Nwun mąąɓo 17 - Yálá laawoo hɛɓɛ (dc)Dan nu huwu Mika nwɔ hali kɔ́ pɛlɛ́ mąą mɛ̨nį 1 Ɛfraimə yee ɓa, hulɔnu ta ə kɛ laa, diɛ kɛ mą: Mika. 2 Yələ ta, Mika yɛ nee ɓa: «Ɓɛlɔwai di ə́ wɔ wali kwələ waa tɔ̨nɔ̨ pulu nwun-dɔnɔi nwuɔ̨ la, yɛ́ nwuɔ̨mun nɛ̨ŋɛ̨n naa, ə́ kili kaa ɉu, ŋą́ kɛ laa, ɲą́ą́ ɓə ɉəɠə.» Ya ɓə, nee yɛ mą: «Nón, gɛ Yai-Laa ə́ lúwɔ́ too yɛ́.» 3 Mika ə nɛɛmą ə nwali kwələ waa tɔ̨nɔ̨ pulu nwun-dɔnɔi tii tɛɛ nee pɔ. Nee yɛ mą: «Nwalii tii, ŋą́ naakwɛlanmo Yai-Laa ɓa, ə́ mąą mɛ̨nį ɓa. Ə gɛ, di hali ta pɛli la yɛ́, yii a kɛ a mąąnįnįn ɉaɠaa ta, yɛ ɓo a kwɛli, yili ɓa, gáá dɛɛi ə́ pɔ.» 4 Kɛlaa, Mika ə pənə nwɔ̨nɔ̨, ə nwalii tii tɛɛ nee pɔ. Nee ə nwun-veelɛ həɠə ɉu, ə dɛɛ wali kwɛli pu mun da bɔ. Yili ə bu, ə bɛli a hali, a mąąnįnįn ɉaɠaa ta, də li di ɉee Mika yəi bɛlɛ́n. 5 Ɉulɔnui tii a Mika, haláá kulɔi ta ə kɛ ɲəi bɛlɛ́n. Ə haláá həɠə ta pɛli, da mąąnįnįn ɉaɠaa takpɛliɠaa. Ə non ɉulɔnu tɔ̨nɔ̨ həɠə, ə ɉee nwun na, a ɉaláá laa həli mun. 6 Nąąlɔwai tii hu, tɔɔmun da hvo kɛ Israɛlə nuą nwun na, yii kɛi nɛ̨ɛ̨ diɛ, ya ɓə di kɛi gɛ. 7 Levi mun da, ə kɛ Bɛtleɛmə daai, Ɉuda nwɔ lɔi hu, ə kɛ laa a nwɛ̨ą. 8 Ɉulɔnui tii ə həɠə Bɛtleɛmə, Ɉuda nwɔ lɔi hu, yɛ li ɉeei nįnɛ̨ kwɛlii, ə pa Ɛfraimə lɔi hu, ə həli Mika yəi bɛlɛ́n. 9 Mika ə mąąni kɛ, yɛ mą: «Ə́ həɠə mį pələ?» Yɛ mą: «Levi mun mąą ɲą́ą́, ŋą́ həɠə Bɛtleɛmə daai Ɉuda lɔi hu. Gáá kɛɛnąą ta kwɛli ɓɛi ŋą́ hee laa.» 10 Mika yɛ mą: «Hee ɓɛ gwɛ́lɛ, ə́ kɛ a nąn, da nwɔ́ haláá laa həli mun. Kwɛlan dɛitɛi yee mu, gáá pai kɛi wali kwɛlə pow tɛɛi ə́ pɔ, gɛ́ ə́ mąą həɠə kɛ da ə́ kɔ̨nɔ̨n.» 11 Levi mun tii ə hvaa mą, ə lɛɛ ɉulɔnui tii pɔɔli. Mika ə ɉulɔnui tii kaa yɛ non ɉulɔnu ta. 12 Mika ə Levi mun tii hee a nwɔ haláá laa həli mun. Ə ɉee ɲəi bɛlɛ́n. 13 Nąąlɔwai, Mika yɛ gbɔwɔ ɓa: «Gíli kaa ɉu gɛ́, Yai-Laa kaa kɛa pai mɛ̨inɛ̨ɛ̨ kɛi mą́ą́, mąąhɔlɔɓo, Levi mun ŋɛ̨i aa kɛ a nwɔ́ haláá laa həli mun.» |