Filemɔn 1 - Yálá laawoo hɛɓɛ (dc)

Túwɔ́-woo

¹ Ɲą́ą́ Polə, ɲą́ą́ ŋɛ̨i gaho ŋą Jesus Kristə laa mąą mɛ̨nį ɓa, kwa Timote ɓə ɉɛɓɛ́ ŋɛ̨i tɛɛi Filemɔn ɓa, diɛi kwa diɛni ku kaa díɓo tɔ̨nɔ̨i ŋɛ̨i ɓa.

² Da gbɔn a kɛ ɲąąkpɔn ɉi ɲəi bɛlɛ́n, ə mą kɛ gu mąąhala Apia, da Arsipə yai kwa diɛni ku kaa gɔ́ tɔ̨nɔ̨i ŋɛ̨i kɔ́i.

³ Gu Nąn Yálá da gu Ną́mu Jesus Kristə di wɔ mɛ̨inɛ̨ɛ̨, da di wɔ liilaa ə kɛ ka pɔ.

Filemɔn nwɔ wɛlikɛmąąlaa da nwɔ laa na laa

⁴ Nwɛ́likɛmąąmun ŋą́ą́ kɛi Yálá hvɛli, ŋą́ giliŋąhiɛ yɛ́ gɛ́ ɉɛɠɛɛɓo.

⁵ Mąąhɔlɔɓo, bələi yá nu mąąhəɠɛɛɠaa wɛli la kɛ la, da bələi ə́ wɔ laa na laa kaa la Ną́mu Jesus ɓa, ŋą́ą́ yiliɠaai bələ mɛ̨n.

⁶ Ŋą́ Yálá hvɛli gɛ́, gu kɛ mɛ̨nį ɉu tanɔ̨n laa na laa hu, yai gu yili gu kee ɓa, da mɛ̨nį lɛlɛɛ yiiɠaai gwa pɛli gu gɛ Kristə mąą mɛ̨nį ɓa, yili kəlee kɔ́lɔn gbaɠala ə kɛ yɛ́.

⁷ Gááyɔwɔ, ə́ wɔ wɛlikɛmąąlaa aa gwə́inɛ̨ɛ̨ kpɔ kɛnɛ̨, aa váŋąlɔ. Mąąhɔlɔɓo, ə́ yee hee mɛ̨nį nu mąąhəɠɛɛɠaa, a di liilaa yɛ di hvaŋąlɔ.

Polə ə Onesimə mąą liɛwoo kɛ Filemɔn ɓa

⁸ Yili ɓə gaa mą, bələi mąn Kristə aa lɛɛ gbɔwɔ ɓa laa tɛɛ la bɔ́, gɛ́ pɛli ə́ tíi a ə́ kɛ mɛ̨nį,

⁹ Yii viɛlaɓoɔ ɲɛ̨́i ɓa ya ɓaa: ŋą́ Onesimə mąą liɛwoo kɛ yɛ́, yɛ bələi ɲą́ą́ Polə gáá la a hulɔgolo, gɛ́ ɓo gaho ŋą Jesus Kristə laa mąą mɛ̨nį ɓa.

¹⁰ Onesimə aa kɛ kɛa a nón ɓɛ gaho pɛlɛ́ mu, ya ɓə gáá mąą mɛ̨nį hu hvɛlii yɛ́;

¹¹ Tɔlɔɔ, tɔ̨nɔ̨ lɔpee hvo kɛli kɛ Onesimə hu ə́ ɲɛ̨i ɓa; kɛlaa yiihu, gu wɔ tɔ̨nɔ̨ kaa kɛa ɉu.

¹² Onesimə aa kɛ kɛa a gbíní. Gáá dɔɔi ə pa ə́ pɔ.

¹³ Ŋą́ kɛ kpɔ bɔ ə lɛɛ ɓɛ gwɛ́lɛ, ə́ ə́ tɔɔi kɛ, ɓɛlɔwai ŋɛ̨i gáá la gaho ŋą nwɛlɛɛ lɛlɛɛ mąą mɛ̨nį ɓa.

¹⁴ Kɛlaa, və́ bɔ və́ ə́ kpaan yɛ mɛ̨inɛ̨ɛ̨ kɛ mą́ą́ a ə́ kpaan mɛ̨nį. Gáá bɔ yii yá kɛi gɛ, ə kɛ a ə́ liiɓa.

¹⁵ Gbəli hu Onesimə ə həɠə ə́ pɔ a lɔwai tawolo, ə gɛ, a pənə a pa, ka yaa ka kɛ ka lɛɛ ka ɓa a yələ kəlee.

¹⁶ Mąąhɔlɔɓo, hvo kɛa a luwɔ kpɛli-kpɛli, kɛlaa, aa hviɛlaɓo aa tɛɛ luwɔ ɓa. Aa kɛ kɛa a gu nąn non yii mąąnɛ̨ɛ̨ gu nwɛli la kɛ. Ɲą́ą́ Polə, Onesimə wɛli kaa mą́ą́ kpɔ a mɔlɔɔ, mąąnɛ̨ɛ̨ yɛ́ kpɛli nwɛli ə kɛ ti yɛ́, ə́ wɔ luwɔ li kpɔ, kɛlaa nwɛli la kɛ yɛ kristalon.

¹⁷ Akɛ yá gáá yɛ ə́ nąn non laa na laa hu, Onesimə a pa ə́ pɔɔli, ə́ yee hee mu yɛ bələi yá ə́ yee hee kɛ la mú.

¹⁸ Akɛ ə hɛn da kala ə́ yɛi, a wala kɛ ti, ə́ wɔ kwələ aa kɛ li mą; gəlee pɛ̨ɛ̨ nwúɔ̨.

¹⁹ Ɲą́ą́ gbíní ɓə nwooɠaa ŋɛ̨i pɛ̨ɛ̨ a ɲéé, gɛ́, ŋą́ ɉɛnŋąą ti kəlee pɔɔi kulɔ ɉu. Ə mą kɛ və́ ə kili puli ɉu, ə́ gɔlɔn gbɔ yɛ nwɔ́ kwələ kaa yɛ́, mąąnɛ̨ɛ̨ ə́ gulɔ: Ya ɓaa ə́ ə́ wɔ yɛnɛ̨ɛ̨ tɛɛ bɔ́.

²⁰ A tɛ̨ą, gááyɔwɔ, mɛ̨nį ŋɛ̨i gáá vɛli yɛ́, gɛ́ ə́ hvaa mą́ą́ gu Ną́mu nwɔ wɛlikɛmąąlaa hu; gáá bɔ ə́ nį́ilɔ Kristə laa hu.

²¹ Ə wɔ woo mɛ̨n naa ɓə gílítɔɔi ma, gɛ́ ɉɛɓɛ́ ŋɛ̨i pɛ̨ɛ̨. Náái na gɛ́, yii gáá vɛli yɛ́ ə́ kaa pai gɛi ə tɛɛ nwɔ́ kiliŋąhiɛ ɓa.

²² Yili ɓa nwɛ̨́ą pɛlɛ́ kulɔ. Mąąhɔlɔɓo, náái na gɛ́ Yálá kaa pai ka wɔ hvɛli wooɠaa mu hon ɉi, ŋą́ pa ka pɔɔli.

Yələ wala too woo

²³ Epafrasə ŋɛ̨i kwa yaa ku kaa gaho ŋą Jesus Kristə laa mąą mɛ̨nį ɓa, yɛ ə́ tuwɔ ɓo.

²⁴ Ə mą kɛ Markə, Aristarkə, Demasə da Lukə diɛi kwa diɛni ku kaa góló tɔ̨nɔ̨i ŋɛ̨i ɓa diɛ kpɛli diɛ ə́ tuwɔ ɓɔ.

²⁵ Gu Ną́mu Jesus Kristə nwɔ mɛ̨inɛ̨ɛ̨ ə kɛ ka pɔ. Yálá ə kɛ!