Nwun mąąɓo 13 - Yálá laawoo hɛɓɛ (dc)Samsɔn hɔlɔɓo mɛ̨nį 1 Mɛ̨nįi kɛ ɲɔ̨nwɔ̨ɔ̨ Yai-Laa ɲɛ̨i ɓa, Israɛlə nuą di pənə nwɔ̨nɔ̨ di di yee lɔ ɉu, di gɛ. Yai-Laa ə di too Filisti nuą yee ŋą kwɛlan bow nąąn ɲee mu. 2 Hulɔnu ta ə kɛ Sorea, yai kɛ a Dan mun da, diɛ kɛ naa ɓaa: Manoa. Nɛ̨ą ə kɛ a kpomąnɛ̨ą. 3 Yai-Laa nwɔ malaka ə gbɔwɔ lɛ nɛ̨ɛ̨nui tii ɓa pɔ̨nɔ̨ŋą, yɛ mą: «Gili kaa ɉu gɛ́, lon ve yɛ́, ə́ kaa a kpomąnɛ̨ą; kɛlaa, ə́ kaa pai koo həɠəi, ə́ lon ɉulɔnu kaa. 4 Ə həɠə yiihu ɓa, hvo lɔɔ kpələ, ə mą kɛ kpələ hɛn ɉuwui lɔpee a nu nwun ɉu tínɛ̨n. Kɔ̨nɔ̨n yii Yala ə tɔ́n dɔɔ mą hvo da mįi. 5 Mąąhɔlɔɓo, ə́ kaa pai koo həɠəi, ə́ lon ɉulɔnu kaa, di hvo kpəŋą hiɛ nwuɔ̨, mąąhɔlɔɓo, nokoloi tii kaa pai kɛi a nui naakwɛlanmoɔ Yala ɓa, ɛlɛɛ. Ya ɓə pai Israɛlə nuą kulɔi Filisti nuą yee mu.» 6 Nɛ̨ɛ̨nui tii ə li ɲəi bɛlɛ́ laaləi, yɛ ɉilɛ ɓa: «Yálá nwɔ nu ta aa gbɔwɔ lɛ mą́ą́, ɲɛ̨ilai ə kɛ yɛ Yai-Laa nwɔ malaka, mąą ɲɔuɔ. Və́ kɛ li mą mįnɛ̨ ɓə ə́ həɠə laa, hvo nwɔ̨nɔ̨ naa ɓo mą́ą́. 7 Ə kɛ lɔ mą́ą́: ‹Ə́ kaa pai koo həɠəi, ə́ lon ɉulɔnu hɔlɔɓo, ə həɠə yiihu ɓa, hvo lɔɔ kpələ, kpələ hɛn ɉuwui lɔpee a nu nwun ɉu tínɛ̨n, hvo da kpələ. Kɔ̨nɔ̨n yii Yálá ə tɔ́n dɔɔ mą, hvo da mįi; mąąhɔlɔɓo, nokoloi tii kaa pai kɛi a nui naakwɛlanmoɔ Yálá ɓa, ə gɔwɔ tɔɔ nee kwəi, ə lɛɛ la ɉu, ɉaa yələ.›» 8 Nąąlɔwai, Manoa ə Yai-Laa hvɛli, yɛ mą: «Ną́mu, Yálá ə́ wɔ nui hiɛ ə́ dɔɔ, pənə nwɔ̨nɔ̨ ə́ dɔɔ, ə́ pa ku pɔ, ə gɛ, mɛ̨nįi mąąnɛ̨ɛ̨ ku gɛ nooloi mąą mɛ̨nį hu, ə ku kilaa pɔ̨nɔ̨ la.» 9 Yálá ə Manoa nwɔ hvɛli ɓo woo mu hon, Yálá ə pənə nwɔ̨nɔ̨ ə pa nɛ̨ɛ̨nui pɔ. Ə kɛ tii yɛ ɓo ɲɛa, ɉilɛ Manoa hvo kɛ gwɛlɛ. 10 Ə nɛɛmą ə gilɛ həɠə, ə pa ə mo ɉilɛ ɓa, yɛ mą: «Ɉulɔnui hiɛ kɛ, aa pa nwɔ̨nɔ̨, aa gbɔwɔ lɛ mą́ą́.» 11 Manoa ə hvilɛn nɛ̨ą pulu, da yaa də li kpɔlɔ tii ɲąąɓa, ɉulɔnui tii pɔ, ə mąąni kɛ, yɛ mą: «Yɛ́ ɓə hiɛ mɛ̨nį ɓo nɛ̨́ą ɓa?» Yili yɛ mą: «Ɲą́ą́ ɓə!» 12 Manoa ə pənə, yɛ mą: «Mɛ̨nį ŋɛ̨i ə́ mo, naa a hon, lə ɓə kwa gɛ nokoloi tii mąą mɛ̨nį hu?» 13 Yai-Laa nwɔ malaka yɛ Manoa ɓa: «Mɛ̨nįɠaai ŋą́ mo nɛ̨ɛ̨nui ŋɛ̨i ɓa, mąąnɛ̨ɛ̨ ə yiliɠaai kɛ. 14 Hvo viɲə má ta mįi, hvo lɔɔ kpələ, da kpələ hɛn lɔpee a nu nwun ɉutínɛ̨n; kɔ̨nɔ̨n ɲiiɠaai Yálá ə tɔ́n dɔɔ mą, hvo da mįi. Mɛ̨nįɠaai ŋą́ mo mą, ə gili lɛɛ gəlee hu, ə ɉon.» 15 Manoa yɛ Yai-Laa nwɔ malaka ɓa: «Kuɔ ku Ə́ nwɛ̨ąlaa kɛ a ɓolu lon, Ə́ hvaa mą?» 16 Yai-Laa nwɔ malaka yɛ mą: «Ə mą kɛ kaa ka yee kanąn mą́ą́ ɓɛ, kɔ̨nɔ̨n ka káá pai ɲilii, və́ pai mįi, kɛlaa a kɛ ə́ kaa bɔ, haláái da gəlee kələn ə́ gulɔ, gulɔ Yai-Laa ɓa.» Manoa kili hvo kɛ ɉu yɛ kɛ diɛ Yai-Laa nwɔ Malaka li. 17 Manoa yɛ Yai-Laa nwɔ malaka ɓa: «Ə́ laa ɓo kuɔ, ə gɛ, mɛ̨nįɠaai ŋɛ̨i ə́ mo, naa a hon, kuɔ pɛli ə́ tɛnɛ̨i.» 18 Yai-Laa nwɔ malaka ə pənə, yɛ mą: «Lə mɛ̨nį ɓa ə́ kaa bɔ ə́ naa kɔ́lɔn? Náá kaa a kwəi pili mąą.» 19 Manoa ə ɓolu lon dɔ̨nɔ̨ həɠə da bɔ hɛnŋąą, ə di kulɔ Yai-Laa ɓa a haláá kwɛni mɛ̨i. Yai tii gɛ mɛ̨nį kaa a kwəi pilimąą. Manoa da nɛ̨ą di ɲɛ̨i ə lɛɛ lɔ laa. 20 Nwɔ̨n nulu tii kɛi tɛ ɲələi pələ, Yai-Laa nwɔ malaka ə lɛɛ nwɔ̨n nulu hu, ə tɛ. Yili nąą kaai Manoa da nɛ̨ą di mo, di pɛlɛ nɔi ɓa. 21 Manoa kili ə pu ɉu, yɛ kɛ Yai-Laa nwɔ malaka ka tii gbɔwɔ lɛ diɛ; yili pulu, di hvo kɛa gaa. 22 Manoa yɛ nɛ̨ą ɓa: «Gu haa hiɛ ka, mąąhɔlɔɓo, gwaa Yálá kaa.» 23 Manoa nɛ̨ą yɛ mą: «Akɛ Yai-Laa ə kɛ bɔ ə gu paa, ɉaláá hɛn ŋɛ̨i gu naa həli mą, hvo li ɲee hee mu. Yili pulu, hvo li hvaa mą, hvo mɛ̨nįɠaai ŋɛ̨i lɛ guɔ, hvo mɛ̨nį ɓo nwɔ̨nɔ̨ guɔ.» 24 Manoa nɛ̨ą ə koo həɠə, ə lon ɉulɔnu hɔlɔɓo, ə naa hee a Samsɔn. Nokoloi tii ə kɛi kɛnɛ̨, Yai-Laa yɛ lúwɔ́ too mą. 25 Ɓɛlɔwai Samsɔn ə kɛ la Mahane-Dan, Sorea da Ɛstaɔlə di lɔwai, Yai-Laa nwɔ Kilii ə gɔwɔ tɔɔ, yɛ too ɉu. |