Osia 14 - Yálá laawoo hɛɓɛ (dc)1 Mąąnɛ̨ɛ̨ Samari ə pa gwələ kulɔ, mąąhɔlɔɓo, aa nwun gulɔ nwɔ Yálái woo mu, di kaa pai tooi kɔ́ kɔ́ ɓɔwa ŋą; diɛ di lon dalaɠaa kiin, diɛ koo nɛ̨ąɠaa kwəi ɓɛla. 2 Israɛlə! Pənə ə́ pa wɛ, Yai-Laa ə́ wɔ Yálái pɔ, mąąhɔlɔɓo, ə́ kɛ nɛ̨ŋɛ̨n aa ə́ too. 3 'Ka woo lɔ ka la, 'ka pənə ka pa Yai-Laa pɔ, 'ka kɛ mą: «Ku ɲɛ̨imąąwɛli kaa, ə́ ə́ yee hee ku mu, nɛ̨ŋɛ̨n gəlee kulɔ kuɔ; nįŋɛ̨ hilɛɠaa hvə ku kaa pai gulɔi yɛ a haláá, Kɛlaa nwooɠaai lɔ da kulɔ ku la diɛ lɔ ɓə. 4 Asiri lɔi hva pɛli ku ɓaloi, ku hvo kɛa pai tɛi hoo mɛ̨i, ɉɛnŋąąi ku yee a di pɛli, ku hva kɛa kɛ diɛ: ‹Ku wɔ yálá›, Ə həli tii Yɛ́, yɛ́i ya təli lon ɲɛ̨imąąwɛli kaa.» 5 Gáá pai di ɓaloi di wɔ pulu kulɔ mɛ̨nįi tii yəi, gɛ́ di wɛlilakɛ gwə́i tɔ̨nɔ̨ mɛ̨i, ŋą́ą́ nwɔ́ lííholii həɠə di mɛ̨i. 6 Gáá pai kɛi a nɛ̨nɲá Israɛlə ɓa, gaa pai powai yɛ yagbudɛn, yɛ ɉamu lɔ kpɔ kwɛa la yɛ Liban wəla wulu. 7 Mąąpooɠaa diɛ li kwɛa la, mąą yɛ wiɛ yɛ olivə wulu, gun nɛ̨ɛ̨ yɛ tɛ yɛ Liban wəla wulu. 8 Nuąi kɛi hee nįnįn mu, di kaa pai yalii di pulu diɛ pa, mɔ̨nin yɛ pənə yɛ lɛlɛ diɛ, diɛ powa yɛ viɲə wulu, di laa a tɛ yɛ Liban lɔɔ. 9 Ɛfraimə! Nwɔ́ lə mɛ̨nį ɓə hali mɛ̨nį hu? Ɲą́ą́ ɓə ŋą́ nwoo mu hon, gɛ́ ɲɛ̨́i kɛ mą, nwɛ́i gáá lɔ yɛ wului naa ka ŋą a yələ kəlee, ɲą́ą́ ɓə ə́ ɓa a kulɔ váŋą hu. 10 Gbɛɛ ɓə kili kaa mą, yɛ pɛli mɛ̨nįɠaai tii hu kpɛi? Gili ə ɓo ɲəi yɛ di kɔ́lɔn? A tɛ̨ą, Yai-Laa nwɔ pələɠaai haŋąą ɓə, di mɛ̨i ɓə tələnmo nuą kaa pai hiɛi laa, Kɛlaa, kulɔ nwoo mu nuą di wɛi, di kaa pai kalin ɉii ɉu. |