Nwun mąąɓo 20 - Yálá laawoo hɛɓɛ (dc)Di kɔ́ pɛlɛ Bɛnɉamɛn nu huwu ɓa 1 Israɛlə lonnii kəlee woo tɔɔi ə kɛ tanɔ̨n, di kəlee di di ŋąąkpɔn Mispa daai, Yai-Laa lííla. Di kɛi həɠə Dan lɔi hu, ɲələi pələ, ə lɛɛ la ɉu ə həli Beɛrə-Seva ɉɛɠɛɛ pələ, da Galaadə lɔi hu, voló həɠəi pələ. 2 Israɛlə ɲɛ̨itɔwɔ nuą kəlee, nu huwu kəlee, di pa, di Yálá nwɔ nuą di wɔ ɲąąkpɔn nąą kaa. Nuąi pa, di kɛ a nu waa nwun-nąąn, di ɓo a kɔ́kuláá hąą yiliɛ kɔ́ kɔ́ mɛ̨nį ɓa. 3 Bɛnɉamɛn nu huwu ə bələ mɛ̨n, diɛ di kayɔwɔɠaa Israɛlə nuą daa di ŋąąkpɔn Mispa daai, Israɛlə nuą di mąąni gɛ kɛ, diɛ mą: «Mɛlɛkpɛɛmąą mɛ̨nį ŋɛ̨i kɛ pələ ə kɛ ləi?» 4 Levi mun tii nɛ̨ą ə haa, yɛ diɛ: «Kwa nwɔ́ wɛli nɛ̨ɛ̨nu ta ɓə pa Givea, Bɛnɉamɛn nu huwu nwɔ lɔi hu, ə gɛ ku yíi laa. 5 Givea hinąą di pa, di nwɛ̨́ą pɛlɛ́ mąą tínɛ̨n diɛ kɛ di mɛ̨nį ɲɔ̨n gɛ a ɲą́ą́. Di kɛ bɔ di báá, nɛ̨́ą ɓə di laa la, di lɛɛ la ɉu, di baa. 6 Nąąlɔwai, ŋą́ nwɔ́ wɛlii powa həɠə, ŋą́ ɉu tee tee a gbuɔ pow kɔ́w hveelɛ, ŋą́ ɲąąkwɛlɛ Israɛlə huwu heei pow kɔ́w hveelɛi ɓa, mąąhɔlɔɓo, daa ɓɛlɛkpɛɛmąą túwɔ́ ɓo a ɲą́ą́ Israɛlə lɔi hu. 7 Yiihu, ka ŋąąkpɔn ŋąąi ɓɛ, yii mąąnɛ̨ɛ̨ ka gɛ, ka yili ɓo.» 8 Di kəlee di woo tɔɔi ə kɛ tanɔ̨n, diɛ mą: «Nu ta lɔpee hvo kɛa bulu pənəi ɲəi ɉəɠə pɛlɛ́ mu, a wala kɛ tii, ɲəi bɛlɛ́ laaləi. 9 Mɛ̨nįi gu kaa pai gɛi a Givea taa, gu kaa gbɛɛn bilii, ə gɛ, yii mąąnɛ̨ɛ̨ ə həli nu ɓa a nwɔɔ, gu kɛ a gɔlɔn ŋąą. 10 Israɛlə lonnii lɔwai, nu pow ɓə kwa ɉəɠə nu nwun dɔ̨nɔ̨ hu, nu waa tɔ̨nɔ̨ hu, nu nwun dɔ̨nɔ̨ ɓə kwa ɉəɠə, nu waa pow hu, nu waa tɔ̨nɔ̨ ɓə kwa ɉəɠə. Nuą tii ɓə pai lii, di kɔ̨nɔ̨n gwɛli di paa la, ə gɛ, gɔ́ laɠai pai lii Givea Bɛnɉamɛn lɔi hu nuą di wɔ ɓɛlɛkpɛɛmąą túwɔ́i di mo Israɛlə lɔi hu, gwələ kulɔi di kɔ̨nɔ̨n.» 11 Israɛlə lonnii kəlee di woo tɔɔi ə kɛ tanɔ̨n, ə gɛ, də li di kɔ́ pɛlɛ Givea taa ɓa. 12 Israɛlə nuą di nuą tɔɔ Bɛnɉamɛn nu huwu kəlee pɔɔli, diɛ kɛ diɛ: «Mɛlɛkpɛɛmąą mɛ̨nį huwui ŋɛ̨i, ə tɛɛ ləi yɛ kɛ ka lɔwai? 13 Yili ɓa, nu kpoloonŋaa tii di kaa Givea daai, ka di tɛɛ ku pɔ, ku di paa, ə gɛ, mɛ̨nį ɲɔ̨n ə kulɔ Israɛlə nuą lɔwai.» Kɛlaa, Bɛnɉamɛn nu huwu hvo gɛ, di hvo di wəli tɔɔ di kaayɔwɔɠaa woo ɓa, diɛi kɛ a Israɛlə lonnii. 14 Nąąlɔwai; Bɛnɉamɛn nu huwu həɠə di wɔ taaɠaai hu, di di ŋąąkpɔn Givea daai, ə gɛ, di kɔ́ pɛlɛ di kaayɔwɔɠaa Israɛlə lonnii diɛ. 15 Mąą yələ kɔ́kuláá waa pow hveelɛ kɔ́w mɛ̨ida ɓə həɠə daaɠaa hu, di pa Givea daai, Givea nuą laa kulaa ɉu. 16 Gɔ́laɠai tii lɔwai, kɔ́kuláá nwun mɛ̨ihveelɛ ə kɛ ɉu, diɛ ɓo a kɔ́ɓɛ nuą, di yɛlɛɛ vun gwɛni pilii, diɛ pɛli nu nwun nəɠa tɔ̨nɔ̨ gbən-gbən hɔɔi. 17 Israɛlə nuą kəlee di pa nonon mo ɓa. Bɛnɉamɛn huwu laa hvo kɛ ɉu. Di wɔ kɔ́kulááɠaai di kɛ a nu waa nwun nąąn, yiiɠaai kɛ di wɛlɛɛ kɔ́ kɔ́i. 18 Israɛlə nuą kəlee də li Betɛlə, di Yálá mąąni kɛ, diɛ mą: «Ku lɔwai, ɉuwu nɛlɛ ɓə pai tɛɛi tɔwɔ, yɛ li pɛlɛi Bɛnɉamɛn nu huwu ɓa?» Yai-Laa yɛ diɛ: «Ɉuda nu huwu ɓə tɛɛi tɔwɔ.» 19 Mąą yələ laa ɓoɔ, Israɛlə nuą di tɛɛ, də li di di wɔ kɔlaɠai pɛlɛ Givea taa kwɛlɛ. 20 Israɛlə nuą di tɛɛ kɛa diɛ li, kɔ́ pɛlɛi Bɛnɉamɛn nu huwu ɓa, Givea. 21 Bɛnɉamɛn nu huwu kulɔ Givea a mąą yələ, di Israɛlə lonnii waa pow hveelɛ paa. 22 Israɛlə nuą di di lii kpələ, ɓɛi lɔ tii di kɛ laa a voló dɔlɔɔ, di lɛɛ laa, di hvo pu. 23 Israɛlə nuą di tɛɛ, də li di wɔlɔ Yai-Laa ɓa, ə lɛɛ la ɉu, yələwulii pɔ. Di Yai-Laa mąąni kɛ, diɛ mą: «A kɛ tii, mąąnɛ̨ɛ̨ kwəli ku kɔ́ pɛlɛ Bɛnɉamɛn nu huwu ɓa nwɔ̨nɔ̨, diɛi di kaa a ku kayɔwɔɠaa?» Yai-Laa yɛ diɛ: «'Ka li.» 24 Voló veelɛ yələ, Israɛlə lonnii, di həɠə nwɔ̨nɔ̨ diɛ li kɔ́ pɛlɛi Bɛnɉamɛn nu huwu ɓa. 25 Volói tii, Bɛnɉamɛn nu huwui kulɔ Givea di nɛɛ mą, di Israɛlə nuą di wɔ kɔ́ kúlaa waa pow kɔ́w mɛ̨ihaaɓa paa gɔ́ mɛ̨i. 26 Israɛlə nuą kəlee, da nɔi nuą, di tɛɛ də li Betɛlə, diɛ wɔlɔ Yai-Laa lííla, di hin nɔ a volói tii, yələwulii pɔ, di haláá huwu hveelɛ kulɔ Yai-Laa ɓa, yii da gəlee kələn, da yii gaa a pɔnaa kulɔ haláá, da Yai-Laa ni di lɔwai. 27 Di pənə di Yai-Laa mąąni kɛ, mąąhɔlɔɓo, Betɛlə ɓə Yálá nwɔ mįnɛ̨ kəhi ə kɛ laa, 28 ɛlɛɛ Aarɔn lon Eleazarə, lon ɉulɔnui ŋɛ̨i kɛ a Pinasə, ya ɓə kɛi kóló kɛ nąąlɔwai Yai-Laa hee pɛlɛ́ mu. Di Yai-Laa mąąni kɛ, diɛ mą: «A kɛ tii mąąnɛ̨ɛ̨ kwɛ li ku kɔ́ pɛlɛ Bɛnɉamɛn nu huwu diɛ, diɛi di kaa a ku kaayɔwɔɠaa? A wala kɛtii ku lɛɛ ɓɛ?» Yai-Laa yɛ diɛ: «'Ka li! Gáá tinąą di lɔi ka yee ɲą.» 29 Israɛlə nuą di kɔ́kulááɠaa loo Givea taa kwɛlɛ. 30 Voló ɉaaɓa yələ, yɛ pələi lɔ da kɛ gɛi la, di həɠə nwɔ̨nɔ̨ diɛ li pɛlɛi Bɛnɉamɛn nu huwu ɓa. 31 Nąąlɔwai, Bɛnɉamɛn nu huwu kulɔ, diɛ pa di kulɔ kpɔ Givea taa ɓa a ɉu kwɛa, yɛ bələi lɔ hiɛ da gɛ la, di Israɛlə kɔ́kulááɠaa bow haaɓa ɲɔ̨nwɔ̨mąn baa. Betɛlə daa pələ nwun na da Givea taa pələ nwun na ɓə di nuąi tii paa laa. 32 Ə kɛ di kwəi daa Israɛlə nuą yee kulɔ, yɛ pələi hiɛ da kɛ gɛi la a bɔlɔ. Kɛlaa, Israɛlə nuą di gɛ yɛ da ɲɔw, diɛ pu. Di ɉon a Givea ɲɛɛ kɔ́wɔ hu pələɠaa, ə gɛ Bɛnɉamɛn nu huwu di lɛɛ di pɔ. 33 Israɛlə nwɔ kɔlaɠaɠaai, ɓɛɠaai di kɛ laa, di kəlee di həɠə laa, də li di di ɲąąkpɔn Baalə-Tamarə. Nąąlɔwai, gɔ́kulááɠaai ŋɛ̨i kɛ di di loo Givea taa kwɛlɛ, Gɛva nɛ̨ŋɛ̨ lɔi hu pələ, di kulɔ ŋąąɓa. 34 Israɛlə kɔ́kuláá waa pow di pa Givea taa lííla, kɔ́ kɛnɛ̨ kpɔ ə muhəɠə laa. Bɛnɉamɛn nu huwu kili hvo kɛ yili ɓa di mɛ̨i. 35 Mąą yələi tii, Yai-Laa ə gɔ́ nɛ̨ɛ̨ Israɛlə nuą diɛ, Bɛnɉamɛn nu huwu mɛ̨i, di kɔ́kuláá waa pow hveelɛ kɔ́w lɔɔli pulu nwun dɔ̨nɔ̨ paa Bɛnɉamɛn nu huwu lɔwai. 36 Bɛnɉamɛn nu huwu kili ə pu ɉu diɛ kɛ, gɔ́ a kala diɛ. Israɛlə nuą di gɛ yɛ da pu Bɛnɉamɛn nu huwu tɔwɔ, mąąhɔlɔɓo, di kilitɔɔi kɛ nuąi ŋɛ̨i di di loo Givea taa kwɛlɛ diɛ. 37 Gɔ́kulááɠaa tii di kulɔ di loo pələi, di pɛlɛ Givea taa ɓa, di ɉu nuą kəlee paa. 38 Gɔ́kulááɠaa ŋɛ̨i daai nuą paa, da yiiɠaai ŋɛ̨i kɛ gɔ́ mɛ̨i, di kɔ́lɔn ɉɛn da lɛ di kee ɓa, ya ɓaa: Da nwɔ̨n nulu kaa yɛ tɛ daai, a kɛ tii di yee aa tɛɛ daa ɓa. 39 Ɓɛlɔwai Bɛnɉamɛn nu huwu hvilɛn ŋąą kɛ la Israɛlə nuą pulu diɛ di kpɛ, di nu pow haaɓa ɲɔ̨nwɔ̨mąn baa Israɛlə nuą lɔwai. Ə kɛ Bɛnɉamɛn nu huwu kwəi, di yee aa tɛɛ diɛ, yɛ pələi da hiɛ kɛ gɛi la. 40 Kɛlaa, nąąlɔwai, nwɔ̨n nului ŋɛ̨i kɛ a di kɔ́lɔn ɉɛn, ə kɛi kɛa tɛ Givea taa mɛ̨i. Bɛnɉamɛn nuą di tínɛ̨n di di pulu kaa, di nwɔ̨n nulu kaa, daa yɛ kələn. 41 Israɛlə nuą di pənə di hvilɛn Bɛnɉamɛn nu huwu pulu. Bɛnɉamɛn nu huwu ə pu diɛ, mąąhɔlɔɓo, gbaloi aa ɓɛla diɛ, diɛ kpinįi daa gaa. 42 Di pu Israɛlə nuą tɔwɔ, diɛ li nɔi pun ɉu pələ. Kɛlaa, di too kɔlaɠa kɛnɛ̨ yee ŋą, diɛ həɠə taai pələ, di gəlee paa, di wɔ kɛɛnąąɠaai ɓa. 43 Israɛlə nuą di tínɛ̨n Bɛnɉamɛn nu huwu diɛ, di hvilɛn di pulu a di hvaŋą kɛnɛ̨. Di lɛɛ di paai, di həli la Gɛva voló həɠəi pələ. 44 Mąą yələi tii, di Bɛnɉamɛn nu huwu nwɔ kɔ́kúlaa waa pow kɔ́w mɛ̨ihaaɓa paa. 45 Yiiɠaai ŋɛ̨i pu diɛ li nɔi pun ɉu pələ, diɛ kɛ di di loo Rimɔn gwɛni wolo hu, di nu waa lɔɔli paa ɉu bələi. Di hvilɛn gbəliɠaa pulu, di həli Gidɔmə, di nu waa hveelɛ paa ɉu. 46 Bɛnɉamɛn nu huwu lɔwai, nuąi di di paa a volói tii, di kɛ a kɔ́kuláá waa pow hveelɛ kɔ́w lɔɔli, gəlee diɛ ɓo a kɔ́kúlaa. 47 Nuąi pu diɛ li di looi Rimɔn gwɛni wolo hu, nu nwun-mɛ̨ida ɓə lɛɛ, di di loo gwɛni wolo hu ɲąnin nąąn ɲee mu. 48 Israɛlə nuą di pənə di hvilɛn Bɛnɉamɛn nu huwu lɛɛ di pulu, diɛ ɉinąą paa daaɠaa hu, ə mą kɛ daatɛlɛɛɠaa. Di nwɔ̨n nɔ daaɠaa kəlee hu nąą nɔi. |