Nwun mąąɓo 11 - Yálá laawoo hɛɓɛ (dc)Ɉɛfte ə nwun nąmu laa kɛ Israɛlə 1 Kɔ́kuláá walawala ta ə kɛ Galaadə, diɛ kɛ naa ɓa: Ɉɛfte. Ɉɛfte ə kɛ a wɛlikɛ nɛ̨ɛ̨nu ta lon, yai da Galaadə di ɉɔlɔɓo. 2 Yili pulu Galaadə nɛ̨ą ə lon ɉinąą hveelɛ hɔlɔɓo. Ɓɛlɔwai yiliɠaai di kɛnɛ̨ la, di Ɉɛfte kpɛ diɛ mą: «Ə́ wɔɔ nąą hvo ku nąn gwɛlin ɉu, mąąhɔlɔɓo, wɛlinnon mąą yɛ́.» 3 Ɉɛfte ə pu, ə həɠə gaayɔwɔɠaa kwɛlɛ, ə li ə hee Tɔvə daai. Nu kpoloonŋaa di həɠə di too Ɉɛfte pɔ, da diɛni də li. 4 Ɉu hvo kwɛa, Amɔn nuą diɛ pa kɔ́ pɛlɛi Israɛlə nuą diɛ. 5 Ɓɛlɔwai gɔ́ ə wiɛ la, Galaadə kalanɉonŋaa, di Ɉɛfte wɛlɛɛ tɔɔ Tovə daai, 6 diɛ mą: «'Pa ə́ tɔɔ ku ɲɛ̨i tɔwɔ, gu kɔ́ pɛlɛ Amɔn nuą diɛ.» 7 Kɛlaa, Ɉɛfte yɛ diɛ: «Kɛlɛi kaa ɓə yowolaa hee mą́ą́, ka gbɛ́ ną́n ɲəi bɛlɛ́n. Lə mɛ̨nį ɓa mɛ̨nį a kpɔlu ka la, kaa də́ li?» 8 Galanɉonŋaa diɛ Ɉɛfte ɓa: «Kwaa pa ə́ pɔ, ə gɛ, yiihui ŋɛ̨i, ə́ tɔɔ ku tɔwɔ, gu kɔ́ pɛlɛ Amɔn nuą diɛ, ə́ kɛ a ku nwun nąmu, Galaadə kəlee nwun mɛ̨i.» 9 Ɉɛfte yɛ diɛ: «Akɛ ŋą́ too ka pɔ, gwa pɛlɛ Amɔn nuą diɛ, Yai-Laa a yeetɛɛmąą tɛɛ bɔ́ di mɛ̨i, ŋą́ kɛ a ka nwun nąmu.» 10 Nąąlɔwai, Galaadə kalanɉonŋaa, diɛ Ɉɛfte ɓa: «Yai-Laa kaa a gu wɔ kɛla, yii kpɔ ŋɛ̨i ku mo, kwa gɛ tii.» 11 Galanɉonŋaa da Ɉɛfte ni di tɛɛ də li, di Ɉɛfte kɛ a di wɔ kɔ́ nwun nąmu. Lii di mo Mispa, mɛ̨nį Ɉɛfte da galanɉonŋaa di mo, ə hvaa mą Yai-Laa ɲɛ̨i ɓa. Ɉɛfte ə wɛlɛɛ tɔɔ Amɔn nuą pɔɔli 12 Ɉɛfte ə wɛlɛɛ tɔɔ Amɔn nuą di wɔ tɔɔmun pɔɔli, yɛ mą: «Lə mɛ̨nį ɓə gwa kaa ni gu lɔwai, yai ə́ pa pɛlɛi nwɔ́ lɔi ɓa?» 13 Amɔn tɔɔmun yɛ Ɉɛfte ɓa: «Ɓɛlɔwai Israɛlə nuą di kulɔ la Eziptə lɔi hu di pa, di nwɔ́ lɔi həɠə, ə həɠə kpɔ Arnɔn yá nɛ̨ŋɛ̨ hu, da Yabɔkə yá, ə lɛɛ ɉu ə həli Ɉurdɛn yá ɓa. Pənə ə́ nwɔ́ lɔi tii tɛɛ bɔ́ ɲɛ̨i laɠi hu.» 14 Ɉɛfte ə pənə ə wɛlɛɛ nįnɛ̨ tɔɔ Amɔn tɔɔmun bɔɔli, 15 yɛ mą: «Israɛlə nuą di hvo kɛ Moabə nuą di wɔ lɔi həɠə li, ə mą kɛ Amɔn nuą di wɛi ta. 16 Ɓɛlɔwai wɔlɔ Israɛlə nuą di həɠə la Eziptə, di tɛɛ nɔi pun ɉu, di veen gbɔnɔ gboloyá teen, di pa Kadɛsə. 17 Nąą ɓə di lɛɛ laa, di wɛlɛɛ tɔɔ Edɔmə tɔɔmun bɔɔli, ə gɛ, yili ə hvaa mą, di tɛɛ nwɔ lɔi hu. Kɛlaa, hvo hvaa mą. Israɛlə nuą di pənə nwɔ̨nɔ̨ di mɛ̨nį tɔ̨nɔ̨i tii hu hvɛli Moabə tɔɔmun ma. Yili yaa kpɛli, hvo nwɔ̨nɔ̨ hvaa mą. Israɛlə nuą di lɛɛ Kadɛsə. 18 Yili pulu, di pənə di pulu, di Edɔmə lɔi da Moabə lɔi mąą kpəlaan, di həli Moabə lɔi voló həɠəi pələ. Nąą ɓə di di taa pu laa Arnɔn ɲá kwɛlɛ, di hvo lɔ Moabə lɔi hu, Arnɔn ɓə kɛ a Moabə lɔi ɲɛ̨n. 19 Di lɛɛ laa, di wɛlɛɛ tɔɔ Amɔrə nuą di wɔ tɔɔmun Sihɔn pɔɔli, yaai ɉeɛ ə kɛ Hɛsbɔn. Di ɉu hvɛli mą, ə gɛ, di tɛɛ nwɔ lɔi hu, diɛ li ɓɛi di kɛi li laa. 20 Kɛlaa, Amɔrə tɔɔmun hvo laa Israɛlə nuą la, hvo kɛli Amɔrə nuą di di wɔ kɔlaɠaɠaa ŋąąkpɔn, də li di hee Israɛlə nuą tɔwɔ a kɔ́ Yahasa. 21 Yai-Laa Israɛlə nwɔ Yálá, ə Sihɔn da nwɔ kɔlaɠai kwɛlɛ Israɛlə nuą diɛ, di yee ə tɛɛ diɛ. Nɔi ŋɛ̨i kɛ Amɔrə nuą di kɛ ɉu, Israɛlə nuą di nąą kəlee həɠə. 22 Ə həɠə kpɔ Arnɔn lɔi ɓa, ə həli Yabɔkə ɲá ɓoloon bɔ; ə həɠə la nɔi pun ma pələ, ə həli la Ɉurdɛn ɓa. 23 Yiihu, yɛ bələi ŋɛ̨i Yai-Laa ku wɔ Yálái ə nɔi tii tɛɛ la nwɔ nuą pɔ, yai a Amɔrə lɔi, yaa ɓə yɛ́ ə́ ɉəɠə? 24 Nɔi ŋɛ̨i ə́ wɔ halii Kemɔsə ə dɛɛ ə́ pɔ, hvo mɔ̨ɔ̨ ə́ yəi? Yili ɓa, nɔi ŋɛ̨i Yai-Laa ə hvaa mą ku ɉɔlɔɓo, gaa a ku wɔɔ. 25 Moabə tɔɔmun Balakə, yai gaa a Sipɔrə lon, gaa ə́ kwəi, ə́ hviɛla ɓoɔi ə́ tɛɛ mą? Lolo nwɛi, hvo kɔ́ pɛlɛ Israɛlə nuą diɛ. 26 Aa kɛ kɛa a kwɛlan nwun ɉaaɓa, Israɛlə nuą heɛ kaa Hɛsbɔn da gwɛlɛɠaa, Aroɛrə da gwɛlɛɠaa, ɛlɛɛ da daaɠaai kpɔ di kaa Arnɔn koo ɓa. Lə mɛ̨nį ɓa nąąlɔwai ka hvo kɛ nąą həɠə li? 27 Nwɛ́i, və́ nɛ̨ŋɛ̨n ɉəɠə li yɛ́, kɛlaa, yɛ́ ɓə yáá mɛ̨nį ɲɔ̨n gɛ a ɲą́ą́, ya ka tii, ə́ kaa kɔ́ pɛlɛi la mą́ą́. Gɛ́ Yai-Laai a nuą lɔwai mɛ̨nį hutɔɔ, ə Israɛlə nuą da Amɔn nuą di mąą mɛ̨nį hutɔɔ háákələi.» 28 Kɛlaa, Amɔn tɔɔmun hvo Ɉɛfte nwɔ wɛlɛɛi tii kaa a mɛ̨nį walawala. Ɉɛfte ə nwoo kwɛlɛ 29 Yai-Laa ə nwɔ Kilii tɛɛ Ɉɛfte pɔ, ə Galaadə lɔi da Manase lɔi hu hiɛ, ə li Mispa, həɠəi ə mo Mispa, ə li Amɔn nuą di wɔ lɔi hu. 30 Ə Nwoo kwɛlɛ Yai-Laa ɓa, yɛ mą: «Yai-Laa, yá hvaa mą ɲéé a tɛɛ Amɔn nuą diɛ, 31 nu tɔlɔɔi pai kulɔi ɲə́i bɛlɛ́n, yɛ pa náákwiɛn ɉii, ŋą́ gɛ a Ə́ kɔ hɛn, ŋą́ gulɔ a haláái da gəlee kələn.» 32 Ɉɛfte ə tɛɛ ɲɛn bələ ɓa, yɛ li kɔ́ pɛlɛi Amɔn nuą diɛ, Yai-Laa ə gɔ́ nɛ̨ɛ̨ mą. 33 Ɉɛfte yee ə tɛɛ diɛ kpɔ kɛnɛ̨, ə taa pow hveelɛ hon, Aroɛrə taa da Minitə taa di lɔwai, da Avɛlə-Keramimə, Amɔn nuą di lɛɛ kɛa Israɛlə nuą yee mu. 34 Ɓɛlɔwai Ɉɛfte ə bulu pənə la yɛ pa bɔ taai Mispa, non nɛ̨ɛ̨nu ɓə kulɔ yɛ pa naakwiɛn ɉii, yɛ mąną kaa, yɛ hvɛli kɛ. Ɉɛfte non nɔ ka tii kɛ tanɔ̨n gbən. 35 Ɓɛlɔwai Ɉɛfte ə non gaa la yɛ pa naakwiɛn ɉii, Ɉɛfte lii ə kələn gwəi, ə mąą həɠə hu ɓɛla, ə tomą kpɔ kɛnɛ̨, yɛ mą: «Ee nón! Yáá kpalo ɓɛla mą́ą́, yáá kɛ a nwɔ́ lii too pulu mɛ̨nį nwun; ŋą́ nwóó kwɛlɛ Yai-Laa ɓa, vá pɛli nwóó tii kalai.» 36 Ɉɛfte lon yɛ mą: «Akɛ yáá ə́ woo kwɛlɛ Yai-Laa ɓa, bələi ə́ mo la, ə́ woo kwɛlɛi lɔwai, bɔ mɛ̨nį kɛ. Mąąhɔlɔɓo, Yai-Laa aa hvaa mą ə́ yowoɠaai a Amɔn nuą, yáá ə́ nwąną kulɔ diɛ. 37 Kɛlaa, ə mą kɛ tii, ɲąnin veelɛ tɛɛ bɔ́, kwa mɛ́laa, kwə li, ɲeeɠaa ton na, ku nwɔ́ nɛ̨ɛ̨gbɛla laa mąą wɔlɔ ɓo. Mąąhɔlɔɓo, və́ hilɔnu mɛ̨nį kɛ li gɛ́ haa.» 38 Ɉɛfte ə hvaa mą, ə ɲąnin veelɛ tɛɛ non nɛ̨ɛ̨nu pɔ. Da mɛlaa nɛ̨ąą də li, diɛ nwɔ nɛ̨ɛ̨gbala mąą wɔlɔ ɓo, diɛ di woolaa. Mąąhɔlɔɓo, hvo hee hulɔnu nwuɔ̨, yɛ haa. 39 Ɲąnin veelɛi tii tɛɛ pulu, ə pa nąn bɔ, bələi tii nąn ə mo la, ə gɛ tii. Nɛ̨ɛ̨non tii ə haa, hvo hulɔnu mɛ̨nį hu kɔ́lɔn. Ə həɠə kɛa ɲələ ɓa, yili ə kɛ kɛa a Israɛlə nuą huwu la mɛ̨nį ta, diɛ ɉɛli pu. 40 Kwɛlan nwoo kwɛlan, Israɛlə nɛ̨ą di kɛi Ɉɛfte Galaadə mun, lon nɛ̨ɛ̨nu nwɔ nɛ̨ɛ̨gbɛla laa mąą wɔlɔ ɓo hvóló pow nąąn ɲee mu. |