Rutə 2 - Yálá laawoo hɛɓɛ (dc)Rutə ə kɛi kpai kpan ɉu kwɛli Boozə yəi ɲɛa 1 Naomi ɉilɛ Elimelɛkə pulu mun da ə kɛ laa, yɛ ɓo a nu mąą wia, diɛ kɛ naa ɓaa Boozə. 2 Hvoló ta, Rutə yai a Moabə nɛ̨ɛ̨non ə mo Naomi ɓa, yɛ mą: «Gɛ́ ə́ hvaamą, ŋą́ li kpai kpan ɉu ta ɓa, nąmu a ɲɛ̨́i mąąwɛli kaa, ŋą́ gban ɉu kwɛli.» Naomi yɛ mą: «Nón! Ŋą́ą́ hvaa mą, li.» 3 Lii Rutə ə mo kpai tee nuą pulu gban ɉu kwɛlii, nwun na ə nɛ̨ɛ̨, ə li Elimelɛkə pulu mun ŋɛ̨i da kɛ naa ɓa: Boozə, ɲəi ɲɛa. 4 Nąąlɔwai, ɉu hvo kpɛli kwɛa, Boozə ə həɠə Bɛtleɛmə, ə pa ɲəi ɲɛa. Ə nwoo pili gbai tee nuą diɛ, yɛ diɛ: «Yai-Laa ə kɛ ka pɔ!» «Diɛ kpɛli diɛ mą: Yai-Laa ə lúwɔ́ too yɛ́.» 5 Yili pulu, Boozə yɛ gbai tee nuą nwun nąmu ɓa: «Nɛ̨ɛ̨nu nɛlɛ ɓəi ka pului?» 6 Yili yɛ mą: «Moabə lɔi hu nɛ̨ɛ̨non tii li, yai lɛɛ Naomi pulu, yɛ həɠə la Moabə lɔi hu, yaa li. 7 Pai nɛ̨ɛ̨nui tii ə mo, ə kɛ kuɔ: Gɛ́ ka hvaamą ŋą́ gbai kpan ɉu kwɛli, yiiɠaai da kulɔ gbai tee nuą yəi yɛ too, gɛ́ ɲɛɠɛ ka pulu. Pai kɛ ə mo, ə gɔwɔ tɔɔ yələ wala pɔ, ə həli la yiihu ɓa, hvo ni hee li hvo vįitɔɔ.» 8 Nąąlɔwai, Boozə ə mo Rutə ɓa, yɛ mą: «Ə́ wəli tɔɔ, gáá ə́ liɛwoo kɛi; hvo kɛa li tíi takpɛli hu, kpai kpan ɉu kwɛlii, kɛ lɔ kɛa pai ɓɛ, hvo ə́ mąą kwɛa ɓɛ ɓa. Kanąn nwɔ́ kpai tee nuą ŋɛ̨i diɛ. 9 Ɓɛi nwɔ́ kpai tee nuąi da kɛi li laa, ə́ ɲɛ̨́i hee diɛ. Nɛ̨ąi di kaa di pulu diɛ kpai kpan ɉu kwɛli, ka diɛni ka lɛɛ ka kee pɔ, ŋą́ą́ ə́ mąą liɛwoo kɛ ɉinąą tii diɛ, gɛ́ diɛ di hvo mɛ̨nį ta kɛ a yɛ́. Kpələ wɛli a ə́ hon, ə́ li ə́ di kpələ yá ta kpələ.» 10 Nąąlɔwai, Rutə ə pɛlɛ Boozə kɔ́wɔ mu nɔi ɓa, yɛ mą: «Lə ɓə kɛ yai ə́ mɛ̨inɛ̨ɛ̨ kɛnɛ̨i kɛ mą́ą́ hvo gɔ́lɔ́n; gɛ́ ɓo a nwɛ̨ą?» 11 Boozə yɛ mą: «Daa ə́ mąą mɛ̨nį kəlee hukulɔ mą́ą́; bələi ə́ túwɔ́ la a ə́ hilɛ lee, yai ə́ ə́ kili kulɔ ə́ wɔ lɔi hu, nuąi hvó wɔlɔ kɛ di kɔ́lɔn, yɛ́ lɛɛ di pɔ, daa yili kəlee ɓo mą́ą́. 12 Gɛ́ Yai-Laa a Israɛlə nwɔ Yálá, yai ə́ pa ə́ mąąkilɛi vaŋąn mu, ə ə́ túwɔ́ pələi tii hvɛla kulɔ.» 13 Rutə ə mo kɛa Boozə ɓa nąąlɔwai, yɛ mą: «Nwɔ́ mɛ̨nį nąmu, nwɔ́ nu lɛlɛɛ kpɔkpɔɔ ɓaa a yɛ́. Mąąhɔlɔɓo, nwɛlikɛmąą woo ŋɛ̨i yáá mo mą́ą́, yili aa váŋąlɔ; ɲą́ą́ ŋɛ́i kwa ə́ wɔ tínɛ̨ąąi ta ku hvo kpɛli pɛli li.» 14 Yili pulu, kɔ̨nɔ̨n mįi kɛi lɔwai, Boozə ə mo Rutə ɓa, yɛ mą: «'Pa, gu kɔ̨nɔ̨n mįi. Nɛɠɛ ta həɠə ə́ nɔ nɔɔ kponą yá hu.» Rutə ə pa ə hee gbai tee nuą kwɛlɛ. Boozə ə kpai kɔ́w yələn ŋąą ta həɠə, ə dɛɛ bɔ. Rutə ə kɔ̨nɔ̨n mįi, ə pilɛ, ə gbəli lɛɛ. 15 Yili pulu, Rutə ə həɠə yɛ li gbai kpan ɉu kwɛli. Nąąlɔwai Boozə ə mo nwɔ kpai tee nuą diɛ, yɛ diɛ: «'Ká nɛɛ laa, gbai yiiɠaai da kɛ puu ni gbai hįįɠaa lɔwai, ə di yɛɠɛ, ka hvo mąą ɲɔw. 16 Ka gili, kaa ɓo daɠaa diɛ kaa bu, yɛ ɲɛɠɛ, kɛlaa, nu ta hvo haŋą mą.» 17 Rutə ə tuwɔ kpai kpan ɉu kwɛli kpɔ ɉólótótó Boozə yəi ɲɛa ə lɛɛ la ɉu, yələ ə wulu. Yii ə ɉɔlɔɓo, ə gəlee tan, ə gɔw pu ɓíi kɛnɛ̨ ta hu, ə naahvɛɛ. 18 Ə ɉəɠə ə tɛ la taai, ə nɛ ɉilɛ lee ɓa, ə mą kɛ gɔ̨nɔ̨n tii ə mįi laa gbəlii lɛɛ, ə ɉəɠə ə dɛɛ ɉilɛ lee pɔ. 19 Ɉilɛ lee yɛ mą: «Mįnɛ̨ pələ ɓə háá ə́ kaa gbai kpan ɉu kwɛli la? Gbɛɛ yəi ɲɛa ɓə háá ə́ kaa laa? Nui ŋɛ̨i mɛ̨inɛ̨ɛ̨ kɛ yɛ́, Yálá ə lúwɔ́ too mąą nu ɓa.» Nąąlɔwai, ɓɛi Rutə ə túwɔ́ laa, nui ə kɛ ɲəi ɲɛa, ə yili kəlee hukulɔ mą, yɛ mą: «Nui ŋą́ kɛ ɲəi ɲɛa, da kɛ naa ɓaa: Boozə.» 20 Naomi yɛ Rutə ɓa: «Ŋą́ą́ gaa gɛ́ diɛ: Yai-Laa ə nwoo kwɛlɛ Elimelɛkə da non ɉinąą hveelɛi tii daa haa diɛ, ya ka aa bɔ mɛ̨nį kɛ kuɔi ŋɛ̨i a nu hvulúɠaa kuɔ. Yai-Laa ə lúwɔ́ too ɉulɔnui tii ɓa. Boozə kaa a gu wɔ nu, diɛ ɓə mąą nɛ̨ɛ̨ di gu mąą mɛ̨nį ɲɛ̨i kulɔ.» 21 Rutə yɛ ɉilɛ lee ɓa: «Ɉulɔnui tii ə mo nwɔ̨nɔ̨ mą́ą́, yɛ mą́ą́: Kɛ pai yɛ lɛɛ nwɔ kóló kɛ nuą pulu ə lɛɛ la ɉu, gbai da mɔ̨nun dəɛ ə kpɛɛ ɉu.» 22 Naomi yɛ Rutə ɓa: «Aa kɛ a nɛlɛɛ nón nɛ̨ɛ̨nu; kɛ lii yɛ lɛɛ nwɔ tí nuąi pulu hvo li yɛɛ takpɛli ɓa, ə gɛ, di hvo pa ə́ laanɔ̨nwɔ̨ ɓo.» 23 Rutə ə lɛɛ Boozə nwɔ kpai tee nuąi pɔ, yɛ gban ɉu kwɛli, ə lɛɛ la ɉu, gbai da mɔ̨nun dəɛ kəlee ə kpɛɛ ɉu. Da ɉilɛ lee lɔ ɓə kɛ di kee ɓa. |