Nwun mąąɓo 2 - Yálá laawoo hɛɓɛ (dc)

Yai-Laa ə haŋą nwɔ nu huwui ɓa

¹ Yai-Laa nwɔ malaka ə həɠə Gilgalə, ə pa Bokimə, yɛ Israɛlə lonnii diɛ: «Ɲą́ą́ ɓə ka kulɔ Eziptə lɔi hu, ŋą́ pa a kaa nɔi ŋɛ̨i hu, yai ŋą́ naakwɛlanmo ka kalaɓɔlɔni diɛ. Ŋą́ mo diɛ, gɛ́ diɛ, mįnɛ̨i gu lɔwai, vá gala.

² Kɛlaa, ŋą́ mo kaa, gɛ́ kaa; nɔi ŋɛ̨i kaa pa ɉu, ka ɉu nuą ka hvo mįnɛ̨ həɠə, yili pulu, ka di wɔ haláá kulɔiɠaa wolo. Ya ka tii, ka hvo nwóó hon ni, lə ɓə tii ka gɛi?

³ Ŋą́ mo gɛ́ diɛ və́ pai di kpɛi ka tɔwɔ, di wɔ haliɠaai di kaa pai kɛi ka tɔwɔ a hɛlɛn.»

⁴ Ɓɛlɔwai Yai-Laa nwɔ malaka ə kpɛɛ la a nwooɠaai tii ɓoɔ, Israɛlə lonnii kəlee di di woo kulɔ, diɛ wɔlɔ.

⁵ Di gɛɛnąąi tii laa hee a Bokimə, yili pulu, di haláá kulɔ laa Yai-Laa ɓa.

Ɉosue haa mɛ̨nį

⁶ Ɉosue ə nuą kəlee tɔɔ bələi, Israɛlə lonnii kəlee tɛitɛi di li, lɔi kɛ a di wɔ nąą, di hee laaɠaa.

⁷ Ɉosue kɛɛni yɛnɛ̨ɛ̨, nɔi nuą kəlee di kɛi tí Yai-Laa ɓa, ɉaa pulu, galanɉonŋaai di ɲɛ̨i ə tɔɔ Yai-Laa kɛ mɛ̨nįɠaa hu, di wɔɔ yələi, Israɛlə lonni di kɛi lɔ ni tí Yai-Laa ɓa.

⁸ Nun lon Ɉosue yai kɛ a Yai-Laa nwɔ tímun, gaa kwɛlan ə kɛ a kwɛlan nwun dɔnɔ, kwɛlan bow, ɓɛlɔwai ə laa la nąnni kwɛlɛ.

⁹ Di bowa loo nwɔ lɔi hu Timnatə-Hɛrɛsə, ɲee lɔi hu, Ɛfraimə pələ, Gaasə yee ɲələi pələ.

¹⁰ Nuąi tii kəlee haa pulu; nuąi pa nąą pulu, yiliɠaa di hvo kɛ Yai-Laa kɔ́lɔn, ə mą kɛ mɛ̨nį kpɛa kpɛai ə gɛ Israɛlə lonnii diɛ.

Nuą di lɛ̨ą Yai-Laa ɓa

¹¹ Mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, ya ɓə Israɛlə lonnii di di yee lɔ ɉu, di kwɛli hvilɛn Baalə haliɠaa diɛ.

¹² Di lɛ̨ą Yai-Laa ɓa, yai a di nąnni di wɔ Yálá, yai di kulɔ Eziptə lɔi hu. Di hvilɛn gea di kwɛlɛ lɔiɠaa di wɔ haliɠaai pulu, diɛ kwɛli hvilɛn diɛ, di Yai-Laa lii kələn gwəi.

¹³ Di lɛ̨ą Yai-Laa ɓa, diɛ kɛa kwɛli hvilɛn Baalə ɓa da hali Astarteɠaa.

¹⁴ Yai-Laa ə níiɲąnwąną Israɛlə lonnii diɛ. Ə di tɛɛ di yowoɠaa pɔ, yiliɠaai di di hon. Ə di lɔwɔ́tɔɔ di yowoɠaa kɛ di kwɛlɛ diɛ, di hvo pɛli tɔɔi di yowoɠaa la.

¹⁵ Ɓɛlɔwai lɔpee kɛ da li la kɔ́ mɛ̨i, Yai-Laa hva gɔ́ nɛ̨ɛ̨ diɛ, yɛ bələi Yai-Laa ə mo la, yɛ gwɛla diɛ. Nąąlɔwai tii hu, laanɔ̨nwɔ̨ kɛnɛ̨ ə laa di mɛ̨i.

¹⁶ Nąąlɔwai, Yai-Laa ə kulááɠaa muhəɠə di lɔwai, yiliɠaai diɛ di nwun mąąɓo di yowoɠaa yəi.

¹⁷ Kɛlaa, di hvo kpɛli kɛi di wəli tɔɔ di nwun mąąɓo nuąi woo ɓa, mąą hɔlɔɓo, di kɛi lɔ kwɛli hvilɛn haliɠaa diɛ, di lɛ̨ą kpɔlɔ tii, bələi di nąnni di kɛi hiɛ mɛ̨i, mą; diɛi kɛi Yai-Laa nwɔ liɛwooɠaai hon.

¹⁸ Ɓɛlɔwai lɔpee kɛ Yai-Laa a kuláá ta tɔɔ la, a kɛ bɔ yaa kpinįi, yɛ di nwun mąąɓo di yowoɠaa yəi, guláái tii nwɔ lɔwai hu. Mąąhɔlɔɓo, ɓɛlɔwai da di ɓɛlɛkpɛɛ la diɛ, diɛ di laanɔ̨nwɔ̨ ɓo, di ɲɛ̨imąąwɛli a too Yai-Laa ɓa.

¹⁹ Kɛlaa, ɓɛlɔwai guláái yili a haa la, da lan gbɔ, di tɛɛ di nąnni diɛ, diɛ haliɠaa həɠə, diɛ kwɛli hvilɛn diɛ, di hvo kɛi kpɛla túwɔ́ pələ ɲɔ̨n ma, di wɔ kili walawala laa ta hvo kɛi kulɔ mą.

Yai-Laa ə Israɛlə hu kɔ́ɔn

²⁰ Yai-Laa ə níiɲąnwąną Israɛlə lonnii diɛ, yɛ diɛ: «Mįnɛ̨i wɔlɔ kwa nu huwui ŋɛ̨i di nąnni ku ɉəɠə, yai ŋą́ kɛ di nąnni diɛ, ka mąąwiɛ, di wɛi daa mąą kala, di hvo nwóó hon ni.

²¹ Ɲą́ą́ gbɛli, nu huwuɠaai ŋɛ̨i lɛɛ nɔi Ɉosue yɛ haa, və́ pai da kpɛi di ɲɛ̨i tɔwɔ.»

²² Bələ ɓə gáá pai Israɛlə hu kɔ́ɔn ɉii la, akɛ di kaa pai hvilɛn ɉii Yai-Laa pulu, yɛ bələi wɔlɔ di nąnni di gɛ la.

²³ Nąąlɔwai kɛa, nɔiɠaai tii wɔlɔ Yai-Laa hvo di lɔ Ɉosue yee mu, hvo gɛ hvo yiliɠaai kpɛ ɉa-ɉa, ə yiliɠaai lɛɛ laa, di di hvįįtɔɔ.