Nwun mąąɓo 6 - Yálá laawoo hɛɓɛ (dc)Madian nuą di hee Israɛlə nuą mɛ̨i 1 Israɛlə lonnii di pənə nwɔ̨nɔ̨, mɛ̨nįi kɛ ɲɔ̨nwɔ̨ɔ̨ Yai-Laa ɲɛ̨i ɓa, di di yee lɔ ɉu diɛ gɛ, Yai-Laa, ə di too Madian nuą yee ŋą kwɛlan mɛ̨ihveelɛ yee mu. 2 Madian nuą di hee kpɔ Israɛlə lonnii mɛ̨i a nwąnąlɔ. Ya ɓə ə gɛ, Israɛlə nuą di kɛi di loo Madian nuą tɔwɔ, diɛ pələ kulɔ ɲee woloɠaa hu, diɛ lɔ gwɛni woloɠaa hu, diɛ di mąąkilɛ laa. 3 Ɓɛlɔwai Israɛlə nuą da di wɔ tíiɠaai hin na, Madian nuą da Amalɛkə nuą, da nuąi ɲɛ̨i kɛi həɠə voló kulɔi pələ, diɛ pa toonwunma ɓa, di kɛi too Israɛlə nuą mɛ̨i, 4 diɛ di taa pu Israɛlə lɔi hu, diɛ di wɔ hihɛnŋaai kala, diɛ lɛɠɛ la Gaza lɔi ɓa. Di hva kɔ̨nɔ̨n nɔpee ta lɛɛ Israɛlə nuą yəi, da di wɔ ɓɛlaɠaai həɠə, da nįŋɛ̨ɠaa, ɛlɛɛ da ɉoohvaalənŋaa. 5 Nuąi tii kɛi mɛ̨nį ɲąąnwąnąą la Israɛlə nuą diɛ, di kpulu hu kɛnɛ̨i kɛ yɛ peeləɠaa, da di wɔ taatɛlɛɛɠaai, ə mą kɛ, ɉəɠə pɛlɛ́ɠaa kəlee. Diɛ, da di wɔ ɲɔ̨nwɔmɛɛɠaai, di kpulu hu kɛnɛ̨i kɛ. Di kɛi pa, diɛ nɔi hɛnŋaa kəlee həɠə. 6 Madian nuąi tii mąą mɛ̨nį ɓa, hɛn lɔpee ta hvo kɛa kɛ Israɛlə nuą yəi. Yili ɓə gɛ, Israɛlə nuą di wɔlɔ Yai-Laa ɓa. 7 Ɓɛlɔwai Israɛlə nuą di wɔlɔ la Yai-Laa ɓa, diɛ ə di kulɔ Madian nuą yəi, 8 Yai-Laa ə gwəi mɛ̨nį hukulɔ mun da tɔɔ, yili yɛ diɛ: «Yai-Laa, yii gaa a Israɛlə nwɔ Yálá, nwoo ka, yɛ diɛ: Ɲą́ą́ ɓə ka kulɔ Eziptə, luwɔlaa hu. 9 Ŋą́ ka kulɔ Eziptə nuą yee mu, da nuą kpɔ kɛi ka laanɔ̨nwɔ̨ ɓo. Ɓɛlɔwai ka kɛi paa la nɔi ŋɛ̨i hu, ŋą́ kɛi ka yowoɠaa kpɛ, kpɔlɔ tii ka tɔwɔ, ə lɛɛ ɉu, ŋą́ nɔi tɛɛ ka pɔ. 10 Ŋą́ mo kaa, gɛ́ kaa: Ɲą́ą́ ɓə gáá a Yai-Laa, ka wɔ Yálá, mąą hvo nɛ̨ɛ̨li ka hvo kwɛli hvilɛn Amɔrə nuą di wɔ haliɠaai di kaa laa diɛ, ɓɛi ka káá laa heeni. Ya ka ti, ka hvo nwóó hon ni!» Yálá ə Zedeɔn həɠə ɉu 11 Yai-Laa nwɔ malaka ə pa, Ofra daai, ə hee wulu kɛnɛ̨ ta mu, yai kɛ a Yoasə nwɔɔ. Yoasə ə kɛ a Aviɛzɛrə yəi bɛlɛ́n mun da. Yoasə lon Zedeɔn, ə kɛi nwɔ mɔ̨nun dan, ɓɛi ŋɛ̨i da viɲə yá kulɔ laa, ə gɛ, Madian nuą di hvo pa gaa. 12 Yai-Laa nwɔ malaka ə gbɔwɔ lɛ mą, yɛ mą: «Zedeɔn, kɔ́kuláá walawala, Yai-Laa kaa ə pɔ.» 13 Zedeɔn yɛ malaka ɓa: «Ee! Nwɔ́ mɛ̨nį Nąmu! Akɛ Yai-Laa kaa ku pɔ, lə mɛ̨nį ɓa, mɛ̨nį ɲąąnwąnąąi ŋɛ̨i kaa laai kuɔ? Ku nąnni di kɛ kuɔ, Yai-Laa ə wɔlɔ di kulɔ Eziptə lɔi hu, ə kpalo mɛ̨nį tamąą kɛ di ɲɛ̨i ɓa, nwɔ mɛ̨inɛ̨ɛ̨ tii kaa kɛa mį? A tɛ̨ą, Yai-Laa aa gili kulɔ ku hu, aa ku kwɛlɛ Madian nuą diɛ.» 14 Yai-Laa ə tínɛ̨n yɛ Zedeɔn ɓa: «Vaŋąi tii gaa ə́ yə́i, li ə́ Israɛlə nwun mąąɓo la Madian nuą yəi. Ɲą́ą́ ɓə ə́ tɔɔi.» 15 Zedeɔn yɛ Yai-Laa ɓa: «Ee Nwɔ́ mɛ̨nį Nąmu! Ŋą́ pɛli Israɛlə nwun mąąɓoi ləi? Manase nu huwu lɔwai, ku wɔ pɛ́lɛ́i ɓə mąąwɛliɛ, ɛlɛɛ, ɲą́ą́ ɓə ku yəi bɛlɛ́n a nokolo.» 16 Ya ɓə, Yai-Laa a kɛ mą: «Gáá pai kɛi ə́ pɔ, yili ɓa, ə́ kaa pai Madian nuą kɛlɛi, yɛ yá kɛi nu tɔ̨nɔ̨ kɛlɛ.» 17 Zedeɔn yɛ nwɔ̨nɔ̨ mą: «Akɛ yáá ɉəɠə ɉu, mɛ̨nį ta lɛ mą́ą́, yii a nɛ yɛ, Yai-Laa yɛ́ ka tii mɛ̨nį ɓoi mą́ą́. 18 Hvó həɠə ɓɛ dɔ́wɔ, ə lɛɛ ɉu, ŋą́ li, ŋą́ pa a ə́ kɔ́ hɛn, ŋį́ dɛɛ ə́ pɔ.» Yai-Laa yɛ Zedeɔn ɓa: «Gáá lɛɛi ɓɛ, ə́ li ə́ pa.» 19 Zedeɔn ə li, ə ɓolu gbɔn da paa, ə bɛli, ə bɛlɛ, lɛɠɛ hunwɔ̨ kəgən ɉu pow haaɓa ɓa, lɛɠɛ tɛ hɛn və ɉu, ə paa la. Ə ɉuwɔi tii pu kpɔlɔ ta hu, ə ɉuwɔ yá lɛɛ nəɠii, ə paa la wulu kɛnɛ̨ ta mu, ə naa həli Yálá nwɔ malaka ɓa, 20 yili yɛ mą: «'Li, ə́ ɉuwɔ da nɛɠɛ pɛlɛ gee ɓa, ə́ ɉee van ŋą ɓɛi tii, yili pulu ə́ ɲiliyá pu mą.» Zedeɔn ə gɛ tii. 21 Ya ɓə, Yai-Laa nwɔ malakai ə ɲee haŋą, dunwɔ̨n tii kɛ ɲəi, ə ɉee ɉuwɔ da nɛɠɛ diɛ. Nwɔ̨n ə kulɔ gwɛni hu, ə ɉuwɔ da nɛɠɛ di kələn. Yili pulu, malaka ə kwɛlɛɛn, Zedeɔn hvo kɛa gaa. 22 Zedeɔn ə gɔlɔn gea, yɛ kɛ Yai-Laa nwɔ malaka ka tii kɛ. Yɛ gbɔwɔ ɓa: «Ée kə! Nąmu Yálá! Ɲą́ą́ ɓə tii ɲɛ̨́i aa tɔɔ Yai-Laa nwɔ malaka ɓa, kwa yaa ku ɲɛ̨i aa too gee hui!» 23 Kɛlaa, Yai-Laa yɛ Zedeɔn ɓa: «Ə́ liilaa, hvo ɲɔw, hvo pai haai.» 24 Zedeɔn ə nɛɛ mą, ə haláá kulɔi pɛli laa Yai-Laa ɓa, ə ɉaláá kulɔi tii laa hee, a: «Yai-Laa kaa a Líilaa.» Haa ɓaa haa, gɛɛnąąi tii kaa Ofra daai yai a Aviɛzɛrə nu huwu nwɔɔ. Zedeɔn ə Baalə nwɔ haláá kulɔi wolo 25 Gbini tɔ̨nɔ̨i tii hu, Yai-Laa yɛ Zedeɔn ɓa: «Ə́ nąn nwɔ nįŋɛ̨ hilɛ gbɔn həɠə, da nįŋɛ̨ hilɛ takpɛli, nwɔ kwɛlan yɛ ɓo mɛ̨ihveelɛ. Baalə nwɔ haláá kulɔi, gaa a ə́ nąn nwɔɔ, nąą wolo, nwulu ŋɛ̨i di gbanwo goo ɓa, diɛ gɔ́, ə́ gulɔ, ə́ ɉu tee. 26 Yili pulu, ɲee kpu kpui tii ton na, ə́ haláá kulɔi pɛli laa Yai-Laa ɓa, yai a ə́ wɔ Yálá. Ə́ nįŋɛ̨ hilɛi tii həɠə, ə́ gulɔ Yai-Laa ɓa a haláái da gəlee kələn, nwului tii di kɛi gɔ́, ə́ ɉu tee, ə́ gɛ a ɉaláá kwɛi.» 27 Zedeɔn ə nwɔ tínuąi bow həɠə, ə gɛ, díi Yai-Laa ə mo, da diɛni di gɛ. Di gɛ a kpinį mąąhɔlɔɓo, di kɛi ɲɔw nąn ɲəi bɛlɛ́n nuą diɛ, da daa nuą. 28 Yələ wala pɔ, daa nuą di di ɲįnąąɓo, di gaa, daa Baalə kɔ́i kala, nwului kɛ nąą kwɛlɛ, daa gəlee kulɔ, ɉaláá kulɔi nįnɛ̨i tii di bɛli, daa nįŋɛ̨ lon gulɔ laa a haláái da gəlee kələn. 29 Daa nuą di kɛi di kee mąąni kɛ, diɛ kɛ mą: «Gbɛɛ ɓə mɛ̨nį ŋɛ̨i kɛ?» Di lɛɛ nu kwɛlii, di bələ mɛ̨n, diɛ mą: Yoasə lon Zedeɔn ɓə. 30 Nuą dəli kɛa, diɛ Yoasə ɓa: «Pa a ə́ lon Zedeɔn, ku baa, mąąhɔlɔɓo, aa Baalə nwɔ haláá kulɔi wolo, nwului kɛ nąą kwɛlɛ, kuɔ gɔ́, aa gulɔ aa ɉu tee.» 31 Nuąi kpɔ pa Yoasə pɔ, ə mo diɛ, yɛ diɛ: «Akɛtii, kaa ɓə mąąnɛ̨ɛ̨ ka Baalə tɔɔ bulu kɛ mɔ̨ɔ̨? Nui lɔpee a kɛ yɛ gaa Baalə tɔɔ bulu kɛi, gɛɛ tínąą yələ hvo ɓɔ, kwa baa. Akɛ Baalə kaa a yálá, mąąnɛ̨ɛ̨ ə gbɔwɔ mąąkɔ̨nwɔ̨, mąąhɔlɔɓo, ɓɛi da gɔ́ laa, nąą ka tii Zedeɔn aa nwolo.» 32 Ə həɠə kɛa ɲələi tii ɓa, di Zedeɔn laa mɛ̨i hee, a: Yerubaalə; mukulaa ɓaa: Baalə ə gbɔwɔ mąą kɔ̨nwɔ̨. Di yili ɓo tii, mąąhɔlɔɓo, nwɔ haláá kulɔi ka tii daa nwolo. Zedeɔn ə kɔlɔn ɉɛn vɛli Yálá ɓa 33 Madian nuą, Amalɛkə nuą, da nuąi da həɠə doo nwunma ɓa vóló kulɔi pələ, di pɛlɛ di kee ɓa, di jurdain teen, di pa di di wɔ ɓuwui pɛlɛ Izreɛlə. 34 Yai-Laa nwɔ Kilii ə pa Zedeɔn pɔ, Zedeɔn ə túlú hvɛɛ, ə gɛ, Aviɛzɛrə nu huwu di hvilɛn bulu. 35 Zedeɔn ə wɛlɛɛ tɔɔ Manase nu huwu kəlee pɔ, di di ɲąąkpɔn, di hvilɛn bulu. Ə pənə ə wɛlɛɛ tɔɔ Asɛrə nu huwu pɔ, da Zabulɔn nu huwu, ə mą kɛ Nɛftali nu huwu di di ŋąąkpɔn di hvilɛn bulu. 36 Nąąlɔwai, Zedeɔn ə mo Yálá ɓa, yɛ mą: «Yɛ́ kpinįi ɓə mo, yɛ mą: Ɲą́ą́ ɓə ə́ kaa Israɛlə nwun mąąɓoi ɲéé hu. 37 Yili ɓa, gáá mɛlaa lɛɠa ŋɛ̨i pɛlɛi ɓɛi da kɛ mɔ̨nun dan ɉii laa. Akɛ mɛlaa kɔ́lɔi a yɔwɔ gwɛlɛ ə lɛɛ a gbalaa, ə lɛɛ la ɉu, yələwala, ŋą́ gɔlɔn, gɛ́ diɛ, ɲą́ą́ ɓə ə́ kaa pai Israɛlə nwun mąąɓoi ɲéé hu, yɛ bələi ə́ mo la.» 38 Ə kɛ kpɔlɔ, yɛ pələi Zedeɔn, ə ɉu hvɛli la. Yələwala pɔ, Zedeɔn ə humo, ə mɛlaa lɛɠai tii həɠə, ə nowa, ə ɲá pu kpələ kɔwɔ ta hu, ə vɛɛ. 39 Yili pulu, Zedeɔn yɛ nwɔ̨nɔ̨ Yálá ɓa: «Ną́mu, hvó ə́ líiholi bɔ́, gáá bɔ nwɔ̨nɔ̨, ŋą́ da kpɛli ɓo! Gɛ́ nwɔ̨nɔ̨, ŋą́ kilila tee hɔlɔɓo, mɛlaa lɛɠai ŋɛ̨i pɔ pələ. Yii ŋɛ̨i nwɛi, gáá bɔ mɛlaa lɛɠa ə lɛɛ a gbalaa, mu ə yɔwɔ nɔi ɓa.» 40 Mąą kpinįi hu, mɛ̨nįi Zedeɔn ə ɉu hvɛli Yálá ɓa, Yálá ə gɛ. Mɛlaa lɛɠa ə lɛɛ a gbalaa, kɛlaa, luwuluwu ə pu nɔi ɓa nąą kəlee. |