Nwun mąąɓo 7 - Yálá laawoo hɛɓɛ (dc)

Zedeɔn nwɔ nu nwun ɉaaɓai

¹ Yələwala piinɛ̨ɛ̨, Zedeɔn, yai naa mɛ̨i hee ɓaa Yerubaalə, da nwɔ nu kpului di di muhəɠə, də li di di wɔ kɔ́ ɓuwui pɛlɛ Ein-Harɔdə ɲá ton na. Madian nuą di wɔ kɔ́ ɓuwui ə kɛ pɛlɛ́ni ɲələi pələ, nɛ̨ŋɛ̨ lɔi hu, More ɲee kwɛlɛ pələ.

² Yai-Laa yɛ Zedeɔn ɓa: «Nu kpului ŋɛ̨i ə pɔ, gɛnɛ̨i, vá pɛli gɔ́ wiɛi Madian nuą mɛ̨i di yee hu, ə gɛ, Israɛlə lonnii di hvo pa di huɲąŋą kɛnɛ̨, diɛ kɛ diɛ: Di wɔ kuláálaa ɓə di yeetɛɛmąą kɛ la. Mąąwiɛi mąąnɛ̨ɛ̨ ə tɛɛ bɔ́, di hvo pa gɛ a di wɔɔ.

³ Yili ɓa, mo ə́ wɔ nu kpului ɓa, yɛ mą: ‹Nuąi kpɔ di kaa ɲɔwi, di mąą yɛ kpɛlin, di pənə, di di mąą kwɛa Galaadə yee ɓa.›» Nu waa pow hveelɛ kɔ́w hveelɛ, di di pulu pənə də li, ə lɛɛ a nu waa pow.

⁴ Kɛlaa, Yai-Laa yɛ Zedeɔn ɓa: «Nu kpulu aa nwɔ̨nɔ̨ lɛɛ kɛnɛ̨, ka diɛni ka yɛɛ ɲái, nąą ɓə gáá lii di huyɛɠɛi laa. Nuąi mąąnɛ̨ɛ̨ də li, gáá pai di lɛi yɛ́, yiiɠaai di mąą hvo nɛ̨ɛ̨li a li nuą, ŋą́ di lɛ yɛ́.»

⁵ Zedeɔn ə nwɔ nu kpului həɠə, ə yɛɛ a diɛ ɲái. Yili pulu, Yai-Laa yɛ mą: «Nuąi pai di laa pɛlɛi ɲái yɛ yilɛɠaa, ə́ di pili di kee mɛ̨i. Nuąi pai hɛlɛn ɉii diɛ ɲá pili di la, a di yee, ə́ di pili di kee mɛ̨i.»

⁶ Nu nwun ɉaaɓaa ɓə ɲá pili na a di yee. Yiiɠaai kpɔ tii bɛlɛ mą, gəlee di di laa pɛlɛ ɲái, diɛ di kpələ.

⁷ Yai-Laa yɛ Zedeɔn ɓa: «Nu nwun-ɉaaɓa ŋɛ̨i ɲá pili di la a di yee, di pɔ pələ ɓə gaa Israɛlə nwun mąąɓoi la Madian nuą yəi. Yii ɓaa nuą yiiɠai tii, di pənə də li di pɔ taai.»

⁸ Zedeɔn da nu nwun-ɉaaɓai tii ɓə kɛa lɛɛ, ə mo yiiɠaai tii diɛ, yɛ diɛ: nu kəlee ə li bɔ taai. Kɛlaa, di kɔ̨nɔ̨n di paa la, da di wɔ túlúɠaai, di lɛɛ laa. Madian nuą di wɔ kɔ́ ɓuwui ə kɛ ɲee kɔ́wɔ la, ŋɛŋɛ hu.

⁹ Mąą kpinįi tii hu, Yai-Laa yɛ Zedeɔn ɓa: «Ə́ muhəɠə, ɲee yɛɛ, ə́ kɔ́ pɛlɛ Madian nuą diɛ, ŋą́ą́ di tɛɛ ə́ pɔ.

¹⁰ Akɛ ə́ kaa ɲɔwi pɛlɛi diɛ, ə́ wɔ tímun ŋɛ̨i ə́ pɔ diɛ kɛ mą: Pura, ka yaa ka li.

¹¹ Mɛ̨nįi di kaa moi laa, ə́ mɛ̨n, yili pulu, ə́ lii kaa pai kpələi, ə́ pɛlɛ diɛ a kɔ́.» Zedeɔn da nwɔ tímun, di yɛɛ, di di mąą lɛɠɛ muwu ɓa.

¹² Madian nuą, Amalɛkə nuą, da doonwunma nuąi həɠə voló həɠəi pələ, di hu hiaa kpɔ kɛ nɛ̨ŋɛ̨ hu laa yɛ peeləɠaa. Di wɔ ɲɔ̨nwɔmɛ̨ɛ̨ɠaai, kwɛdɛn və kɛ mą, ə kɛ yɛ gboloyá kwɛlɛ ɲɛ̨ąkɔw.

¹³ Zedeɔn ni həliɛ diɛ, hulɔnu ta ə kɛi nwɔ hįi woo hukulɔ mɛlan ma, yɛ kɛ mą: «Ŋą́ą́ hįi ta kaa! Ŋą́ kpai nwɔ̨mįi ta kaa, yɛ kiliɠilin, yɛ tɛɛ gu wɔ kɔ́ ɓuwui la, ə pa ə kɛlɛ ɉəɠə pɛlɛ́ tɔ̨nɔ̨ hu, ə doo, ə gɔwɔ tɛ mɛ̨i.»

¹⁴ Mɛlan yɛ mą: «Yili mukulaa hvo a hɛn da kpɛli, Israɛlə mun ŋɛ̨i a Yoasə non Zedeɔn nwɔ ɓɔwa kwɛaai li. Yálá aa gu tɛɛ bɔ, da gu wɔ kɔ́ ɓuwui.»

¹⁵ Yii kɛa Zedeɔn ə ɉįi wooi tii mɛ̨n, da mukulaa, ə kwɛli hvilɛn Yálá ɓa, ə mąmą ɓo. Yili pulu, ə pənə ə pa nwɔ kɔ́ ɓuwui la, ə tomą kpɔ a kuláá hvuluun nwoo, yɛ nuą diɛ: «'Ka ka muhəɠə! Yai-Laa aa Madian nuą tɛɛ gu pɔ.»

Madian nuą di pu Israɛlə nuą ɲɛ̨i tɔwɔ

¹⁶ Zedeɔn ə nwɔ nu nwun-ɉaaɓai tii ɲąąkwɛlɛ ɉu haaɓa, ə túlú tɛɛ nu kəlee pɔ; ə bɛlɛ múlúún bɛlɛɛɠaa diɛ, da kpalan.

¹⁷ Yili pulu, ə mo diɛ, yɛ diɛ: «Ka kəlee ka ka ɲɛ̨i hee pai kɛi bɔ́ɔ́li pələ, ŋą́ həli pai kɛi di wɔ ɓuwui kpɛlai, bələi ŋą́ gɛ la, kaa kpɛli, ka gɛ kpɔlɔ tii.

¹⁸ Ɓɛlɔwai kwa bɔ́ nuą kwa dúlú hvɛɛ la, kaa kpɛli, ka ka wɛi hvɛɛ. Ka vɛɛ, ka hvuluu, kaa diɛ: ‹Yai-Laa nwɛi, Zedeɔn nwɛi.›»

¹⁹ Gɛɛ kwii hąą hvo mɛlaɓo, Zedeɔn da nwɔ nu nwun-dɔnɔi di həli gɔ́ ɓuwu kpɛlai, daa kɛ kɛa gɔ́ ɓuwu mąąkpɛ nuą mąą hvalin. Di dúlúɠaa hvɛɛ, di múlúúnŋaa wolo.

²⁰ Gbulu hveelɛi tii diɛ kpɛli, di di wɛiɠaai wolo, di wɔ kpalanŋaai diɛ ɓo di kɔ́ɓəyee ŋą, dúlú ə bo di ɓa-mįi-yee ŋą; di tomą, diɛ mą: «Yai-Laa nwɔ ɓɔwa kwɛai, Zedeɔn nwɔ ɓɔwa kwɛai.»

²¹ Gbuluɠaai tii kəlee di lɛɛ tɔɔni di tɔɔi gɔ́ ɓuwu kwɛlɛ, nuąi kɛ laa gɔ́ ɓuwu la, di ɲɔw, diɛ tomą, diɛ gilɛ həɠə.

²² Zedeɔn nwɔ nu nwun-ɉaaɓai tii, di kɛi di wɔ túlúɠaai hvɛɛ, Yai-Laa ə di yowoɠaa di wɔ ɓɔwaɠaai ɲɛ̨i pənə di kpɔwɔ ɓa, diɛ di kee paa. Gbəliɠaai kulɔ ɉu, di tɛɛ a gilɛ, di li Bɛtə-Sita, Serera pələ, di li kpɔ di həli Avɛlə-Mehola, Tabatə kwɛlɛ.

²³ Nąąlɔwai, Nɛftali nu huwu, Asɛrə nwɛiɠaai, da Manase nwɛiɠaai, di kpɔn di kee ɓa, di hvilɛn Madian nuą pulu, diɛ di kpɛ.

²⁴ Yili pulu, Zedeɔn ə wɛlɛɛ tɔɔ Ɛfraimə nu huwu pɔ ɲeeɠaa ɓa, yɛ diɛ: «Ka yɛɛ, ka laa Madian nuą tɔwɔ, ka hee ɲáɠaa la, ə lɛɛ la ɉu, ka li Bɛtə-Bara, da Ɉurdɛn yá koo ɓa.» Ɛfraimə nuą di di kee təli, di kulɔ a di kpulu, di hee ɲáɠaa la, ə lɛɛ la ɉu di həli Bɛtə-Bara, da Ɉurdɛn yá koo ɓa.

²⁵ Di Madian ɲɛ̨i tɔwɔ nuą hveelɛi, Orɛvə da Ɉeɛvə di hon, di Orɛvə paa Orɛvə van ŋą, di Ɉeɛvə paa Ɉeɛvə viɲə yá kulɔi. Yili pulu, di hvilɛn Madian nuą pulu, diɛ di kpɛ. Nu hveelɛi tii di di paa, di pa a di nwungalən Zedeɔn pɔ jurdain yá pulu pələ.