Nehemi 9 - Yálá laawoo hɛɓɛ (dc)

Nu kəlee ə hvaa ɉɔn ma

¹ Ɲąnįn tii nwɔ hvóló pow hveelɛ kɔ́w nąą ɲələ, Israɛlə nu huwu di mąąwɛli heeɓo, di muluun gbala pu di nwuɔ̨, di hin nɔ.

² Nuąi kɛ a Israɛlə nu huwu, di kulɔ nwɛ̨ąą lɔwai di tɔɔ a di tee, diɛ hvaa di kɛ nɛ̨ŋɛ̨nŋąą diɛ da di nąnni di wɔ túwɔ́ pələ ɲɔ̨n.

³ Di di muhəɠə, di lɛɛ tɔɔni, di Yai-Laa di wɔ Yálái nwɔ tɔ́n ɉɛɓɛ́i hu woo ɓo diɛ, ə həɠə yələwala pɔ, ə həli la nįŋɛ̨ lon bɛlɛi lɔwai ɓa. Ə həɠə nɔwai tii ɓa, ə həli la hvóló tɛɛ nwun ma ɓa, di pɛlɛɛ Yai-Laa di wɔ Yálá lííla, diɛ hvaa di kɛ nɛ̨ŋɛ̨n ma.

⁴ Yesua, Bani, Kadmiɛlə, Sevania, Buni, Serevia, Bani, da Kenani, di tɛ, di tɔɔ Levi lonnii di wɔ gbatalai ŋą, di tomą Yai-Laa di wɔ Yálá pɔ.

⁵ Yili pulu, Levi lonnii, Yesua, Kadmiɛlə, Bani, Hasavneya, Serevia, Hodiya, Sevania, da Petahia, diɛ nuą diɛ: «Ka ka waa, ka Yai-Laa ka wɔ Yálá mąątɛ̨nɛ̨, yələ kəlee da nwɔɔ. «Ka mąątɛ̨nɛ̨! Ka naa tɛ! Naa kɛnɛ̨i dɛɛ laa kəlee ɓa.

⁶ Yálá! Yɛ́ ɓə ə́ kaa a Yai-Laa yɛ́ tɔ̨nɔ̨! Yɛ́ ɓə yələkɔlɔn bɛli da yələkɔlɔn mɛ̨i yələkɔlɔn, da di wɔ kɔlaɠaɠaa kəlee. Lɔi da di ɉu hɛnŋąą kəlee; gboloyá da ɉu hɛnŋąą kəlee, yɛ́ ɓə ya yɛnɛ̨ɛ̨ kpɛɛ hvo mą tɛɛ gəlee pɔ, ə lɛɛ, yələkɔlɔn ɉu, kɔlaɠai gaa laa, da pɛlɛ ə́ kɔ́wɔ mu.

⁷ Yɛ́ Yai-Laa, yɛ́ ɓə Abramə həɠə, ə́ gulɔ Urə Kalde lɔi hu, ə́ naa hee a Abrahamə.

⁸ Ə́ gaa yɛ́ Abrahamə lii kanąn ŋąąi yɛ́, ka yaa ka mįnɛ̨ həɠə, ə́ Kanaan nuą, Hɛtə nuą, Amɔrə nuą, Perizi nuą, Ɉebusə nuą, da Girgasə nuą, tɛɛ bɔ yaa tii bɔ, ə mą kɛ ɉuwu hu nuą. Ə́ kulɔ ə́ woo ɓa, mąąhɔlɔɓo, ə́ tələnmoɔi.

⁹ «Ə́ ku nąnni di wɔ laanɔ̨nwɔ̨ kaa Eziptə lɔi hu, ə́ di wɔlɔ woo mɛ̨n gboloyá kpɔlu kwɛlɛ.

¹⁰ Ə́ mɛ̨nį kpɛa kpɛaa da kpalo ɓɛla Eziptə tɔɔmun ma, da nwɔ ɲɛ̨itɔwɔ nuą kəlee. Mąąhɔlɔɓo, gbaɠala ə kɛ yɛ́, yɛ́ di kpɔɔ ŋąą kɛnɛ̨ pələ, di di mɔ̨nɔ̨ ɓo. Ə́ ə́ kpɔɔ laa tɛ, yɛ pələi gaa la, ə mą kɛ háákələi.

¹¹ Ə́ gboloyá ɓɛlaɓo ɉąą di tɔwɔ, di tɛɛ laa a di kɔ́wɔ mąą kpalaa. Nuąi kɛi di kpɛ, ə́ di pili ɲa kpon ɉu yɛ kwɛni kpuwulu.

¹² Ə́ kɛi di tənən dɔɔ hvóló ŋą a tulɔ kpinįn, yɛ́ di tənən dɔɔ kpinį hu a nwɔ̨n nən, bələi di kɛi hiɛ ɉu, ɉu pɔ̨nɔ̨ mɛ̨nį ɓa.

¹³ Ə́ lɛɛ yələkɔlɔn ɉu, ə́ pələ ɓo diɛ, ə́ yɛɛ Sinai yee nwuɔ̨. Ə́ tíɓo haŋąą tɛɛ di pɔ, da tɛ̨ą tɔ́nŋąą da di hiɛ pələ. Da yɛnɛ̨ɛ̨ kɛ pələ a nɛlɛɛ.

¹⁴ Ə́i wɔ hvįįtɔɔ yələ mąąhəɠɛɛ lɛ diɛ, ə́ di hiɛ pələ lɛ diɛ da yɛnɛ̨ɛ̨ kɛ pələ, da ə́ wɔ tɔ́n. Ə́ wɔ kɛla Moisə pɔ pələ.

¹⁵ Ə́ pulu kulɔ diɛ, a yələi pələ kɔ̨nɔ̨n, ə́ kpələ wɛli kulɔ diɛ, a yai ə́ gulɔ kwɛni hu, ə́ mo diɛ, yɛ diɛ nɔi ə́ naakwɛlanmo diɛ, yɛ́ ə́ kwɛla la, di pa di hee ɉu.

¹⁶ «Kɛlaa, diɛ da ku nąnni, di gɛ a kpɔɔ ŋąą kɛnɛ̨, a nwun ɉuwalawala laa, di hvo di wəli tɔɔ ə́ wɔ tɔ́n nwooɠaa diɛ.

¹⁷ Di hvo gɛ di hvo di wəli tɔɔ, di hvo di kili lɛɛ gbalo mɛ̨nįɠaa ə́ gɛ diɛ ɉu, di di nwun ɉuwalawala, di di nwun dɛ ə́ pɔ, di naa di kwəi, diɛ kɛ di pənə də li di wɔ luwɔlaai hu. Kɛlaa, ə́ wɛi, nu mąą hvaalɛɛ Yálá ɓaa yɛ́, ə́ wɔ mɛ̨nį lɛlɛɛi, yɛ́ nu mąąwɛli kaa, hva ə́ líiholi ɉa. Ə́ kulaa ə́ woo ɓa, hvo ə́ yee kulɔ di mu.

¹⁸ Ə mą kɛ ɓɛlɔwai di nįŋɛ̨ lon bɛli la a hɛni, diɛ kɛ diɛ: ‹Ə́ wɔ Yálá ka, ya ɓə ə́ kulɔ Eziptə lɔi hu.› Di di hɔn gɛ mɛ̨nį kpɛa kpɛa hu.

¹⁹ Kɛlaa, ə́ wɔ wɛlikɛmąą hu, hvo di lɛɛ laa nɔi pun ɉu, dulɔ kpinįn və həɠə di mɛ̨i hvóló ŋą, ə́ di tənən dɔɔ bələ mɛ̨i, ə mą kɛ nwɔ̨n nən, kwii hąą yɛ di tɛɛ pələ hupono.

²⁰ Ə́ kili lɛlɛɛ tɛɛ di pɔ, diɛ pɛli mɛ̨nį kulɔ ɉu kɛi, hvo manə kulɔ di la, ə́ ya tɛɛ di pɔ diɛ gbələ.

²¹ Kwɛlan bow nąąn ɲee mu, ə́ di kɔ̨nɔ̨n gɛ. Kɛi di mo nɔi pun ɉu, hɛn da mąą kpaan və kɛ diɛ, di mąąhəɠəɠaa di hvo haɠa, di kɔ́wɔɠaa di hvo hvɛɛ.

²² Ə́ lɔiɠaa tɛɛ di pɔ, da nu huwuɠaa, ə́ di ɲąąkwɛlɛ di lɔwai, a di hee lɔiɠaa. Di hee Sihɔn, Hɛsbɔn tɔɔmun nwɔ lɔi hu, da Ogə yai kɛ a Basan tɔɔmun nwɔ lɔi.

²³ Ə́ lɔiɠaa tɛɛ di pɔ, yɛ́ yələkɔlɔn ɉu pɛmɛ̨lɛ̨n gɔwɠaa, nɔi ə́ kɛ di nąnni diɛ də li di hee ɉu, də li di hee mąą lɔi hu.

²⁴ Di lonnii di lɔ laa, di ɉɔlɔɓo a di wɔɔ, ə́ nɔi hu nuą lɔ di mu, diɛ ɓaa Kanaan nuą, ə́ di too di yee kɔ́nma, da di wɔ tɔɔɓɛlaai, da nu kanŋaa, diɛ di hon a di liiɓa.

²⁵ Di walawalaaɠaa hon, da lɔi lɛlɛɛɠaa, di pɛlɛ́ɠaa hɔlɔɓo a di wɔɔ, di laahvɛɛ a hɛn gɔw huwu lɔpee. Ya-lɔwa da viɲə yɛaɠaa. Olivə yeaɠaa, da ɓá wulu kpulu tamąą. Di di laa mįi, di koo haɠa ə laa di ŋą. Di wɔ yɛnɛ̨ɛ̨ kɛ di ɲąąnɛ̨ɛ̨ hu, ə́ wɔ mɛ̨nį lɛlɛ pələ ɓa.

²⁶ «Kɛlaa, di pɛlɛ yɛ́ a kɔ́, di di pulu tɔɔ yɛ́, di ə́ wɔ tɔ́n nwooi pili di pulu, pələ kwɛa la. Ə́ loloɓo nuąi kɛi di mąąnɛ̨ɛ̨, diɛ kɛ di pənə di pa ə́ pɔ, di yiliɠaai paa, ə lɛɛ, di di hɔn gɛ a yɛ́ mɛ̨nį kpɛa kpɛa hu.

²⁷ Yili ɓə gɛ, 'di too di yowo yee kɔ́nma, a di mɔ̨nɔ̨ laa di mɛ̨i, da kɛ tii mɔ̨nɔ̨ hu, di kɛi tomą ə́ pɔ pələ, ə lɛɛ, yɛ́ lɛɛ yələi pələ, yɛ́ di woo mɛ̨n. Ə lɛɛ, ə́ wɔ ɲɛ̨imąąwɛli kaa hu ə́ kɛi di nwun mąąɓo nuą tɛɛ di pɔ, yiliɠaai diɛ di kulɔ di yowoɠaa yəi.

²⁸ Kɛlaa, da liilaa hɔlɔɓo lɔ kɛ, diɛ pənə diɛ túwɔ́ pələ ɲɔ̨n gulɔ a yɛ́. Ə lɛɛ, yɛ di lɛɛ di yowoɠaa yee kɔ́nma, yiliɠaai diɛ hee di mɛ̨i. Diɛ nwɔ̨nɔ̨ tomą ə́ pɔ pələ, ə lɛɛ, yáán yɛ́ lɛɛ yələi pələ, yɛ́ di woo mɛ̨n, yɛ́ di kulɔ mɛ̨nįi gee mɛ̨i tamąą, ə́ wɔ ŋɛ̨i mąąwɛli kaa hu.

²⁹ Ə́ di liɛwoo kɛ, yɛ́ di pənə di pa ə́ wɔ tɔ́n ma. Kɛlaa, di di kpɔɔ kɛ a huɲąŋą kɛnɛ̨ nuą, di hvo di wəli tɔɔ ə́ wɔ tɔ́n ma. Di nɛ̨ŋɛ̨n ɉəɠə ə́ wɔ liɛwooi ɓa, liɛwoo yii a yɛnɛ̨ɛ̨ kpɛɛ hvo mą tɛɛ ɉon nuą pɔ. Di di kwɛli tee, diɛ ɓowon dɛ diɛ, di di kpowo pulu walawala, di hvo gɛ di ɉon.

³⁰ «Kwɛlan damąą yee mu, ə́ mɔ̨nɔ̨ mįi di mu, ə́ kɛi di təli ə́ pɔ pələ, ə́ wɔ Kilii haalai yai kɛ ə́ wɔ loloɓo nuą hu. Kɛlaa, di hvo gə di hvo di wəli tɔɔ ə́ woo ɓa. Yili ɓə gə, yɛ́ di kwɛlɛ lɔi takpɛliɠaa diɛ.

³¹ Kɛlaa, ə́ wɔ wɛlikɛmąąlaa kɛnɛ̨ɛ mąą mɛ̨nį ɓa, hvo kɛ ə́ kili kulɔ li di hu, hvo kɛ di nwun na pili li; mąąhɔlɔɓo, ə́ kaa a wɛlikɛmąą Yálá, yɛ́ nu ɲɛ̨imąąwɛli kaa.

³² «Yii hu kɛa, ku wɔ Yálá, yɛ́i ə́ kaa a Yálá kɛnɛ̨ɛ, vaŋą kɛnɛ̨ɛ, mąą ɲɔwɔ, mįnɛ̨i ka ɉəɠə ya bɔ mɛ̨nį kɛ da ə́ woo; mɔ̨nɔ̨i ŋɛ̨i aa laa ku wɔ, hvo gaa a mɛ̨nį hviikpɛɛ. Kuɔ-o, ku wɔ tɔɔɓɛlaai, ku ŋąąwoo ɓo nuą, ku wɔ haláá laa həli nuą, da ə́ wɔ loloɓo nuąi, da ku ną́nni, ə mą kɛ nɔi lonnii kəlee, ə həɠə Asiri tɔɔɓɛlaa di wɔ hvólói ɓa, ə həli la háákələi ɓa.

³³ Ə́ wɛi, mɛ̨nįɠaa kpɔ həli ku wɔ, ə́ tələnmoɔ ɉu, hvo gaai, ə́ ə́ wɔ tɛ̨ą lɛ ku wɔ. Kɛlaa, ku wɔ ɓə túwɔ́ a nwąnąlɔ pələ.

³⁴ Kuɔ tɔɔɓɛlaa, ku ŋąąwoo ɓo nuą, ku wɔ haláá laa həli nuą, da ku ną́nni, di hvo ə́ wɔ tɔ́n bɔ túwɔ́ ɓo li, di hvo di kili lɛɛ li ə́ wɔ tíɓoɠaai hu, da ə́ liɛwooɠaai ə́ kɛi gɛ diɛ.

³⁵ Ɓɛlɔwai di kɛi di wɔ tɔɔlaa kɛ la, di ɓo nwun na nɛ̨ɛ̨ kɛnɛ̨ɛ ə́ dɛɛ di pɔ ɉu, nɔi kɛnɛ̨ɛ yii kɔ̨nɔ̨n a lɛlɛ ɉu, yii ə́ naa di lííla, di hvo gɛ di hvo di yee kulɔ di kɛ mɛ̨nį ɲɔ̨nŋąą hu, di hvo tii yɛ́.

³⁶ Háákələi, ku wɔ ka a luwɔɠaa, nɔi ŋɛ̨i ə́ dɛɛ ku ną́nni pɔ, yɛ́ kɛ di ɉu hɛn gɔw, da ɉu kɔ̨nɔ̨n mįi, ku wɔi a di lonnii, kwaa kɛ ɉu a luwɔɠaa.

³⁷ Ku kɛ nɛ̨ŋɛ̨nŋąą mąą mɛ̨nį ɓa, nɔi hɛn gɔw kpɛa kpɛaa daa lɛɛ a dɔɔɓɛlaai ə́ ku lɔ di yee mu di wɔɔ. Daa hee ku wɔ kpinįi ku mɛ̨i, da ku yəi taatɛlɛɛɠaa, ə lɛɛ, ku ɓo la laanɔ̨nwɔ̨ kɛnɛ̨ɛ hu.»