Nwun mąąɓo 19 - Yálá laawoo hɛɓɛ (dc)Bɛnɉamɛn nu huwu Bɛnɉamɛn nu huwui kɛ heeni Givea di nu paa 1 Nąąlɔwai, tɔɔmun və kɛ Israɛlə lɔi nwun na; Levi mun da ə kɛ heeni Ɛfraimə lɔi hu, mąą kwɛa mɛlaa diɛ. Ə Bɛtleɛmə, Ɉuda nɛ̨ɛ̨nu ta hon a wɛli. 2 Nwɔ wɛlii tii ə mowo, ə li nąn bɔ Bɛtleɛmə Ɉuda lɔi hu, ə ɲąnin nąąn gɛ laa. 3 Ɉilɛ ə həɠə, yɛ li tɔɔi dɔwɔ, ə gɛ da yaa di di lɔwai woo ɓo, ə pənə ə pa bɛlɛ́n. Ɉulɔnui tii kɛɛ lii, da ɲee pɔmun dɔ̨nɔ̨ ɓə li, ɛlɛɛ da hoohvaalən veelɛ. Nɛ̨ɛ̨nui tii ə ɉilɛ lɔ nąn ɲəi bɛlɛ́n. Nɛ̨ɛ̨nu nąn gwəi ə nɛ̨ɛ̨ mɔlɔ kaa mɛ̨nį ɓa, ə kulɔ yɛ li nɛ̨nɛ̨ɓoi. 4 Nɛ̨ɛ̨nu nąn, ə ɲee too mɔlɔ hu, da diɛni di hvóló haaɓa kɛ laa. Di kɔ̨nɔ̨n mįi, di di kpələ, da diɛni di yíi laa. 5 Voló nąąn ɲələ, di humo ɓɛlɔwai Levi mun ə kɛ la bɔ ə li, mɔlɔ yɛ mą: «Kɔ̨nɔ̨n mįi, hvaŋą ə kɛ ə́ yəi, kaa tɛɠa pa lii.» 6 Da mɔlɔ di nu hveelɛi, di hee di kɔ̨nɔ̨n mįi, di di kpələ. Levi mun mɔlɔ yɛ mą: «Gɛ́ ə́ hvaa mą gu lɛɛ ni ɓɛ, ə́ yíi ɓɛ.» 7 Yii kɛa Levi mun tii ə muhəɠə yɛ kɛ ə li, mɔlɔ ə kanąn mą, ɉulɔnui tii ə nwɔ kiliŋąhiɛ mąą hvalin, ə hvaa mą ə yíi nwɔ̨nɔ̨ laa. 8 Voló nɔɔli yələ, ə humo nwɔ̨nɔ̨ yɛ kɛ ə li; kɛlaa, mɔlɔ yɛ nwɔ̨nɔ̨ mą: «Hɛn da wolo mįi, nɛ̨ɛ̨mąą ɓə gáá vəi yɛ́, ə́ nąą mąąkpɔn, hvóló mąą laa, ə́ li.» Nąąlɔwai, di kɔ̨nɔ̨n mįi nwɔ̨nɔ̨ gee ɓa. 9 Ɓɛlɔwai kɛ mąąnɛ̨ɛ̨ Levi mun da nɛ̨ą də li kɛa la, da nwɔ tímun, mɔlɔ yɛ mą: «Ə́ kaa gaai yələ aa wulu kɛa, ka yíi ɓɛ, ka ka kwəinɛ̨ɛ̨. Tínąą, ka humo a ka liɛ.» 10 Yili nwɛi, ɉulɔnui tii hvo kɛa hvaa mą, di di muhəɠə, di hvilɛn bələ pɔ, yaa, nwɔ wɛlinɛ̨ą da nwɔ hoohvaalən veelɛi. Di lɛɛ pai, di həli Ɉebusə daa kpala, ya ɓaa a Ɉerusalɛmə. 11 Ɓɛlɔwai di kɛi lɛɠɛ la daa ɓa, kpinį yɛ kɛa pɛlɛ. Levi mun tii nwɔ tímun yɛ mą: «Gu tɛ Ɉebusə daai, gu yíi laa.» 12 Nwɔ mɛ̨nį nąmu yɛ mą: «Kpaa! Daa ŋɛ̨i kaa a nwɛ̨ą taa, Israɛlə mun da hvo laa, və́ lii laa, gu tɛɛ gwəli Givea.» 13 Yili pulu, yɛ nwɔ̨nɔ̨ diɛ: «Gu hiɛ gwəli, gwa wala həli Givea, gu həli Rama, gu yíi gɛɛnąą hveelɛi tii tɔ̨nɔ̨ ɓa.» 14 Di tɛɛ, di hvilɛn bələ ɓa, diɛ li. Hvóló kɔ́w toɔ kɛa kɛ, ɓɛlɔwai di kɛi həli la Givea, Bɛnɉamɛn nu huwu nwɔ lɔi hu. 15 Di kɛi daai tii mąą gilɛ həɠə, ə gɛ di li di yíi laa, də li di hee gwəli hąąi kɛnɛ̨ ɓa. Nu ta hvo hɔlɔɓo, hvo kɛ diɛ: «'Ka pa gwəli ɲə́i bɛlɛ́n.» 16 Ɲələ wulii tii hu, hulɔgolo ta ə həɠə ɲəi ɲɛa, yɛ tɛ tai. Ɉulɔgoloi ə kɛ a Ɛfraimə lɔi hu mun da, kɛlaa, ɉeɛ ə kɛ Givea. Givea nuą di kɛ a Bɛnɉamɛn nu huwu. 17 Ə ɉiɛ kulɔ mun tii kaa heeni gwəli hąą, ə mąąni kɛ, yɛ mą: «Ə́ həɠə mį, ə́ kaa lii mį?» 18 Levi mun tii yɛ mą: «Ku həɠə Bɛtleɛmə Ɉuda lɔi hu, ku kaa li kpɔ Ɛfraimə lɔi gbon ɉeei pələ, nąą ɓə ɉéɛ kaa laa. Ŋą́ həɠə Bɛtleɛmə Ɉuda lɔi hu gáá li bɔ́ taai, ya ka tii nu ta hvo ɲee hee li ɓɛ mú. Gáá Yai-Laa yəi bɛlɛ́n a nwɔ tímun. 19 Ku kɔ̨nɔ̨n gaa ku yəi, kuɔ hooɠaai kɔ̨nɔ̨n yɛ ɓo ku yəi; lɔɔ kaa ku yəi, ɉooɠaa di wɔ kala yɛ ɓo ku yəi. Ku mąą kpaan və hɛn da kpɛli ɓa.» 20 Ɉulɔgoloi yɛ mą: «Ə́ liilaa, yii hvo ə́ yəi, ɲą́ą́ ɓə yili mąą mɛ̨nį kaa mą́ą́. Mąą hvo nɛ̨ɛ̨li, hvo yíi heeni gwəli hąąi.» 21 Ɉulɔgoloi ə nwɛ̨ąąi tii lɔ ɲəi bɛlɛ́n, ə kɔ̨nɔ̨n dɛɛ nwɔ hoohvaalənŋaai pɔ. Ə yá tɛɛ nwɛ̨ąą pɔ, di di kɔ́wɔ mąą waa, di kɔ̨nɔ̨n mįi, di di kpələ. 22 Ɓɛlɔwai di kɛi di laa mįi la, nu kpoloonŋaai kɛ laa daai, di bɛlɛ́ mąątínɛ̨n, diɛ gbon gɛlɛ, diɛ kɛ bɛlɛ́ nąmu hulɔgoloi ɓa: «Ɉulɔnui ŋɛ̨i ə́ naa ə́ yəi bɛlɛ́n, gulɔ ɲɛnɛ̨ɛ̨, ku kaa bɔ ku laa la.» 23 Ɉulɔgoloi ə kulɔ ɲɛnɛ̨ɛ̨, yɛ diɛ: «Gááyɔwɔɠaa, və́ kɛli ka mɛ̨nį ɲɔ̨n gɛ a nwɔ́ nwɛ̨ąi, nɛ̨ɛ̨mąą ɓə gáá vəi kaa. Ka hvo ɓɛlɛkpɛɛmąą túwɔ́ ɓo a ɉulɔnui ŋɛ̨i. 24 Ka ka wəli tɔɔ, nón nɛ̨ɛ̨nu kaa ɓɛ, hvo hulɔnu mɛ̨nį hukɔlɔn, ɉulɔnui ŋɛ̨i yaa kpɛli, nwɔ wɛlinɛ̨ɛ̨nu ka ŋɛ̨i da yaa di kaa ɓɛ. Gáá nɛ̨ąą hveelɛi tii tɛɛi ka pɔ, yii gaa ka kwəi ka gɛ a diɛ. Kɛlaa, ka hvo ɓɛlɛkpɛɛmąą túwɔ́ ɓo a ɉulɔnui ŋɛ̨i.» 25 Bələi mąn ə kɛ la tii, nuą di hvo kɛi di wəli tɔɔ ɉulɔgoloi woo ɓa. Nąąlɔwai, Levi mun tii ə nwɔ nɛ̨ɛ̨nui həɠə, ə dɛɛ di pɔ ɲɛnɛ̨ɛ̨; di too mɛ̨i, di di liiɓa kɛ la. Yələɓoɔ, di ɓo nɛɠɛ ɓa di naa. 26 Yələwala pɔ, nɛ̨ɛ̨nui tii ə muhəɠə, ə pa ə too ɉulogoloi yəi bɛlɛ́ laaləi, ɓɛi ɉilɛ ə kɛ laa, ə lɛɛ laa yələ ə ɓɔ. 27 Yələwala pɔ, ɉilɛ ə bɛlɛ́ laa ɓo, ə gɛ də li, ɉulɔnui ə nɛ̨ą kaa too ni bɛlɛ́ laaləi. 28 Ɉulɔnui tii yɛ nɛ̨ą ɓa: «Ə́ muhəɠə gwəli.» Kɛlaa, nɛ̨ɛ̨nui tii hvo kɛa hvaa, ɉilɛ ə bowa həɠə ə naa ɉoohvaalən bulu, ə li la bɔ taai. 29 Həli ə mo bɔ taai, ə nɛ̨ą hu tee a gbuɔ kpuɔ pow kɔ́w hveelɛ. Ə gbuɔ ɲąąkwɛlɛ Israɛlə lonnii pow kɔ́w hveelɛi kəlee ɓa. 30 Nuą lɔpee mɛ̨nį tii nąą kaa, di kɛi mo diɛ kɛ mą: «Ku hvo ta mɛ̨nį ŋɛ̨i ta kaa li Israɛlə nuą lɔwai, ə həɠə kpɔ ɲələi di kulɔ la Eziptə lɔi hu mą, ə həli la yiihu ɓa. Hvo kɛli ku mɛ̨nį ŋɛ̨i mąąkpɛɛ, ku mɛ̨nį ta kɛ ɉu.» |