Piɛrə veelɛ 3 - Yálá laawoo hɛɓɛ (dc)

Jesus pa mɛ̨nį hva ɉəɠə ma

¹ Nwɛ́li kɛ mąą nuą, Ɉɛɓɛ́i ti ŋį́ dɛɛ kaa veelɛ kɛɛnąą ka ŋɛ̨i. Ɉɛɓɛ́ hveelɛi ti hu, galanŋąa ŋɛ̨i gáá naa kilitooi ka ŋą, gáá gɛi ti, ə gɛ, ŋį́ ka wɔ kiliŋąhiɛ ɲɛ̨ilaa ɓo.

² Gáá bɔ ka ka kiliŋąhiɛ Yálá kwəi mɛ̨nį hukulɔ nuą woo ɓa, da gu Ną́mu Jesus Kristə nwɔ liɛwooɠaa diɛ, yiiɠaai Jesus nwɔ tiɓo kə nuąi di ka kalan na.

³ Ka ka kili lɛɛ ɉu kaa diɛ: Yɛnɛ̨ɛ̨ ɲąąkpɛɛi lɔwai, nu tamąą kaa pai kɛi túwɔ́i yɛ pələi di kpɔɔ kiliŋąhiɛ kaa la. Ə lɛɛ, diɛ yɛlɛ kulɔ ka hu.

⁴ Di kaa pai kɛi kaa: «Jesus ə kɛ kaa: ‹Gáá pai›; kɛlɛi? Akɛti, ə wɔɔ kɛa aa pa? Mąąhɔlɔɓo, ku nąnni diɛ kpɔ wɔlɔ haa, mɛ̨nį kəlee kaa lɔ ni a gɛ pələ, yɛ pələi wɔlɔ yɛnɛ̨ɛ̨ ə gɔwɔ tɔɔ la.»

⁵ Yii da kɛ lɛ̨ąi mą, ya ɓaa: Yálá aa wɔlɔ yələkɔlɔn da lɔi di pɛli, a naa woo, ɉu aa kwɛa, lɔi ə kulɔ yai, di bɛli a ya.

⁶ Yanwana lɔ ɓə wɔlɔ ɲɛnɛ̨ɛ̨ tɔlɔɔ ti nwun napili.

⁷ Yálá lawoo tɔ̨nɔ̨i ti ɓə mo yɛ diɛ: Yiihu, yələkɔlɔn da lɔi ŋɛ̨i, nwɔ̨n gaa pai di kələn ɉi. Yálá aa ɲee kɛ diɛ, ə lɛɛ la ɉu, volói gaa pai mɛ̨nį ɲɔ̨n gɛ nuą kiti teei la, yɛ ɉəli.

⁸ Nwɛ́li kɛ mąą nuą, mɛ̨nį tɔ̨nɔ̨ ɓə gaa ɉu, yii mąą hvo nɛ̨ɛ̨li ka hvo lɛ̨ą ma, ya ɓaa: Ną́mu Yálá ɲɛ̨i ɓa, hvóló tɔ̨nɔ̨ kaa a kwɛlan nwaa tɔ̨nɔ̨, kwɛlan nwaa tɔ̨nɔ̨ yɛ ɓo a hvóló tɔ̨nɔ̨.

⁹ Ną́mu Yálá nwɔ mįnɛ̨ həɠɛɛ hu hvo kwɛa li yɛ pələi nu taɠaa da kɛ di kiliŋąhiɛi la, diɛ kɛ mą: Hvo pai ɉa. Kɛlaa, nii ɓə aa naa nuą pɔ, hvo bɔ nu tɔ̨nɔ̨ kpɛli nwun na hvo pili, kɛlaa, gaa bɔ nu kəlee di tinɛ̨n di həɠə mɛ̨nį ɲɔ̨n bulu.

¹⁰ Ną́mu Jesus pa hvóló kaa pai kɛi yɛ nwuɔ̨ mun bai lɔwai. Yələkɔlɔn gaa pai tɛɛi a tin gɛnɛ̨, yələ kwəi hɛnŋąa kəlee kaa pai həɠeen ɉi, lɔi da ɉu hɛnŋąa kəlee di kaa pai kələn ɉi.

^11-12 Yɛ bələi Ɉɛnŋąa ti kaa pai kalai la ti, pələi mąąnɛ̨ɛ̨ ka túwɔ́ pələ ə kɛ la, kaa kpinįi kaa gbaɠala kɔ́lɔn. Ɓɛlɔwai ka káá Yálá pa hvóló mąąkpɔn ɉi la, ka ka ŋąą wala, ə gɛ, ə pa a mąą hulaa. Mąąnɛ̨ɛ̨ ka wɔ kanąn Yálá ɓa laa ə ka túwɔ́ pələ mąąhəɠə. Ba hvóló, nwɔ̨n a yələkɔlɔn gələn, hɛnŋąai kpɔ di kaa yələkɔlɔn ɉu di həɠeen.

¹³ Kɛlaa, gu wɛi, yɛ pələi ə mįnɛ̨ həɠə la, yɛ diɛ: Yələkɔlɔn nįnɛ̨ da lɔi nįnɛ̨ kaa pai, ɓɛi tələnmolaa kaa tɔɔlaa kɛi laa. Yili ɓə gu kaa mąąkpɔn ɉi.

¹⁴ Yili ɓə gaa mą:, nwɛ́li kɛ mąą nuą, gwa kɛi mąąkpɔn ti kɛ, ka ka ŋąą wala, ə gɛ, a pa, ə ka káá liilaa hu, hɔn nɔpee ta hvo kɛ kaa.

¹⁵ Ka gɔlɔn kaa diɛ: Gu Ną́mu Yálá nwɔ liilaa hu kwɛa ti ɓə a ka wɔ nwun mąąɓo. Giliŋąhiɛi ti ɓə gɛ, gu kaayɔwɔ da gu wɛlikɛmąą mun Polə yɛ hɛɓɛ́ tɛɛ la kaa, yɛ pələi Yálá ə mąą kili tɛɛ la bɔ.

¹⁶ Yili ɓə ə bɛ̨ɛ̨ nwɔ hɛɓɛ́ɠaai hu, yɛ hvilɛn na mɛ̨nįi ŋɛ̨i ɓa. Kɛɛnaa tamąą kaa Polə nwɔ hɛɓɛ́ɠaai hu, yii nuąi di hva mɛ̨nį kpaɠala kaa, ə lɛɛ, di hvo kalan ni, da nwoo mąąpənə, yɛ pələi da kɛ gɛi la a Yálá lawoo naa taɠaa. Da gɛ ti di kpɔɔ nwun napili mɛ̨nį ɓa.

¹⁷ Yili ɓə gaa mą:, nwɛ́li kɛ mąą nuą, ka wɛi, ka kili aa pu kɛa mɛ̨nį kəlee hu, ka ka kpɔɔ mɛ̨i kaa, ka hvo nɛɛ laa nu ɲɔ̨nwɔ̨ɔ̨ɠaa di hvo ka həɠə bələ mɛ̨i, di hvo ka wɔ kilitɔɔ mąą kulɔ ka yəi.

¹⁸ Kɛlaa, ka tɛ tɔwɔ gu Ną́mu Yálá da gu Nwun mąąɓomun Jesus Kristə kɔ́lɔn ŋąą hu, da nwɔɔ mɛ̨inɛ̨ɛ̨ hu. Ə həɠə yiihu ɓa, ə lɛɛ la ɉu lɔwai kəlee, mąąwiɛ ə kɛ Jesus Kristə ɓa. Yálá ə kɛ ti!