Osia 2 - Yálá laawoo hɛɓɛ (dc)Yálá aa pənə yɛ ɲee hee nwɔ nuąi mu 1 Israɛlə lonnii kaa pai tamąi yɛ gboloyá kwɛlɛ ɲɛ̨ą kɔ́w, di hva pɛli gɔwɔn ɉii, di hva pɛli nonon ɉii, ɛlɛɛ, ɓɛi di kɛi kɛ laa diɛ nwɔ́ nu huwu hvaa kaa, di kaa pai kɛi laa diɛ, Yálá húlúmąą lonnii. 2 Ɉuda lonnii da Israɛlə lonnii di kaa pai pɛlɛi di kee ɓa, nu tɔ̨nɔ̨ ə ɓo di yəi a di ɲąąwooɓomun, diɛ hee lɔi kəlee mɛ̨i; mąąhɔlɔɓo, Izreɛlə nwɔ hvólói a kɛ a hvóló kɛnɛ̨. 3 'Ka kɛ ka nąn nonnii diɛ: «Ami, nwɔ́ nu huwu», kaa ka mąąhalani diɛ: «Ruhama, nwɛli kɛmąą mun.» 4 'Ka ka lee təli kiti ɓa, 'ka li kiti haɠa ɓa; mąąhɔlɔɓo nɛ̨́ą hvəli, ɛlɛɛ, ɉilɛ hvaa a ɲą́ą́. Ə kpəla wɛli hon ŋąą ɓa, nwɔ wɛli mɛ̨nį pɔɔ kaa ɲįnį lɔwai, ə gulɔ laa. 5 A wala gɛ tii, gáá pai həɠə kulɔi mą, ə lɛɛ a gbuwulu, gɛ́ nɛɛ lɔ yɛ bələi wɔlɔ ə kɛ la a gaa yələ. Ŋį́ gɛ yɛ lɔi pun, ŋį́ gɛ yɛ gbali a kələn, gɛ́ gɛ, yɛ haa la a kpələ wɛli. 6 Vá kɛa nonnii ɲɛ̨imąąwɛli kaa, mąąhɔlɔɓo di kaa a wɛlin nonnii, 7 di lee kɛ mɛ̨nį a wɛlikɛ nɛ̨ɛ̨nu, nɛ̨ɛ̨nui di mąą koo həɠə, aa nwumɛ̨ tɛ a gbɔwɔ, a kɛi ə kɛi mo diɛ: «Gáá gilɛ həɠəi nwɔ́ wɛliɠaai pulu, diɛ ɓə da gɔ́ a kɔ̨nɔ̨n da yá; diɛ gɔ́ a həɠəɠaa, wulɔ da lɔɔ.» 8 Yili mąą mɛ̨nį ɓa, gáá pai ə́ wɔ pələɠaa pui a ɲąąlənŋaa, ŋį́ gala yili ɉu, ɛlɛɛ, hva kɛa ə́ tɛɛ pələ kaa. 9 Gaa pai gilɛ həɠəi nwɔ wɛliɠaai pulu, hva di kaa, a di kwɛli, kɛlaa, hva di kaa; gaa pai kɛi diɛ: «Gáá pənəi ŋį́ li ɉilɛ pɔɔli, mąąhɔlɔɓo, ŋį́ kɛ laa nɛ̨́ɛ̨́ hu dɛɛ yiihu ɓa.» 10 Hvo kɛ gbaɠala kɔ́lɔn yɛ kɛ mɔ̨nun, wulɔ, lɔɔ nɛ̨ɛ̨, ɲą́ą́ ɓə kɛi di tɛɛ bɔ, ŋį́ kɛi wali tiɛ̨ mą, ɛlɛɛ, ɉɛni nwɛi, di kɛi Baalə mąą mɛ̨nį kɛ la. 11 Yili maą mɛ̨nį ɓa, gáá pai pənəi ŋį́ nwɔ́ mɔ̨nun həɠə ɲəi, ɲələ a həli, da nwɔ́ lɔɔ nɛ̨ɛ̨i, a ɲələi ŋą́ kɛ la bɔ, gɛ́ nwɔ́ həɠəɠaai kulɔ ɲəi, diɛi tii kɛi mąąkpulu. 12 Gáá kɛa pai nwɔ nwumɛ̨ mɛ̨nįɠaai tooi pɔ̨nɔ̨ ɲą, nwɔ wɛliɠaa ɲɛ̨́i ɓa, ɛlɛɛ, nu ta hvo pai gulɔi ɲə́i. 13 Gáá pai nwɔ kwəinɛ̨ɛ̨ mɛ̨nįɠaa kəlee kpɛlai, da nwɔ hɛliɠaa, da nwɔ ɲąnįn ninɛ̨ hɛliɠaa, da nwɔ hvįįtɔɔ yələɠaa, da nwɔ hɛli kpɛa-kpɛa kɛ yələɠaa kəlee. 14 Díi tii, da nwɔ ɓawuluɠaai tii ə kɛli kɛ di mąą mɛ̨nį ɓa: «vɛ́lai nwɔ́ wɛliɠaa di dɛɛ bɔ́, ya ka», ŋį́ di hu kala, gɛ́ di mąą pənə a kpomó, lɔwɔ huwɔɠaa diɛ nąą kɛ a di kɔ̨nɔ̨n gwɛlii. 15 Gáá pai múhəɠəi naa ɓa, Baaləɠaa mąą mɛ̨nį ɓa, diɛi tii ə kɛi di kɔ́ a hɛn gun nɛ̨ɛ̨ɠaa, yɛ mąą yili nąąlɔwai a wəlii-kwɛli da kwɛan, ə kɛi gilɛ həɠə nwɔ wɛliɠaa pulu, ɛlɛɛ ɲą́ą́n, yɛ lɛ̨ą mą́ą́, Yai-Laa woo li. Yálá kaa bɔ da nwɔ nu huwui di pənə di nɛ̨ɛ̨ 16 Yii gaa tii, ɲą́ą́ ɓə pai ɲɛ̨i kwɛlii, ŋį́ li a yaa lɔi pun ɉu, Gɛ́ nii ɓa wooɠaa ɓo mą. 17 Yili pulu, gɛ́ pənə gɛ́ nwɔ tíiɠaai tɛɛ bɔ, gɛ́ Akɔrə lɔi kɛ a kilitɔɔmąą kpala tɔɔ lɔi. Gaa pai pənəi yɛ nwóó pulu pənə, yɛ bələi ə kɛli gɛ la a gbəla yələ, a ɓɛlɔwai ə kulɔ la Eziptə lɔi hu. 18 Yai-Laa woo ka: Mąą yələ, yá kɛ mą́ą́ «ɉílɛ»; hvá kɛa kɛ mą́ą́: «nwɔ́ baalə.» 19 Ŋą́ Baalə wooi tii kulɔ na, di hva mąn kɛa di laa ɓo. 20 Kwa diɛni kwa mįnɛ̨ həɠə a mąą yələ, da lɔwɔ huwɔɠaa, da yələi nwɛ̨niɠaa, da talahuwɔɠaai. Kilɛn, kɔ́ kɔ́ ɓɔwa, da kɔ́, ŋą́ gəlee hu wolo; da hva kɛa kɛ nɔi, gɛ́ hvaa mą nɔi lonnii diɛ yíi lii laa hu 21 Gwá too wɛlii a yələ kəlee mɛ̨nį, gwá too wɛlii, tələnmolaa hu, da tɛ̨ą, a wɛlikɛmąąlaa, da lii nɛ̨ɛ̨ gwəi. 22 Gáá ə́ həɠəi a nɛ̨́ą, vá ə́ ɓowo, ɛlɛɛ, ə́ kaa pai Yai-Laa kɔ́lɔn ɉii. 23 Yai-Laa woo ka, yɛ diɛ: Nąąlɔwai, mɛ̨nįi yələkɔlɔn ɲɛ̨i kaa dɔwɔ, ŋą́ dɛɛ bɔ; yaa kpɛli, mɛ̨nįi lɔi ɲɛ̨i kaa dɔwɔ, yɛ dɛɛ bɔ. 24 Lɔi kaa pai di woo pulu pənəi a mɔ̨nun, a lɔɔ nɛ̨ɛ̨, a wulɔ, ɛlɛɛ diɛn mɛ̨nįi Izreɛlə kaa mąą kpɔn ɉii, diɛ dɛɛ bɔ. 25 Gáá pai ɉin ɉii nɔi hu a nwɔ́ɔ́, gɛ́ Lo-Ruhama wɛli la kɛ, gɛ́ kɛ Lo-Ami ɓa: «Nwɔ́ nu huwu», yáán, yɛ kɛ mą́ą́: «Nwɔ́ Yálá.» |