Nwun mąąɓo 3 - Yálá laawoo hɛɓɛ (dc)

¹ Nu huwuɠaai Yai-Laa ə di lɛɛ laa, yɛ Israɛlə nuą yiiɠaai di hvo Kanaan kɔ́i kɔ́, yɛ di hukɔɔn a diɛ, di laa ka:

² Yai-Laa ə kɛ bɔ, ɉəɠə gee pɔ nįnɛ̨i tii kɛ a Israɛlə nuą, di kɔ́ kɔ́ɔ mąą kwɛli; diɛi wɔlɔ di hvo ta kɛ kɔ́ kɔ́ li.

³ Nu huwuɠaai tii laa ka: Filisti tɔɔɓɛlaa lɔɔli, Kanaan nuą, ɛlɛɛ, Sidɔn nuą, Hivi nuą, diɛ kɛ di heɛ Liban ɲeeɠaa ɓa, ə həɠə Baalə-Hɛrmɔn ɲee ɓa, ə həli la Lebo-Hamatə ɓa.

⁴ Yai-Laa ə Israɛlə hu kɔ́ɔn a nu huwuɠaai tii, ə gɛ, ə gaa a kɛ di kaa pai Yai-Laa nwɔ tɔ́nŋaa hon ɉii, yaa tii wɔlɔ ə dɛɛ Moisə pɔ, yɛ nɛ di nąnni diɛ.

⁵ Israɛlə lonnii di kɛ heeni Kanaan nuą lɔwai, da Hɛtə nuą, da Amɔrə nuą, Perizi nuą, Hivi nuą da Ɉebusə nuą lɔwai.

⁶ Israɛlə nuą di yiliɠaai lonnii nɛ̨ą həɠə a di nɛ̨ąni, diɛ di kpɔ-kpɔ lonnii nɛ̨ąą tɛɛ yiliɠaai lon ɉinąą pɔ a di nɛ̨ąni, diɛ di wɔ haliɠaai mąąwiɛ.

Nwun mąąɓo kɛ nuą mąą mɛ̨nį Dɔlɔɔ Otniɛlə

⁷ Mɛ̨nįi kɛ ɲɔ̨nwɔ̨ɔ̨ Yai-Laa ɲɛ̨i ɓa, Israɛlə ə ɲee lɔ ɉu, di di pulu tɔɔ Yai-Laa ɓa, yai a di wɔ Yálá, diɛ kwɛli hvilɛn Baaləɠaa da Aseraɠaa diɛ.

⁸ Yai-Laa lii ə holi Israɛlə nuą pɔ, ə di kwɛlɛ Kusan-Riseataimə ɓa, yai kɛ a Aramə yá leeɠaa kwɛlɛ tɔɔmun, di kwɛlan mɛ̨ihaaɓa kɛ yili yəi luwɔlaa hu.

⁹ Israɛlə lonnii di wɔlɔ Yai-Laa ɓa, Yai-Laa ə Israɛlə nwun mąąɓomun dɛɛ di pɔ, yili ə di nwun mąąɓo. Naa ɓaa kɛ a: Otniɛlə, yai kɛ a Kalɛbə nəɠə Kenazə lon.

¹⁰ Yai-Laa nwɔ Kilii ə kɛ ɲəi, ə Israɛlə ɲąąwooɓo, ə kɔ́ pɛlɛ Kusan-Riseataimə ɓa, yai kɛ a Aramə tɔɔmun, Yai-Laa ə yeetɛɛmąą laa tɛɛ bɔ Kusan-Riseataimə mɛ̨i.

¹¹ Nɔi ə liilaa hɔlɔɓo kwɛlan bow nąąn ɲee mu, yili pulu, Kenazə lon Otniɛlə ə haa.

Veelɛnąą Ehudə

¹² Israɛlə nuą di gbala tɔɔ nwɔ̨nɔ̨, mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, di di yee lɔ ɉu. Yai-Laa ə Moabə tɔɔmun Ɛglɔn lii kpələ, Israɛlə nuą diɛ, mąąhɔlɔɓo, mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, ya ɓə di di yee lɔ ɉu.

¹³ Ɛglɔn da Amɔn nuą, ɛlɛɛ Amalɛkə nuą, di di yee pɛlɛ gee ɓa, di pa di yee ə tɛɛ Israɛlə ɓa, di dow kpulu mu taa kɛnɛ̨ hon, yai kɛ a Ɉeriko taa.

¹⁴ Israɛlə nuą di lɛɛ Moabə tɔɔmun Ɛglɔn yee mu, ə kɛ a kwɛlan bow kɔ́w mɛ̨ihaaɓa.

¹⁵ Israɛlə nuą di wɔlɔ Yai-Laa ɓa, Yai-Laa ə di nwun mąąɓomun dɛɛ di pɔ, yai kɛ a Gera lon Ehudə yai kɛ a Bɛnɉamɛn mun, gɔɓɛɛ kɛ. Israɛlə nuą di di yee pɛlɛ gee ɓa, di dɛɛ Ehudə pɔ, yɛ li naa lɛi Moabə tɔɔmun Ɛglɔn pɔ.

¹⁶ Ehudə ə ɓɔwa pɛli, ɲąąliɛ bələ hveelɛi, gwɛa yee ə ɓo a yee laa mą tɔ̨nɔ̨, ə gbulɔn nwɔ həɠəi mu, mamįiyee wɛla ɓa.

¹⁷ Ə ɉɛn gɔwi tii tɛɛ Moabə tɔɔmun Ɛglɔn pɔ, Ɛglɔn yaan ə kɛ a nu kpinį kɛnɛ̨,

¹⁸ kpɛɛi Ehudə ə mo a ɉɛn gɔwi tii tɛɛ, nuąi da diɛni di pa ɉɛn gɔwi tii laalɛi, ə ɓo yiliɠaa diɛ, di pənə di li.

¹⁹ Kɛlaa, nwɛi, həlii ə mo ɓɛi ɉaliɠaa kaa laa, Gilgalə daa kpala, ə yali bulu, yɛ diɛ: «Loo mɛ̨nį kaa gwə́i a ə́ wɔ, tɔɔmun.» Yili yɛ nuą diɛ: «Ka kulɔ ɲɛnɛ̨ɛ̨, nuąi kpɔ kɛ tɔɔ ni gwɛlɛ, gəlee di kulɔ.»

²⁰ Ehudə ə li Ɛglɔn pɔ, yili yɛ ɓo ɲee bɛlɛ́n, yɛ hvaŋą həɠə, yaa tɔ̨nɔ̨ lɔ ɓə kɛ laa. Ehudə yɛ mą: «Tɔɔmun, Yálá aa wɛlɛ ɓo mą́ą́ yɛ ŋį́ mo yɛ́.» Yili ə nɛɛ mą ə muhəɠə nwɔ kpəlin hu.

²¹ Ehudə ə gɔɓɛ yee lɔ ɉəɠə mu, ə mowa kulɔ mamįiyee wɛlɛ mɛ̨i, ə nɔ tɔɔmun gwəi.

²² Mowa nwun gəlee ə lɛɛ mowa kɔ́w ɓa ə lɔ, nwulɔ ə mowa mɛ̨i kpulu, mąąhɔlɔɓo, Ehudə hvo mowa kulɔ tɔɔmun gwəi.

²³ Ehudə ə kulɔ bɛlɛ́ kpon bələ. Ə bɛlɛ́ laa pɛlɛ mą bulu pələ, ə naa kpulu a gbon gwɛli.

²⁴ Kulɔi Ehudə ə mo, tɔɔmu ɲee pɔ nuą di pa nąą kaai, ɲələi pɛlɛ́ laa kpuluɔi kɛ a gwɛli, diɛ di kee ɓa, tɔɔmun aa kiɛ li hįi pulu.

²⁵ Di nąą mąąkpɔn a ɉu kwɛa, di kwəi ə pili diɛ, tɔɔmu və kɛi bɛlɛ́ laa ɓo. Di gbon gwɛli həɠə, di bɛlɛ́ laa ɓo, di di nąmu kaa tooni a bowa.

²⁶ Ehudə nwɛi ə pu ɓɛlɔwai di kɛi tɔɔmun mąą kpɔn na, aa kɛ tɛɛ ɉalə kɛɛnąą ɓa, ə li ə mąą kilɛ Seira gbomo hu.

²⁷ Ə həli kpɔlɔ, ə dulu hvɛɛ, Ɛfraimə nwɔ yee ɓa, Israɛlə nuą di hvilɛn bɔ, di ɲee yɛɛ, ə ɓo di ɲɛ̨i tɔwɔ.

²⁸ Yɛ diɛ: «Ka hvilɛn búlú, mąąhɔlɔɓo, gu yowoɠaai a Moabə nuą, Yai-Laa aa di lɔ gu yee ɲą.» Di lɛɛ bulu, di ɲee yɛɛ, ɓɛi da Ɉurdɛn yá teen naa, di nąą hon, Moabə nwɔ lɔi ta li kɛ, di hvo nu ta lɛɛ laa hvo tɛɛ.

²⁹ Mąą yələi tii, di yee ə tɛɛ Moabə ɓa, di nu waa pow ɲɔ̨nwɔmąn baa, diɛ ɓo a kpakoloɠaa da kulááɠaa; nu ta lɔpee hvo kulɔ a di yee wolo.

³⁰ Mąą yələ, Moabə nwun ə yɛɛ Israɛlə yee mu, nɔi ə liilaa hɔlɔɓo kwɛlan bow mɛ̨ihaaɓaa yee mu.

Ɉaaɓanąą Samgarə

³¹ Ehudə həɠɛɛ laa, Anatə lon Samgarə ə mąą hvalin ɲee ə tɛɛ Filisti nuą, nu nwun-mɛ̨ida ɓa a nįŋɛ̨ kpala kpɛ gbɔn, ə Israɛlə nuą nwun gulɔ la tii mɛ̨nįi.