Samia Veerɛi 1 - Yálá laawoo hɛɓɛ (dc)Di Saulə haa mɛ̨nį hukulɔ Davidə ɓa 1 Saulə haai lɔwai, ə kɛ tii, Davidə yee aa kɛ tɛɛ Amalɛkə ɓa, aa pənə aa pa. Ə hvóló hveelɛ kɛ Siklagə daai. 2 Voló ɉaaɓa yələ, hulɔnon da ə həɠə Saulə nwɔ kɔ́ ɓuwui la pələ, mąą həɠəɠaa huɓɛlai kɛ, pɔlɔ puɔ nwuɔ̨. Həli ə mo Davidə ɓa, ə pɛlɛ nɔi ɓa. 3 Davidə yɛ mą: «Ə́ həɠə mįnɛ̨ pələ?» Ɉulɔnon tii yɛ mą: «Ŋą́ pu, gɛ́ kulɔ Israɛlə nuą di wɔ kɔ́ ɓuwui la.» 4 Davidə yɛ mą: «Lə mɛ̨nį ɓə kɛ laa bələ? Ɉukulɔ mą́ą́.» Yili yɛ mą: «Nuą di pu, nu tamąą ə haa di lɔwai, ə lɛɛ, Saulə da non Ɉonatan di lɛɛ gɔ́ hu.» 5 Davidə ə nwɛlɛɛ ɓo hulɔnon tii mąąnin gɛ, yɛ mą: «Ə́ gbaɠala kaa ləi, yɛ́ kɛ, Saulə ə haa, ə mą kɛ non Ɉonatan?» 6 Ɉulɔnon tii yɛ mą: «Nąąlɔwai ŋą́ kɛ Gilboa yee ɓa, Saulə ə kɛ laa, dunwɔ̨n ŋąą nwɔɔ kpalai mɛ̨i. Gɔ kɔ́ wotoloɠaa da ɉoo gilɛ həɠə nuą diɛ lɛɠɛ mą kpɔ hɔɔlɛɛ, 7 ə tinɛ̨n, ə gáá, ə də́ li, gɛ́ mą: ‹Ɲą́ą́ ka!› 8 Yɛ mą́ą́: ‹Gbɛɛ ɓa a yɛ́?› Gɛ́ mą: ‹Amalɛkə mun ma a ɲą́ą́.› 9 Yɛ mą́ą́: ‹Ə́ mąą lɛɠɛ mą́ą́, və́ gbɔ́wɔ́ mɛ̨nį ɲąą kaai, ya pa váŋa kəlee kaa nii ɉú, gbə́li paa!› 10 Yili ɓə gɛ, ŋį́ mą́ą́ lɛɠɛ ma, ɛlɛɛ, ŋą́ baa. Mąąhɔlɔɓo, gíli ə kɛ ɉu, gɛ́ kɛ, gɔ́ kala mɛ̨nį mą, hvo pai na mui yɛnɛ̨ɛ̨. Dɔɔ ɓɔlɔi kɛ nwuɔ̨, da gwɛlii kɛ ɲee ɓa, ŋą́ ɉəɠə, ŋą́ pa a diɛ nwɔ́ mɛ̨nį nąmu pɔ.» 11 Davidə ə gwąną həɠə hu ɓɛla, mɛlaa kəlee di gɛ lɔ tii. 12 Saulə da Ɉonatan, da Yai-Laa nwɔ nu huwui, da Israɛlə nwɔ nuąi tii lɛɛ a gɔ́ kɔ́ ɓɔwa kɔ̨nɔ̨n, di di haa wɔlɔ ɓo, di hin nɔ, ə lɛɛ la ɉu yələ ə wulu. 13 Yili pulu, ɉulɔnon tii pa nwɛlɛɛ ɓoi, Davidə yɛ mą: «Ə́ həɠə mį?» Ɉulɔnon tii yɛ mą: «Amalɛkə mun da lon maa ɲą́ą́, ną́n gaa a nwɛ̨ą, ɉəɛ kaa ɓɛ nɔi.» 14 Davidə yɛ mą: «Ə́ həɠə ləi yaai, hvo ɲɔw li, yɛ́ li ə́ yee pɛlɛi nui Yai-Laa ə dɔɔ wulɔ hiɛ mą, yɛ́ baa?» 15 Davidə ə bɔ mun dɔ̨nɔ̨ təli, yɛ mą: «Lí ə́ nwɛlɛɛ ɓomun ŋɛ̨i paa.» Yili ə ɉulɔnon tii paa. 16 Davidə yɛ mą: «Ə́ ŋama wulu a lɛɛ ə́ kpɔɔ nwuɔ̨, mąąhɔlɔɓo, yáá ə́ kpɔɔ kalama ɓo, kɛi ə́ mo diɛ: ‹Nui Yai-Laa ə dɔɔ wulɔ hiɛ mą, ɲą́ą́ ɓə baa.›» Davidə ə haa wələ too Saulə da Ɉonatan di mɛ̨i 17 Davidə ə nwələi ŋɛ̨i too, yɛ wɔlɔ la Saulə da Ɉonatan di ha mɛ̨nį hu. 18 Bɛ̨ɛ̨i tələnmomun nwɔ hɛɓɛ́i hu. Davidə ə mo yɛ di Ɉuda lonnii mąąkwɛli gilɛn bili wələi tii ɓa. 19 Israɛlə nwɔ mawiɛ aa lɛɛ puu ni ɉaláá kulɔiɠaa ɓa! Gɔ́kuláá kpɛa-kpɛaa di too pələ kɛ ləi? 20 Ka hvo bələ taɠa Gatə daai, Ka hvo ɉukulɔ Askelɔn bələɠaa pɔ. Ə gɛ, Filisti nɛ̨ąą di hvo pa ləi maa kwəinɛ̨ɛ̨ kulɔ, gɛ́nɛ kpolɔwaɠaa lonnii nɛ̨ąą di pa nee kɛ pili yələi a kwəinɛ̨ɛ̨. 21 Gilboa yeeɠaa, ka hvo kɛa tulɔ hɔlɔɓo, ə mą kɛ luwuluwu; tíi hvo kɛa lɛlɛ ka mɛ̨i. Mąąhɔlɔɓo, naa ɓə gɔ́kulááɠaa di wɔ hə́mə ɓɛlɛ ə kpɛɛ laa mą. Saulə nwɔ hə́məi tii, yai mąą hvo kɛ tii li a wulɔ, 22 Kɛlaa, ə kɛi mąątí a nuąi ə kɛi di paa di ɲąmą, da kɔ́kuláá wulɔ. Ɉonatan nwɔ kilɛn hvo ta kɛ pu li nu ta tɔwɔ. Saulə nwɔ kɔ́ kɔ́ ɓɔwai hvo kɛi tɛ taai a mąą kpalaa. 23 Saulə da Ɉonatan di wɛli ə kɛ di kee ɓa, di hvo di ɓɛlaɓo li di wɔ yɛnɛ̨ɛ̨ hu, ə mą kɛ haa hu. Di kɛi gilɛ həɠə di yee tɛɛ Kuwɔ ɓa, di huwalawala yee tɛɛ yala ɓa. 24 Israɛlə nɛ̨ɛ̨lɛa, ka Saulə haa wɔlɔ ɓo; ya ɓə kɛi ka mąąyili a nįnįkɔ́lɔ həɠə, da mąąyili hɛn nɛlɛɛɠaa, yɛ ka mąą həɠəɠaa mąą pu a hɛni. 25 Gɔ́kulááɠaa di lɛɛ pələ kɛ ləi gɔ́ hu? Ɉonatan, lə mɛ̨nį ɓa ə́ kaa tooni ɉaláá kulɔi? 26 Ee kə! Níikələnŋąąi gwə́i ə́ mąą mɛ̨nį hu Ɉonatan, ną́n non, ə́ wɛli aa lɛɛ mą́ą́ kpɔ kɛnɛ̨! Ə́ wɔɔ nɛ̨ɛ̨laa ə kɛ mą́ą́ a mɛ̨nį ŋąą nɛɛ. Ŋaa nɛɛi kɛ mą́ą́ ə tɛɛ nɛ̨ɛ̨nu nwɔ wɛlikɛ maa ɓa. 27 Gɔ́kulááɠaa kpɛa-kpɛaa tii, daa too kɔ́ hu, gɔ́ kɔ́ kwɛli hɛnŋaa tii hu aa kala. |