Osia 5 - Yálá laawoo hɛɓɛ (dc)

Di kaa hąŋąi tɔɔmun da ɉaláá kulɔ nuą diɛ

¹ Kaai a ɉaláá laa həli nuą, 'ka ka wəli tɔɔi ə́ wəli tɔɔ a nɛlɛɛ, Israɛlə nwɔ pɛlɛ́i, Kaai a dɔɔ pɛlɛ́ mu nuą, 'ka ka wəli tɔɔ a nɛlɛɛ! Kaa ɓə kiti kaa ka mɛ̨i; mąąhɔlɔɓo, ɓɛ kaa kɛ a hɛlɛn Mispa, da ɓaaləi daa dɛ Tabɔrə yee nwuɔ̨.

² Nu kpoloonŋąą daa lɔwa kpon ɉu kwɛaa tee. Kɛlaa ɲą́ą́n gáá həlii kpɔ gəlee diɛ tɛ̨ɛ̨ tɛ̨ɛ̨.

³ Nwɛ́i, ŋį́ Ɛfraimə kɔ́lɔn, ɛlɛɛ Israɛlə hvo loo li mą́ą́. Yɛ́i a Ɛfraimə, ə́ yee tooi ə́ mo wɛli mɛ̨nį hui, Israɛlə mąą ə luwu ɉu.

⁴ Di tuwɔ pələ hva pɛli gɛi, diɛ yali di pulu, diɛ pa Yálá pɔ, mąąhɔlɔɓo, wɛli mɛ̨nį kili ɓə di tənən dɔɔi, ɛlɛɛ, di hvo Yai-Laa kɔ́lɔn.

⁵ Israɛlə nwɔ kpɔwɔ ɲąąkɛnɛ̨i ɓə giti kalai mą, Israɛlə, da Ɛfraimə di wɔ nɛ̨ŋɛ̨nŋąąi ɓə di tooi, Ɉuda yaa kpɛlimąn, yɛ too, da diɛni.

⁶ Di kaa pai, da di wɔ taatɛlɛɛɠaai, gbɛa kpɛa da bɛlɛɛ pɛlɛɛ, Yai-Laa kwɛli mɛ̨nį ɓa, ɛlɛɛ di hvo pai gaai, Aa di kpɛ nwəli pulu.

⁷ Daa kulɔ Yai-Laa pulu, mąąhɔlɔɓo, daa wɛlin nonnii kaa; Yiihu, aa lɛɛ a ɲąnin dɔ̨nɔ̨, da di kwɛlinŋąą di hu yɛ kala.

Israɛlə da Ɉuda kɔ́i

⁸ 'Ka tulu hvɛɛ Givea, 'ka nįŋɛ̨ mįnɛ̨ hvɛɛ Rama, 'ka təluɓo kɛ Bɛtə-Awɛn. Daa ə́ hon, ə́ kɔ́n bulu pələ, Bɛnɉamɛn!

⁹ Ɛfraimə kaa pai kɛi a lɔi pun, a ɉu tɔɔ yələ. Gáá gbɛa yili hu kulɔi Israɛlə pɛlɛ́ɠaa diɛ, yili hva ɉəɠə mą.

¹⁰ Ɉuda ɲąąwooɓo nuą kaa a nuąi da lɔi ɲɛ̨n ɉəɠə naai, gáá pai nwɔ́ líiholii ɓɛlai di mɛ̨i, yɛ ya nwąną.

¹¹ Ɓɛlɛ a kpɛɛ Ɛfraimə ɓa, giti aa mąą mɛ̨nį pili ɉu, mąąhɔlɔɓo, aa gɛ a wəlii kpɔlɔ, yɛ gbɔwɔ tɔ́n bulu.

¹² Ɲą́ą́n, gáá pai kɛi yɛ lɔ́wɔ́ Ɛfraimə ɓa, ŋį́ ɓo yɛ ɲį́n nwąną Ɉuda nwɔ pɛlɛ́i ɓa.

¹³ Ɛfraimə aa nwɔ ɲɔ̨n kaa, Ɉuda yaan, aa nwɔ palai kaa; Ɛfraimə aa li Asiri pɔ pələ, ɛlɛɛ, aa kɛla tɔɔ dɔɔmun gɛnɛ̨ pɔ. Kɛlaa, gáá moi kaa: Hva pɛli ka ɓaloi, hva pɛli ka wɔ palai hali kɛi.

¹⁴ Hvo lɛɛi yili ɓa, gáá pai kɛi yɛ yala Ɛfraimə ɓa, ŋį́ kɛ yɛ yala gbɔn, Ɉuda nwɔ pɛlɛ́i ɓa. A ɲą́ą́, ɲą́ą́ ɓə pai di ɓɛla ɓɛlai, yili pulu, ɉuwɔi ŋą́ ɉon, ŋą́ li la, ɛlɛɛ, nu ta hva pɛli gulɔi ɲə́i.

Yálá aa ɲee kulɔ di mu

¹⁵ Gáá pai lií, gáá pənəi ŋį́ li bɔ́ɔ́li, ə lɛɛ ɉu, di hvaa di hɔn ma, ɛlɛɛ, diɛ ɲɛ̨ilai gwɛli. Mɔ̨nɔ̨ kaa pai wiɛi diɛ, di kaa pai hvilɛn ɉii, diɛ gwɛ́li.