Nehemi 8 - Yálá laawoo hɛɓɛ (dc)

Ɛsdrasə ə dɔ́n ɉɛɓɛ́ kalan gbɔn gəlee ɲɛ̨i ɓa

¹ Nɔi lonnii kəlee di di ŋąąkpɔn nɔ yɛ nu tɔ̨nɔ̨, di pa a Moisə nwɔ tɔ́n ɉɛɓɛ́i, yaai tii Yai-Laa ə naa Israɛlə lonnii nwuɔ̨.

² Ɉaláá laa həli mun Ɛsdrasə ə pa a dɔ́n ɉɛɓɛ́ nu kpɔn gəlee ɲɛ̨i ɓa; hinąą mąn, nɛ̨ąą mąn, ə mą kɛ nui lɔpee a mɛ̨nį hukpɛ, di kəlee di kɛ laa, ɲąnįn mɛ̨ihveelɛ naa nwɔ dɔlɔɔ tɔlɔɔ li kɛ.

³ Ə ɉɛɓɛ́ hu woo ɓo gwəli hąą, ɲai pələ nwun na, ə həɠə yələwala pɔ ɓa, ə lɛɛ la ɉu hvóló ə haŋą. Ɉinąą mąn, nɛ̨ąą mąn, da nuąi da mɛ̨nį hukpɛ di ɲɛ̨i ɓa. Nɔi lonnii kəlee wəli tɔɔi kɛ ɉɛɓɛ́ hu woo ɓa.

⁴ Ɉɛɓɛ́ kɛ mun Ɛsdrasə ə kɛ tɔɔni wulu ɓɛla gbatala ta mɛ̨i, yii di bɛli lɔ mɛ̨nįi tii mąą mɛ̨nį ɓa. Ɛlɛɛ, Matitia, Sɛma, Anaya, Uriya, Hilkiya, da Maaseya di kɛ tɔɔni gwɛlɛ mamįiyee hu pələ. Ɛlɛɛ, Pedaya, Misaɛlə, Malkiya, Hasumə, Hasbadana, Ɉekaria, da Mesulamə, di kɛ tɔɔni gɛɓɛyee hu pələ.

⁵ Ɛsdrasə ə ɉɛɓɛ́ laa ɓo nɔi lonnii kəlee ɲɛ̨i ɓa, nwun laŋin ŋąąi kɛ nu kəlee nwun mɛ̨i. Ɉɛɓɛ́ laa ɓoi ə mo, nu kəlee di haŋą di tɔɔ.

⁶ Ɛsdrasə ə Yálá mąątɛ̨nɛ̨, yaai gaa a Yálá kɛnɛ̨. Nɔi lonnii kəlee di mu hon, di di yee tɛ yələ, diɛ mą: «Yálá ə kɛti! Yálá ə kɛti!» Yili pulu, di di nwun vilɛn, di pɛlɛ Yai-Laa lííla, tɔwɔla hvilɛn ŋąą nɔi ɓa.

⁷ Yesua, Bani, Serevia, Yamin, Akuvə, Sabtai, Hodiya, Maaseya, Kelita, Azaria, Yozavadə, Hanan, da Pelaya, di kɛ a Levi huwuhu nuą; di kɛ dɔ́n nwoo hukulaa lɛ nuą diɛ, ɛlɛɛ, nuą di kɛ tɔɔni gwəli hąą.

⁸ Di kɛi Yálá nwɔ tɔ́n ɉɛɓɛ́i ɓo a ɉu pɔ̨nɔ̨ɔ̨, diɛ mukulaa lɛ, mɛ̨nįi di kɛi mo, nuą diɛ ɉukulaa kaa.

⁹ Ya ɓə Nehemi ŋɛ̨i kɛ a gbahanama da Ɛsdrasə ɉaláá laa həli mun yai lɔ kɛ a ɉɛɓɛ́ kɛ mun, da Levi huwuhu nuąi tii kɛi ɉɛɓɛ́ hukulɔ wooɠaa ɓo nuą diɛ, di kɛi kɛ nɔi lonnii kəlee diɛ: «Volói ŋɛ̨i kaa a Yai-Laa ka wɔ Yálá nwɔ hvóló. Mąą hvo nɛ̨ɛ̨li, ka hvo kɛ liihɛlɛn ɉu, kaa wɔlɔ. Mąąhɔlɔɓo, nuą kəlee di kɛi wɔlɔ, dɔ́n ɉɛɓɛ́ hu woo mąą mɛ̨nį ɓa.»

¹⁰ Ɛsdrasə yɛ diɛ: «Ka li, ka kɔ̨nɔ̨n nɛlɛɛɠaa mįi, ka lɔɔ nɛ̨ɛ̨ɠaa kpələ, ɛlɛɛ, nui hvo pɛli li hɛn da kɛ pələ pɛlii, ka mąą nuą tii kɔ́. Mąąhɔlɔɓo, volói ŋɛ̨i kaa a gu Ną́mu nwɔ hvóló mąąhəɠɛɛ, ka hvo kɛ liihɛlɛn ɉu, mąąhɔlɔɓo, Yai-Laa nwɔ kwəinɛ̨ɛ̨ ɓə gaa a guɔ huwalawala.»

¹¹ Levi huwuhu nuą di kɛi nuą kəlee ŋąąyɛɛ, di kɛ diɛ: «Ka ka laapilɛ! Mąąhɔlɔɓo, volói ŋɛ̨i kaa hvóló mąąhəɠɛɛ, mąą hvo nɛ̨ɛ̨li ka hvo kɛ liihɛlɛn ɉu.»

¹² Nɔi lonnii kəlee diɛ kɛa li di kɔ̨nɔ̨n mįi diɛ di kpələ. Nuą yiiɠaai hɛn da hvo kɛ di yəi, diɛ di kɔ́, di kəlee diɛ kwəinɛ̨ɛ̨ kɛnɛ̨ kulɔ. Mąąhɔlɔɓo, nwooɠaai di mo diɛ, daa kɛ ŋąą kaa.

Gələ hɛli pu mɛ̨nį

¹³ Hvóló hveelɛ tɛɛ pulu, bɛlɛ nąmįną kɛ nɔi, di kəlee, ɉaláá laa həli nuą da Levi huwuhu nuą, di di ŋąąkpɔn ɉɛɓɛ́ kɛ mun Ɛsdrasə pɔɔli, ə gɛ, di pɛli dɔ́n nwooɠaa hukpɛi kpɔ a nɛlɛɛ.

¹⁴ Di gaa, bɛ̨ɛ̨ dɔ́n ɉɛɓɛ́ hu diɛ kɛ: Yai-Laa ə mo Moisə ɓa, yɛ mą: «Mąą nɛ̨ɛ̨ Israɛlə nuą di kɛ kələɠaa mu, ɲąnįn mɛ̨ihveelɛ naa hɛli pu mɛ̨nį ɓa.

¹⁵ Ɛlɛɛ, mąąnɛ̨ɛ̨ kɛ di nuą kili pu ɉu, ə lɛɛ, di kwəi mɛ̨nį hukulɔ mun daa kəlee hu, ɛlɛɛ, da Ɉerusalɛmə daai. Nolo woo ka: ‹Ka tɛ ɲeeɠaa ɓa, ka pa a olivə laa, lɔwɔ olivə laaɠaa, gwala laaɠaa, da wulu laa huwiɛɠaa; ka kəleɠaa tɔɔ la, yɛ bələi bɛ̨ɛ̨ la›.»

¹⁶ Nu kəlee di kulɔ, də li di pa a kələ tɔɔ hɛnŋąą, nu kəlee ə pa a nwɛi ɲəi bɛlɛ́ laaləi da Yálá hee pɛlɛ́ kwɛlɛ kwəliɠaa hu, ə mą kɛ gwəli hąą tii kɛ ɲai pələ nwun na, da yii ŋɛ̨i kɛ Ɛfraimə nwɔ kpɔn dənən ma.

¹⁷ Nuą kəlee, diɛi kpɔ tii həɠə nuwɔ laa hu, di kələɠaa tɔɔ di lɔ mu. Ya pa, ə həɠə Nun lon Ɉosue nwɔ hvólói ɓa, ə həli la ɲələi tii ɓa, Israɛlə nu huwu di hvo ta kɛ da kɛ li tii. Ə kɛ a kwəinɛ̨ɛ̨ kɛnɛ̨.

¹⁸ Hvóló tɛitɛi kəlee yee mu, di kɛi Yálá nwɔ tɔ́n ɉɛɓɛ́i ɓo, ə həɠə voló dɔlɔɔ ɓa, ə həli la voló gbɛlamąą ɓa. Di ɉɛlii tii pu hvóló mɛ̨ihveelɛ yee mu. Voló mɛ̨ihaaɓa yələ, di ɉɛli laakulɔ ŋąąkpɔn gɛ.