Nwun mąąɓo 18 - Yálá laawoo hɛɓɛ (dc)

Dan nu huwu di di wɔ lɔi mąą hvalin

¹ Mąą kwɛlan tii hu, tɔɔmun və kɛ Israɛlə lɔi nwun na. Mąą kwɛlan tii ɓə Dan nu huwu di kɛi di hee lɔi kwɛli la. Mąąhɔlɔɓo, diɛ tɔ̨nɔ̨ lɔ ɓə kɛ Israɛlə lonnii lɔwai di hee lɔi hvo ni kɛ di yəi.

² Dan lonnii di nu lɔɔli kulɔ, a kulááɠaa, di di həɠə Sorea da Ɛstaɔlə, ə gɛ di nɔi mąąkpɛɛ. Di mo diɛ, diɛ diɛ: «'Ka li ka nɔi mąą kpɛɛ.» Də li di həli Ɛfraimə lɔi hu, di tɔɔ Mika yəi bɛlɛ́ laaləi, nąą ɓə di yíi laa.

³ Di kɛɛ Mika yəi bɛlɛ́ kwɛlɛ, di Levi hulɔnon tii woo kɔ́lɔn, di ɉaŋą bɔ pələ, diɛ mą: «Gbɛɛ ɓə pa a yɛ́ ɓɛ? Lə ɓə ə́ kaa gɛi ɓɛ? Lə ɓə ə́ kanąn ŋąą ɓɛ mą?»

⁴ Yɛ diɛ: «Ɉɛnŋaa Mika ə gɛ mą́ą́, diɛ ka: Aa ɉə́ɠə ɉu, aa gɛ́ a nwɔ tímun da nwɔ haláá laa həli mun.»

⁵ Nuąi tii diɛ mą: «Akɛ yili kaa tii, Yálá mąąni kɛ, akɛ ɉiɛi ŋɛ̨i ku kaa gulɔi, gaa pai nɛ̨ɛ̨i.»

⁶ Ɉaláá laa həlimun tii yɛ diɛ: «'Ka li liilaa hu, Yai-Laa kaa pai kɛi ka pɔ, ka wɔ hiɛi hu.»

⁷ Ɉinąą lɔɔli tii də li, di həli Laisə. Di gaa diɛ nuą di kaa daai tii hu, di kaa liilaa hu, yɛ bələi Sidɔn nuą kaa la, di wəli pulu laɠiɛ, mɛ̨nį ta hvo kɛ di pulu, ɛlɛɛ nwɔ̨nɔ̨, di hvo tɔɔmun da yee mu, di mąą kwɛaa Sidɔn nuą diɛ.

⁸ Ɉinąą lɔɔli tii di yali di pulu, di pa di di kaayɔwɔɠaa kaa Sorea da Ɛstaɔlə; yiliɠaai di di mąąni kɛ, diɛ diɛ: «Ka gaa ləi?»

⁹ Diɛ mą: «Ka pa gwəli, gu kɔ́ pɛlɛ Laisə nuą diɛ, mąąhɔlɔɓo, kwaa nɔi hu kaa, lɔi lɛlɛɛ kpɔkpɔɔ li. Ya ɓə ka heɛ lɔ, ka hvo mɛ̨nį ta ɓoi! Yɔgbɔlɔn və too ka hu, ka li mɛ̨nį ɓa, ka lɔ nɔi tii hu, ɛlɛɛ ka hee laa.

¹⁰ Ɓɛlɔwai ka həli la laa, ka káá lii həlii nu huwu ta pɔɔli, nwəli pulu laɠiɛ. Nɔi laa təɛi, mąąhɔlɔɓo, Yálá aa nąą tɛɛ ka pɔ. Gaa a lɔi hɛn gəlee a lɛlɛ ɉu hɛn gəlee kaa laa.»

¹¹ Nąąlɔwai, Dan nu huwu, nu nwun-mɛ̨ida, di hąą yiliɛ a kɔ́ kɔ́ mun ɉąą yili pələ, di həɠə Sorea da Ɛstaɔlə, diɛ li.

¹² Də li, di di wɔ kɔlaɠai pɛlɛ Kiriatə-Yearimə voló tooi pələ, Ɉuda lɔi hu. Yili ɓə gɛ, di gɛɛnąąi tii laa hee a Mahane-Dan. Naai tii ɓə gaa mą háá ɓa háá.

¹³ Di həɠə laa, də li Ɛfraimə yeeɠaa hu. Di həli Mika nwɔ pɛ́lɛ́i ɓa.

¹⁴ Nu lɔɔli ŋɛ̨i pa, Laisə mąąkpɛɛi, di mo di ɓɛlaa diɛ, diɛ diɛ: «Ka kili kaa ɉu kaa: bɛlɛ́ɠaai ŋɛ̨i ta mu, haláá kulɔi kaa laa da mąąnįnįn ɉaɠaɠaa, da mąąnįnįn ɉaɠaa takpɛli, a wali kwɛli? Ə həli kaa, ka káá gɛi ləi?»

¹⁵ Nu lɔɔli tii, di ɉon a Mika yəi bɛlɛ́ laaləi pələ, di lɔ bɛlɛ́n, di di woo pili Levi hulɔnon tii kɛ laa mą.

¹⁶ Nąąlɔwai, nu nwun-mɛ̨ida ŋɛ̨i kɛ di hąą yiliɛ kɔ́ kɔ́ mɛ̨nį ɓa, di kɛ tɔɔ ni bɛlɛ́ laaləi.

¹⁷ Nu lɔɔli tii li nɔi mąąkpɛɛi, di lɔ bɛlɛ́n, mąąnįnįn ɉaɠaaɠaai tii kɛ laa, di gəlee həɠə, da yii ŋɛ̨i kɛ a nwali kwɛlii. Ɉaláá laa həli mun ə kɛ bɛlɛ́ laaləi, da nu nwun-mɛ̨idai tii.

¹⁸ Yii kɛa ɉaláá laa həli mun ə gaa nuą diɛ lɔ Mika yəi bɛlɛ́n, diɛ ɉaliɠaa həɠə da ɉɛnŋaai kpɔ di kɛi gɔ́, ə di mąąni kɛ, yɛ diɛ: «Lə ɓə ŋɛ̨i ka káá gɛi?»

¹⁹ Diɛ mą: «Ə́ laa pilɛ, ə́ yee kɛ ə́ laaləi ɓa. 'Pa gwəli, ə́ kɛ a ku nąn da kuɔ haláá laa həli mun. Mɛ̨nį hveelɛi ŋɛ̨i, nɛlɛ ɓə ə́ kaa bɔ? Ə́ kɛɛ a nu tɔ̨nɔ̨ yəi bɛlɛ́n ɉaláá laa həli mun, a wala kɛ tii, ə́ kɛ a Israɛlə huwu ta yai a Dan nwɔ haláá laa həli mun.»

²⁰ Mɛ̨nį tii di mo ɉaláá laa həli mun mą, ə gwəinɛ̨ɛ̨. Ə ɉaliɠaa həɠə da dɔlukpɛ hɛnŋaa, ə hvilɛn na di pulu.

²¹ Di hvilɛn bələ ɓa, di nɛapɛlɛɛ daatɛlɛɛɠaa da diɲɛ̨ɠaa tɛɛ tɔwɔ.

²² Di liɛ kɛa kwɛa la, Mika da gaayɔwɔɠaa di di ŋąąkpɔn, di hvilɛn di pulu.

²³ Di tomą wooi tii kɛ Dan nuą pulu, yiliɠaai di tínɛ̨n di Mika mąąni kɛ, diɛ mą: «Lə ɓə kɛ yɛ́, yai ə́ nuą ŋąąkpɔn, yɛ́ di hvilɛn ku pulu?»

²⁴ Mika yɛ diɛ: «Nwɔ́ haliɠaai ŋą́ bɛli, diɛ ka tii kaa di həɠə, ɛlɛɛ, kaa nwɔ́ haláá laa həli mun həɠə. Lə ɓə kɛa lɛɛ ɲə́i? Ka pɛli kɛi ləi mą́ą́ lə ɓə kɛ?»

²⁵ Dan nuą diɛ mą: «Ku hvo kɛa ə́ woo mɛ̨n ku pulu, yili hvo mą, nuą líikələn ŋąąi di kwəi, di hvo pa wolo kaa, yɛ́, ə́ yəi bɛlɛ́n nuą, ka nwun və pa lɛɛ ɉu.»

²⁶ Yili pulu, di tɛɛ diɛ li. Yii kɛa Mika ə gaa yɛ di hvaŋą tɛɛi mą, ə bulu pənə yɛ li.

Dan nuą di Laisə taa hon di naa hee a Dan

²⁷ Dan nuą di wɛi, yii kɛa Mika nwɔ hɛnŋaai ə bɛli, di ɉəɠə da nwɔ haláá laa hɛlimun kɛ ɲəi a nwɔ tímun, di həli Laisə daai, ɉu nuą di ɓo liilaa hu, di wəli pulu laɠiɛ, di di kəlee di paa, di nwɔ̨n nɔ daai.

²⁸ Nui lɔpee ta hvo hɔlɔɓo, hvo di mąąkɔ̨nwɔ̨, mąąhɔlɔɓo, di mąą kwɛaa kɛ Sidɔn ɓa, ɛlɛɛ, di hvo kɛ nu ta yee mu. Laisə ə kɛ nɛ̨ŋɛ̨ lɔi hu, ə li kpɔ ə həli Bɛtə-Rehɔvə. Dan nu huwu di pənə di daai tii tɔɔ, di hee laa.

²⁹ Di Laisə laa həɠə mą, di di nąn Dan laa hee mą, yai kɛ a Ɉakɔbə lon da.

³⁰ Mika nwɔ halii ŋɛ̨i di gulɔ ɲəi, di ɉee laa, diɛ gɔ́. Yehonatan Gɛrsɔmə lon, Moisə lon, ya ɓə kɛ a Dan nu huwu di wɔ haláá laa həli mun, ɛlɛɛ, ɉaa pulu, nonnii ɓə kɛa lɛɛ a ɉaláá laa həli nuą, ə lɛɛ la ɉu, diɛ li luwɔlaa hu.

³¹ Ɉalii tii Mika ə bɛli, ya ɓə di ɉee laa diɛ gɔ́, ə lamun lɔ laa, yɛ bələi Yálá nwɔ pɛ́lɛ́i ə lamun la Silo.