Nwun mąąɓo 21 - Yálá laawoo hɛɓɛ (dc)Bɛnɉamɛn huwu ə pənə ə nwun 1 Israɛlə nuą kəlee di di kwɛla, ɓɛlɔwai di kɛ la Mispa daai, diɛ mą: «Ku ta lɔpee hva kɛa non nɛ̨ɛ̨nu ta hilɛtaai kɛ Bɛnɉamɛn mun da ɓa.» 2 Nu kpulu ə pənə ə pa Betɛlə daai, di lɛɛ heeni Yálá lííla, ə lɛɛ la ɉu yələwulii. Di kəlee di di woo kulɔ, di wɔlɔ, diɛ di woolaa a nąą mąąwɛliɛ. 3 Diɛ kɛ mą: «Oo Yai-Laa, Israɛlə nwɔ Yálá, lə ɓə kɛ yai Israɛlə aa háákələi hvɛɠɛ a ɉuwu tɔ̨nɔ̨?» 4 Mąą yələ laaɓoɔ, nuą di di muhəɠə, di haláá kulɔi pɛli gɛɛnąąi tii ɓa, di haláá kulɔ Yálá ɓa a haláá yii da gəlee kələn, da pɔnnaa kulɔ haláá. 5 Israɛlə nuą diɛ diɛ: «Israɛlə lonnii lɔwai, gbɛɛ ɓə hvo kɛ gu pɔ ɲąąkpɔn ɉu Yai-Laa lííla?» Mąąhɔlɔɓo, di di kwɛla diɛ, nui a wala tɛ Yai-Laa lííla Mispa, di baa. 6 Bɛnɉamɛn nu huwu mąąwɛli ə too Israɛlə lonnii diɛ, diɛ kɛ diɛ: «Háákələi, huwu tɔ̨nɔ̨ aa haa Israɛlə nuą lɔwai. 7 Gwa tɛɛ pələ kɛ ləi, yii wolaai daa lɛɛ, gu di nɛ̨ąni hɔlɔɓo? Yaan, gwaa gu kwɛla a Yai-Laa, guɔ diɛ: ‹Nu ta hvo non nɛ̨ɛ̨nu tɛɛ Bɛnɉamɛn mun da pɔ a nɛ̨ą.›» 8 Di mąąni kɛ kɛ, akɛ huwu ta hvo hɔlɔɓo di lɔwai, yii hvo tɛ. Yai-Laa lííla Mispa. Di gaa diɛ Yavɛsə-Galaadə di hvo kɛ li li ɲąąkpɔn ma. 9 Di nuą lono, di gaa Yavɛsə-Galaadə mun dɔ̨nɔ̨ kpɛli hvo kɛ ɉu. 10 Nu kpului tii kəlee di kɔ́kúlaa waa pow kɔ́w hveelɛ tɔɔ Yavɛsə, diɛ diɛ: «'Ka li, Yavɛsə-Galaadə, ka nuą kəlee paa, nɛ̨ą mąn, ə mą kɛ nɛapɛlɛɛ. 11 Ka káá lii, ka ɉinąą paa, ə mą kɛ nɛ̨ąąi daa hulɔnu mɛ̨nį hu kɔ́lɔn. Kɛlaa, nɛ̨ɛ̨gbɛlaɠaai di hvo hulɔnu mɛ̨nį hu kɔ́lɔn, ka di lɛɛ a di hvulú.» 12 Yavɛsə-Galaadə nuą lɔwai, nɛ̨ąąi di hvo hulɔnu mɛ̨nį hu kɔ́lɔn, di kɛ a nu nwun-nąąn, diɛ ɓə di pa a diɛ Silo daai ɲąąkpɔn ɉu, Kanaan lɔi hu. 13 Di nuą tɔɔ Bɛnɉamɛn nu huwu pulu, diɛi kɛ Rimɔn gwɛni wolo hu, di pa ə gɛ, di bɔnaa kulɔ mɛ̨nį ɓo. 14 Bɛnɉamɛn lonnii di pənə, də li di hee di pɔ taai. Nɛ̨ąi ŋɛ̨i di di həɠə Yavɛsə-Galaadə, di dɛɛ di pɔ a di nɛ̨ąni. Kɛlaa, ɉinąą kəlee di hvo nɛ̨ɛ̨nu hɔlɔɓo. 15 Bɛnɉamɛn nu huwu mąąwɛli ə nuą hon, mąąhɔlɔɓo, Yai-Laa aa kɛ Israɛlə lonnii tɔ̨nɔ̨ huwu pu. 16 Nɔi kalanɉonŋaa diɛ diɛ: «Gwa gɛ ləi, nuąi ŋɛ̨i laa di nɛ̨ąą hɔlɔɓo. Hvo gaai, daa Bɛnɉamɛn nɛ̨ąą kəlee paa? 17 Gwa gɛ pələ kɛ ləi, Bɛnɉamɛn huwu ə lɛɛ, ə gɛ, nu huwu tɔ̨nɔ̨ hvo pa kpɛɛ Israɛlə nuą lɔwai. 18 Kɛlaa, kuɔ kpinįi ku hva pɛli ku lonnii nɛ̨ą tɛɛi di pɔ.» Mąąhɔlɔɓo, Israɛlə lonnii daa kɛ di kwɛla, diɛ: «Nui a nɛ̨ɛ̨nu tɛɛ Bɛnɉamɛn mun da pɔ, di nɛ̨ŋɛ̨n naa.» 19 Di mo, diɛ diɛ: «Kwɛlan gəlee, yɛ bələi Yai-Laa nwɔ hɛli a kɛ la Silo daai, Betɛlə ɲələi pələ, nu a həɠə Betɛlə yɛ li Sisɛmə, voló həɠəi bələ, ə ɓo Levona ɉɛɠɛɛ pələ.» 20 Di niɛwoo ŋɛ̨i kɛ kɛa Bɛnɉamɛn nu huwu ɓa, diɛ mą: «Ka li ka ka loo viɲə yɛa hu. 21 Kaa nąą mąą hɛn, ɓɛlɔwai ka Silo nɛ̨ɛ̨lɛa kaa la, daa kulɔ diɛ mąną a di kpulu, ka kulɔ ka loo pələi, nu kəlee ə nɛ̨ɛ̨lɛai tii da hon, ka li la Bɛnɉamɛn lɔi hu. 22 Akɛ di nąnni, a wala kɛ tii di liɛni da pa da doo kuɔ, kwa kɛ diɛ: ‹Ka nɛ̨ąą tii lɛɛ di yəi, mąąhɔlɔɓo, lii ŋɛ̨i ku mo Yavɛsə ku hvo pɛli nɛ̨ąą hɔlɔɓoi, yɛ pɛli diɛ. Kaa hvəi nɛ̨ąąi tɛɛi di pɔ a di nɛ̨ąni. Ə gɛ, ka hvo pa kɛ a hɔn mąą nuą Yai-Laa ɲɛ̨i ɓa.›» 23 Bələ ɓə Bɛnɉamɛn nu huwu ə gɛ la. Di nɛ̨ąą hɔlɔɓo, yɛ bələi di lonoɔ ə kɛ la, Silo mąną kaa nuąi tii lɔwai. Di di pulu pənə diɛ li di pɔ taai. Di di wɔ taaɠaai tɔɔ, di hee ɉu. 24 Nąąlɔwai, Israɛlə nuą kəlee də li di huwu hee taa hu. Nu kəlee ə hee nąn gwɛlin mɛ̨i. 25 Nąąlɔwai, tɔɔmun da hvo kɛ Israɛlə nuą nwun na, yii kɛ a nɛ̨ɛ̨ nu ɓa, ya ɓə a gɛ. |