Nwun mąąɓo 4 - Yálá laawoo hɛɓɛ (dc)

Debora da Barakə

¹ Ehudə haa pulu, Israɛlə nuą di gbala tɔɔ nwɔ̨nɔ̨, mɛ̨nį ɲɔ̨nwɔ̨ɔ̨ Yai-Laa ɲɛ̨i ɓa, di di yee lɔ ɉu diɛ gɛ.

² Yai-Laa ə di too Kanaan tɔɔmun Yavimə yəi ŋą, yili ə kɛ heeni Hasɔrə. Nwɔ kɔlaɠa nwun nąmu ɓa kɛ a Sisera, kɛlaa, yili ə kɛ heeni Harosɛtə-Goimə.

³ Israɛlə nuą di wɔlɔ Yai-Laa ɓa, mąąhɔlɔɓo, kɔ́ wotolo nwun mɛ̨inąąn ə kɛ Sisera yəi, ə ɓo a kwɛli, ɛlɛɛ, aa kɛ hee Israɛlə nuą nwun mɛ̨i kpɔ a nwalawalaa, kwɛlan bow hveelɛ yee mu.

⁴ Nąąlɔwai, Lapidotə nɛ̨ą Debora, yai kɛ a Yálá kwəi mɛ̨nį hukulɔ nɛ̨ɛ̨nu ta, ya ɓə kɛi Israɛlə ɲąąwooɓo.

⁵ Ə kɛ heeni Debora nwɔ tow wului mu, Rama da Betɛlə di lɔwai, Ɛfraimə nwɔ yeei hu, Israɛlə nuą diɛ li bɔɔli, yɛ di lɔwai mɛ̨nįɠaa ɓo.

⁶ Debora ə Avinoamə lon Barakə təli, yai kɛ a Kɛdɛsə, Nɛftali lɔi hu mun. Yɛ mą: «Yai-Laa Israɛlə nwɔ Yálá, yii ə mo ya ka, yɛ: ‹Ə́ li ə́ nu waa pow ŋąąkpɔn Tabɔrə yee ɓa, ya di həɠə Nɛftali lonnii da Zabulɔn lonnii di lɔwai.

⁷ Gáá pai Yavimə nwɔ kɔlaɠa namui Sisera tənən dɔɔi yɛ́, da nwɔ wotoloɠaai, ɛlɛɛ da nwɔ kɔ́kulááɠaai Kisɔn ɲá-ɓoloon bɔ, ŋą́ di lɔ ə́ yee ɲą.›»

⁸ Barakə yɛ mą: «Akɛ gwa yɛ́ ɓə lii, váái mą. Kɛlaa, akɛ hvo bɔ́, vá li.»

⁹ Debora yɛ mą: «Akɛ gwa yɛ́ gwa li, mąąwiɛ laa hvo pai lɛɛi ə́ yəi, mąąhɔlɔɓo, nɛ̨ɛ̨nu ɓə Yai-Laa kaa pai Sisera lɔi ɲee ŋą.» Debora ə muhəɠə, da Barakə də li Kɛdɛsə.

¹⁰ Barakə ə Zabulɔn nuą da Nɛftali nuą di ŋąąkpɔn Kɛdɛsə. Nu waa pow ə hvilɛn Barakə pɔ, di hvilɛn Debora pulu.

¹¹ Hebɛrə ŋɛ̨i kɛ a Keni mun, ə kulɔ Keni nuą pɔ, diɛi kɛ a Moisə mɔlɔ Hobabə lonnii, ə nwɔ taai pu Saananimə nwɛla kwɛlɛ, Kɛdɛsə.

¹² Di mo Sisera ɓa, diɛ mą: «Avinoamə lon Barakə aa tɛ Tabɔrə yee ɓa.»

¹³ Sisera ə nwɔ kɔ́ wotoloɠaai kəlee ŋąąkpɔn, kwɛli wotolo nwun mɛ̨inąąn, da gɔ́ kɔ́ nuąi kpɔ kɛ ɲee mu. Ə həɠə Harosɛtə-Goimə lɔi ɓa, ə həli la Kisɔn yá ɓa.

¹⁴ Debora yɛ Barakə ɓa: «'Ə́ muhəɠə, volói Yai-Laa aa Sisera lɔ la ə́ yee ŋą, voló ka. A tɛ̨ą, Yai-Laa kaa pai kɛi ə́ tɔwɔ.» Barakə ə Tabɔrə yee yɛɛ, nu waa pow hvilɛnŋaa bulu.

¹⁵ Yai-Laa ə ɲɔw too Sisera kɔ́lɔi, ə pu Barakə tɔwɔ, da nwɔ kɔ́ kɔ́ wotoloɠaai kəlee, da nwɔ kɔlaɠai kəlee, gəlee di lɛɛ a kɔ́ kɔ́ ɓɔwa kɔ̨nɔ̨n. Sisera ə kulɔ nwɔ kɔ́ kɔ́ wotolo hu, ə hvilɛn gɔwɔ ŋą, ə pu.

¹⁶ Barakə ə hvilɛn gɔ́ kɔ́ wotoloɠaa da gɔ́laɠaɠaa pulu, ə həli kpɔ Harosɛtə-Goimə lɔi hu, Sisera nwɔ kɔlaɠaɠaai kəlee di lɛɛ a kɔ́ kɔ́ ɓɔwa kɔ̨nɔ̨n, da lɔpee hvo kulɔ ɉu.

¹⁷ Sisera nwɛi, ə kɛ gɔwɔ ŋą, yɛ gilɛ həɠə, yɛ li Hebɛrə ŋɛ̨i kɛ a Keni mun, nɛ̨ą Yaɛlə nwɔ pɛ́lɛ́i pɔ pələ. Mąąhɔlɔɓo, nɛ̨ɛ̨laa ə kɛ Hebɛrə nwɔ pɛ́lɛ́i da Hasɔrə tɔɔmun Yavin di lɔwai.

¹⁸ Yaɛlə ə kulɔ, ə Sisera laakwiɛn, yɛ mą: «'Lɔ ɓɛ nwɔ́ mɛ̨nį nąmu, lɔ ɲə́i bɛlɛ́n, hvo ɲɔw.» Yili ə lɔ bɔɔli, nɛ̨ɛ̨nui tii ə həɠə pɛlɛ mɛ̨i.

¹⁹ Sisera yɛ mą: «Yá tɛɛ bɔ́ ŋą́ gbələ, kpələ wɛli kaa mą́ą́.» Nɛ̨ɛ̨nui tii ə nįŋɛ̨ ɲįnįyá ɓala laa ɓo, ə da tɛɛ bɔ, ə gbələ, ə pənə ə ɉəɠə pɛlɛ mɛ̨i.

²⁰ Sisera yɛ mą: «'Tɔɔ bɛlɛ́ laaləi, nu ta a pa a ə́ mąąni kɛ, yɛ kɛ yɛ́: ‹Nu ta kaa ɓɛ?› Yá kɛ mą: ‹Kpaa!›»

²¹ Ɓɛlɔwai Sisera ə kɛi yíi la, Hebɛrə nɛ̨ą Yaɛlə ə bɛlɛ́ lɔnwɔ̨ ta həɠə, ə bɛlɛ madalan-gɔw ɓa, ə lɔ kpɔlɔɔ bɛlɛ́n ɲąą, ə nwulu kpɔn nwun ɉu, nwulu ə ɓɔ ɉu, ə həli kpɔ nɔi ɓa. Ə haa,

²² Barakə yaan, vilɛn ŋąą kɛ Sisera pulu, Yaɛlə ə kulɔ yɛ li naakwiɛn ɉii, yɛ mą: «Pa! Nui ə́ kaa gwɛlii, ŋą́ nɛ yɛ́.» Barakə ə lɔ bɔɔli, ə Sisera kaa too ni a bowa, nwulu kpiɛn gbɔn ŋąą nwun ɉu.

²³ Mąą yələi tii, Yálá ə Kanaan tɔɔmun nwun mąą yɛɛ, Israɛlə nuą yee mu.

²⁴ Israɛlə nuą yee ə wiɛ kpɔ a nwalawalaa Kanaan tɔɔmun Yavimə mɛ̨i, ə lɛɛ ɉu, di yee ə tɛɛ Yavimə ɓa.