Nehemi 6 - Yálá laawoo hɛɓɛ (dc)Nehemi ɲowoɠaa di di muhəɠə nwɔ̨nɔ̨ 1 Ɓɛlɔwai di mo la Sanbalatə ɓa da Toviya da Gɛsɛmə, yai kɛ a Arabə mun, da ku yowo takpɛliɠaa diɛ, diɛ kɛ diɛ; ŋą́ą́ ɉįi tɔɔ, ə lɛɛ, wolo hvo kɛa mą; və́ nii kɛ gbonŋąą too li. 2 Sanbalatə da Gɛsɛmə di wɛlɛɛ tɔɔ bɔ́ɔ́li, diɛ kɛ mą: ŋį́ li kwa diɛni ku ku kee kaa Kefirimə, Ono nɛ̨ŋɛ̨ lɔi hu, di kɛ bɔ di mɛ̨nį ɲɔ̨n gɛ laa a ɲą́ą́. 3 Ŋą́ nuą tɔɔ di pɔɔli gə́ diɛ: «Gólói gaa ɲə́i gɛnɛ̨i kpɔ kpąą, vá pɛli yɛɛi laa ka pɔ. Lə mɛ̨nį ɓa, ŋį́ goló lɛɛ laa, gɛ́ pa ka pɔɔli? Ŋą́ gɛ tii, akɛti goló tɔɔ mɛ̨nį hvo li?» 4 Di nwɛlɛɛ tɔɔ tii gee mɛ̨i nąąn bɔ́ɔ́li, ɲą́ą́ gbɛli gɛ́ nwoo ŋąąpənə kɛ lɔ tii. 5 Naa heei lɔɔli naa, mɛ̨nį tɔ̨nɔ̨i tii ɓa lɔ, Sanbalatə ə nwɔ wɛlɛɛɓomun tɔɔ bɔ́ɔ́li, hɛɓɛ́ yɛ ɓo ɲəi, naaɓoɔ. 6 Ɉɛɓɛ́i tii hu woo ka: «Di kaa moi nɔiɠaa hu, diɛ kɛ: Gasmu, gáá moi yɛ́, yɛ́ ka Ɉuifəɠaa ka káá bɔ ka ka muhəɠə a kɔ́, yili mąą mɛ̨nį ɓə gɛi, gɛ́ ɉįi tɔɔ la, ə gɛ, ə́ pa kɛ a di wɔ tɔɔmun, yɛ pələi di kaa moi la. 7 Diɛ yáá Yálá kwəi mɛ̨nį hukulɔ nuą hee Ɉerusalɛmə daai, diɛ kwəi mɛ̨nį hukulɔ mun, diɛ kɛ diɛ: ‹Tɔɔmun gaa kɛa Ɉuda lɔi hu.› Bələ lii hiɛ ka tii yiihutɔɔmun ma, yɛ bələi di kaa moi la. Pa kani yiihu, gu gu nwun dɔɔ.» 8 Ŋą́ nwɛlɛɛ pulu pənə, gɛ́ mą: «Mɛ̨niɠaai kpɔ ə́ mo, da lɔpee hvo ɓaa nɛlɛɛ, yɛ́ ka tii di kulɔi ə́ nwun ɉu yɛ́ mo.» 9 Mąąhɔlɔɓo, di kəlee di kɛi kɛ di ku mąąɲɔw, diɛ kɛ diɛ: «Di kaa pai di yee ɓoi goló ɓa, hva kɛa kɛ.» Yii hu, ɲéé huwalawala. 10 Ŋą́ li Mehetaveɛlə lon Delaya nwɔ lon Semaya ɲəi bɛlɛ́n, mąąhɔlɔɓo, gbaan mɛ̨nį ə kɛ mą, yɛ mą́ą́: «Gu gu kee kaa Yálá yəi bɛlɛ́n, Yálá hee pɛlɛ́ mu, gu bɛlɛ laa kpulu guɔ, mąąhɔlɔɓo, di kaa pai ə́ paa mɛ̨nį ɓa, kwii hąą ɓə di ka pai pai la ə́ paa mɛ̨nį ɓa.» 11 Gɛ́ mą: «Ɲą́ą́! Ɲɔ́nwɔ̨ma a moɔ pu? Nu ləi ɓaa ɲą́ą́ yaai, ŋį́ pɛli lɔi Yálá hee pɛlɛ́ mu, gɛ́ lɛɛ a vúlú? Və́ lɔi laa.» 12 Ŋą́ gɔlɔn gɛ́ diɛ, Yálá hvəi dɔɔ a mɛ̨nįi tii, mąąhɔlɔɓo, a kɛi mą́ą́ mɛ̨nį lɛɛ tii tɔwɔ yɛ mo, Sanbalatə da Toviya ɓə daa ɉala. 13 Di ɉala lə mɛ̨nį ɓa? Mą́ą́ɲɔw mɛ̨nį ɓə. Ə gɛ, ŋį́ gɛ yɛ bələi ə mo la mą́ą́, ɛlɛɛ, ŋį́ nɛ̨ŋɛ̨n ɉəɠə. Di náá kala nwun ɉɔlɔɓo, ɛlɛɛ, diɛ gáá a Yálá lalanmun. 14 «Námu Yálá, ə́ kiliŋąhiɛ Toviya da Sanbalatə diɛ, di túwɔ́ pələ mąą mɛ̨nį ɓa, da ə mą kɛ kwəi mɛ̨nį hukulɔ nɛ̨ɛ̨nu Noadia, da kwəi mɛ̨nį hukulɔ nuą yiiɠaai kɛ bɔ di mą́ą́ ɲɔw.» 15 Daa mąąkpɛ hįį tɔɔ ə kpɛɛ ɉu a Elulə ɲąnįn nwɔ hvóló pow hveelɛi kɔ́w lɔɔli yələ; hvóló pow lɔɔli kɔ́w hveelɛ yee mu. 16 Bələ mɛ̨n ku yowoɠaa kəlee di mo, nɔiɠaai kpɔ kɛ ku kwɛlɛ, gəlee di ɲɔw, ɛlɛɛ, di nwunmɛ̨ di kpɔɔ yəi. Di gbaɠala kaa, diɛ kɛ golói tii ə kɛ, mąąhɔlɔɓo, ku wɔ Yálái ɓə kɛ bɔ́. 17 Nąąlɔwai tii ɓə, Ɉuda kalanɉonŋąą di kɛi hɛɓɛ́ tɛɛ la kɛlɛ-kɛlɛ Toviya ɓa, ə lɛɛ, Toviya nwɛiɠaai diɛ həli diɛ. 18 Mąąhɔlɔɓo, da Ɉuifəɠaa tamąą daa kɛ nɛ̨ɛ̨laa mįnɛ̨ həɠə. Hvo gaai, ə kɛ a Ara lon Sekania mɔlɔ, ɛlɛɛ, non ɉulɔnu Yehohanan aa kɛ Bɛrɛkia lon Mesulamə lon nɛ̨ɛ̨nu həɠə a nɛ̨ą. 19 Di kɛi kpɔ mun hɔlɔɔ mąątɛ̨nɛ̨ ɲɛ̨́i ɓa, diɛ nwóóɠaa hukulɔ mą. Toviya ə kɛi hɛɓɛ́ɠaa tɛɛ diɛ, yɛ mą́ą́ɲɔw ɉu. |