Nehemi 2 - Yálá laawoo hɛɓɛ (dc)Tɔɔmun yɛ Nehemi ə pənə ə li Ɉerusalɛmə 1 Tɔɔmun Artasɛrsɛsə nwɔ tɔɔlaa gwɛlan bow hveelɛ lɔwai, Nisan ɲąnin ɉu, tɔɔmun ə kɛ heeni daɓali ɓa, nɔɔ heɛ nííla, ŋį́ da pu ŋį́ dɛɛ bɔ. Volói tii, ɲį́nąą yiliɛi kɛ, ɲą́ą́n, və́ ta kɛ ɲį́nąą yili li ɲɛ̨i ɓa. 2 Nąąlɔwai, tɔɔmun yɛ mą́ą́: «Lə ɓə kɛ, yai ə́ ɲįnąą yiliɛi? Ɲɔ̨n mə yɛ́? Ə́ lii ŋą ɓə yaa nwąną?» Nąąlɔwai, ŋį́ ɲɔw kpɔ kɛnɛ̨. 3 Gɛ́ tɔɔmun ma: «Ə́ lamun yɛnɛ̨ɛ̨ Yálá ə kɛ! Lə mɛ̨nį ɓa, ɲį́nąą hva kɛ a ɲiliɛ! Daai ną́nni kámą kaa ɉu, aa lɛɛ a taa kpoloon, nwɔ̨n aa ɉįi kponŋąą kəlee kələn!» 4 Tɔɔmun yɛ mą́ą́: «Lə ɓə ə́ kaa bɔ?» Ɲąąɓa, ŋį́ yələkɔlɔn ɉu Yálá hvɛli. 5 Yili pulu, gɛ́ tɔɔmun ma: «Tɔɔmun a kɛ ya hvaa mą, ɛlɛɛ, akɛ yɛ́ tímun aa ə́ lii hon, dɔ́ɔ́ Ɉuda lɔi hu, daai tii ną́nni kámą ka ɉu, ŋį́ pənə ŋį́ nąą tɔɔ.» 6 Tɔɔmun nɛ̨ą ə kɛ heeni gwɛlɛ, tɔɔmun yɛ mą́ą́: «Hvóló yɛli ɓə ə́ kaa gɛi ɉiɛ hu? Ya pənə ə́ pa a lə yələ?» Ŋą́ kuu hee mą, guu ə níi hon, ə hvaa ní mɛ̨nį ɓa. 7 Gɛ́ nwɔ̨nɔ̨ tɔɔmun ma: «Tɔɔmun a hvaa mą, mąąnɛ̨ɛ̨, ə hɛɓɛ́ tɛɛ bɔ́, a Eufratə pulu pələ gbahanąmąɠaa di wɔ, ə gɛ, di pələ tɛɛ bɔ́ ə lɛɛ la ɉu ŋį́ həli Ɉuda lɔi hu. 8 Ɛlɛɛ, ə́ dɔ̨nɔ̨ kɛ a Asafə nwɔ, yaai gaa a tɔɔmun nwɔ lɔwɔɠaa ɲąąwooɓomun, ə gɛ, ə pɛli wulu tɛɛi bɔ́, daa mąąkɔ̨nwɔ̨ hįį gbonŋąą kulɔ mɛ̨nį ɓa, da daa mąąkɔ̨nwɔ̨ pɛ́lɛ́i tii Yálá hee pɛlɛ́ kwɛlɛ nwɛi; da bɛlɛi gáá pai lɔi mu nwɛiɠaa.» Tɔɔmun ə ɉɛɓɛ́ɠaa tii tɛɛ bɔ́, mąąhɔlɔɓo, nwɔ́ Yálái yee lɛlɛɛ ə kɛ mɛ̨́i. 9 Ŋą́ həli Eufratə pulu pələ lɔi ɲąąwooɓo nuą diɛ, ŋį́ tɔɔmun nwɔ hɛɓɛ́ɠaai tɛɛ di pɔ. Tɔɔmun ə yala nąmįną taɠaa hvilɛn bɔ́, da hoo nąmįną. 10 Nąąlɔwai Sanbalatə ŋɛ̨i kɛ a Horɔn mun, da Toviya, Amɔn mun, yii kɛ ɲee mu. Di bələi tii mɛ̨n, di kwəi hvo nɛ̨ɛ̨ kpɔ tiikpə, gili kɔ́lɔn di mo, diɛ kɛ nu ta aa pa, yɛ Israɛlə lonnii mąą mɛ̨nį lɛlɛɛ ɲɛ̨i kulɔ. Nehemi ə Ɉerusalɛmə hįį mąąkpɛ 11 Ŋą́ həli Ɉerusalɛmə daai, ŋį́ hvóló haaɓa kɛ laa. 12 Yili pulu, kwii hąą, ŋį́ muhəɠə kwa hinąą taɠaa, kɛlaa, mɛ̨nį nwɔ Yálá aa kɛ doo giliŋa ə gə, ŋį́ gɛ Ɉerusalɛmə mąą mɛ̨nį hu, hvo mo nu ta ɓa. Hoo takpɛli hvo kɛ bɔ́, hvo kɛ li yii tii ŋį́ kɛ mɛ̨i. 13 Ŋą́ kulɔ kwii hąą, a nɛ̨ŋɛ̨ lɔi hu kpon gɛɛnąą pələ, ŋį́ ɉon a gaalə yá nwun gulɔi pələ da dulun ŋą kpon gɛɛnąą pələ. Ŋą́ Ɉerusalɛmə hįį mąąkpɛ kpɔ a nɛlɛɛ. Buɔi kɛ nąą kəlee, ɛlɛɛ, nwɔ̨n aa kɛ gbonŋąą kələn. 14 Ŋą́ tɛɛ a ɲa nwun gulɔi kpon da tɔɔmun nwɔ powaya kɛɛnąą pələ, yili pulu, ɉooi ŋį́ kɛ mɛ̨i, dɛɛi hvo kɛa kɛɛ laa. 15 Ku moloon dɛ laa a kpinį, gɛ́ ɉįi mąąkpɛ kpɔ a kpinį. Yili pulu, ŋį́ pənə ŋį́ li a ɲee lɔwai kpon gɛɛnąą pələ, ŋį́ yali tii búlú ŋį́ pa bɛlɛ́ laaləi. 16 Mɛ̨nįi tii ŋį́ gɛ́, daa ɲąą woo ɓo nuą di hvo kɛ nwun gɔlɔn. Və́ nii kɛ mɛ̨nį ta ɓo li Ɉuifəɠaa diɛ, da ɉaláá laa həli nuą, ə mą kɛ galanɉonŋąą da daa ɲąą woo ɓo nuą, da nuą takpɛliɠaai kɛ golóɠaa nwun na. 17 Ya ɓə ŋį́ kɛ diɛ: «Mɛ̨nį ɲąąnwąnąąi gu ɉu, ka káá gaai! Ɉerusalɛmə taa aa pu, gbonŋąą kələn ŋąą, ka gu pənə, ka gu Ɉerusalɛmə mąąkpɛ hįį tɔɔ. Gu hvo kɛa kɛ a nwunmɛ̨ lɔwɔ.» 18 Bələi nwɔ́ Yálá yee lɛlɛɛ ə kɛ la mɛ̨́i, ŋį́ ɉukulɔ diɛ, da bələi tɔɔmun ə hvaa la bɔ́. Diɛ kɛa kɛ diɛ: «Ka gu gu muhəɠə, ka gu ɉį́i tɔɔ.» Di kpɔnmą́ą́ goló lɛlɛɛi tii hu. 19 Nąąlɔwai, Sanbalatə yai kɛ a Horɔn mun, da Toviya Amɔn mun yii kɛ ɲee mu, da Gɛsɛmə yii Arabə mun, bələ mɛ̨i di mo, di kɛi di woo həɠə ku wɔ, diɛ ku hviiɓo diɛ kɛ diɛ: «Lə ɓə ka káá gɛi? Kaa kɛ kulɔ tɔɔmun nwoo mu?» 20 Bələi ŋį́ di woo pulu pənə la, bələ ka, ŋį́ kɛ diɛ: «Yələkɔlɔn ɉu Yálá yaa kpinįi ɓə pai ku yee pɔɔ lɛlɛɛi, ku wɔi a nwɔ kɛlaɠaa. Ku kaa ku muhəɠəi ku dɔɔ. Kɛlaa, ka wɛi, ka wɔ hvo Ɉerusalɛmə mɛ̨nį hu, ka wɔ hɛn və laa, ə mą kɛ ka laa.» |