Nehemi 4 - Yálá laawoo hɛɓɛ (dc)

¹ Sanbalatə, Toviya, Arabə nuą, Amɔn nuą, da Asdɔdə nuą, bələ mɛ̨n di mo, diɛ Ɉerusalɛmə mąąkpɛ hįį kaa pɛlii, goló yɛ tɛ tɔwɔ, ə lɛɛ nwoloɠaa yɛ kpulu, di lii ə holi kpɔ kɛnɛ̨.

² Di kəlee di woo ə laa mą, diɛ pa kɔ́ pɛlɛi Ɉerusalɛmə ɓa, ə gə, di mąą mɛ̨nį hukala.

³ Ku ku wɔ Yálái hvɛli nąąlɔwai, ə lɛɛ, ku nuą tɔɔ, diɛ nąą mąąkpɛ a hvóló da kpinį; diɛi tii di mąą mɛ̨nį ɓa.

⁴ Kɛlaa, Ɉuda ə kɛi kɛ diɛ: «Goló kɛ nuą yee hu kaa haai, muluun nwəleen ɉu a wiɛ; gu yee hvo pai lɔi ɉįi tɔɔ ɓa.»

⁵ Ku yowoɠaa diɛ kɛ diɛ, gɛɛ di kili hvo pu ɉu, ɛlɛɛ di hvo ku kaa, kwa tɛ di mɛ̨i, ku wɔ di paa, ɛlɛɛ, ku goló kpəla bələi.

Nehemi ə kwɛli hɛnŋąą lɔ goló kɛ nuą yee ŋą

⁶ Ɉuifəɠaai kɛ di kwɛlɛ, di kɛi pa diɛ mo ku wɔ gee mɛ̨i pow-lee-pow; diɛ kɛ ku wɔ, di kaa pai woloi guɔ, diɛ həɠə gu kwɛlɛ nąą kəlee.

⁷ Yili ɓə gɛ, gɛ́ kɛɛnąąɠaa kulɔ, ɉįi pulu pələ, nąąɠaa lonon, ŋį́ nɔi lonnii tɔɔ laa a kwəliɠaa laa, kɔ-kɔ ɓɔwaɠaa, da kpalaɠaa, da kilɛnŋąą di ɓo di yəi.

⁸ Di mąąkpɛɛi ŋį́ mo, ŋą muhəɠə, gɛ́ galanɉonŋąą, daa ɲąąwooɓo nuą da nuą kpɔ kɛ laa, gɛ diɛ: «'Ka hvo ɲɔw diɛ! 'Ka ka kiliŋąhiɛ kaa Hɛn-Gəlee-Namu kɛnɛ̨i, mąą ɲɔwɔ. Ka gɔ́ kɔ́ ka kaayɔwɔɠaa mąą mɛ̨nį ɓa, ka lonnii ka nɛ̨ąni da ka wɔ pɛlɛ́ɠaai mąą mɛ̨nį ɓa.»

⁹ Gaai ku yowoɠaa di mo, diɛ kɛ daa ku kilaa pɔ̨nɔ̨, ə lɛɛ, Yálá aa di kwəi kiliŋąhiɛ kala; ku kəlee ku pənə kwəli ɉįi tɔɔ koló ɓa, nu kəlee ə́ li gɛ koló ɓa.

¹⁰ Kɛlaa, ə həɠə mąą yələ ɓa, nwɔ́ koló kɛ nuąi bələ tɔ̨nɔ̨ ə kɛi koló, kilɛnŋąą, ɓɔwa kwɛaɠaa da kpalaɠaa di ɓo bələ tɔ̨nɔ̨ yəi. Bɛlɛ nąmįną tɔɔi kɛ Ɉuda nuą pulu.

¹¹ Nuąi kɛi ɉin tɔɔ koló kɛ, da nuąi kɛi ɉɛnŋąą tiɛ̨, di kɛi ɉɛnŋąą həɠə di yee tɔ̨nɔ̨ ŋą, gwɛli hɛnŋąą di ɓo di yee tɔ̨nɔ̨ ŋą.

¹² Nuąi kɛi ɉįi tɔɔ, kɔ́ kɔ́ bowa kpulɔn ŋąą kɛ di kəlee di ləŋəi, tulu hvɛɛ mun ə ɓo tɔɔni gwɛ́lɛ.

¹³ Gɛ́ galanɉonŋąą daa ɲąąwooɓo nuą, da nɔi lonnii takpɛliɠaa diɛ: «Goló kɛnɛ̨i, ŋąą kɛnɛ̨, ka gu taɠa-taɠa ɉįi mɛ̨i, gu mąą kwɛaa gu kee ɓa.

¹⁴ Ɓɛi lɔpee ka tulu woo mɛ̨n naa, ka ka ŋąąkpɔm gu kwɛlɛ, ka gu Yálái kaa pai tɔɔi gu pulu.»

¹⁵ Ku kɛi goló kɛ, kpalaɠaa di ɓo ku yee tɔ̨nɔ̨ ŋą, ə həɠə yələ ɓɔɔ ɓa, ə lɛɛ la ɉu pɛmɛ̨lɛ̨n gɔwɠaa di kulɔ.

¹⁶ Nąąlɔwai ɓə ŋį́ kɛ nwɔ̨nɔ̨ la nuą diɛ: Nu kəlee da wɔ koló kɛ mun, mąąnɛ̨ɛ̨ di yii Ɉerusalɛmə daa kwɛlɛ kpinįi, nuą diɛ daa mąąkpɛ, yələ a ɓo, nu kəlee ə li goló ɓa.

¹⁷ Nu ta hvo kɛi nwɔ həɠəi kulɔ gwaną, ɲą́ą́ mąn, gááyɔwɔɠaa mąn, nwɔ́ tii nuą mąn, ə mą kɛ daa mąąkpɛ nuą tii kɛ bɔ́i, nu kəlee nwɔ kwɛli hɛn ə kɛ mamįiyee ŋą.