Nwun mąąɓo 1 - Yálá laawoo hɛɓɛ (dc)

Israɛlə nuą di hee Kanaan lɔi hu

¹ Ɉosue haa pulu, Israɛlə nuą di Yai-Laa mąąni kɛ, diɛ mą: «Ku lɔwai, bɛlɛ́ nɛlɛ ɓə pai tɔɔi ku tɔwɔ, kuɔ li pɛlɛi Kanaan nuą diɛ?»

² Yai-Laa yɛ diɛ: «Ɉuda yəi bɛlɛ́n nuą ɓə; ya ɓə ŋą́ą́ Kanaan nuą lɔ ɲee ɲą.»

³ Ɉuda yɛ niɛ Simeɔn ɓa: «'Pa gwə li nwɔ́ lɔi hu, gu kɔ́ pɛlɛ diɛ. Yili pulu, ɲą́ą́ gbɛli mąn, gwa yɛ́ gwa li ə́ wɔ lɔi hu.» Yili pulu, Ɉuda da Simeɔn də li.

⁴ Ɉuda ə li ə gɔ́ too, Yai-Laa ə Kanaan nuą da Perizi nuą lɔ ɲee ŋą. Di nu waa pow paa gɔ́ hu, Bɛzɛkə daai.

⁵ Di Adoni-Bɛzɛkə kaa Bɛzɛkə daai, di kɔ́ pɛlɛ ma, di yee ə tɛɛ Kanaan nuą diɛ, da Perizi nuą.

⁶ Adoni-Bɛzɛkə ə pu, kɛlaa, di hvilɛn bulu, di ɉon, di ɲee kpuɔɠaa da gɔwɔ kpuɔɠaa tee mą.

⁷ Adoni-Bɛzɛkə yɛ diɛ: «Tɔɔɓɛlaa pow mɛ̨ihveelɛ, diɛi kɛ daa di yee kpuɔ da di kɔ́wɔ kpuɔ tee diɛ, di kɛi kɔ̨nɔ̨n bɛnɛ̨ yɛɠɛ ɲə́i daɓali mu. Mɛ́nii ŋį́ gɛ a nuą, Yálá aa gwələ kulɔ mą́ą́.» Də li a Adoni-Bɛzɛkə Ɉerusalɛmə daai, nąą ɓə ə haa laa.

⁸ Ɉuda nuą di kɔ́ pɛlɛ Ɉerusalɛmə taa ɓa, di yee ə tɛɛ mą, di nuą kəlee paa a ɓɔwa, di nwɔ̨n bili daai.

⁹ Yili pulu, Ɉuda nu huwu di yɛɛ, di kɔ́ pɛlɛ Kanaan nuąi tii kɛ ɲee ɓa diɛ, diɛ ɓaa: ɉɛɠɛɛ pələ lɔi da nɛ̨ŋɛ̨ lɔi hu.

¹⁰ Yili pulu, Ɉuda ə li ə kɔ́ pɛlɛ Kanaan nuąi kɛ Hebrɔn diɛ, ɓɛi kɛ nąą laa ɓaa a: Kiriatə-Arba, di yee ə tɛɛ Sesai ɓa da Ahiman, ə mą kɛ Talmai diɛ.

¹¹ Ɉuda ə həɠə laa, ə li ə kɔ́ pɛlɛ Dəvirə nuą diɛ, ɓɛi kɛ naa ɓaa a: Kiriatə-Sefɛrə.

¹² Kalɛbə yɛ diɛ: Nui ɲee kaa pai tɛɛi Kiriatə-Sefɛrə ɓa, ə nąą nuą hon, ŋą́ nón nɛ̨ɛ̨nu Aksa tɛɛ bɔ a nɛ̨ą.

¹³ Otniɛlə Kalɛbə niɛ hulɔnu Kenazə lon mə gɛɛnáái tii hon a kɔ́, Kalɛbə ə non nɛ̨ɛ̨nu Aksa tɛɛ bɔ a nɛ̨ą.

¹⁴ Aksa ə lɛɛ kpɔlɔ pai, ə lɔ ɉilɛ hu, yɛ kɛ yili ɓa, ə tíi kɛ lɔi hvɛli nąn ma. Aksa ə həɠə nwɔ hoohvaalən mɛ̨i, ə hvilɛn, Kalɛbə yɛ mą: «Lə ɓə ə́ kaa bɔ?»

¹⁵ Aksa yɛ nąn ma: «Mɛ̨inɛ̨ɛ̨ kɛ mą́ą́, mąąhɔlɔɓo, nɔi ŋɛ̨i ə́ dɛɛ bɔ́ ɉɛɠɛɛ lɔi hu pələ, yá nwun gulɔi hvo ɉu. Yá nwun gulɔiɠaa tɛɛ bɔ́.» Kalɛbə ə nɛɛmą, ɲá kwɛlɛ lɔiɠaa kɛ ɲələi pələ, da yiiɠaai kɛ ɉɛɠɛɛ pələ, ə di tɛɛ bɔ.

¹⁶ Moisə mɔlɔ́, yai ɉuwu hu nuą ɓa kɛ a Keni nuą, di həɠə dow kpulu mu taa hu, da Ɉuda nu huwu, di li di hee Ɉuda nwɔ lɔi pun ɉu pələ, Aradə kwɛlɛ, ɉɛɠɛɛ pələ, di hee laa nɔi lonnii kwɛlɛ, diɛi kɛ a Amalɛkə nuą.

¹⁷ Ɉuda da niɛ Simeɔn, di tɛɛ diɛ li a di wɔ kɔ́ toɔ, di yee ə tɛɛ Kanaan nuą diɛ, diɛi kɛ heeni Sefatə. Di daai tii wolo kpɔ tɛ̨ɛ̨tɛ̨ɛ̨, di nąą laa hee a Hɔrma.

¹⁸ Yili pulu, Ɉuda ə Gaza da gwɛlɛ lɔiɠaa hon, Askelɔn da gwɛlɛ lɔi, ə mą kɛ Ɛkrɔn da gwɛlɛ lɔi.

¹⁹ Yai-Laa ə kɛ Ɉuda pɔ, Ɉuda ə ɲee ɓa lɔi hon, kɛlaa, di hvo pɛli nɛ̨ŋɛ̨ lɔi hu nuą kpɛi, mąąhɔlɔɓo, kwɛli wotoloɠaa di kɛ yiliɠaai yəi.

²⁰ Yɛ bələi Moisə ə di tí la, di Hebrɔn lɔi tɛɛ Kalɛbə pɔ, Kalɛbə ə Anakə lonnii haaɓai kpɛ laa.

²¹ Yii ɓaa Ɉebusə nuą ŋɛ̨i kɛ heeni Ɉerusalɛmə daai, Bɛnɉamɛn nu huwu hvo di kpɛ. Ɉebusə nuą di lɛɛ heeni Ɉerusalɛmə daai, da Bɛnɉamɛn nu huwu, da diɛni di kaa háákələi laa.

²² Ɉosɛfə yəi bɛlɛ́n nuą diɛ kpɛli, də li di kɔ́ pɛlɛ Betɛlə nuą diɛ, Yai-Laa ə kɛ di pɔ.

²³ Ɉosɛfə yəi bɛlɛ́n nuą, di nuą tɔɔ Betɛlə daai, nąą mąą kpɛɛi, Betɛlə laa ɓaa tɔlɔɔ kɛ a Luzə.

²⁴ Nɛ̨nɛ̨ɛ̨n naa kɛ nuąi tii di di tɔɔ, di nu ta kaa, aa həɠə taai pələ, diɛ mą: «Mįnɛ̨ pələ ɓə nu ya pɛli lɔi la daai? Nąą lɛ kuɔ, ku kaa pai mɛ̨inɛ̨ɛ̨ kɛi yɛ́.»

²⁵ Bələi nu a tɛɛ la ə lɔ daai, ə nɛ diɛ. Di daai tii hu nuą kəlee paa, kɛlaa, di nui tii lɛɛ a vulú, da ɲəi gwəlii nuą kəlee.

²⁶ Ɉulɔnui tii ə li Hɛtə lɔi hu, ə taa pu laa, ə naa hee a Luzə, naa lɔ li, ə mą kɛ háákələi.

²⁷ Manase nu huwu di hvo pɛli Bɛtə-Sean da gwɛlɛ lɔiɠaa hon ɉii, ə mą kɛ Taanakə da gwɛlɛ lɔiɠaa, ə mą kɛ Dɔrə da gwɛlɛ lɔiɠaa, ə pɛlɛ la Yivleamə da gwɛlɛ lɔiɠaa, ə mą kɛ Megido da gwɛlɛ lɔiɠaa; Kanaan nuą di lɛɛ lɔ heeni nɔi tii hu.

²⁸ Ə mą kɛ ɓɛlɔwai Israɛlə hu ə walawala la, hvo pɛli di kpɛi, kóló lɔ ɓə ə naa diɛ.

²⁹ Ɛfraimə nu huwu hvo pɛli Kanaan nuą kpɛi, diɛi kɛ heeni Gɛzɛrə. Yiliɠaai di lɛɛ heeni Ɛfraimə nu huwu lɔwai.

³⁰ Zabulɔn nu huwu di hvo pɛli Kanaan nuą kpɛi, diɛi kɛ heeni Kitrɔn da Nahalɔlə. Yiliɠaai di lɛɛ heeni Zabulɔn nu huwu lɔwai, Kóló lɔ bə́ di naa diɛ.

³¹ Asɛrə nu huwu di hvo pɛli Ako nuą, Sidɔn nuą, Alavə nuą, Akzivə nuą, Hɛlba nuą, Afikə nuą da Rehɔvə nuą kpɛi,

³² Asɛrə nu huwu di hee lɔ Kanaan nuą lɔwai.

³³ Nɛftali nu huwu di hvo pɛli Bɛtə-Sɛmɛsə da Bɛtə-Anatə nuą kpɛi, kɛlaa, daa hveelɛi tii hu nuą di kɛi kóló wala-walaaɠaa kɛ Nɛftali nu huwu yee mu.

³⁴ Amɔrə nuą di hee Dan nu huwu diɛ, di tɛ a diɛ ŋee ɓa pələ, di hvo hvaa mą, yiliɠaai di hvo yɛɛ nɛ̨ŋɛ̨ lɔiɠaa hu.

³⁵ Amɔrə nuą di kɛ bɔ di hee Harə-Hɛrɛsə, Ayalɔn da Saalvimə. Kɛlaa, Ɉosɛfə yəi bɛlɛ́n nuą yee ə tɛɛ diɛ lɔwai tawolo tɛɛ pulu, di gaho kóló laa Amɔrə nuą mɛ̨i.

³⁶ Amɔrə nuą di wɔ lɔi ɲɛn ə kɛi həɠə Edɔmə lɔi kwɛlɛ pələ, yɛ li voló həɠəi pələ, yɛ tɛ Ɲɔ̨n-gaalə Yee ɓa.