Nwun mąąɓo 5 - Yálá laawoo hɛɓɛ (dc)

Debora nwɔ wələ woo

¹ Mąą yələi tii Israɛlə lonnii di yeetɛɛmąą kɛ la, Debora da Avinoamə lon Barakə di nwələ ŋɛ̨i too; diɛ kɛ mą:

² «Israɛlə lɔi hu, kɔ́kulááɠaa kəlee hąą yiliɛi kɔ́ kɔ́ mɛ̨nį ɓa. Nɔi nuą kəlee daa di kpɔwɔ kwɛlɛ a di kwəinɛ̨ɛ̨, ə gɛ, di kɔ́ kɔ́: ka gu Yai-Laa mąąwiɛ.

³ Kaai ɓaa tɔɔɓɛlaa, ka ka wəli tɔɔ, kaai ɓaa ɲɛ̨itɔwɔ nuą, ka mɛ̨nįi ŋɛ̨i mɛ̨n! Gáá pai wələ tooi, ŋą́ Yai-Laa, Israɛlə nwɔ Yálái mąątɛ̨nɛ̨.

⁴ Ee, Yai-Laa! Ɓɛlɔwai ə́ həɠə la Seirə lɔi hu, yɛ́ pa, ɓɛlɔwai ə həɠə la Edɔmə ɲɛɛ kɔwɔɠaa hu, lɔi ə kpɛlin, yələkɔlɔn ə tumo, tulɔ kpinįn ɲá ə tee mą, ə pu a tulɔ kɛnɛ̨.

⁵ Yeeɠaa di kɛi kpɛlin Yai-Laa ɲɛ̨itɔwɔ, ə mą kɛ, Sinai yee yaa kpɛli. Yai-Laa, ə́ kaa a Israɛlə nwɔ Yálá.

⁶ Anatə lon Samgarə da Yaɛlə di wɔ yələ hu, bələɠaa di too, nuą di hvo kɛi kɛa hiɛ kulɔ a di kpulu. Hiɛ kulɔ nuą di kɛi tɛɛ a pələ kpəlaan ŋąą.

⁷ Nwun nąmįną di hvo kɛa kɛ daa-leeɠaa hu, nwun nąmįną di hvo kɛa kɛ Israɛlə lɔi hu. Ə lɛɛ ɉu, ɲą́ą́ Debora, gɛ́ muhəɠə yɛ ə lɛɛ ɉu, ɲą́ą́ gɛ́ muhəɠə yɛ Israɛlə lonnii di lee.

⁸ Nąąlɔwai tii, Israɛlə nuą di kɛi hali nįnɛ̨ɠaa pɛli. Nąąlɔwai lɔ ɓə, kɔ́ ə kɛi too la diɛ. Yili a kɛ tii, nu ta hvo kpɛli kɛi kpala da hə́mə́ di hɔlɔɓo, Israɛlə hinąą waa pow nąąn mąą mɛ̨nį ɓa.

⁹ «Nį́ilaai Israɛlə ɲɛ̨itɔwɔ nuą mɛ̨i, da nuąi da di kpɔwɔ kwɛlɛ a kwəinɛ̨ɛ̨. Ka Yai-Laa mąąwiɛ.

¹⁰ Kaai kɛ heeni hoohvaalən gwɛlɛɛɠaa mɛ̨i, kaai heeni haɠaɠaa mɛ̨i, kaai tii hiɛi bələɠaa pɔ, ka wələ too.

¹¹ Ɲá lɔwaɠaa la, nuąi da kɛ ɲá ɲąąkwɛlɛi, ka Yai-Laa kɛ mɛ̨inɛ̨ɛ̨ɠaa hukulɔ, gɛ mɛ̨inɛ̨ɛ̨ yiiɠaai aa gɛ Israɛlə ɲɛ̨itɔwɔ nuą diɛ, mąąhɔlɔɓo, aa ɲee kɔ̨nwɔ̨n ɉu ɓɛlɛ. Nąąlɔwai, Yálá nwɔ nuąi di ɉįi laaləiɠaa hon.

¹² «Debora! Ə́ ɲɛ̨ilaa ɓo! Ə́i muhəɠə! Ə́ wələ too. Avinoamə lon Barakə! Ə́ muhəɠə, ə́ pa, a ə́ wɔ kɔ́ honŋaai!

¹³ Nąąlɔwai, nu kpəli wolaai lɛɛ, di hvilɛn galanɉonŋąą pulu. Yai-Laa nwɔ nuąi di di ɲąąkpɔn gwɛ́lɛ, yɛ kulááɠaa.

¹⁴ Nuąi di yee ə tɛɛ Amalɛkə nuą diɛ, di həɠə Ɛfraimə lɔi hu, Bɛnɉamɛn nu huwu di hvilɛn di pulu, di humo a di kee. Makirə yəi bɛlɛ́n nuą, di kɔ́kulááɠaa kulɔ, Zabulɔn nu huwu, ɲɛ̨itɔwɔ nuą kulɔ, tɔɔ-tunwɔ̨n ə ɓo di yəi.

¹⁵ Isakarə nwɔ nwun nąmįnąi di hvilɛn Debora pulu, Isakarə nu huwu, da Barakə ni ɓə di tɔɔ, di hvilɛn Barakə pulu, nɛ̨ŋɛ̨ lɔi hu. «Kɛlaa, Rubɛn nu huwu di wɛi, di hea too, gbəlai hvo kɛ mą.

¹⁶ Lə mɛ̨nį ɓa ka lɛɛ ka yei daatɛlɛɛ gala hu? Kaa ka wəli tɔɔ daatɛlɛɛɠaa təli túlu woo ɓa? Kɛlaa, Rubɛn nu huwu lɔwai, di kɛi mɛ̨nį hu yala di kee lɔwai, a ɉu kwɛaa.

¹⁷ Galaadə lɔi hu, Ɉurdɛn yá voló həɠəi pələ, nu ta lɔpee hvo həɠə ɉeei. Dan nu huwu di lɛɛ heeni, di ɓo di wɔ yá ŋą kələnŋaa kwɛlɛ, Asɛrə nu huwu diɛ kpɛli, di lɛɛ heeni gboloyá kwɛlɛ, ɓɛi nwɔ kələnŋaa da pa diɛ tɔɔlaa.

¹⁸ «Zabulɔn nu huwu di wɛi, ə mą kɛ Nɛftali nu huwu, di hvaa mą, di kɔ́ pɛlɛ haa ɓa.

¹⁹ Kanaan tɔɔɓɛlai kɛ a di yowoɠaa, di kɔ́ pɛlɛ Tanaakə ɓa, ɲá tonŋaai ŋɛ̨i kɛ Megido lɔi hu, di kwɛlɛ. Kɛlaa, di hvo kɔ́ hon nɔpee ta hɔlɔɓo, ə mą kɛ a wali.

²⁰ Yələkɔlɔn ɉu pɛmɛ̨lɛ̨n-gɔwɠaa, di di wɔɔ nąą kɛ gɔ́ mɛ̨nį hu, bɛmɛ̨lɛ̨n-gɔwɠaai tii di hvilɛn bələ ɓa di kɔ́ pɛlɛ, kɔlaɠa nwun nąmu Sisera ɓa.

²¹ Kisɔn ɲá leei a yá lee pɔlɔ-pɔlɔ, ə di həɠə ə li a diɛ, ka gwəli gɔ́ mɛ̨i a liikpələ.

²² Nąąlɔwai, ɉooɠaa kɔ́wɔ mu tin ə kɛi tɔɔ, diɛ nɔi tan a di kɔ́wɔ.

²³ Ka Merozə taa nɛ̨ŋɛ̨n naa, Yai-Laa nwɔ malaka woo li, ka ɉu nuą nɛ̨ŋɛ̨n naa, ka di nɛ̨ŋɛ̨n naa, mąąhɔlɔɓo, di hvo pa li, di hvo kpɔmąą tɛɛ Yai-Laa pɔ. Di hvo gɛ li, di hvo too Yai-Laa nwɔ kulááɠaai pɔ, di hvo kɔ́ pɛlɛ ɲowoɠaa diɛ.

²⁴ Keni mun Hebɛrə, lúwɔ́ kaa nɛ̨ą Yaɛlə ɓa, nɛ̨ąą kəlee lɔwai, lúwɔ́ kaa Yaɛlə ɓa, mɛlaa nɛ̨ąą lɔwai, diɛi di kaa pɛlɛ́n.

²⁵ Sisera ə ya hvɛli Yaɛlə ɓa, Nɛ̨ɛ̨nui tii ə nįŋɛ̨ ɲįnįyá tɛɛ bɔ, nįŋɛ̨ ɲįnįyá nwulɔ pɛlɛɛ ni ŋą, kpələ kɔ́wɔ lɛlɛɛ hu.

²⁶ Ə ɉəɠə pɛlɛ́ tɔɔ wulu kpiɛn dɔ̨nɔ̨ kulɔ, ə ɉon a ɲee tɔ̨nɔ̨, ə góló kɛ nuą di wɔ madalan ɉon a mamįiyee, ə gbɔn Sisera nwun ɉu, ə nwun mɛla, nwulu kpiɛn ə ɓɔ ɉu, ə hvilɛn nɔi ɓa.

²⁷ Sisera ə haŋą ə hee Yaɛlə kɔ́wɔ mu, ə too, ə haa. Ə haŋą kpɔ ə hee, ə pənə ə too, ə haa.

²⁸ «Sisera nee ə lɛɛ tɔɔni vinɛtɛlɛ la, níi ə ɓɛla mą, yɛ non mąą woolaa kɛ, yɛ kɛ diɛ: ‹Lə ɓə kɛ yai Sisera nwɔ wotoloi hvo ni pa li? Lə ɓə kɛ yaai aa lamun laa?›

²⁹ Nwɔ tínɛ̨ąąi kɛ bɔ, gilimąąmun ə nwoo mu hon, yɛ gbɔwɔ ɓa:

³⁰ ‹Kɛlɛi di kaa kiɛ gɔ́ hon ɲąąkwɛlɛ. Luwɔ nɛ̨ą dɔ̨nɔ̨, a wala kɛ tii luwɔ nɛ̨ą veelɛ ɓə gaa a kɔ́kuláá tɔ̨nɔ̨ nwɔɔ. Tɔɔ həɠə mąą puɔ ɓə gaa a Sisera nwɔɔ, a tɛ̨ą nwɔ həɠəi mąą puɔi, gɔn mąą puɔ gee hu hveelɛ, yili ɓə di kaa pai dooi yeetɛɛmąą kɛ mun gwąną.›

³¹ «Yai-Laa, pələ ɓə ə́ yowoɠaa kəlee nwun na a pili la, Kɛlaa, ə́ wɛlikɛmąą nuą, da lən yɛ hvóló a tɛ nwun ma.» Bələ ɓə Israɛlə lonnii di líilaa hɔlɔɓo la, kwɛlan bow nąąn ɲee mu.