nį hukulɔi tɔɔmun ma.

¹⁹ Ɉoabə ə mo nwɛlɛ ɓomun tii ɓa, yɛ mą: «Ya kpɛɛ a gɔ́ mɛ̨i mɛ̨nįɠaa kəlee hukulaa tɔɔmun ma.

²⁰ Tɔɔmun a níiholi, a kɛ yɛ: ‹Lə mɛ̨nį ɓa ka li ka maa lɛɠɛi daa ɓa, kaa kɔ́ pɛlɛ ma, ka hvo mɔ̨ɔ̨ gbaɠala kɔ́lɔn, kaa diɛ da pɛli di lɛɛ ɉįi mɛ̨i diɛ kwɛli hɛn bili kaa?

²¹ Gbɛɛ ɓə mɔ̨ɔ̨ Yerubɛsɛtə lon Abimelɛkə paa? Kɛlɛi nɛ̨ɛ̨nu ɓə! Nɛ̨ɛ̨nui tii ə lɛɛ tɔɔni ɉįi mɛ̨i, ə kwɛni kpuwulu ta pili, ə too Abimelɛkə ɓa, ə baa. Bələ ɓə ɉaa pələ ə kɛ la tii Tevesə daai. Lə mɛ̨nį ɓa ka li ka ká maa lɛɠɛi ɉįi ɓa?› Nąąlɔwai, yá kɛ mą: Ə́ wɔ tímun Uri ŋɛ̨i kɛ a Hɛtə mun, yaa kpɛli ə lɛɛ ɉu.»

²² Nwɛlɛ ɓomun ə li, mɛ̨nįi kpɔ Ɉoabə ə mo mą, ə gəlee hukulɔ Davidə ɓa.

²³ Nwɛlɛ ɓomun yɛ Davidə ɓa: «Nuą hvaŋą kɛnɛ̨i kɛ di tɛɛ kuɔ. Di wolo kuɔ gbomoi ku hee di hu, ku pa a diɛ ɉįi la.»

²⁴ Nąąlɔwai, gilɛn bili nuą di kɛ tɔɔni ɉįi mɛ̨i, diɛ ə́ wɔ tii nuąi ɓon. Tɔɔmun nwɔ nuą tamąą di haa, ə́ wɔ tímun ŋɛ̨i kɛ a Uri Hɛtə mun, yaa kpɛli ə lɛɛ ɉu.

²⁵ Davidə yɛ nwɛlɛɛ ɓomun ma: «Ya li ə́ mo Ɉoabə ɓa, yɛ́ mą: ‹Mɛ̨nii tii hvo kɛ gaa wiɛi ə́ ɲɛ̨i ɓa a mɔlɔɔ, mąąhɔlɔɓo, kɔ́ kɔ́ ɓɔwa a paa ɓo kɛ lɔ bələ kəlee. Ə́ wɔɔ kɔlaɠaɠaai hvaŋą lɔ, di hee daa ɓa a nwalawalaa, ə lɛɛ la ɉu, ə́ da a hon.› Ya li ə́ Ɉoabə lííla tii gwəi.»

²⁶ Uri nɛ̨ą ə ɉilɛ haa mɛ̨nį bələ mɛ̨n, yɛ nwoolaa, yɛ wɔlɔ ɉilɛ haa mɛ̨nį hu.

²⁷ Ɉaa wɔlɔ ɓoɔ pulu, Davidə ə nuą tɔɔ, diɛ li tɔɔi nɛ̨ɛ̨nui tii tɔwɔ; ə ɉəɠə ə nɔ ɲəi bɛlɛ́n, ə lɛɛ ɲəi a nɛ̨ą, ə lon ɉulɔnu kaa mą. Kɛlaa, mɛ̨nįi tii Davidə ə gɛ, hvo nɛ̨ɛ̨ Yai-Laa ɓa.