Nwun mąąɓo 16 - Yálá laawoo hɛɓɛ (dc)Samsɔn da Gaza kponŋaa 1 Yələ ta, Samsɔn ə li Gaza daai, ə wɛlikɛ nɛ̨ɛ̨nu ta kaa laa; ə li ə yíi bɔɔli. 2 Gaza nuą di bələ mɛ̨n diɛ Samsɔn aa pa di pɔɔ li, di hiɛ daa kwəi diɛ gwɛli, di nuą tɔɔ ɉįi la, diɛ nąą mąą hɛn. Di mo di kee ɓa, diɛ mą: «Ka gu yələ ɓoɔ mąą kpɔn, gu pa baa nąąlɔwai.» 3 Kɛlaa, kwíi hąą Samsɔn ə muhəɠə, ə ɉį́i laaləi kpon ɉon da nwului ŋɛ̨i kɛ dɔɔ bulu, ə gulɔ, ə naa galan ŋą. Ɲeei tii kɛ tɔɔ ni Hebrɔn taa tənən ma, ə li ə naa don ɉu. Dalila ə Samsɔn ɓowo 4 Mɛ̨nįɠaai tii tɛɛ pulu, nɛ̨ɛ̨nu ta wɛli ə too Samsɔn ɓa, diɛ kɛ naa ɓaa: Dalila, yai kɛ Sorɛkə daai nɛ̨ŋɛ̨ lɔi hu. 5 Filisti nuą di wɔ tɔɔɓɛlaa lɔɔli di pa, diɛ Dalila ɓa: «'Lí ə́ Samsɔn ɲąą nɛ̨nɛ̨n, ɓɛi nwɔ huwalawala kaa laa, ə nąą lɛ yɛ́. Ɛlɛɛ, bələi nu yee a pɛli tɛɛi la mą, ə nɛ yɛ́, ə́ pa ə́ mo kuɔ. Ə gɛ, ku pa ku ɉon, ku ɲili. Ku nu lɔɔli, nu kəlee a wali kwɛlə waa tɔ̨nɔ̨ pulu nwundɔ̨nɔ̨ tɛɛ ə́ pɔ.» 6 Ya ɓə, Dalila ə li, yɛ Samsɔn ɓa: «Nwɛ́li! Mįnɛ̨ ɓə ə́ wɔ huwalawala kɛnɛ̨i ŋɛ̨i a həɠə laa, ɛlɛɛ nu a tɛɛ ləi ɲee ə pɛli yɛ́?» 7 Samsɔn yɛ mą: «Da ɲíli a kilɛn ɲɛli nįnɛ̨ mɛ̨ihveelɛ, yii hvo kpala li, vįi a kpɛɛ, vá pɛli kɔ́i.» 8 Filisti tɔɔɓɛlaa di pa a kilɛn ɲɛli mɛ̨ihveelɛ, yii hvo ni kɛ kpala li, di dɛɛ Dalila pɔ, ə Samsɔn yili la. 9 Nąąlɔwai, aa kɛ nuą loo laa bɛlɛ́n, yili pulu, ə tomą, yɛ Samsɔn ɓa: «Filisti nuą kaa pai pɛlɛi yɛ́.» Samsɔn ə ɲɛli tee mą yɛ nwɔ̨n a hɛn gələn. Nɛ̨ɛ̨nui tii hvo Samsɔn nwɔ huwalawala looi kɔ́lɔn. 10 Dalila yɛ Samsɔn ɓa: «Ə́ kaa gaai tii, yáá mówo, yáá lɛɛ kɛ mą́ą́. Bələi kpɔ nu a tɛɛ la ɲee ə tɛɛ yɛ́, ə ə́ yili, bələ lɛ mą́ą́.» 11 Samsɔn yɛ mą: «Akɛ da ɲili a yɛli nįnɛ̨ yii di hvo ni kóló kɛ li la, vįi a kpɛɛ, vá pɛli kɔ́i.» 12 Dalila ə nɛɛ mą ə yɛli nįnɛ̨ həɠə, ə ɲili la, yili pulu, yɛ nwɔ̨nɔ̨ mą: «Samsɔn, Filisti nuą kaa pai.» Nąąlɔwai, nuą di kɛ a di loɔ laa bɛlɛ́n. Samsɔn ə muhəɠə, ə ɲɛli hu tee yɛ yee kali. 13 Dalila yɛ Samsɔn ɓa: «Yáá nwɔ̨nɔ̨ mówo, yáá lɛɛ kɛ mą́ą́. Yii ŋɛ̨i nwɛi, bələi kpɔ nu a tɛɛ la ɲee ə pɛli yɛ́, bələ lɛ mą́ą́.» Samsɔn yɛ mą: «Akɛ ya nwún nəɠa lɔ kahva hu ə́ naa, ə́ gbulɔn a yɔwɔn ə́ gbulɔn kwɛlɛ wulu ɓa, vįi a kpɛɛ, vá pɛli kɔ́i.» 14 Nąąlɔwai Dalila ə lɛɛ gɛ pələ kwɛlii mą, Samsɔn ə yíi, ə nwun nəɠa lɔ kahva hu, ə gbaɠa kɛ mɛ̨ihveelɛ, ə gbulɔn a yɔwɔn, ə gbulɔn kwɛlɛ wulu kpuɔ ta ɓa. Yili pulu yɛ Samsɔn ɓa: «Samsɔn, Filisti nuą kaa pai.» Ɲąąɓa, Samsɔn ə ɲįnąąɓo, gwɛlɛ wulu kpiɛn tii di gbulɔn mą, ə́ gulɔ. 15 Dalila yɛ nwɔ̨nɔ̨ Samsɔn ɓa: «Yá pɛli kɛi ləi diɛ nwɛ́li kaa yɛ́, akɛ yá kɛi mówo lɔ a yələ kəlee? Yáá mówo, yɛ́ lɛɛ kɛ mą́ą́, gee mɛ̨i haaɓa ɓɛi ə́ wɔ huwalawalai kaa laa, hvo nąą lɛi mą́ą́.» 16 Yələ kəlee, Dalila ə kɛi kpɔlu Samsɔn la, yɛ yili hviikpɛɛ kpɔ a mɔlɔ. 17 Yili ɓə gɛ Samsɔn ə gbɔwɔ looi kulɔ, yɛ Dalila ɓa: «Ə gɔwɔ tɔɔ kpɔ néé kwəi, kpəŋą hvo ta tɛɛ li nwúɔ̨, gáá a nu laakwɛlanmoɔ Yálá ɓa. Akɛ da nwún galaan nwɔ́ huwalawala a kulɔ ɲəi víi ə kpɛɛ, vá pɛli kɔ́i.» 18 Dalila ə gaa kɛa yɛ Samsɔn aa nooi kəlee lɛ mą, ə wɛlɛɛ tɔɔ Filisti tɔɔɓɛlaa pɔɔli, yɛ diɛ: «Yii ŋɛ̨i nwɛi, Samsɔn aa gwəi mɛ̨nį kəlee ɓo mą́ą́. Ka pa kɛa.» Nuąi tii di pa nwalii di naakwɛlanmo Dalila ɓa, di dɛɛ bɔ. 19 Dalila ə gɛ pələ kwɛli mą, Samsɔn ə lɛɛ laani gɔwɔ mɛ̨i, ə yíi. Ə hulɔnu ta təli, yili ə pa ə Samsɔn nwun gbaɠa mɛ̨ihveelɛi tii kəlee kalaan. Bələ ɓə nɛ̨ɛ̨nui tii ə Samsɔn ɲąąhɛn na, vii yɛ kpɛɛ, mąąhɔlɔɓo, nwɔ huwalawala aa kɛ kulɔ ɉu. 20 Yili pulu, yɛ Samsɔn ɓa: «Samsɔn, Filisti nuą kaa pai.» Samsɔn ə ɲįnąąɓo, yɛ kɛ nwɔ kwəi pələ: «Gáá pai kulɔi ɉu, yɛ bələi hiɛ ŋą́ kɛ kulɔi la ɉu.» Kɛlaa, hvo kɛ gɔlɔn yɛ kɛ Yai-Laa aa mąą kwɛa mą. 21 Yili pulu, Filisti nuą di ɉon, di ɲɛ̨i wolo. Di ɉəɠə də li la Gaza daai, di ɲili a ɓala kwɛli yɔwɔn veelɛ. Samsɔn ɓə kɛa kɛ laa, yɛ gaho nąmįną kɔ̨nɔ̨n ɉiɠɛ. 22 Bələi mąn di nwun galaan na, nwun nəɠa ə kɛi tɛ. Samsɔn nwąną kpəli kulɔ mɛ̨nį da ɉaa mɛ̨nį 23 Yələ ta, Filisti tɔɔɓɛlaa di di ɲąą kpɔn, diɛ haláá kulɔ, di wɔ halii Dagɔn ɓa, diɛ ɉɛli pu. Diɛ kɛ di kee ɓa: Gu wɔ halii aa gu yowo Samsɔn hon aa dɛɛ gu pɔ. 24 Nɔi nuą di gaa lɔ tii, diɛ wələ too di wɔ halii ɓa, diɛ kɛ mą: «Ku wɔ halii nwɔ lúwɔ́ haalai, ku yowoi kɛi ku kɛ mɛ̨nįɠaa hu kala, yɛ ku wɔ nuą paa, aa ɉon.» 25 Yɛ bələi di kəlee di kwəinɛ̨ɛ̨i kɛ la diɛ tomą, di mo diɛ: «'Ka pa a Samsɔn, ə pələ kɛ ku ɲɛ̨i ɓa, ku nąą kaa.» Di Samsɔn kulɔ gaho pɛlɛ́ mu, di paa la nuą pɔ, di kwəinɛ̨ɛ̨ yɛ pələ kɛ, diɛ gaa. Di Samsɔn tɔɔ Dagɔn mąąwiɛ pɛlɛ́ nɔ̨nwɔ̨ hveelɛ lɔwai. 26 Ɉulɔnon ŋɛ̨i Samsɔn yee hon yɛ paa la, Samsɔn yɛ yili ɓa: «Bɛlɛ́ lɔ̨nwɔ̨ yiiɠaai dɔɔ bɛlɛ́ nąą kəlee mu, ɲee pɛlɛ mą, ə gɛ, ŋą́ gálihvaɓo mą.» 27 Bɛlɛ́i tii laahvɛɛi kpɔ kɛ a hinąą da nɛ̨ąą. Filisti tɔɔɓɛlaa kəlee ɲąąkpɔn ŋąą kɛ laa. Nuąi kpɔ kɛ laa bɛlɛ́ kwɛlɛ, diɛ yɛlɛ kulɔ Samsɔn hu, di kɛ a hinąą da nɛ̨ąą nu waa haaɓa ɲɔ̨nwɔ̨mąn. 28 Ya ɓə, Samsɔn ə nwoo tɛ Yai-Laa ɓa, yɛ mą: «Nwɔ́ mɛ̨nį Nąmu Yálá, nɛ̨ɛ̨ yɛ́, ə́ kiliŋąhiɛ ə́ vilɛn mą́ą́. 'Pənə ə́ nwɔ́ huwalawalai tɛɛ bɔ́ kpɔlɔ yii-hu. Nán Yálá! Ə gɛ ŋą́ nwąną kulɔ Filisti nuą diɛ, ɲɛ̨́ikɔw ŋɛ̨i di nwolo mąą mɛ̨nį ɓa.» 29 Yili pulu, bɛlɛ́ lɔ̨nwɔ̨ hveelɛi Samsɔn ə kɛ tɔɔni di nɔwai, ə ɲee pɛlɛ diɛ, dɔ̨nɔ̨ ə lɛɛ mamįiyee hu, dɔ̨nɔ̨ ə lɛɛ gɔɓɛyee hu. 30 Samsɔn yɛ diɛ: «Kwa Filisti nuą ku kaa haai a gee.» Yili pulu, ə tɔɔ kpɔ a nwalawala, ə bɛlɛ́ pu, dɔɔɓɛlaa da nuąi kpɔ tii kɛ laa di mɛ̨i. Nuąi lɛɛ ɉu, di kpulu ə kɛnɛ̨ ə tɛɛ yiiɠaai ə di paa vulú kɔ́wɔ ŋą diɛ. 31 Samsɔn gaayɔwɔɠaa, da nąn ɲəi bɛlɛ́n nuą di pa di bowa həɠə, də li la, di noo Sorea da Ɛstaɔlə di lɔwai, nąn Manoa kámą hu. Samsɔn ə tɔɔ Israɛlə ɲɛ̨itɔwɔ kwɛlan bow hveelɛ yee mu. |