Rutə 4 - Yálá laawoo hɛɓɛ (dc)

Boozə ə Rutə həɠə a nɛ̨ą

¹ Nąąlɔwai, Boozə ə li ə hee ɉįi la, ɓɛi da kɛ mɛ̨nį ɓo kɛi laa, ə lɛɛ laa heeni, nui ŋɛ̨i ə mąą mɛ̨nį ɓo Rutə ɓa, yɛ kɛ mą: «Yaa ɓə mąąnɛ̨ɛ̨ ə ə́ mąą mɛ̨nį ɲɛ̨i kulɔ,» yili yɛ pa tɛɛi. Boozə ə dəli, yɛ mą: «Mɛ̨i yɛ́ ɓə! 'Lɛɠɛ ɓɛ, ə́ heei kaa laa.» Yili ə pa, ə hee.

² Boozə ə daa kalanɉon pow təli, da diɛni di heei ə kɛ tanɔ̨n. Heei di mo,

³ Boozə yɛ Elimelɛkə kaayɔwɔ ɓa: «Ə́ kili kaa ɉu yɛ́ kɛ: Naomi aa həɠə Moabə lɔi hu aa pa! Yili ɓa, ɉɛnŋaai kɛ a gu kaayɔwɔ Elimelɛkə nwɔɔ, Naomi yɛ, gaa nɔwɔtɔɔi.

⁴ Yili ɓə gɛ, ŋą́ ə́ kili pu ɉu, ŋą́ mo yɛ́, gɛ́ yɛ́: Ɉɛnŋaa ŋɛ̨i mąą mɛ̨nį, ə́ tɔɔi kɛ ɉu, nuą ŋɛ̨i ɓɛ da daa kalanɉonŋaa kəlee di ɲɛ̨i ɓa. Akɛ ə́ kaa ə́ tɔɔi kɛi nwun mąąɓo mɛ̨nįi ŋɛ̨i hu, gɛ tii. Akɛ hvá pɛli mą, yɛ bələi gaa la, yɛ́i ŋɛ̨i ya həɠə laa ɲą́ą́ ɓə laa; ə́ ə́ woo hukulɔ mą́ą́.» Ɉulɔnui tii yɛ mą: «Gáá pai nɔi yai.»

⁵ Boozə ə pənə yɛ mą: «Akɛ ya nɔi ya Naomi yəi, Moabə nɛ̨ɛ̨nui ŋɛ̨i a Rutə, ya ɉəɠə a ə́ nɛ̨ą, ə gɛ, ɉilɛ pulu hɛnŋaa tii, di lɛɛ bɛlɛ́n.»

⁶ Ɉulɔnui tii yɛ Boozə ɓa: «Akɛ yili kaa tii, vá pɛli ɉɛnŋaa tii nwun mąąɓoi. Mąąhɔlɔɓo, ŋą́ gɛ ləi tii, gwɛ́lin ɉu kalaa li. Yili ɓa, dɔ́ɔ́i tii həɠə, ə́ ɉɛnŋaa nwun mąąɓo. Mąąhɔlɔɓo, vá pɛli mą.»

⁷ Tɔlɔɔ, Israɛlə lɔi hu, mɛ̨nįi kɛ di lɔwai yɛ kɛla mɛ̨nį lɔpee gəlee hu; yɛi kɛ a nwun mąąɓo mɛ̨nį, a wala kɛ tii hɛn da mąą hvalin mɛ̨nį, ya ɓaa: Nu tɔnɔ̨ a kɔ́lɔ kulɔ gɔwɔ ŋą ə dɛɛ mɛlan bɔ.

⁸ Yili ɓə gɛ, nui ŋɛ̨i kɛ mąąnɛ̨ɛ̨ ə nwun mąąɓo, ə gɔwɔ ɲą kɔ́lɔ kulɔ ə dɛɛ Boozə pɔ, yɛ mą: «Ɉɛnŋaa tii nwun mąąɓo.»

⁹ Nąąlɔwai Boozə ə mo galanɉonŋaa da nɔi nuą kəlee diɛ, yɛ diɛ: «Kaa kɛ háákələi a nwɛ́i gɛla. Ɉɛnŋaa ŋɛ̨i kɛ a Elimelɛkə nwɔɔ, yɛ ɓo a Kiliɔn nwɔɔ da Malɔn, ŋą́ą́ gəlee nwun mąąɓo Naomi yəi.

¹⁰ Yili pulu, Moabə nɛ̨ɛ̨nui ŋɛ̨i a Rutə, yai kɛ a Malɔn nɛ̨ą, ŋą́ą́ ɉəɠə, ə gɛ, ŋą́ Malɔn huwu kulɔ, naa hvo pa kpɛɛ gaayɔwɔɠaa lɔwai di pɔ taai. Ka káá háákələi a mąą kɛla.»

¹¹ Galanɉonŋaa da nuąi kpɔ kɛ laa, gəlee diɛ mą: «Kwaa kɛ a gɛla. Di lúwɔ́ too Boozə ɓa diɛ mą: Nɛ̨ɛ̨nui ŋɛ̨i háákələi pai lɔi ə́ yəi bɛlɛ́n, Yai-Laa ə lúwɔ́ too mą; gɛ́ pələ ə kɛ yɛ Ɉakɔbə nɛ̨ąni hveelɛi: Rasɛlə da Lea. Diɛ ɓə Israɛlə nu huwu hɔlɔɓo. Yai-Laa ə ə́ yee laholoon Ɛfrata lonnii lɔwai, ə ə́ laa tɛ Bɛtleɛmə.

¹² Yai-Laa ə nɛ̨ɛ̨nui ŋɛ̨i kwəi nwun, ə lon damąą kaa. Ə́i wɔ pɛlɛ́i kɛ yɛ ə́ kalá Pɛrɛsə, yai Ɉuda ə gaa Tamarə ɓa.»

Obɛdə hɔlɔɓo mɛ̨nį

¹³ Boozə ə Rutə həɠə a nɛ̨ą. Yai-Laa ə lúwɔ́ too Rutə ɓa, ə koo həɠə, ə lon ɉulɔnu hɔlɔɓo.

¹⁴ Bɛtleɛmə daai nɛ̨ąą diɛ Naomi ɓa: «Mąąwiɛ ə kɛ Yai-Laa ɓa! Hvo hvaa li mą hvo ə́ lɛɛ laa, yii ə́ nwun mɛ̨i mun hva kɛ yɛ́. Kuɔ Yai-Laa ə hvaa mą ə́ mąnįn tii laa ə kɛnɛ̨ Israɛlə lɔi hu.

¹⁵ Gaa pai ə́ ɲɛ̨i pɔ̨nɔ̨i, ə ə́ pɔlɔɔ ɲąąkɔn. Ə́ lon nɛ̨ą tanɔ̨n ŋɛ̨i, viɛlaɓoɔi ə tɛɛ lon ɉinąą mɛ̨ihveelɛ ɓa. Mąąhɔlɔɓo, ə́ wɛli kaa mą, aa mąnįn dɛɛ ə́ pɔ.»

¹⁶ Naomi ə nokolo hon, ə bɛlɛ gəŋəla, ə lɛɛ ɲəi ə gulɔ ɉu.

¹⁷ Naomi mɛlaa nɛ̨ąą di kɛi kɛ mą: «Naomi aa lon ɉulɔnu hɔlɔɓo.» Nɛ̨ąą tii di nokoloi tii laa hee a: Ovɛdə. Ovɛdə tii ɓə kɛ a Ɉɛse nąn, Ɉɛse yɛ ɓo a tɔɔmun Davidə nąn.

Davidə galaɓɔlɔni laa ka

¹⁸ Davidə galaɓɔlɔni laa ka; ə gɔwɔ tɔɔ Pɛrɛsə ɓa: Pɛrɛsə lon maa kɛ a Hɛsrɔn.

¹⁹ Hɛsrɔn non mąą kɛ a Ramə. Ramə lon maa kɛ a Aminadavə.

²⁰ Aminadavə lon maa kɛ a Nasɔn. Nasɔn lon maa kɛ a Salma.

²¹ Salma lon maa kɛ a Boozə. Boozə lon maa kɛ a Ovɛdə.

²² Ovɛdə lon maa kɛ a Ɉɛse. Ɉɛse lon maa kɛ a Davidə, yai kɛ a tɔɔmun.