Nwun mąąɓo 14 - Yálá laawoo hɛɓɛ (dc)

Samsɔn kɛ mɛ̨nį dɔlɔɔ

¹ Yələ ta, Samsɔn ə li Timna daai, ə nɛ̨ɛ̨nu ta kaa laa Filisti nɛ̨ąą lɔwai,

² bulu pənəi ə mo ə pa bɔ taai, ə mo nee da nąn diɛ, yɛ diɛ: «Ŋą́ą́ Filisti nɛ̨ɛ̨nu ta kaa Timna daai, gáá bɔ ka li ka mąą mɛ̨nį ɓo, ŋą́ ɉəɠə a nɛ̨́ą.»

³ Samsɔn kaa nuą diɛ mą: «A kɛ tii, hvo kɛ nɛ̨ɛ̨non da kaa li ə́ huwu lɔwai ɓɛ, yii yá pɛli ɉəɠəi a ə́ nɛ̨ą? Hvo kɛ li lɔ Filisti nɛ̨ɛ̨nu, a diɛi di huwu kaa a kɛ́nɛ̨ kpolɔwaɠaai?» Kɛlaa, Samsɔn yɛ nąn ma: «Nɛ̨ɛ̨nui tii ɓə gáá bɔ ŋą́ ɉəɠə a nɛ̨́ą, ka li ka mąą mɛ̨nį ɓo.»

⁴ Samsɔn nee da nąn di kili hvo kɛ ɉu diɛ kɛ Yai-Laa nwɔ mɛ̨nį pɛliɛ li, ə gɛ, Samsɔn ə li ə hvaa tee Filisti nuą diɛ. Nąąlɔwai, Filisti nuą ɓə kɛ di heɛ Israɛlə nuą mɛ̨i.

⁵ Samsɔn da gaa nuą di həɠə də li Timna, ɓɛlɔwai di həli la yiliɠaai di wɔ viɲə yɛɛi ɓa daa kwɛlɛ, yala ta ə lan yɛ pa woloi Samsɔn ɓa.

⁶ Nąąlɔwai, Yai-Laa nwɔ Kilii ə too Samsɔn hu, hɛn da hvo kɛ ɲəi. Ə ɲalai tii hu ɓɛla, yɛ bələi da ɓolu lon ɉu ɓɛla la. Kɛlaa, mɛ̨nįi tii ə gɛ, hvo ɉukulɔ nee da nąn diɛ.

⁷ Yili pulu, ə li Timna, ə nwɛli mɛ̨nį ɓo nɛ̨ɛ̨nu ɓa, nɛ̨ɛ̨nu ə níihon.

⁸ Yii kuu hveelɛ kulaa ɉu, ə pənə yɛ li ɉəɠəi a nɛ̨ą, kɛlaa, hvo bələ haŋą taai pələ, ə tɛɛ ɲala powa kɛɛnąą pələ. Lii ə mo, ə kwɛ̨in gaa ɲala nwun galən gala hu, aa nwulɔ pu laa.

⁹ Ə gwɛ̨in gban da həɠə, yɛ mįi, yɛ li, ə li, ə da tɛɛ nąn da nee di pɔ. Kɛlaa, hvo kɛ diɛ ə gwɛ̨in tii kulɔ yala nwun galə gala hu.

Samsɔn ə hanwon da hɔɔ Filisti nuą diɛ

¹⁰ Yili pulu, Samsɔn nąn ə li nɛ̨ɛ̨non pɔɔli, Samsɔn ə hɛli kɔ̨nɔ̨n bɛli, mąąhɔlɔɓo, pələ ɓə hilɛlɛa da gɛ la kɛ, di yíi pələ hu.

¹¹ Yii kɛa Filisti nuą di gaa tii, di hilɛlɛa pow haaɓa həɠə, di vilɛn Samsɔn pɔ, di ɓo gwɛlɛ.

¹² Samsɔn yɛ ɉilɛlɛai tii diɛ: «Gáá hanwon da hɔɔi kaa, ka mukulɔ ɉɛli hvóló mɛ̨ihveelɛi ŋɛ̨i yee mu, ŋą́ hiŋɛ̨nɉəɠə pow haaɓa tɛɛ ka pɔ, da hɛli həɠə pow haaɓa.

¹³ Kɛlaa, ka wala mukulɔ, kaa ɓə ka hɛli həɠə pow haaɓa tɛɛ bɔ́, da hiŋɛ̨nɉəɠə pow haaɓa.» Ɉilɛlɛai diɛ mą: «Ə́ wɔ hanwon ɉɔɔ ku gaa.»

¹⁴ Samsɔn yɛ diɛ: «Hɛn da mįi aa kulɔ hɛn mįi hɛn ɉu. Hɛn nɛ̨ɛ̨ aa kulɔ huwalawala hɛn ɉu. Yili mukulaa ɓaa lə?» Hvóló haaɓa kuu mu, ɉilɛlɛai tii di hvo pɛli ɉanwon tii mukulaa lɛi.

¹⁵ Voló mɛ̨ihveelɛ yələ, ɉilɛlɛai diɛ Samsɔn nɛ̨ą ɓa: «A kɛ tii, ku mąą kpoloon mɛ̨nį ɓə ka ku tə li la? Akɛ hvo bɔ ku hvo ə́ kələn, yɛ́ ka ə́ nąn ɲəi bɛlɛ́n nuą, li ə́ too ə́ hilɛ mu ə ɉanwon tii mukulaa lɛ yɛ, ə́ pa ə́ nɛ kuɔ.»

¹⁶ Samsɔn nɛ̨ą ə li, ə too ɉilɛ kɔ́wɔ mu a wɔlɔ, yɛ mą: «Nwɛ́li hvo kpɔ yɛ́ tanɔ̨n gbɛli, yáá hanwon ɉɔɔ ɉúwu ɓa, hvó gɛ li hvó mukulaa lɛ mą́ą́.» Samsɔn yɛ nɛ̨ą ɓa: «Və́ kɛ mukulaa lɛ li gáá nuą diɛ, gɛ́ pa nɛi yɛ́?»

¹⁷ Samsɔn nɛ̨ą ə wɔlɔ mą, di wɔ hɛli hvóló mɛ̨ihveelɛi tii kəlee yee mu; voló mɛ̨ihveelɛ yələ, ə mukulaa lɛ mą. Mąąhɔlɔɓo, aa kɛ kpɔlu na. Nɛ̨ɛ̨nui tii ə li ə ɉanwon mukulaa lɛ nwɔ nuą diɛ.

¹⁸ Voló mɛ̨ihveelɛ yələ, hvóló hvo ni kɛ too li, daa nuą diɛ Samsɔn ɓa: «Lə ɓə nɛ̨ɛ̨ dɛɛ kwɛ̨in nwulɔ ɓa, Lə ɓə nwalaa dɛɛ yala ɓa?» Samsɔn yɛ diɛ: «Ka wala kɛ kɛɛ hin a nwɔ́ nįŋɛ̨ haai, Ka hvo li nwɔ́ hanwon mukulaa kɔ́lɔn.»

¹⁹ Yai-Laa nwɔ Kilii ə too Samsɔn hu nąąlɔwai, ə həɠə, yɛ li Askelɔn. Ə hinąą pow haaɓa paa, ə di mąą həɠəɠaa kulɔ diɛ, ə dɛɛ ɉanwon mukulɔ nuą pɔ. Yili pulu, níi ə kələn gwəi, ə pənə ə li nąn bɔ.

²⁰ Yii ɓaa Samsɔn nɛ̨ą nwɛi, ɉulɔnon ŋɛ̨i kɛ Samsɔn pɔ, ya ɓə di dɛɛ bɔ a nɛ̨ą.