Osia 12 - Yálá laawoo hɛɓɛ (dc)

Ɛfraimə nwɔ lɛɛ mɛ̨nį

¹ Ɛfraimə kaa gílí ɲąą pɛlɛi a lɛɛ, Israɛlə nwɔ pɛlɛ́i yɛ mówo, Kɛlaa, Ɉuda kaa ni Yálá pulu, ganąn ŋąą ni yələkɔlɔn ɉu Yálá ɓa.

² Ɛfraimə kaa goo laahvɛɛi a hvaŋą, a túwɔ́ gilɛ həɠəi kpɛli kpɛli mɛ̨nįɠaa pulu, yɛ, lɛɛ da hulu mɛ̨nį di tiɛ̨ lɔ gee mɛ̨i, da Asiri di kaa mįnɛ̨ həɠəi, yɛ wulɔ tɛɛ Eziptə pɔ.

Israɛlə kaa lɔ yɛ nąn Ɉakɔbə gbąną mɛ̨nį hu

³ Yai-Laa da Ɉuda di kaa kiti haɠa ɓa, yɛ Ɉakɔbə mąąni kɛ dúwɔ́ pələɠaa hu, yɛ ɉon yɛ bələi ə gwɛli la, gɛ mɛ̨nįɠaa hu.

⁴ Ɉakɔbə ə laa niɛ tɔwɔ di lee kwəi, ɛlɛɛ, gɛɛ a kpakolo, da Yálá di gɔ́.

⁵ Da malaka di gɔ́ ɲee ə tɛɛ yili ɓa, ə wɔlɔ, ə nɛ̨ɛ̨mąą hvə, ə gaa Betɛlə, nąą ɓə Yálá ə pələ ɓo laa kuɔ.

⁶ «Yai-Laa Mɛ̨nį Kəlee ŋą Hééɓomun Yálái ti a Yai-Laa.» Bələ ɓə mąąnɛ̨ɛ̨ di vɛli la.

⁷ Ə́ wɛi, pənə ə́ pa ə́ wɔ Yálái pɔ, ə́ yee kanąn tɛ̨ą mɛ̨nį ɓa, da kwəi kwələ laa, ə́ kilitɔɔ lɔ Yálá ɓa yələ kəlee.

⁸ Nu ɓowo hɛn gɔwɔn gəgən mə ka yəi, yɛ bələi gaa la Kanaan yəi, hvulu wɛli kaa mą.

⁹ Ɛfraimə nwɛi yɛ kɛ diɛ: «Ŋą́ą́ hɛn ɉɔlɔɓo kɛnɛ̨, ŋą́ą́ wali tiɛ̨ gee mɛ̨i, góloi kpɔ ŋą́ gɛ, di hva pɛli nɛ̨ŋɛ̨n bɔɔ kaai ɉu.»

¹⁰ Kɛlaa, ɲą́ą́ nwɛ́i, ɲą́ą́ Yai-Laa, ə́ wɔ Yálá ɓaa a ɲą́ą́, ə həɠə Eziptə lɔi hu, ə həli la yiihu ɓa. Gáá pai pənəi ŋį́ ə́ lɔ ə́ wɔ həɠə pɛlɛ́ɠaai mu, yɛ bələi ə kɛ la, a ɲələi tii, gwa kaani gu gu kee kaa la.

¹¹ Gɛ́ pələ ɓo gwəi mɛ̨nį hu kulɔ nuą diɛ, gɛ́ mɛ̨nį tamąą lɛ diɛ a hįį pələ, gɛ́ hanwonŋaa pu gwə́i mɛ̨nį hu kulɔ nuą la diɛ mo.

¹² Galaadə nwɛi, lɛɛ taa li, daa kɛ lɔ kpɛli kpɛli, di hvo kpɛlai nįŋɛ̨ haláá kulaa ɓa Gilgalə, di wɔ hali kɔ́iɠaa kaa yɛ kwɛni tiąą gee mɛ̨i kɛɛ hin ŋąą hu.

¹³ Ɉakɔbə ə pu Aramə yɛɛ kɔ́wɔ hu, ɛlɛɛ, Israɛlə yɛ nɛ̨ɛ̨nu mąą koló ɓo laa, ɛlɛɛ, yɛ gbɔwɔ kɛ a taatɛlɛɛ mɛ̨i kaamun nɛ̨ɛ̨nu mɛ̨nį ɓa.

¹⁴ Kɛlaa, Yálá kwəi mɛ̨nį hu kulɔ mun da yee ŋą ɓə Yai-Laa ə Israɛlə kulɔ la Eziptə lɔi hu, yɛ paa la; Yálá kwəi mɛ̨nį hu kulɔ mun da ɓə Israɛlə mąą kɔ́nwɔ̨.

¹⁵ Ɛfraimə ə Yálá lii kələn gwəi kɛnɛ̨, ɲąmąi ə bu, Nąmu kaa pai nwulu lɛɛi nwuɔ̨, yɛ nwɔ lalanŋąąi gwələ kulɔ mą.