Nehemi 3 - Yálá laawoo hɛɓɛ (dc)

Ɉuifəɠaa di pənə di Ɉerusalɛmə mąąkpɛ hįį tɔɔ

¹ Ɉaláá laa həli mun gɛnɛ̨ Ɛliasivə, ə muhəɠə da gaayɔwɔɠaa ɉaláá laa həli nuą, bɛlɛ́ laaləi ŋɛ̨i ɉįi ɓa, yɛ ɓo a mɛlaaɠaa lɔi, di naa gbon doo. Di lúwɔ́ too mą. Di gbon mɛlaɠaa hɛlɛn, di həli la nu nwundɔ̨nɔ̨ nwɔ taa mąąkpɛ pɛ́lɛ́i ɓa. Di lúwɔ́ too ɉįi ɓa, ə lɛɛ la ɉu, di həli la Hananeɛlə daa mąąkpɛ pɛlɛ́ ɓa.

² Gwɛlɛ pələ, Ɉeriko nuą diɛ di wɛi tɔɔ, nąą kwɛlɛ, Imri lon Ɉakurə yɛ nwɛi tɔɔ.

³ Ha-Senaa lonnii diɛ ɉɔ̨nwɔ̨lee pɛlɛ́ laaləi tɔɔ, diɛ lɔ ɓə bɛlɛ́ mɛ̨i kɛ, di gbonŋąą too, di gwɛliɠaa too na.

⁴ Hakɔsə lon Uriya, yili nwɔ lon Meremotə yɛ koló kɛ nąą kwɛlɛ; ɛlɛɛ, Mesezaveɛlə lon Bɛrɛkia yili nwɔ lon Mesulamə, yɛ koló kɛ nąą kwɛlɛ. Baana lon Sadɔkə yɛ koló kɛ nąą kwɛlɛ.

⁵ Tekoa nuą diɛ kpɛli, diɛ koló kɛ nąą kwɛlɛ, kɛlaa, di wɔ ɲɛ̨itɔwɔ nuą, di hvo gɛ di hvo di nwun nąmu woo hon.

⁶ Pasea lon Yoyada da Besodia lon Mesulamə, diɛ ɓə Yesana pɛlɛ laaləi tɔɔ; diɛ lɔ ɓə mɛ̨i kɛ, di gbonŋąą too, di gwɛli too na.

⁷ Di kwɛlɛ Melatia yai a Gabaɔn mun, ɛlɛɛ, Yadon Meronotə mun da Mispa nuąi kɛ Eufratə pulu pələ, diɛ koló kɛ Transəfratɛnə gbahanąmą heei kwɛlɛ pələ.

⁸ Harhaya yai kɛ a hɛni-pumun, non Uziɛlə yɛ koló kɛ nąą kwɛlɛ, ɛlɛɛ, yili kwɛlɛ, Hanania, yai kɛ a mąątí wulɔ pɛlimun. Di həɠə laa a ɓɛlowai di di yee laa kulɔ la Ɉerusalɛmə kolói ɓa ɉįi ɲąą kɛnɛ̨i.

⁹ Di kwɛlɛ, Hurə lon Refaya, ɓə kɛi koló kɛ laa, yaai kɛ a Ɉerusalɛmə taa bələ tɔ̨nɔ̨ nwun nąmu.

¹⁰ Di kwɛlɛ; Harumafə lon Yedaya ɓə naa tɔɔ, nwɔ pɛ́lɛ́i tənən ma; ə lɛɛ, yili naa kwɛlɛ Hasavneya lon Hatusə ɓə nąą koló kɛ.

¹¹ Malkiya Harimə lon, da Hasuvə Pahatə-Moabə lon di bələ tɔ̨nɔ̨ həɠə, di həli la nɛɠɛ kɛ pɛlɛ kɛɛnąą.

¹² Nąą kwɛlɛ, Salumə Ha-Lohɛsə lon, yii kɛi Ɉerusalɛmə bələ tɔ̨nɔ̨ ɲąąwooɓo, da nonnii nɛ̨ąą ɓə naa tɔɔ.

¹³ Ɲee lɔwai lɔi nwɔ kpon, Hanun da Ɉanoa daai nuą ɓə naa tɔɔ. Di dɔɔ, di gbon doo, di kwɛliɠaa laa bulu di naa kpulu a gwɛliɠaa. Di yee laa mą waatɔnɔ hįį tɔɔ, di həli la dulun ŋą kpon ma.

¹⁴ Rekavə lon Malkiya, yai kɛ a Bɛtə-Kɛrɛmə kwəli ɲąąwooɓomun, ya ɓə duluŋa kpon gɛɛnąą tɔɔ, ə gbonŋąą too na, ə gwɛliɠaa laa bulu, ə naa kpulu a gwɛliɠaa.

¹⁵ Ɲa nwun gulɔi pələ, Kɔlə-Hoze lon Salumə ŋɛ̨i kɛ a Mispa nwun nąmu, ya ɓə nąą koló kɛ. Ə dɔɔ, ə mɛ̨i kɛ, ə gbonŋąą too, ə gwɛliɠaa laa bulu da naa kpulu kwɛliɠaa. Ə pənə ə daa mąąkpɛ hįį pɛli, ə həɠə ɲálɔwa kɛnɛ̨ ɓa, tɔɔmun nwɔ nɔw yɛai kwɛlɛ, ə həli la Davidə taa pələ ɓa.

¹⁶ Yili pulu, Azbukə lon Nehemia, yai kɛ a Bɛtə-Surə kwəli bələ tɔ̨nɔ̨ nwun nąmu ya ɓə nąą tɔɔ, ə həɠə Davidə nwɔ kámąɠaai tənən ma, ə həli la bowa yai ŋɛ̨i di naa kulɔ mą, ə lɛɛ ɉu ə həli gulááɠaa di wɔ pɛ́lɛ́i ɓa.

¹⁷ Naa pulu, Levi huwuhu nuą di kɛi koló kɛ, Bani lon Rehumə ə kɛ di pɔ, yili pulu, Hasavia, yai kɛ a Keila kwəli bələ tɔ̨nɔ̨ ɲąąwooɓomun, ə nwɔ kwəlii kwɛlɛ nwɛi tɔɔ.

¹⁸ Nąą pulu, di kaayɔwɔɠaa Henadadə lon Binui yai kɛ a Keila kwəli bələ tɔ̨nɔ̨ ɲąąwooɓomun, ya ɓə koló kɛ nąą kwɛlɛ.

¹⁹ Nąą kwɛlɛ, Yesua lon Ezɛrə, yai kɛ a Mispa taa nąmu, ya ɓə nąą tɔɔ, a ɉələ veelɛ naa; ə həɠə ɓɛi nu ya pɛlɛ laa ɲee ɓa, ə həli gɔ́ kɔ́ hɛnŋąą pu pɛlɛ ɓa, bɛlɛ́ nwąną hveelɛ yɛ gee kaa laa.

²⁰ Yili kwɛlɛ, Zabai lon Barukə ə koló kɛ laa, ə həɠə bɛlɛ́ nwąną hveelɛ kee kaai, ə həli la ɉaláá laa həli mun gɛnɛ̨ Ɛliasivə yəi bɛlɛ́ laaləi.

²¹ Nąą pulu, Hakɔsə lon Uriya nwɔ lon Meremotə ɓə naa tɔɔ a ɉələ veelɛ naa, ə həɠə ɉaláá laa həli mun gɛnɛ̨ Ɛliasivə yəi bɛlɛ́ laaləi, ə həli bɛlɛ́ laa kulɔi.

²² Yili pulu, ɉaláá laa həli nuąi həɠə Ɉerusalɛmə kwɛlɛ taɠaa hu, diɛ ɓə naa tɔɔ.

²³ Yili pulu, Bɛnɉamɛn ə mą kɛ Hasuvə di kolo ke di wo pɛ́lɛ́i tenen ma; yili pulu, Azaria Maaseya lon, Anania lon ɓə naa tɔɔ nwɔ pɛ́lɛ́i kwɛlɛ.

²⁴ Naa pulu, Henadadə lon Binui ɓə nąą tɔɔ a ɉələ veelɛnąą; ə həɠə Azaria nwɔ pɛ́lɛ́i ɓa, ə həli la bɛlɛ́ nwąną hveelɛi kee kaai ɉonwon ɉu.

²⁵ Yili pulu, Uzai lon Palalə ɓə koló kɛ bɛlɛ́ nwąną hveelɛi kee kaai tənən ma, da daa mąąkpɛ pɛ́lɛ́i tii dɔɔ tɔɔmun nwɔ pɛ́lɛ́i ɓa, dənən ma, gaho pɛlɛ gwəli hąą kwɛlɛ. Nąąpulu, Pareɔsə lon Pedaya.

²⁶ Goló kɛ nuą di kɛi yii Ofɛlə, ə həli la ɲa pɛlɛ laaləi tənən ma, ɓa-mįi-yee hu pələ, da daa mąąkpɛ pɛlɛ tənən ma.

²⁷ Nąą pulu, Tekoa nuą di ɉələ veelɛnąą kulɔ, ə həɠə daa mąąkpɛ pɛlɛ kɛnɛ̨ tənən ma, ə həli la Ofɛlə hįį ɓa.

²⁸ Ə həɠə ɉooɠaa di wɔ pɛlɛ laaləi ɓa ɲələi pələ, ɉaláá laa həli nuą kəlee di kɛi koló kɛ di wɔ pɛlɛ tənən ma.

²⁹ Nąą pulu, Imɛrə lon Sadɔkə ə koló kɛ nwɔ pɛ́lɛ́i tənən ma, nąą pulu, Sekania lon Semaya, yai kɛ voló həɠəi pələ bɛlɛ́ laaləi mąąkpɛ mun, ə koló kɛ nąą kwɛlɛ.

³⁰ Nąą pulu, Selemia lon Hanania, ə mą kɛ Salafə lon mɛ̨ida nąą yai kɛ a Hanun, di koló kɛ ɉələ veelɛnąą hu. Nąą pulu Bɛrɛkia lon Mesulamə ə koló kɛ nɔ pɛ́lɛ́i tənən ma.

³¹ Nąą pulu, Malkiya ɉɛni yɔw mun, ə koló kɛ ə həli la ɉaláá koló kɛ nuą da ɲɔwɠaa di wɔ pɛ́lɛ́i ɓa, Mifkadə kpon dənən ma, ə həli la bɛlɛ́ nwąną hveelɛi tii kee kaai, bɛlɛ kɛnɛ̨ ɓa.

³² Bɛlɛ́ nwąnąɠaa kee kaai, da mɛlaaɠaa. Kulɔ pɛlɛ laaləi, ɉɛni yɔw nuą da ɲɔw kɛ nuą ɓə naa tɔɔ.

Ɉuifəɠaa di yowoɠaa diɛ di kpəɲan goló tɔwɔ

³³ Bələ mɛ̨n Sanbalatə ə mo, yɛ ku kaa daa mąąkpɛ hįį tɔɔi, níí ə holi, níí ə kələn gbɔ gwəi kɛnɛ̨, ə naa pu Ɉuifəɠaa hu.

³⁴ Yɛ́ hvaa gaayɔwɔɠaa da Samari kɔ́kulááɠaa ɲɛ̨i ɓa, yɛ kɛ diɛ: «Lə ɓə Ɉuifəɠaa kaa gɛi nu kpɛli-kpɛliɠaai tii? Ka di lɛɛ laa mɔ̨ɔ̨ diɛ gɛ, di kaa mɔ̨ɔ̨ pai haláá kulɔi? Diɛ mɔ̨ɔ̨ di kpɛɛ la háákələi? Diɛ mɔ̨ɔ̨ di pənə di gwɛniɠaa pɛli, diɛ di kaa di kulɔi pɛlɛ kpoloonŋąą hu, diɛ ɓo a tiɠi?»

³⁵ Toviya yai kɛ a Amɔn mun, yaa kpɛli ə kɛ naa kwɛlɛ, yɛ diɛ: «Di dɔɔ lɔ, kɛlɛn a tɛ di wɔ taa mąąkpɛ hįį tii a kwɛni mɛ̨i, bu hiɛ li.»

³⁶ «Ku wɔ Yálá ə́ kaa mɛ̨n ɉii, daa tɛɠɛɓo ku hu, di wɔɔ lalan tii ə pənə ə yɛɛ a di nwun, ɛlɛɛ, di ɲɛ̨i ə paa lɔi ta hu, luwɔlaa hu.

³⁷ Hvo di wɔ nɛ̨ŋɛ̨n tii mąą hvaalɛɛ diɛ, di hɔn tii kili hvo kpɛɛ ə́ ŋą; mąąhɔlɔɓo, daa nɛ̨ŋɛ̨n ɉəɠə ɉįi tɔɔ nuą diɛ.»

³⁸ Ku daa mąąkpɛ hįį tɔɔ, ku gəlee pɛli, ə həli la ɉąąi, nɔi lonnii kəlee lii muhəɠɛɛ kɛ goló kɛi.