Nehemi 13 - Yálá laawoo hɛɓɛ (dc)

Nehemi kɛ koló gbɛlamąąɠaa

¹ Nąąlɔwai, di Moisə nwɔ hɛɓɛ́i ɓo nɔi lonnii kəlee lííla, di gaa ɉɛɓɛ́ hu diɛ mą: Amɔn nuą da Moabə nuą, mąą hvo nɛ̨ɛ̨li di hvo lɔ Yálá nwɔ nu kpului lɔwai.

² Mąąhɔlɔɓo, di hvo wɔlɔ kɛ Israɛlə lonnii laakwiɛn ni a kɔ̨nɔ̨n da ya; ə lɛɛ, Moabə ə wɔlɔ Balaamə hala, ə gɛ, ə Israɛlə nuą nɛ̨ŋɛ̨n naa, kɛlaa, Yálá ə nɛ̨ŋɛ̨n naa mąą pənə a lúwɔ́.

³ Dɔ́n ɉɛɓɛ́ hu woo mɛ̨n di mo, Israɛlə nuą lɔwai, nwɛ̨ąą kpɔ kɛ laa, da diɛni di di ɓɛlaɓo.

⁴ Gɛɛ kɛ yili hvo kɛ, ɉaláá laa həli mun Ɛliasivə ɓə di gɛ a ku wɔ Yálái nwɔ pɛlɛ́ɠaai mɛ̨i kaa mun. Ɛliasivə ə kɛ a Toviya nwɔ nu ta.

⁵ Di pɛlɛ kɛnɛ̨ ta tɛɛ bɔ, ɓɛi mąąnɛ̨ɛ̨ kɛ di gɔɓo hɛnŋaa, lansan, bɛlɛ́n ɉɛnɲąŋąɠaa, ɉɛn bow naa yii kulɔ a mɔ̨nun, lɔɔ nįnɛ̨ da wulɔ nįnɛ̨, yai kɛ a Levi huwuhu nuą di wɔ da nwələ too nuą, ə mą kɛ bɛlɛ́ laaləi nuą da ɉaláá laa həli nuą di wɛi; bɛlɛi tii ɓə di kɛi ɉɛnŋąą tii hee mu.

⁶ Volóɠaa tii yee mu, və́ kɛ Ɉerusalɛmə daai, Mąąhɔlɔɓo, tɔɔmun Artasɛrsɛsə, yai kɛ a Babilonə tɔɔmun, nwɔ tɔɔlaa gwɛlan bow haaɓa kɔ́w hveelɛ lɔwai, ŋį́ pənə ŋį́ li tɔɔmun bɔ. Kɛlaa, lɔwai tawolo tɛɛ pulu, ŋį́ hvįįtɔɔ hvɛli tɔɔmun ma,

⁷ ŋį́ pənə ŋį́ pa Ɉerusalɛmə daa, ə lɛɛ, mɛ̨nį ɲɔ̨n Ɛliasivə ə gɛ, Toviya mąą mɛ̨nį ɓa, ŋį́ gaa, gɛ́, ə ku wɔ Yálái nwɔ pɛ́lɛ́i ta həɠə ɉu, ə dɛɛ Toviya pɔ.

⁸ Yili ə níí holi kpɔ kɛnɛ̨, yili mąą mɛ̨nį ɓa, ŋį́ Toviya yəi hɛnŋąą kəlee kulɔ bɛlɛ́n, ŋį́ bili ɲɛ̨nɛɛ.

⁹ Yili pulu, ŋą mo, gɛ́ diɛ: «Ka Yálá nwɔ pɛlɛ́ɠaa mąąhəɠə, ŋį́ mo di pa a Yálá yəi bɛlɛ́n ɉɛnɲąŋąɠaa, gɔɓo hɛnŋąą da lansan.»

¹⁰ Di mo nwɔ̨nɔ̨ mą́ą́, diɛ: hɛn kɛ a Levi huwuhu nuą di wɔɔ, di hvo kɛi dɛɛ di pɔ, ə lɛɛ, nwələ too nuą kɛi koló kɛ, daa kɛ pu, nu kəlee aa li bɔ taai.

¹¹ Ŋą́ haŋą ɲɛ̨itɔwɔ nuą diɛ, gɛ́ diɛ: «Lə mɛ̨nį ɓa ka ka kili kulɔ Yálá nwɔ pɛ́lɛ́i hu?» Yili pulu, ŋį́ di kəlee di ɲąąkpɔn, ŋį́ nu kəlee hee gɛ koló nwun na.

¹² Nąąlɔwai ɓə kɛa, Ɉuda nuą di kɛi paa la a di wɔ mɔ̨nun ɉeen bow nąą da nɔɔ nįnɛ̨, ə mą kɛ, nwulɔ nįnɛ̨; diɛ pa diɛ ɉee ɓɛi mąąnɛ̨ɛ̨ di ɉee laa.

¹³ Ŋą́ mo gɛ́ diɛ, di ɉɛnŋąą tii tɛɛ ɉaláá laa həli mun Selemia pɔ, ə mɛ̨ikaa, da ɉɛɓɛ́ pɛɛ mun Sadɔkə, da Pedaya, yai kɛ a Levi ta, ə lɛɛ, Matania lon Ɉakurə, nwɔ lon Hanan, mąąhɔlɔɓo, nuą lɔwai ə kɛ a nu tələnmoɔ ta. Dɛi tii ɓə kɛ da ɉɛnŋąą ɲąąkwɛlɛ di kaayɔwɔɠaa diɛ.

¹⁴ Ŋą́ Yálá hvɛli gɛ́ mą: «Nwɔ́ Yálá, mɛ̨nįɠaa ŋɛ̨i ŋą́ gɛ, ə́ wɔ tələnmo la yii ŋį́ golói ŋɛ̨i kɛ, ə́ wɔ pɛ́lɛ́i mu, ə́ mąąwiɛ mɛ̨nį ɓa, ə́ kili lɛɛ ɉu.»

¹⁵ Nąąlɔwai tii hu, ŋį́ nuą kaa Ɉuda lɔi hu diɛ di wɔ viɲəɠaa ya kulɔ a túwɔ́ lɔwɔ yələ, daɠaa daa mɔ̨nun naa di wɔ hoohvaalənŋąąi pulu, da lɔɔ, viɲə ɓáɠaa, ɓɔ́ɔ́laa ɓa, tiɛ̨ huwui lɔpee gəlee, diɛ lɔ la Ɉerusalɛmə daai a túwɔ́ lɔwɔ yələ, volói tii ɓə, di kɛi di wɔ hɛnŋąą tii lɔwɔ too la, ŋį́ haŋą diɛ.

¹⁶ Yili pulu, Tirə nuąi kɛ heeni Ɉerusalɛmə daai, di kɛi pa a hɔ̨wɔ̨lee, da lɔwɔ tiɛ̨ huwui lɔpee gəlee diɛ nɔwɔtɔɔ Ɉuda nuą diɛ, a túwɔ́ lɔwɔ yələ.

¹⁷ Ŋą́ haŋą Ɉuda nɔi kalanɉonŋąą diɛ, gɛ́ diɛ: «Lə mɛ̨nį ɲɔ̨n mə ŋɛ̨i ka káá gɔwɔ tɔɔi ɓɛi, ka túwɔ́ lɔwɔ ɓɛlɛkpɛɛ maa?

¹⁸ Kɛlɛi bələ lɔ ɓə ka nąnni di kɛi túwɔ́ la-e! Yili ɓə gɛ, Yálá yɛ mɛ̨nį nwąnąą laa daai ŋɛ̨i ɓa, ə mą kɛ ka kuɔ. Ka kɛi túwɔ́ lɔwɔ ɓɛlɛkpɛɛ mą, ka kɛɛ Yálá nwɔ liiŋanwąną hu kɛnɛ̨i ka tii Israɛlə nuą diɛ.»

¹⁹ Túwɔ́ lɔwɔ mąą yii yələ wulii pɔ, gɛɛ hvitili hvo pu, gɛi di hvo Ɉerusalɛmə hį́i laa kpulu, di hvo naa ɓo, hvo kɛ li túwɔ́ lɔwɔ a kpɛɛ. Ŋą́ nwɔ́ koló kɛ nuą taɠaa tɔɔ ɉį́i la, ə gɛ, túwɔ́ lɔwɔ a ɉəli, nu ta hvo lɔ a tiɛ̨.

²⁰ Yɔw lɔpee gəlee kɛ nuą di kɛi lɛɛ ɉį́i pulu pələ, diɛ kpinį tɔ̨nɔ̨, awala kɛ tii kpinį hveelɛ kɛ.

²¹ Ŋą́ mo diɛ, gɛ́ diɛ: «Lə mɛ̨nį ɓa ka káá ɉį́i pulu pələ kaa yii laa? Ka pənə ka da kɛ, ŋį́ ka hon.» Ə həɠə volói tii ɓa, di hvo kɛa kɛi pa a túwɔ́ lɔwɔ yələ.

²² Yili pulu, ŋį́ mo Levi huwuhu nuą diɛ, gɛ́ diɛ, di di mąąhəɠə, ə gɛ, di pa, di di ɲɛ̨i kɛ Yálá nwɔ pɛ́lɛ́i laaləi, di túwɔ́ lɔwɔ mąąhəɠə. «Yili mąą mɛ̨nį ɓa, nwɔ́ Yálá, ə́ wɔ tələnmolaa hu, ə́ kili lɛɛ ɉú, ə́ ɲɛ̨́i mąąwɛli kaa.»

²³ Ɲələi tii ɓə nwɔ̨nɔ̨, ŋį́ Ɉuifəɠaa kaa la, diɛi Asdɔdə, Amɔn da Moabə nɛ̨ąą həɠə la a di nɛ̨ąni;

²⁴ Di lonnii bələ tɔ̨nɔ̨, Asdɔdə woo lɔ ɓə di kɛi mo, dɔ̨nɔ̨ kpɛli hvo kɛi Ɉuifə woo ɓo. Kɛlaa, hį́i takpɛliɠaa ɓə di kɛi di woo ɓo.

²⁵ Ŋą́ haŋą diɛ, ŋį́ di nɛ̨ŋɛ̨n naa, ŋį́ daɠaa kɛlɛ di lɔwai, ŋį́ di nwun nəɠa kulɔ. Yili pulu, ŋį́ mo diɛ, di di kwɛla a Yálá laa, gɛ́ diɛ: «Ka hvo ka lon nɛ̨ąą tɛɛ da lɔpee pɔ a nɛ̨ą, ka hvo di lon nɛ̨ɛ̨nu ta həɠə a ka lon nɛ̨ą, ə mą kɛ a kaa kpinįi ka wɔɔ.

²⁶ Kɛlɛi mɛ̨nį huwui ŋɛ̨i ɓə wɔlɔ gɛ, Israɛlə tɔɔmun Salomɔn yɛ nɛ̨ŋɛ̨n ɉəɠə-ee? Kaa kpinįi ka gaa, hį́i lɔpee gəlee lɔwai, tɔɔmun da nwɔ tɔɔlaa hvo həli Salomɔn nwɛi pɔ, nwɛli ə kɛ nwɔ Yálái ɓa, ə lɛɛ, Yálá ɓə ɉee Israɛlə nuą nwun na a tɔɔmun. Kɛlɛi yaa tii ɓə nwɛ̨ą nɛ̨ąą di ŋąą nɛnɛn, di nɔ nɛ̨ŋɛ̨n ɉu.

²⁷ Kaa kpɛli mąn, akɛti, mąąnɛ̨ɛ̨ kɛ ka nwoo kulɔ ŋą nɛ̨ŋɛ̨n tii ta həɠə, kaa nwɛ̨ą nɛ̨ąą həɠə a ka nɛ̨ąni?»

²⁸ Ɛliasivə ŋɛ̨i kɛ a ɉaláá laa həli mun gɛnɛ̨, non Yoyada lon ɉulɔnu ta, ə Sanbalatə Horɔn mun lon nɛ̨ɛ̨nu ta həɠə a nɛ̨ą, ŋį́ gbɛ, ə həɠə gwɛ́lɛ.

²⁹ Ŋą́ Yálá hvɛli gɛ́ mą: «Nwɔ́ Yálá, ə́ kili lɛɛ di hu, mąąhɔlɔɓo, daa ə́ wɔ haláái kɔ́hɔɓo, da mįnɛ̨i ka ɉəɠə ka Levi huwuhu nuą, ə́ wɔ haláái mąą mɛ̨nį ɓa.»

³⁰ Ŋą́ di mąąhəɠə, ŋį́ nwɛ̨ą kulɔ di lɔwai, ŋį́ pənə ŋį́ ɉaláá laa həli nuą da Levi huwuhu nuą hee di kɛ koló nwun na, nu kəlee da gɛ koló.

³¹ Gwɛi mąąnɛ̨ɛ̨ kɛ di paa la a mɛ̨inɛ̨ɛ̨, yɛ pələi guuɠaa heeɛ kɛ la, da ɉihɛnŋąą dɔlɔɔɠaa mąą mɛ̨n, ŋį́ yiliɠaa hee gban ɲa. Ŋą́ Yálá hvɛli, gɛ́ mą: «Ə́ kili lɛɛ ɉú mɛ̨nį lɛlɛɛ mąą mɛ̨nį ɓa.»