Osia 4 - Yálá laawoo hɛɓɛ (dc)Yálá da Israɛlə di kaa kiti ɓa 1 Israɛlə lonnii, ka ka wəli tɔɔ Yai-Laa woo ɓa: Yai-Laa da nɔi lonnii di kaa kiti haɠa ɓa, mąąhɔlɔɓo tɛ̨ą mɛ̨nį, nu mɛlan gaalon nwɛli la kɛɛ, da Yálá kɔ́lɔn mɛ̨nį, da hvo kɛa nɔi. 2 Nu woo kala mɛ̨nį, lɛɛ, nu paa mɛ̨nįɠaa, nwuɔ̨, wɛli mɛ̨nį, di laa aa too; ɲąmą kpoloon yɛ ɉeei kaa. 3 Nɔi ɲɛ̨i mąą aa wɛli, ɉu nuą kəlee diɛ kpala, ə mą kɛ lɔwɔ huwɔɠaa, da yələi nwɛ̨niɠaa. Ə mą kɛ gboloyá hu hɔ̨nwɔ̨leeɠaa di kaa pai kpɛɛi. Ɉaláá laa həli nuą hɔn 4 'Ka gɛ a nɛlɛɛ, nu ta hvo gbɔwɔ mąą kɔ́nwɔ̨, nu ta hvo hea too, mąąhɔlɔɓo ə́ wɔ lɔi hu nuą di kaa yɛ, nuąi da kɛ hea tooi haláá laa həli nuą la. 5 Ə́ kaa pai kalin ɉii hvóló ŋą, ka Yálá kwəi mɛ̨nį hu kulɔ mun kaa kalin a kpinį, gáá pai ə́ kaa lee nwun na pilii. 6 Nwɔ́ nuąi ɲąą kaa kwɛ̨ɛ̨i, mąąhɔlɔɓo, mɛ̨nį kɔ́lɔn ŋąą hvo di lɔwai. Lənəi ə́ mo mɛ̨nį kɔ́lɔn mɛ̨nį ɓa, ɲą́ą́ gbɛli mąn, gáá lənəi yɛ́, hvá kɛa kɛ a nwɔ́ haláá laa həli mun. Yáá lɛ̨ą ə́ wɔ Yálái nwɔ tɔ́n nwooi ɓa, ɲąą gbɛlin mąn gáá pai lɛ̨ąi ə́ lonnii diɛ. 7 Di kəlee kpɔ, nu ta nwɔ kwɛni hvo kulɔ li ɉu, daa nɛ̨ŋɛ̨n ɉəɠə mą́ą́, gáá pai di wɔ mąąwiɛ mąąpənəi a nwumɛ̨. 8 Daa pilɛ nwɔ́ nu huwui nwɔ nɛ̨ŋɛ̨nŋąąi hu, diɛ di ɲɛ̨i kulɔ nwɔ nɛ̨ŋɛ̨nŋąąi pɔ. 9 Mɛ̨nįi pai laai nɔi lonnii diɛ, yaa lɔ ɓə pai laai ɉaláá laa həli mun ma, gáá pai muhəɠəi di laa ɓa, di túwɔ́ pələ mąą mɛ̨nį hu, gɛ́ di kɛ mɛ̨nįɠaa kwələ kulɔ diɛ. 10 Di kaa pai kɛi kɔ̨nɔ̨n mį́í hva di pilɛ, diɛ wɛli yíi ɓo, kɛlaa di hva tamą. Mąąhɔlɔɓo, daa di pulu tɔɔ Yai-Laa ɓa. 11 Lɔɔ da wɛli mɛ̨nį daa di nwun ɉu lan. 12 Ɉɛn nwɔ́ nu huwui a mąąnikɛ, ya ɓaa a nwɔ wului, ɛlɛɛ, nwɔ wulu wonwoi ɓə a gili ɲą pɔ̨nɔ̨, mąąhɔlɔɓo, wɛli mɛ̨nį a nwun ɉu lan, ɛlɛɛ, daa lɔ wɛli mɛ̨nį hu, diɛ kulɔ la di wɔ Yálái, woo mu. 13 Da kɛ haláá kulɔi yeeɠaa nwuɔ̨, diɛ hali kɔ́ hɛnŋąą kələn yee kpukpuɠaa nwuɔ̨, hɛanɠaa mu, da towələ wuluɠaa mu, gbala ə tɔɔ, di nįnįn mu ɲąąnɛ̨ɛ̨i. Yili mąą mɛ̨nį ɓə ka lonnii nɛ̨ąą da di kɔ́lɔ lɔwɔ́tɔɔ la, ka lon nɛ̨ąni diɛ wɛli hon. 14 Və́ pai tɔɔi, gɛ́ ka lonnii nɛ̨ąą di wɔ wɛli mɛ̨nį, mąąnigɛ diɛ, da ka lon nɛ̨ąni di wɔ wɛli mɛ̨nį, mąąhɔlɔɓo, ɉaláá laa həli nuą, da kɛ kulɔi kpinįi da wɛli kɛ nɛ̨ąą, ɛlɛɛ, da diɛni diɛ ɉaláá kɔ̨nɔ̨n mįi gee ɓa, bələ ɓə lɔi yii mɛ̨nį kɔ́lɔn gili hvo ɉu, vilɛnŋąąi la nwun na pili pələ mɛ̨i. 15 Yii kpɔ yɛ́, Israɛlə, yá kɛ wɛli hon ɉii, Mąą hvo nɛ̨ɛ̨li Ɉuda yaa kpɛlimąn, hvo tɔɔ yɛ ɉɔn gɛ. 'Ka hvo li Gilgalə, 'ka hvo tɛ Bɛtə-Awɛn, 'ka hvo ka kwɛla, kaa kɛ diɛ: «A kɛ kpɔ Yai-Laa kaa a vulú.» 16 A tɛ̨ą, Israɛlə aa kɛ̨ą, yɛ nįŋɛ̨ haa a kɛ̨ą, Yai-Laa a pɛli kɛa di hon bələ kɛi ləi, yɛ da kɛ a ɓɛlaa talaɠaai kpomói, diɛ di laa mįi. 17 Ɛfraimə da haliɠaa daa too di kee pɔ, 'ka nɛɛ lɔ laa. 18 Da kpɛɛ a nɔɔɠaa kpəlɛɛ, túwɔ́ pələ ɲɔ̨n mə da di ɲąątɔɔ mą. Nwumɛ̨ mɛ̨nį ɓə di ɲɛ̨itɔwɔ nuą da kɛ bɔ di gɛ. 19 Hvaŋą kaa pai lii a diɛ, yɛ li a diɛ, nwumɛ̨ yɛ tɛ diɛ, di wɔ haláá kulɔ mɛ̨nįɠaai tii hu. |