Rutə 3 - Yálá laawoo hɛɓɛ (dc)Rutə ə yii Boozə kɔ́wɔ la 1 Yələ ta, Naomi ə mo Rutə ɓa, yɛ mą: «Nón! Mąą nɛ̨ɛ̨ ŋą́ gɛ pələ kwɛli mą ə́ wɔ yɛnɛ̨ɛ̨ ɲąą ə nɛ̨ɛ̨. 2 Yɛ bələi ə́ gbaɠala kɔ́lɔn na, Boozə kaa a ɉílɛ pulu mun da. Ɲələ wilii hu, nuą kaa li Boozə nwɔ kpai tan ɉi di mąą hvɛɛ. 3 Ə́ waa a nɛlɛɛ, ə́ ə́ mąątí. Ə́i wɔ həɠə lɛlɛɛɠaai kɛ yɛ́, ə́ li ɓɛi di kaa kpai tan ɉi laai; hvo ə́ kpɔwɔ lɛ mą, ə lɛɛ la ɉu, ə kpɛɛ a naa mįɛ da gbələɛ. 4 Ɓɛlɔwai gaa pai laai la, ɓɛi a laa laa, ə́ kili lɛɛ nąą hu, yá lɛɠɛ mą nąąlɔwai, ə́ ɲíi həɠə, həɠə gɔwɔ mɛ̨i, ə́ lɔ mu, ə́ laa gɔwɔ la. Yɛ́ mą: ‹Ə́ nįnįn bɛlɛ mɛ̨́i.› Nąąlɔwai yii mąąnɛ̨ɛ̨ ə́ gɛ, a mo yɛ́.» 5 Rutə yɛ Naomi ɓa: «Bələi tii ə́ mo la, gáá gɛi tii.» 6 Rutə ə li gbai tan ɉi, bələi tii ɉilɛ lee ə mo la mą, ə gɛ tii. 7 Boozə ə naa mįi, ə gbələ, gwəi ə nɛ̨ɛ̨, ə li ə laa gbai hįį ta kwɛlɛ; Rutə ə lɛɠɛ mą, ə ɉəɠə həɠə gɔwɔ mɛ̨i, ə laa. 8 Kwiihɛ̨ą lɔwai, Boozə ə ɲįnąą ɓo lɔ tii tɔ̨nɔ̨ wulu. Ə muhəɠə ə hee ɲąąɓa, ə nɛ̨ɛ̨nu ta kaa laani gɔwɔ la. 9 Yɛ nɛ̨ɛ̨nui tii ɓa: «Gbɛɛ ɓaa a yɛ́?» Nɛ̨ɛ̨nui tii yɛ mą: «Ɲą́ą́ Rutə ə́ wɔ lúwɔ́ nɛ̨ą, ɲą́ą́ li. Gɛ́ ə́ ə́ nįnįn bɛlɛ mɛ̨́i, mąąhɔlɔɓo, yɛ́ ɓə mąąnɛ̨ɛ̨ ə́ ə́ mą́ą́ mɛ̨nį ɲɛ̨i kulɔ.» 10 Boozə yɛ mą: «Rutə! Yai-Laa ə lúwɔ́ too yɛ́. Mɛ̨nį ŋɛ̨i yáá gɛ, aa nɛ yɛ yii kɛ mąąnɛ̨ɛ̨ ə́ gɛ ə́ hilɛ pulu nuą diɛ, ya ka ŋɛ̨i ə́ gɛ. Yii tɔlɔɔ ə́ gɛ a ə́ hilɛ lee, da yii yáá gɛ, aa kɛnɛ̨ a tɛɛ mą; gɛ mɛ̨nį hvo kɛ hulɔnu takpɛli wɛlilakɛ li, yɛ ə kɛ a hɛn gɔw nąmu, yɛ ə kɛ a yeehvowolomun. 11 Yili ɓa, yii ə́ kaa gwɛlii, gáá yili kɛi yɛ́, liihɛlɛn və kɛ yɛ́; mąąhɔlɔɓo, nu kəlee di gɔlɔn diɛ ə́ kaa a nɛ̨ɛ̨nu ɓɛlɛ mąą. 12 Yiihu, ə mą kɛ ŋą́ pɛli ŋą́ ə́ mąą mɛ̨nį ɲɛ̨i kulɔi, nu takpɛli kaa laa mąą laa yɛ ɓo mą ə tɛɛ mą́ą́. 13 Gu lɛɛ ɓɛ yələ ə ɓɔ, yələ a ɓɔi, akɛ mąą nui a pɛli ə́ mąą mɛ̨nį ɲɛ̨i kulɔi, a kɛ tii, mɛ̨nį lɛlɛɛ li. Kɛlaa, a wala kɛ bɔ hvo ə́ mąą mɛ̨nį ɲɛ̨i kulɔ, gáá nwóó kwɛlɛi yɛ́ Yai-Laa ɲɛ̨i ɓa, gɛ́ yɛ́: A wala pɛli mą, yii mąąnɛ̨ɛ̨ ŋą́ gɛ, ŋą́ yili kɛ, 'lɛɛ ɓɛ yələ ə ɓɔ.» 14 Rutə ə lɛɛ laani Boozə kɔ́wɔ la, ə lɛɛ la ɉu, yələ ə ɓɔ. Kɛlaa, ə muhəɠə yələ ɓɔi lɔwai, ə kulɔ, nu ta hvo gbaɠala kaa. Mąąhɔlɔɓo, Boozə hvo kɛ bɔ, nu ta hvo Rutə pa mɛ̨nį laa kili kɔ́lɔn. 15 Boozə yɛ Rutə ɓa: «Ɉəɠəi ŋɛ̨i biliɛ ə́ kalan ɉu, ɉu hvolón, ə́ ə́ yee kɛ mą kpąą.» Rutə ə nwɔ həɠəi hu hvolóon. Boozə ə kpai gəgən ɉu mɛ̨ida kɔ́ɔn, ə Rutə laatɛ mu, yɛ li taai. 16 Pai Rutə ə mo ɉilɛ lee pɔi, yili yɛ mą: «Nón! Ka gɛ ləi?» Bələi kpɔ ə kɛ la, Rutə ə gəlee hukulɔ ɉilɛ lee ɓa. 17 Rutə yɛ nwɔ̨nɔ̨ mą: «Ɉulɔnui tii ɓə gəgən ɉu mɛ̨idai ŋɛ̨i tɛɛ bɔ́, yɛ mą: Mąą hvo nɛ̨ɛ̨li və́ lɛɛ a ɲéé howolo gɛ́ pa ɉílɛ lee pɔ.» 18 Naomi yɛ mą: «Nón! 'Lɛɛ ɓɛ ə lɛɛ la ɉu, bələi mɛ̨nįi ŋɛ̨i ŋąą kaa pai kpɛɛi la, ə́ nąą kaa. Mąąhɔlɔɓo, ɉulɔnui tii lii hvo pai laai, akɛ hvo mɛ̨nįi tii ɲɛ̨i kulɔ li háákələi.» |