Samia Veerɛi 10 - Yálá laawoo hɛɓɛ (dc)

Davidə ə nuą tɔɔ di di ɓɛlɛ too

¹ Mɛ̨nįɠaai tii tɛɛ pulu, Amɔn tɔɔmun ə haa. Non Hanun ə hee a nąn mąąhvalin.

² Ya ɓə Davidə a kɛ diɛ: «Hvo kɛli ŋą́ Nahasə lon Hanun hon a wɛlikɛmąąlaa, nąn nwɔ wɛlikɛmąąlaa mąą mɛ̨nį ɓa.» Davidə ə nuą tɔɔ Hanun pɔ, diɛ li gbəlaɓoi nąn ɉaa mɛ̨nį hu. Davidə nwɔ nuąi də li, di həli Amɔn nuą di wɔ lɔi hu.

³ Kɛlaa, Amɔn kalanɉonŋaa di mo di wɔ tɔɔmun Hanun ɓa, diɛ mą: «Gaa ə́ kwəi yɛ́ ə́ nąn mąąwiɛ mɛ̨nį ɓə Davidə ə nwɔ nuąi tɔɔ la? Hvó gɔlɔn yɛ́ kɛ di pa nɛ̨lɛ̨ɛ̨n naa kɛi? Ə́ gɛ yələ ta di pa ə́ kulɔ dɔɔ kpəlin ɉu di ə́ too? Yili mąą mɛ̨nį ɓə Davidə ə nwɔ nuąi ŋɛ̨i tɔɔ la!»

⁴ Hanun ə Davidə nwɔ nuąi hon, ə di kpɛlɛ bələ tɔ̨nɔ̨ kalaan, ə di mąąhəɠəɠaa mąą tee kpɔ, ə gbɛla di wulɔn mu, ə ɓo diɛ di li.

⁵ Di mɛ̨nįi tii hukulɔ Davidə ɓa, ə nuą tɔɔ diɛ li nwɔ wɛlɛɛɓo nuą laakwiɛn ɉii, mąąhɔlɔɓo, yiliɠaai di nwumɛ̨ kpɔ kɛnɛ̨. Tɔɔmun ə mo yɛ diɛ: «Ka lɛɛ Ɉeriko daai, ka kpɛlɛɠaa di tɛ, yili pulu kaa kɛa pa.»

⁶ Amɔn nuą di gaa diɛ daa túwɔ́ pələ ɲɔ̨n gulɔ a Davidə. Di nɛɛ mą di nuą tɔɔ Bɛtə-Rehɔvə, di Aramə nuą da Sova Aramə nuą yá, di kɛ a di wɔɔ kɔ́kulááɠaa, nu waa pow hveelɛ ɲɔ̨nwɔ̨mąn. Maaka tɔɔmun ə nu waa tɔ̨nɔ̨ tɛɛ, Tɔvə nuą nu waa pow kɔ́w hveelɛ.

⁷ Davidə ə bələ mɛ̨n, ə Ɉoabə tɔɔ da gɔ́kuláá walawalaɠaa di wɔ kɔlaɠai kəlee.

⁸ Amɔn nuą di kulɔ di di tɔɔi kulɔ gɔ́ kɔ́ mɛ̨nį ɓa daa kpala. Aramə nuąi həɠə Sova da Rehɔvə, ɛlɛɛ, Tɔvə nuą da Maaka nuą, di tɔɔ a di tee gɔ kpalan ŋą.

⁹ Ɉoabə ə gaa gɔ tínɛ̨nŋąąi mą bələ kəlee, bulu pələ da dɔwɔ pələ, ə nuą həɠə Israɛlə lɔi kɔ́kulááɠaa kəlee lɔwai, a nu walawalaɠaa, ə di tɔɔ Aramə nuą tɔwɔ.

¹⁰ Ə nu kpulu kpəli tɛɛ nəɠə Avisai pɔ, di tɔɔ a di yɛli Amɔn lonnii tɔwɔ.

¹¹ Yɛ nəɠə ɓa: «Aramə nuą yee a kɛ ə tɛɛ mą́ą́, yá pa ə́ kpɔmąą tɛɛ bɔ́. Amɔn nuą yee a kɛ ə tɛɛ yɛ́, ŋą́ pa ŋą́ kpɔmąą tɛɛ ə́ pɔ.

¹² 'Tɔɔ a ə́ nwąnąi, gu gɛ a kpakololaa gu wɔ lɔi mąą mɛ̨nį ɓa, da gu wɔ Yálái nwɔ taaɠaai mąą mɛ̨nį ɓa. Yai-Laa ə gɛ kani, yɛ bələi niiɓa kaa la!»

¹³ Yili pulu, Ɉoabə da nwɔ kɔlaɠai diɛ kɛa li woloi Aramə nuą diɛ. Yiliɠaai di pu Ɉoabə tɔwɔ.

¹⁴ Yii kɛa Amɔn lonnii di gaa diɛ Aramə nuą daa pu, diɛ kpɛli di pu Avisai tɔwɔ, di tɛ taai. Ɉoabə ə həɠə Amɔn lonnii pulu, ə pənə ə pa Ɉerusalɛmə daai.

¹⁵ Yii kɛa Aramə nuą di gaa diɛ kɛ Israɛlə yee aa tɛɛ diɛ, di kəlee di di ɲąąkpɔn.

¹⁶ Hadadɛzɛrə ə nuą tɔɔ Aramə nuąi kpɔ tii Eufratə ya pulu pələ di pɔ, ə gəlee təli, di pa gɔ́ ɓa. Yiliɠaai di pa Helamə. Hadadɛzɛrə nwɔ kɔlaɠa nwun nąmu Sovakə ɓə kɛ di ɲɛ̨i tɔwɔ.

¹⁷ Di mo Davidə ɓa, Davidə ə Israɛlə nuą kəlee ɲąąkpɔn, di Ɉurdɛn teen di li Helamə. Aramə nuą di di tɔɔi kulɔ Davidə tɔwɔ, di pɛlɛ mą a kɔ́.

¹⁸ Aramə nuą di pu Israɛlə nuą tɔwɔ. Nuąi Davidə ə paa Aramə yəi, nwotolo hu nuą, nu waa mɛ̨ihveelɛ; nuąi kɛ a nɔi ɓa kɔ́ kɔ́ nuą, nu waa pow nąąn. Ə Aramə kɔlaɠa nwun nąmu Sovakə paa.

¹⁹ Dɔɔɓɛlaai kpɔ kɛ Hadadɛzɛrə yeemu, yii kɛa di gaa diɛ Israɛlə yee a tɛɛ diɛ, di kɔ́-tɛ́ɛ́ pili Israɛlə ɓa, di lɔ Israɛlə nuą yeemu. Aramə nuą di kɛi kɛa ɲɔw kpɔmąą tɛɛ Amɔn lonnii pɔ.