Piɛrə veelɛ 2 - Yálá laawoo hɛɓɛ (dc)

Lɛɛ kalan gɛ nuą

¹ Tɔlɔɔ tɔlɔɔ, lɛɛ loloɓo nuą di kɛ Yálá nwɔ nuą lɔwai; kaa kpɛli, lɛɛ kalan gɛ nuą kaa pai kɛi ka lɔwai. Di kaa pai lɛɛ kalan bələ tamąą lɔi ka lɔwai, ə lɛɛ, diɛ lənə di Nwun Nąmu Jesus ɓa, yii di nwun mąąɓo, yili pulu, diɛ nwun napili mąą kpuɔ di kpɔɔ ɓa.

² Nu tamąą kaa pai hvilɛn ɉi di túwɔ́ pələ ɲɔ̨nŋąa ti pulu, diɛi ti di mąą mɛ̨nį ɓa, nu tamąą kaa pai kɛi həɠəi tɛ̨ą pulu.

³ Ə lɛɛ, di wɔ hɛn nwɛli laa mąą mɛ̨nį ɓa, di kaa pai kɛi tooi ka mɛ̨i, diɛ hɛn gulɔ ka yəi a lɛɛ woo, kɛlaa, di kiti tee mun gɛ pələ pɛliɛi ə di kiti tee, ə lɛɛ, di wɔ nwun napili hu hvo kwɛa li.

⁴ Akɛ malakaɠaa ŋɛ̨i hɔn ɲɔ̨n gɛ, Yálá hvo di ɲɛ̨i mąą wɛli kaa, ə di pili kpinį hu, lɔwa kpon gweaa hu ɉahanąmą, di ɓo laa diɛ kiti teei lɔwai mąą kpɔn.

⁵ Ɲɛnɛɛ tɔlɔɔ yii kɛ laa Noe nwɔ lɔwai hu, ɉu nuą ɲɛ̨i wala-walaa, Yálá hvo di ɲɛ̨i mąą wɛli kaa, ə di nwun napili a yanwana, hvo kɛli lɔ Noe ŋɛ̨i kɛi tələnmo woo laa həli, yaa da nu mɛ̨ihveelɛ lɔ ɓə di nwun mąą ə ɓo.

⁶ Yili pulu, Yálá ə Sɔdomə taa da Gomorə taa di hvɛla kɛ a nwɔ̨n, yii ə ɉu nuą kəlee nwun napili, di wɔ kili walawala laa mąą mɛ̨nį ɓa. Yálá ə yili kɛ ti, ə gɛ, ə nɛ mɛ̨nį ɲɔ̨n gɛ nuą diɛ, a mɛ̨nįi pai kɛi a diɛ, mąą pɔɔ kɔ́ɔn.

⁷ Ə lɛɛ, Lɔtə ŋɛ̨i kɛ a tələnmomun, yii nuą ti di wɔ túwɔ́ pələ ə kɛi nii kələn gwəi, Yálá ə nwun mąąɓo.

⁸ Mąąhɔlɔɓo, Lɔtə ti kɛ a dəlimoɔ, da diɛni ɓə kɛ kɛɛnąą tɔ̨nɔ̨, yɛ di kɛ mɛ̨nį ɲɔ̨nŋąa ti naa kaa, yɛ bələ mɛ̨n, yili yɛ nii kələn gwəi.

⁹ Pələi nuą di kanąn ŋąą Ną́mu Yálá ɓa a di kulɔ la hukɔɔn mɛ̨nį hu, ə bələ kɔ́lɔn. Pələi nwɔ̨nɔ̨ mąąnɛ̨ɛ̨ ə mɛ̨nį ɲɔ̨n gɛ nuą hon na, yɛ pa di hutɔɔ kiti teei lɔwai, ə bələ kɔ́lɔn.

¹⁰ Nuąi Yálá kaa pai di tooi gaho ŋą, diɛ ɓaa: Nuąi di hvilɛn ŋąą i di kpɔɔ liiɓa pili diɛ gɛ, diɛ Yálá nwɔ kɛnɛ̨ laa ɓɛlɛkpɛɛ ma. Nɛɛ kalan gɛ nuą ŋɛ̨i ŋį́ di mąą mɛ̨nį ɓo kaa, di laai di kpɔɔ la, di hva ɲɔw Yálá nwɔ pɛli hɛnŋąa mąąwiaɠaai di kaa yələkɔlɔn ɉu diɛ, diɛ nwɔ̨nɔ̨ di lalan.

¹¹ Pələi mąn kpɛli malakaɠaa kaa la, di hvaŋą kɛnɛ̨, di huwalawalai ə tɛɛ nɛɛ kalan gɛ nuą ti diɛ, di hva kpɛli woo ɲɔ̨n mo Yálá pɛli hɛnŋąa ti diɛ, Ną́mu Yálá ɲɛ̨i ɓa.

¹² Kɛlaa, nuą ti di kaa yɛ lɔwɔ huwɔɠaa, di kili kpɛɛ di yəi, di kulɔ lɔ yɛnɛ̨ɛ̨, di paa mɛ̨nį ɓa. Hɛn di hvo gɔlɔn ya ɓə da nalan. Di haa pələ kaa lɔ pai kɛi yɛ lɔwɔ huwɔɠaa.

¹³ Mɔ̨nɔ̨i ti di kaa naai nuą mɛ̨i, mɔ̨nɔ̨ lɔ ɓə pai kɛi a di hvɛla. Daa kɛi ɓɛlɛkpɛɛ mąą túwɔ́ ɓo a hvóló ŋą, yili ɓə gaa a di liiɓa. Da kɛ ka pɔ laa mįi kɛi lɔwai, yili kaa a nwumɛ̨ mɛ̨nį da kɔ́wɔ túwɔ́ kwɛni. Ə lɛɛ, da kɛi nuą ɓowo, yili ɓə a di kwəinɛ̨ɛ̨.

¹⁴ Wɛli hon nɛ̨ą ɓə di kaa bɔ diɛ di kaa, nɛ̨ŋɛ̨n ɉəɠɛɛ hva di hviikpɛɛ, nuąi hvaŋą hvo di yəi, diɛ ɓə da too di mɛ̨i. Hulu hɛn Ɉɔlɔɓoɔ mąą gbana laa ɓə gaa di yəi. Yálá nwɔ nɛ̨ŋɛ̨nnaa kaa di mɛ̨i.

¹⁵ Daa həɠə tɛ̨ą pələ mɛ̨i, daa hvilɛn lan bələ mɛ̨i. Bosɔrə lon Balaamə nwɔ pələi ɓə daa hvilɛn mɛ̨i. Hɛn nwɛli laa mąą mɛ̨nį ɓa, Balaamə ə túwɔ́ pələ ɲɔ̨n gɛ, ə gɛ. Ə wali hɔlɔɓo.

¹⁶ Kɛlaa, nwɔ woo tee ŋą laa mąą mɛ̨nį ɓa, hoohvaalən yii hva hvaa, ə nu woo ɓo, ə gɛ, ə Balaamə nwɔ ɓowo mɛ̨nįi ti kpəla bələi.

¹⁷ Nɛɛ kalan gɛ nuą ti, di kaa yɛ yaton yii aa kpala, di ɓo yɛ tulɔ-kpinįn yii hvaŋą a tɛɛ la, Yálá aa di heei pɛli kpinį kpon ɉu kwɛaa hu.

¹⁸ Da kpɔɔ ɲąą kɛnɛ̨ wooɠaa ɓo da kili kpɛɛ yəi woo. Nuąi daa gɛ pələ kwɛli mą daa kulɔ mɛ̨nį ɲɔ̨n gɛ nuą yee mu, nɛɛ kalan gɛ nuą ti, da gɛ pələ kwɛli mą, di pənə nwɔ̨nɔ̨ diɛ di hon bələ kwɛli a mɛ̨nį ɲɔ̨n giliŋąhiɛi gaa diɛ.

¹⁹ Nɛɛ kalan gɛ nuą ti, da lɛɛgbɔɔɓa laa mįnɛ̨ həɠə diɛ. A pa, diɛi ti di kaa a luwɔ pɔlɔ, yii gaa pai di paai. Mąąhɔlɔɓo, hɛn yii ɲee tɛɛ nu ɓa, ə kaa yəi luwɔlaa hu.

²⁰ Akɛ nuąi ŋɛ̨i daa kulɔ yɛnɛ̨ɛ̨ nwɔ túwɔ́ pələ ɲɔ̨n ɉu, gu Ną́mu da gu Nwun mąąɓomun Jesus Kristə kɔ́lɔn ŋąą pɔ, da pənə da di kpɔɔ lɛɛ laa, di lɔ dúwɔ́ pələ ɲɔ̨n ti hu, ə hee di mɛ̨i nwɔ̨nɔ̨ a nįnɛ̨, di kɛ pələ a ɲɔ̨n ə tɛɛ dɔlɔɔ ɓa.

²¹ Mąąhɔlɔɓo, viɛlaɓoɔi kɛ, di lɛɛ di kpɔɔ ɓa, ə tɛɛ dɛ̨ą pələi ŋɛ̨i kɔ́lɔn ŋąą ɓa di yəi, di pənə di həɠə Yálá nwɔ liɛwoo lɛlɛɛ ŋɛ̨i mɛ̨i, yii di mɛ̨n.

²² Ɉanwon ŋɛ̨i da kɛ mą: «Yilɛ a ɓaɠi, ə tinɛ̨n ə maɠi kɔ́mɔ.» Ə lɛɛ, yii ŋɛ̨i nwɔ̨nɔ̨ da kɛ mą: «Ə mɛ ɓoi waa, a tinɛ̨n ə too palaya hu.» Mɛ̨nįi ti həli diɛ, a nɛ yɛ ɉanwon veelɛi ti kaa tɛ̨ą.