Nwun mąąɓo 12 - Yálá laawoo hɛɓɛ (dc)Hvaa ə too Ɛfraimə nuą da Galaadə nuą di lɔwai 1 Ɛfraimə nuą di di ɲąąkpɔn, di Ɉurdɛn yá teen, də li Safon pələ; diɛ Ɉɛfte ɓa: «Le mɛ̨nį ɓa ə́ kɔ́ pɛlɛi Amɔn nuą diɛ, hvó ku təli li gu hvo li? Ku kaa yɛ́ ká ə́ wɔ pɛ́lɛ́i ka kələn ɉii.» 2 Ɉɛfte yɛ diɛ: «Vaa kɛnɛ̨ɛ̨ ə kɛ, ɲą́ą́, nwɔ́ lɔi hu nuą, kwa Amɔn nuą ku lɔwai. Ɓɛlɔwai ŋą́ ka təli la, ka hvo pa li, ka hvo gúlɔ di yəi. 3 Yii kɛa ŋą́ gaa, gɛ́ kɛ diɛ nu ta hvo pai hvo kpɔnmą́ą́, ŋą́ nį́i kpələ, ŋą́ lɔ Amɔn nuą di wɔ lɔi hu, Yai-Laa ə gɔ́ nɛ̨ɛ̨ mą́ą́. Lə mɛ̨nį ɓa ka pa háákələi kɔ́ pɛlɛi mą́ą́?» 4 Yili pulu, Ɉɛfte da Galaadə nuą di yee ə tɛɛ Ɛfraimə nuą diɛ, mąąhɔlɔɓo, Ɛfraimə nuą di kɛi kɛ mą: «Kaai ɓaa Galaadə nuą, ka káá a nuąi daa di mąą kilɛ. Ɛfraimə nuą lɔwai, da Manase nwɔ nuą lɔwai.» 5 Yili pulu, Galaadə nuą də li di Ɉurdɛn yá kwɛlɛ pələi kɛ a Ɛfraimə nuą di wɔ, di nąą kəlee hon. Ɛfraimə nuąi ŋɛ̨i kɛi pu, da a pa yɛ kɛ ə tɛɛ, Galaadə nuą da mąąni kɛ, diɛ mą: «Ɛfraimə mun mąą yɛ́?» A kɛ diɛ: «Kpaa!» 6 Da kɛ mą: «Sibolɛtə», yili a kɛ diɛ «Ɉibolɛtə.» Mąąhɔlɔɓo, hva pɛli kɛ moi yɛ bələi mąąnɛ̨ɛ̨ la. Nąąlɔwai, da ɉon di nwun dee ɲá teen ɉii. Volói tii, Ɛfraimə nuą, nu waa pow nąąn kɔ́w hveelɛ ɓə di baa. 7 Ɉɛfte Galaadə mun ə Israɛlə ɲąąwooɓo kwɛlan mɛ̨ida yee mu. Yili pulu, ə haa, di noo Galaadə taalee ta hu. Ibsan 8 Ɉɛfte haa pulu, Ibsan Bɛtleɛmə mun, ya ɓə kɛ a Israɛlə nuą ɲɛ̨itɔwɔ mun, 9 non ɉinąą di kɛ a nu pow haaɓa non nɛ̨ąą diɛ ɓo a nu pow haaɓa. Ə non nɛ̨ąą hilɛtai kɛ pələ takpɛli; ə pələ takpɛli nɛ̨ąą pow haaɓa həɠə, ə di tɛɛ non ɉinąą pɔ a di nɛ̨ąni. Ə Israɛlə ɲąąwooɓo kwɛlan mɛ̨ihveelɛ yee mu. 10 Ibsan ə haa, di noo Bɛtleɛmə daai. Elɔn 11 Ibsan haa pulu, Elɔn Zabulɔn mun, ya ɓə kɛ a Israɛlə nuą ɲɛ̨itɔwɔ mun, kwɛlan bow yee mu. 12 Elɔn Zabulɔn mun, ə haa, di noo Elɔn daai, Zabulɔn lɔi hu. Avdɔn 13 Elɔn haa pulu, Hilɛlə lon Avdɔn yai a Pireatɔn mun; ya ɓə kɛ a Israɛlə nuą ɲɛ̨itɔwɔ mun. 14 Avdɔn lon ɉinąą di kɛ pow nąąn, mąnįnni diɛ ɓo pow haaɓa, gəlee diɛ ɓo heeni hoohvaalən mɛ̨i. Avdɔn ə Israɛlə ɲąą wooɓo kwɛlan mɛ̨ihaaɓa yee mu. 15 Hilɛlə lon Avdɔn, Pireatɔn mun, ə haa, di noo Pireatɔn daai, Ɛfraimə lɔi hu, Amalɛkə yee koo mu. |