Nwun mąąɓo 10 - Yálá laawoo hɛɓɛ (dc)

Tola da Yairə

¹ Abimelɛkə haa pulu, Dodo lon Pua nwɔ lon Tola, yai kɛ a Isakarə mun, ə Israɛlə nwun mąąɓo, ə kɛ heeni Samirə daai Ɛfraimə yee ɓa.

² Ə Israɛlə ɲąąwooɓo kwɛlan bow hveelɛ kɔ́w haaɓa yee mu. Yili pulu, ə haa, di noo Samirə daai.

³ Tola həɠɛɛ laa pulu, Galaadə mun Yairə, ɓə hee Israɛlə nwun na, ə kwɛlan bow hveelɛ kɔ́w hveelɛ kɛ.

⁴ Yairə lonnii di kɛ pow haaɓa, gəlee hiɛ hɛn yɛ ɓo a hoohvaalənŋaa. Galaadə lɔi hu, taa pow haaɓa ɓə kɛ di yəi. Háá ɓa háá, Yairə laa kaa daaɠaai tii diɛ.

⁵ Yairə ə haa, di noo Kamɔn daai.

Amɔn nuą di kɔ́ pɛlɛ Israɛlə ɓa

⁶ Mɛ̨nįi kɛ ɲɔ̨nwɔ̨ɔ̨ Yai-Laa ɲɛ̨i ɓa, Israɛlə ə pənə nwɔ̨nɔ̨ ə ɲee lɔ ɉu ə gɛ. Ɉaliɠaai ŋɛ̨i da kɛ diɛ Baalə da Astarteɠaa, ə mą kɛ Aramə nuą di wɔ haliɠaa, ə mą kɛ Sidɔn nuą di wɔ haliɠaa, da Moabə nuą, ə mą kɛ Amɔn lonnii di wɔ haliɠaa, ə lɛɛ da Filisti nuą di wɛi, di kɛi kwɛli hvilɛn diɛ, di di pulu tɔɔ Yai-Laa ɓa.

⁷ Yai-Laa ə níiɲąnwąną diɛ, ə di kwɛlɛ Filisti nuą da Amɔn nuą diɛ.

⁸ Mąą kwɛlan tii hu, di Israɛlə lonnii laanɔ̨nwɔ̨ ɓo kpɔ a mɔlɔ. Kwɛlan bow kɔ́w mɛ̨ihaaɓa yee mu, di Israɛlə lonnii kiin giin, diɛ kɛ Ɉurdɛn yá pulu pələ, Galaadə lɔi hu, Amɔrə nuą pɔɔli.

⁹ Amɔn nuą di Ɉurdɛn yá teen, diɛ pa kɔ́ pɛlɛi Ɉuda nu huwu, Bɛnɉamɛn nu huwu, ə mą kɛ Ɛfraimə nu huwu diɛ. Israɛlə lonnii laa nɔ̨nwɔ̨ ə ɓo kpɔ a mɔlɔ.

¹⁰ Di nɛɛ mą di di woo tɛ Yai-Laa ɓa, diɛ mą: «Yai-Laa kpɔnmąą tɛɛ ku pɔ, kwaa nɛ̨nŋɛ̨n ɉəɠə yɛ́, mąąhɔlɔɓo, kwaa ku pulu tɔɔ yɛ́, yɛ́i ə́ kaa a ku wɔ Yálá, kuɔ ə́ lɛɛ, kuɔ kwɛli hvilɛn Baaləɠaa diɛ.»

¹¹ Yai-Laa ə di woo mu hon, yɛ diɛ: «Ɓɛlɔwai, Eziptə nuą, Amɔrə nuą, Amɔn nuą, Filisti nuą,

¹² Sidɔn nuą, Amalɛkə nuą, da Meun nuą di kɛi ka laanɔ̨nwɔ̨ ɓo la, ka ka woo tɛ mą́ą́, kaa ŋą́ ka mąąkpɔn mąąɓo; kɛlɛi ŋą́ ka kulɔ di yee mu-ee?

¹³ Kɛlaa, ə mą kɛ tii, ka ka pulu tɔɔ mą́ą́, kaa kwɛli hvilɛn haliɠaa diɛ. Yili ɓə gaa mą, və́ kɛa gɛi, və́ ka nwun mąąɓo nwɔ̨nɔ̨.

¹⁴ Yili ɓa, ɉaliɠaai tii ka ɉəɠə, ka di kɛ a ka wɔ yáláɠaai, ka mo diɛ. Diɛ ɓə mąąnɛ̨ɛ̨ di ka kulɔ kpaan ɉu.»

¹⁵ Israɛlə lonnii diɛ Yai-Laa ɓa: «Ku wɔ Yálá, kwaa nɛ̨ŋɛ̨n ɉəɠə yɛ́, pələi kpɔ a nɛ̨ɛ̨ la yɛ́, ku hon di, kɛlaa, ku nwun mąąɓo háákələi.»

¹⁶ Yili pulu, ɉaliɠaai kpɔ kɛ Israɛlə nuą yəi, di di yee kulɔ gəlee hu, di tínɛ̨n di kwɛli hvilɛn Yai-Laa ɓa. Mɛ̨nį ɲąąnwąnąąi tii kɛ naa di mɛ̨i, Yai-Laa hvo pɛli gili kulɔi ɉu.

¹⁷ Amɔn nuą di di ɲąąkpɔn, di Galaadə lɔi həɠə, Israɛlə nuą diɛn, di di ɲąąkpɔn Mispa.

¹⁸ Nąąlɔwai, nu huwuɠaai ŋɛ̨i kɛ di heɛ Galaadə, da di nwun nąmįną, di mo di kee ɓa diɛ mą: «Gbɛɛ ɓə pai kɔ́ pɛlɛi Amɔn nuą diɛ? Nui níi kaa pai kpələi ə yili kɛ, mąą nu ɓə pai kɛi a Galaadə nuą nwun nąmu.»