Nwun mąąɓo 8 - Yálá laawoo hɛɓɛ (dc)

Ɛfraimə nuą di kwəi hvo nɛ̨ɛ̨

¹ Ɛfraimə nuą, di pa diɛ Zedeɔn ɓa: «Lə mɛ̨nį ɓə ŋɛ̨i ə́ gɛ a kuɔi? Ɓɛlɔwai ə́ kɛi li kɔ́ pɛlɛi la Madian nuą diɛ, hvo ku təli li?» Zedeɔn da Ɛfraimə nuą di mo kpɔ di kee lɔwai a nwalawalaa.

² Kɛlaa, Zedeɔn yɛ diɛ: «Lə ɓə ŋą́ gɛ, yaai ka hvo gɛ li? Ɛfraimə nuą, mɔ̨nun ŋɛ̨i ka gwɛli, viɛla hvo ɓo li hvo tɛɛ, Aviɛzɛrə nwɔ teɛ ɓa?

³ Kaa ɓə Yálá ə Madian tɔɔɓɛlaa hveelɛi, a Orɛvə da Ɉeɛvə di too ka yee ŋą. Lə kpɔ ɓə ŋą́ gɛ, yaai ka hvo gɛ li?» Ɛfraimə nuą di wɔ líiholii ɲąą ə yɛɛ, nwooi tii Zedeɔn ə mo diɛ mąą mɛ̨nį ɓa.

Zedeɔn ə li Ɉurdɛn voló həɠəi pələ

⁴ Zedeɔn ə Ɉurdɛn yá teen da nwɔ nu nwun ɉaaɓai, di hviikpɛɛi kɛa kɛ, kɛlaa, di kɛ lɔ nuąi tii pulu diɛ di kpɛ.

⁵ Zedeɔn ə mo Sukotə nuą diɛ, yɛ diɛ: «Ka nɛ̨ɛ̨ kaa! Ka kɔ̨nɔ̨n dɛɛ nwɔ́ nuąi pɔ, mąąhɔlɔɓo, di hvii aa kpɛɛ kɛnɛ̨. Ɛlɛɛ, vílɛn ŋąąi Ɉɛva da Salmuna diɛi a Madian tɔɔɓɛlaa, gɛ di kpɛ.»

⁶ Ɲɛ̨itɔwɔ nuąi ŋɛ̨i kɛ Sukotə daai; diɛ Zedeɔn ɓa: «A kɛ tii, ə́ yee pɛliɛi kɛa Ɉɛva da Salmuna ɓa ɓə ŋɛ̨i, yai ə́ kaa kɛi diɛ ku kɔ̨nɔ̨n dɛɛ ə́ wɔ kɔ́kulááɠaai pɔ?»

⁷ Zedeɔn yɛ diɛ: «Ka nɛɛ lɔ laa! Ɲələi Yai-Laa kaa pai Ɉɛva da Salmuna di tooi la ɲee ŋą, gáá pai ka hu lɔwai a ɲąąlən vaɠa, yai ŋą́ dee nɔi pun ɉu, a gbaɠa walawalaa.»

⁸ Zedeɔn ə həɠə Sukotə, ə li Penuɛlə daai, ə mɛ̨nį tɔ̨nɔ̨i tii hu hvɛli daa nuą diɛ, Penuɛlə daai nuą di nwoo ŋąąpənə, yɛ pələi Sukotə nuą di gɛ la.

⁹ Zedeɔn yɛ diɛ: «Ŋą́ li ŋą́ yeetɛɛmąą kɛ, ŋą́ pənə ŋą́ pa, ɉįi ŋɛ̨i ka wɔ taai ɓa, ŋą́ nwolo.»

¹⁰ Ɉɛva da Salmuna, di kɛ Karkɔrə, di wɔ kɔ́kulááɠaa daa lɛɛ kɛa a nu waa pow kɔ́w lɔɔli. Nuąi həɠə voló kulɔi pələ, diɛ lɔ li kɛ. Yiiɠaai haa, di kɛ a nu waa nwun dɔ̨nɔ̨, nu waa pow hveelɛ.

¹¹ Ɓɛ pələi ŋɛ̨i doonwunma nuą da kɛ tɛɛi la, nąą bələ ɓə Zedeɔn ə tɛɛ la, Nova taa da Yogboha taa voló həɠəi pələ, nuąi tii di kɛi di kpɛ, daa ta kɛ di wɔ kɔ́ ɓuwui pɛlɛ laa, di wɔ kwəi, daa kulɔ ɉu. Zedeɔn ə pɛlɛ diɛ.

¹² Ɉɛva da Salmuna di pu, Zedeɔn ə hvilɛn di pulu, ə Madian tɔɔɓɛlaa hveelɛi hon ə di wɔ kɔlaɠaɠaai kəlee taɠa.

¹³ Yoasə lon Zedeɔn, bulu pənɛɛ kɛa yɛ həɠə gɔ́ mɛ̨i yɛ pa, ə tɛɛ Hɛrɛsə ɲee ɓa pələ.

¹⁴ Ə Sukotə hilɛnon da hon, ə mąąni kɛ. Yili ə Sukotə taa ɲɛ̨itɔwɔ nuą da galanɉonŋaa nu pow mɛ̨ihveelɛ kɔ́w mɛ̨ihveelɛ, ə di laa ɓo Zedeɔn ɓa, hɛɓɛ́ ŋą.

¹⁵ Zedeɔn paa Sukotə daai, yɛ nuą diɛ: «Ɉɛva da Salmuna ŋɛ̨i ka ka woo həɠə mą́ą́ di mąą mɛ̨nį hu, kaa kɛ mą́ą́: ‹Ɉɛva da Salmuna di hvo ə́ yee ŋą, kwa pɛli ku kɔ̨nɔ̨n dɛɛ pələ kɛ ləi ə́ wɔ kɔ́kulááɠaai pɔ, diɛi di hvii aa kpɛɛ?›»

¹⁶ Zedeɔn ə nɛɛ mą, ə daa kalanɉonŋaa hon, ɲąąlən vaɠa walawalai ŋɛ̨i ə dee nɔi pun ɉu, ə ɉəɠə, ə Sukotə kalanɉonŋaa hu waa kpɔ la a neelee.

¹⁷ Yili pulu, ə li ə Penuɛlə taa nwɔ hįi wolo, ə daa nuą kəlee paa.

¹⁸ Nąąlɔwai, Zedeɔn ə Ɉɛva da Salmuna di mąąni kɛ, yɛ diɛ: «Nuąi ka di paa Tabɔrə, di kɛ pələ ə kɛ ləi?» Ɉɛva da Salmuna diɛ mą: «Di kɛ pələ ə kɛ, yɛ bələi ə́ kaa la, di ɲɛ̨ilai ə kɛ a tɔɔkwəlii lonnii.»

¹⁹ Zedeɔn yɛ diɛ: «Gááyɔwɔɠaa ka tii kɛ, kwa diɛni ku lee kaa tɔ̨nɔ̨. Yai-Laa ɲɛ̨i ɓa, gáá moi kaa a tɛ̨ą, akɛ kɛ ka di lɛɛ a di hvulú, və́ li pa ka paai!»

²⁰ Yili pulu, Zedeɔn ə mo non ɉulɔnu dɔlɔɔ Yɛtɛrə ɓa, yɛ mą: «Li ə́ nuąi tii paa!» Ɉulɔnon tii hvo pɛli nwɔ ɓɔwai kulɔi daai, mąąhɔlɔɓo, ə kɛi ɲɔw, ɛlɛɛ, ə kɛ ni a hulɔnon.

²¹ Nąąlɔwai; Ɉɛva da Salmuna diɛ Zedeɔn ɓa: «Yɛ́ kpinįi pa ə́ ku paa, mąąhɔlɔɓo, nu kəlee da bɛli mąą kuláá ɓə.» Zedeɔn ə li, ə Ɉɛva da Salmuna di paa, yili pulu, ə di wɔ ɲɔ̨nwɔ̨mɛ̨ɛ̨ɠaai mąą yili hɛnŋaa həɠə.

Zedeɔn nwɔ yɛnɛ̨ɛ̨ ɲąą kpɛɛ pələ

²² Israɛlə nuą di mo Zedeɔn ɓa, diɛ mą: «Kɛ a ku ɲɛ̨itɔwɔ mun, yá həɠə laa, ə́ lon ə hee laa, yili a həɠə laa, nwɔ lon ə hee. Mąąhɔlɔɓo, yɛ́ ɓə yáá ku kulɔ Madian nuą yee mu.»

²³ Zedeɔn yɛ diɛ: «Və́ pai kɛi a ka ɲɛ̨itɔwɔ mun, nón və pai kɛi la, Yai-Laa ɓə pai kɛi a ka ɲɛ̨itɔwɔ mun.»

²⁴ Yili pulu, Zedeɔn yɛ nwɔ̨nɔ̨ diɛ: «Mɛ̨nį tɔ̨nɔ̨ ɓə gáá ɉu hvɛli kaa, ya ɓaa: Gɔ́ honŋaai tii ka ɉɔlɔɓo, nu kəlee ə gbono tɛitɛi kulɔ ɉu, ə dɛɛ bɔ́.» Ə mo tii diɛ, mąąhɔlɔɓo, nuąi tii də li gɔ́ pɛlɛi diɛ, di kɛ a Ismaɛlə nu huwu, hɛni gbono ə kɛ gəlee yee ɓa.

²⁵ Di kəlee di mo Zedeɔn ɓa, diɛ mą: «Ku hvaai mą, ku dɛɛ ə́ pɔ.» Di nɛɛ mą, di həɠə kɛnɛ̨ ta pɛlɛ nɔi ɓa, nu kəlee ə gbono kulɔ nwɔ kɔ́ honŋaa hu, diɛ bu laa ɉəɠə hu.

²⁶ Ya ɓə, gbonoɠaai tii Zedeɔn ə ɉu hvɛli diɛ, gəlee pɛlɛɛ gee ɓa, ə kɛ a kilə pow hveelɛ. Ɲɔ̨nwɔ̨mɛ̨ɛ̨ mąą yili hɛnŋaa laa hvo kɛ ɉu, nwəlii kwɛliɠaa, da Madian tɔɔɓɛlaa kwąną həɠəɠaa di hvo kɛ lonon ni, ə mą kɛ gwɛɛnŋaai kɛ doɔ di wɔ ɲɔ̨nwɔmɛ̨ɛ̨ɠaai kwąną.

²⁷ Zedeɔn ə nɛɛ mą, ə ɉɛnŋaa tii kəlee pɛli a hɛn da mąąnįnįn, ə dɔɔ bɔ taai Ofra. Nąą ɓə Israɛlə nuą di kɛi li laa, diɛ kwɛli hvilɛn naa ɉɛn tii ɓa. Yili ə kɛ a hɛlɛn ə tɛ Zedeɔn nwɔ pɛ́lɛ́i tɔwɔ.

²⁸ Bələ ɓə Madian nuą di lɛɛ la Israɛlə nuą yee mu, di hvo kɛa pənə di hvo di nwun dɛ. Israɛlə lɔi ə lɛɛ líilaa hu, Zedeɔn nwɔ yɛnɛ̨ɛ̨ yee mu, a kwɛlan bow nąąn.

²⁹ Yoasə lon Zedeɔn, yai naa mɛ̨i hee ɓaa: Yerubaalə, ə li ə hee ɲəi bɛlɛ́ laaləi.

³⁰ Zedeɔn lonnii hinąą di kɛ a nu pow mɛ̨ihveelɛ, mąąhɔlɔɓo, nɛ̨ąni tamąąi kɛ.

³¹ Nwɔ wɛli nɛ̨ɛ̨nui ŋɛ̨i kɛ a Sisɛmə nɛ̨ɛ̨nui, da yili di lon ɉulɔnu hɔlɔɓo, ə naa hee a: Abimelɛkə.

³² Yoasə lon Zedeɔn ə pɔlɔ lɛlɛɛ ɓo, yɛ pa laai nąnni kwɛlɛ; laai ə mo nąnni kwɛlɛ, di noo nąn Yoasə kámą hu Ofra daai, yai a Aviɛzɛrə nu huwu nwɔɔ.

³³ Ɓɛlɔwai Zedeɔn ə haa la, Israɛlə lonnii di pənə nwɔ̨nɔ̨, diɛ kwɛli hvilɛn Baalə ɓa. Di Baalə-Beritə kɛ a di wɔ hali.

³⁴ Israɛlə lonnii di hvo di kili lɛɛ Yai-Laa mąą mɛ̨nį hu, yai a di wɔ Yálá, yaai di kulɔ di yowoɠaa ŋɛ̨i kɛ di kwɛlɛ di yee mu.

³⁵ Di hvo kpɛli di ɲɛ̨i lɛlɛɛ hee Zedeɔn Yerubaalə yəi bɛlɛ́n nuą diɛ, mɛ̨inɛ̨ɛ̨ tii yili ə gɛ diɛ, di hvo kpɛli gaa a mɛ̨nį walawala.